الحلقة الثانية والعشرون
بدئنا بني الجامع اللي خصصت ليه مساحة كبيرة من الأرض، و أهل البلد فهمو ان معنى رجوعي السرايا و ظهوري المستمر و كمان بني الجامع اني خلاص رجعت و هاستقر في البلد،
و ده ماعجبش شباب البلد و على رأسهم عادل ابن العمده و غريمي في وعد.
كان قاعد و لامم شوية شباب حاوليه و عمال يكرههم فيا و يبخ ليهم السم من ناحيتي، و انا معدي انا و الشيخ حسن لمحني هو و قام من علي مجعده و زعج بعزم ما فيه.
-مين قاسم الديب، خير يا وِلد نصار ايه اللي رماك علينا.
بصتله باستهزاء و انا مش ناسي طاري معاه و رديت عليه.
-رماني عليكم كيف يعني، اني اهنه في بلدي و بلد ابوي و اللي اسمها على اسم جدي، و لا انت مش واخد بالك يا وِلد العمده ان بلدك اسمها كفر الديب.
-ما انت فارقتها من زمان راجع ليه دلوك و نافش ريشك اكده و عمال تبني و تزرع ولا كأن ليك عيلة و عزوة ، انت نبت شيطاني مالكش حد و لا حد رايدك ارحل من اهنه و فارق زي ما كنت مفارق من زمان.
قربت عليه هو و اصحابه اللي كانو متحفذين زيه بالظبط، لكن الشيخ حسن مسك ايدي و فضل يرد عليه هو.
-استنى انت يا قاسم يا ولدي، و انت يا عادل اقصر الشر و اتأدب و افتكر فرق السن اللي بينك و بينه، قاسم اهنه في بلده و بيبني بيت لربنا في وسط أرضه يعني انت مايحقش ليك اللي بتعمله و لا اي حد فيكم يقدر يرده.
لكن الكلام ماعجبهوش و رد بكل غرور و تعجرف.
-و احنا مش ناجصنا جوامع يا شيخ حسن، و أرضه اللي بتقول عليها دي،
انت طول عمرك بتزرعها لوحدك و كنا فاكرينها أرضك انت و السرايا لما اتبنت افتكرناه بناهالك عشان يرد جزء من كرمك معاه هو وعد،
لكن نفهم بعد اكده انه كان بيعمل ده كله عشان يزرع نفسه وسطنا من تاني،
لاه دا يبقى بيحلم داحنا نجلعه من جذوره قبل ما يفكر يرمي وتده.
ماسمعتش من كل اللي جاله، غير اسمها اللي رن في ودني زي صوت رصاصة انضربت في قلبي،
ماعرفش ازاي في لحظه كان كف يدي
ضاغط على فكه و جسمه تحت رجلي و اني راكز عليه بركبتي، و الشيخ حسن بيتوسل ليا عشان اسيبه، لكن انا قربت ودنه ليا و همستله فيها.
-اللي انت بتنطج اسمها على لسانك دي تبجي مرتي، و اني مش ناسي اللي عملته جبل اكده يا وِلد العمده، فاحسك عينك تفكر تنطج اسمها على لسانك و الا روحك دي هاطلعها بيدي.
سيبته من يدي و وقفت و اني باصص على الشباب اللي كانو منتبهين ليا و وجهت كلامي ليهم.
-اني ماليش خصومه و لا طار مع حد فيكم، و لا اني راجع البلد و ناوي على الشر، بس انتو ماتعرفوش مين هو قاسم الديب، أسألوا اهاليكم عني هما عارفني و عارفين عيلتي كويس جوي و اتقو شري احسنلكم كلكم.
