الحلقة الرابعة عشر
وصلنا الفندق و وقفت اتكلم مع موظف الاستقبال و هي واقفة جانبي ، عمالة تتلفت يمين و شمال مبهورة بالفندق و جمالة
-قاسم باشا حمدالله علي سلامتك يا فندم.
-الله يسلمك يا تري الجناح اللي حجزته جاهز.
-ايوا طبعاً بس هي الانسة مع حضرتك نحجز ليها أوضة
-انسة مين دي مدام وعد الديب مراتي
-بجد اهلاً و سهلاً بحضرتِك سورى يا فندم احنا ماكنش عندنا خبر بحاجة زي دي.
فرحت اوي اول ما سمعتني بعلنها صريحة، و أكتفت بأنها ترد بابتسامة للموظف اللي كمل كلامه
-ممكن بيانات المدام و الاثبات يا قاسم باشا
-اه طبعا اتفضل بقولك هو رامي بيه هنا و لا مش موجود
-موجود يا فندم لسه طالع اوضته حالا بعد ما مشي عصام بيه هو و واحدة كانت معاه
-كده اوك يلا بينا يا وعد
و كأنها اخدت دش ماية ساقعه في عز البرد اول ما سمعت اسمه، وقفت زي التمثال جسمها متخشب في الأرض.
-لحظة بس يا فندم هو المدير كان سايب خبر اننا نبلغه اول ما حضرتك توصل.
-خير في حاجة و لا ايه.
-و الله يا فندم ماعنديش فكره.
-طيب انا هارتاح شوية و ابقي اكلمه، اطلع بقي و لا في حاجه تاني
-لاء أبداً اتفضل حضرتك
-يلا يا وعد شدتي لأديها فوقتها و كانت هتوقع.
-حاسبي هاتقوعي مالك واقفه متخشبة كده
-هاه مافيش اني بس اول مرة اجي مكان حلو زي ده.
-لاء من دلوقتي و لحد ما نرجع الڤيلا مش عايز اسمع و لا كلمة صعيدي
-ليه بقي
-عشان انتي اليومين دول هاتتقابلي مع ناس كتير معروفين في البلد،
و اكيد هاتتعرفي علي بنتاهم و مرتاتهم مش عايز حد يقولك كلمه تزعلك او مثلا واحدة تفتكرك اقل منهم.
-حاضر يا قاسم.
-يعني كلمته يا رامي و قالك انه خلاص هايبعد عنها.
-اه و الله يا بنتي خلاص بقي يا دينا خلينا نركز فى فرحنا شوية.
-طيب ربنا يستر بقي و قاسم مايعرفش حاجة و يتهور عليه.
-مالك يا دينا خايفه عليها كدة زي ما تكون اختك.
-بصراحة يا رامي انا حبيت البنت دي اوي اصلها لسة صغيرة و يتيمة و غلبانة في نفسها كده،
و اللي قاسم عمله فيها مش شوية هي حاكتلي عن معاملته معاها و قسوته عليها،
و طبعا لو فهم انها ليها علاقة بالموضوع ده مش بعيد يقتلها.
