- مجيهل يابه كونك شاب وتعرف سوالف الشباب شلون اعرف خطيبي او زوجي يحبني وميكدر بدوني ؟
- ممم اوك اني اگلج هسه العلامات الاكيده اذا موجوده بالشاب اللي مرتبطه بي معناها يحبج ويموت عليج
اولا : ميحب يشوفج تبچين يتهستر ويمكن يتخبل ويصير عصبي عليج وتشوفي يتوتر حيل ويصير اعصاب هذا مو معناها انه هو ميحبچ توء هذا عقلج الجميل هيج يگولج هاي معناها انه هو يموووت عليج وميتحمل يشوف دموعج 🙂💜
ثانياً : من تتزاعلون يصير يصخرج ويحجي وياج ويسألج اشياء تافهه مو بعادته يطلبهن او يسأل عنهن ... مثلاً لو انتِ زوجته يجي يگلج تعاي حطي حزام بالبنطرون او تعاي طلعيلي ملابسي او تعاي مرغيلي رجليه 🌚
واذا جنتو مخطوبين مثلا رح يخابرج حته يسألج بيش الساعه هسه 😸 اي اي توقعي اسأله تفاهه عادي
طبعاً هنا عقلج الجميل رح يگلچ هذا مستهين بمشاعرج توء هاي يا عزيزتي معناها انه هو كلش ضايج لان انتِ زعلانه ويريد بس يسمع صوتج ويحسج قريبه ومينطيج فرصه تبتعدين عنه 🌚🚬
- ثالثاً : اذا جابلج شغله تحبيها كلساعه يسألج هااا حلوه ؟ عجبتج ؟ خو اني ذواق ؟ شفتي شلون ماكو مثل ذوقي ؟ يخبصج خبص بيها 😴
هنا عقلج اللطيف رح يگلج اهووو هذا والله لزگلي هسه عبالك مدري شجايبلي شنو شايفني شاف ما شاف وهيج متعجب جابلي جكليته 😏
توء يا غاليه هاي مو معناها انه هو يشوفج شاف ما شاف وانما يحب يشوفج فرحانه ويحس نفسه سوه انجاز لان سوالج او جابلج شغله تحبيها 😐
- رابعاً : يباوعلج هواي انتِ تاكلين وانتِ تمشين وانتِ تحجين وي شخص وانتِ تبدلين وانتِ تنظفين وووو 😴
هنا عقلج الكيوت رح يگلج هذا شبي بس يخوزر بيه شنو شايفني طفله وما اعرف اتصرف لو ما اعرف احجي لو مسويه مكسوره واني مادري بروحي وتبقين تاكلين بروحج 😧
توء عيناي هاي معناها هو يموت عليج ويحب يباوع لوجهج فرجاءً لتتوترين من نظراته وتفقدين ثقتج بنفسج وتنثولين وتتلطمين بالحيطان بالعكس خليج ريلاكس وكلما تجي عينج بعينه غمزيله 😉 ههههه جذب ميحتاج بس ابتسمي 😅
خامساً : يحب يشاقه وياج ويتدحج بيج ويلاشيج مرات حته تحسي يفشلج خاصه اذا موجود احد من اهلكم لو اقاربكم
هنا عقلج اللي بطعم الفراوله رح يگلج ولاااااا يحترمج ولا يعلي قدرج دوووومه مفشلج 😒
توء هذا معناه انه هو يموت عليج ويحب يلاطفج ويتقربلج على طول ويحس بمتعه بالشقه وياج ويرتاحلج حيل لان انتِ مو نفسيه 🙂
سادساً : دائما يحب يشكيلج همومه بالشغل او مشاكله وي اهله او اقاربه ويلتجئ الج اذا جان مكتئب او ضايج
هذا مو معناه انه هو يحب يولول فوگ راسج وانتِ مناقصج دوخه مثل ميگلج عقلج الحنوش 🌚
هذا معناه انه هو يشوفج انتِ صاحبة قلب طيب وابيض فيحتاج حنانج دائما وانه ماعنده احد غيرج يشكيله وانه هو يثق بيج هوااااي ويعتبرج صندوق اسراره 😐💜
سابعاً مادري سادساً تيهت ومالي خلگ ارجع لفوگ اراجع 😴👆 : يحب يگضي وياج وقت رومانسي ويحب قربج ويشتاقلج على طول 😶
هاي مو معناها انه هو لزگه وحيوان وانسان غرائزي كل همه غريزته وميحس بيج هاي الافكار الصهيونيه اللي يخلوها بعقلج صديقاتج الصهيونيات خليها على صفحه رجاءً 😏
هاي معناها انه هو يحب كلشي بيج ويحتاجج وانه انتِ أُنسه ومتنفسه وماعنده غيرج وميباوع لوحده غيرج ويعشق كل تفاصيلج فلتنفري منج بالصد والبرود حاولي تكسبي قدر الامكان 🙂♥
تره الحب مو دبدوب بعيد الحب ولا گلاده ذهب وكيكه بعيد ميلادج ولا بوس ومحاضن گدام الاوادم ... الحب احترام ، تقدير للمشاعر ، خوف ، اهتمام ، الحب لمن يسألج اكلتي لو بعدج ؟ ....جوعانه لو شبعانه ؟... لبسي لتبردين !... لبسي نعال من تريدين تشتغلين بالكهرباء .... عدلي حجابج وطولي ثوبج ولتلبسين ضيق ... من ادگ عليج بالموبايل لتتأخرين وجاوبي بسرعه ....صليتي لو بعدج ؟........ هذا هو الحب 🙂♥
والباقي مجرد شكليات كدام العالم وفخفخه وحب للمظاهر ابببد لتغريج وحده زوجها يتغزل بيها ع الفيس بوك لو الانستغرام يجيبلها هديه ويصورها وينشرها لو لازم ايدها ويمشي بالسوگ 😏
الحب اللي بيناتكم انتو هو اللي رح يقوي علاقتكم ويخليكم شخص واحد مو شخصين والحب كدام العالم رح ينهي علاقتكم الزوجيه ويخليها قضية رأي عام ... 🌚
كل الحب ♥
وشكراً 😂✋
