سلام ♥
شلونكم غوالي ؟😻
اليوم رح احجيلكم عن 👇
القصص العراقيه ..
طبعا الموده هسه اغلب البنات يقرون قصص عراقيه واللي لازمه كلينستها وتبجي نص الليل واللي تحلم بالبطل مال القصه وتتمنه زوجها المستقبلي يكون نسخه منه .. واللي تنتظر الوقت دقيقه دقيقه حته ينزل البارت الجديد 🙂
ببدايتي هنا بالواتباد صار عندي فضول اشوف هاي القصص وخاصه انها على اساس من الواقع ..
بس حاليا اشوف اكبر خساره واحد يتابع هيج قصص ويگضي ساعات يقره بيهن لان للاسف كاتباتنه العزيزات صايرات يبدعن ويطلعن بالقصه بمشاهد خادشه ويتكلمن عن تفاصيل المفروض متنذكر اصلاً
بالنسبه الي اللي يكتب قصه باللهجه العراقيه ميعتبر كاتب اصلاً ..🌚👌
وادخل واشوف البنات ما شاء الله يم كل مقطع يحجي عن سالفه مو خوش التعليقات باالاف والكلام ميلبس عليه هدوم واكو بيهن اعرفهن اعمارهن متتجاوز ال 16 سنه زين انتِ شلون عرفتي هاي السوالف ومنين ؟ 🙂
زين من تكتبين تعليق خادش عبالج محد راح يشوفه واذا احد شافه مراح ياخذ عنج نظره مو تمام ...لااااا والحلوه اذا واحد دخل عليها خاص وذبله كلمتين مو زينه هي تبقه تصرخ زاااااااحف حقييييييير مييييستحي لعد غير شاف تعليقاتج ال+18 وگال هاي تفيد مفتحه باللبن 🌚
تره احلى شي بالبنيه برائتها وخجلها اني متأكد هوااي اكو بنات يستحن يحجن هذا الشي حته بينهن وبين نفسهن واكو بيهن حته يعبرن المقطع لان يخجلن منه !
بس الباقيات هلا هلا تصيح للشله كلها ويگعدن يثردن حجي مينحجي وشرف محمد بقيت فاتح حلگي 😯 معقوله هذني الكائنات اللطيفه ؟ لعد هُزلت والكعبه 🌚😯
قريت اخر بارت من المراهقه والاربعيني وشفت اللي مينشاف نازلات ع الزلمه دوسه ونص وحق الله كلااام ميتصدگ اببد حجي تربية الشوارع ميحجنه يمكن ... اني ما اگول غير صوچ الگرن اللي مخلي مرته تحجي كل خصوصياتهم اللي المفروض ميدري بيها غير همه والله واللي حصل كل هالكلام من وراها 🙂
لاااا والحلو البنات مسحولات عليه وحاسباته رجال وهو انفضح فضيحه بس الله يدري بيها والمستفز اكثر انه هيج قصه تافهه تحصل كل هذا الصده الواسع وهي اتحده واااحد قراها وحصل منها فد درس لو رساله مهمه لو شي بي توعيه مجرد سرد احداث تصير وي اغلب الازواج بالعراق وماكو بيها اي فاائده ...
بس للاسف من نجي نگول اغلب البنات عقلهن صغير ويموتن ع التوافه تطلعلي جم وحده طولها شبر ولسانها عشر مترات تغرد وتسوي روحها سقراط 2 😏🚬
المفروض اللي معتبرات نفسهن " كاتبات " يعرفن يختارن قصص يكون بيهن هدف ونصيحه مبطنه ورساله واضحه حته بدل متحرف المراهقات توعيهن وتوجهن صح وتنطيهن خبره وتعلمهن وتعرفهن التصرف الصحيح !
بدل ميكتبن قصص فوك ال100 بارت نص الكلام بيها مخزي وكله ايحائات والفاظ خارجه تكتب بارت واحد بي موقف او نصيحه او قصه قصيره بيها فائده عاد تفيدلها كم بنيه وتحصل بيها اجر 🙂
الزُبده ...
ابببد للتتوقعون هاي القصص رح تفيدكم بالعكس رح تأثر عليكم بصوره غير مباشره وتخلق ببالكم افكار عمرها مجانت ببالكم تره اغلبها مجرد خياال ولا تمت للواقع بصله ابببد والا مجان كل ابطال القصص ملائكه طاهره والباقين اخلاق سزز 🌚
لو تقرين كل يوم 10 دقايق كتاب بي فائده احسسسن بهوااي من هيج قصص بلا معنى مراح تنطيج ولا ربع فائده ورح تسيطر على مخج وتصرفاتج وتحرفج بدون وعي وتخليج مدمنه عليها وبالتالي تضيعين كل وقتج بشي ما ضاف لشخصيتج شي اببد ..
وانتو اهل التعليقات الطووط اذا انتو تشوفون نفسكم منحرفين وعادي خلي تعليقاتكم لنفسكم لان اكو مراهقين ميعرفون هيج سوالف وانتو جاي تحرفون تفكيرهم وتخلوهم يبحثون عن هيج اشياء وذنبهم برگبتكم ✋
والفشار والغلط والكلام البذيء تره بغض النظر انه هو عيب ومو لائق تره بالمناسبه هو حته حرام واكو احاديث للرسول عن هيج ناس الفشار والسب والبذائه على طرف لسانهم
احنه بيناتنه الشباب واللي دائما يفشر ويحجي كلام منحرف نصيحله سايب ومو الكل يحبه هدور انتو اللي الحياء والخجل والبرائه احلى شي المفروض بيكم ...
فكرو قبل لتكتبون ايي تعليق لان هذا يعكس تربيتكم واخلاقكم وممكن يأثر بشخص انتو متدرون بي ..
وشكرا ✋
