سلام ♥
شلونكم يحشاشه جوفي ؟ 😻
اقرو الموضوع مهم 👇
مو معناها انچ تعيشين بمجتمع ذكوري يعني واجب عليج تحجمين احلامج وطموحج .. وتجبرين نفسج على اشياء متعتبريها مفصله الج حته ترضين " النظره المجتمعيه " ...
بالعكس المفروض انتِ بالذات اللي موجوده بهيج مجتمع يقدس الرجل تثبتين انه انتِ موجوده حتى وان كنت ِ انثى رح تگدرين تاخذين دور الرجل ورح تكونين بنفس المكان اللي موجود بي بس ممكن تكونين انتِ اكثر ابداع وتأهيل ....ورغم كل الصعوبات والحواجز " الكونكريتيه " اللي بنوها كدامج اهلچ واقاربچ ومجتمعچ گدرتي توصلين للهدف والمكان اللي تحلمين تكونين بي
وباليوم اللي تحققين اللي جنتِ تتمني وتنجحين ثقي انه نفسه اللي جان واگف بوجهج ويگلج " عيب " رح يشوفج شي كبير ورح يخليلج الف حساب لان اثبتيله انه تفكيره مجرد تفكير رجعي متخلف وانه الهدف والحلم ماطول مو حرام معناها عمره مراح يكون عيب !
حاليا وبهذا زمانه الاغلب جاي يحاربن هذا الفكر هو فكر " المجتمع الذكوري " بس الاغلب يحاربو بطريقه غلط مثل انه توگف تتمرگص وتغني كدام شاشة الموبايل لو تنزع حجابها اذا جانت محجبه لو تلبس قصير وضيق لو تسترجل وتسوي روحها جبار براسنه وتتعارك وي هذا وذاك 🌚
وهنا عود هي ساوت نفسها وي الرجل وانطت -- طُز --- للموووووجتمع 🌚
احييج على غبائج أنسه تحيه حاره احر من شمس البصره حاليا 👏👏👏
اوك تريدين توصلين رساله انه انتِ موجوده انتِ قويه انتِ الج شخصيه انتِ حالج حال الرجال من حقج بس مو بهاي الطريقه المبتذله انتِ هيج جاي تهينين نفسج وتهينين انوثتج والله 🌚🚬
الاسلام اكثر دين انصف المرأه وصنع الها كيان وانطاها حريه اببد لتعتقدين اللي يفكر بي مجتمعنه هو الفكر اللي اجه بي الاسلام توء الاسلام انطاج حريه لكن بحدود بالمقابل انطه للرجل حريه لكن هم بحدود ماكو شي اسمه ( شله واعبر) بالاسلام ابويه ولا اكو شي اسمه ( المره ذيل رجلها ) ولا ولا ولا ولا 🙂✋
الاسلام قسم الحقوق والواجبات والحريات بالتساوي على الرجل وعلى المرأه بما يُكفل مكانة وشخصية وكرامة كل واحد بيهم بدون زياده ولا نقصان
والدليل بزمن الرسول ( ص) جان اكو دور كبير للمرأه بالحروب والغزوات وغيرها وغيرها واكو لحد الان بطلات يذكرهن التاريخ
بس الافكار المتوارثه والاعتقادات والجهل والرجعيه همه اللي ورثو عدنه التفرقه بين الرجل والمرأه ولحد الان الامهات العجايز اعتقد ينصحن بناتهن لترفعين صوتج كدام رجلج اذا صيح عليج سكتي اذا ضربج عادي تحملي لخاطر جهالج وسويله ، حطيله ، تمكيجيله 🙂 ، لبسيله ، خدمي ، عوزهن بس يكولن عبدي 🌚
واني سامع بيبتي متخلي واحد من عدنه احنه الشباب نشيل الصينيه من الگاع عود تقلل شأنه المفروض ناكل ونگوم وتصيح لوحده من البنات يشيلنها ...گتلها شنو السالفه بيبي شنو ما عدنه ايدين نشيل صينيه ونكوم ..تگول لاا بيبي قدرك وشانك عالي هنه يشيلنها ...!
هاي الافكار المشكله جاي تتوارث ومجاي يصيرلها حد ابببد بحيث صارت سنن عدنه بدل سنة الرسول ( ص ) ...
فبنات هذا الجيل اذا جنتو رافضين هذا الواقع اشتغلو عليه بس مو معناها تطولين لسانج على زوجج او اخوج او تشربين نرگيله بالكوفي 🙂
لااااا يابه مو هيج بس خلي الج شخصيه وكيان ولتسمحين لاي احد يقلل من احترامج كائن من يكون ...اذا جان ابوج او زوجج عصبي حاولي تكونين انتِ الجانب اللين ولتخلي يهينج بالعكس خلي بأخلاقج وشخصيتج يحترمج غصبا عليه
تره بكل الاحوال الرجل حتلو جان انگس خلق الله بس مستحيل يگدر يتجاوز على بنت محترمه بأخلاقها وتربيتها واسلوبها وان صارت وتجاوز عليج انتِ تجاوزي بهدوئج ورزانتج وتجاهلي وشوفي الله شلون رح يخذله ويخلي هو بكبره يجي يعتذر منج ...
حاولو كل البنات اللي واعيات وعاقلات تنصحن وترشدن البنات المراهقات وخاصه المتزوجات حته تگدرن تغيرن تفكير المجتمع ويصير الجن كيان وشخصيه وكلمه غصباً ع المجتمع نفسه ...سوالف العجايز خلص انسنها وابدن من جديد بصناعة فكر اكثر وعي
بدل متفتحون كتب كلها تحشيش وضحك وسوالف هاي فرصتجن حته تفتحن كتب توعيه وثقافه للجيل الجاي
اتمنى يكون كلامي واضح وفكرتي سلسله ومفهومه ..!
تحياتي ♥
وشكرا 😂✋
