عتمتي المضيئة

٣

اليوم دا كنت رايقه شديد ومخططه لي موضوعي واني م ح اخلي مهما حصل بس منتظره ابوي يجي والمساء كدا عندو قعده مع الحاجه وبكونو رايقين وح اوريهم قراري شنو
زي الساعه اربعه كدا قعدت مع اخواتي في الثانوي بقرو واتكلمت معاهم كتير في انهم يخلو بالهم من نفسهم وقرايتهم اهممممم شي وخط احمر ويكونو بنات واعيات ويهتمو بي بعض بعدها فتحت تلفوني وانا اساسا م عندي بيهو ارتباط شديد ولا بحب ولا بتحب مقفوله ع نفسي حتي فتره الخدمه ماف زول قدر ياخد مني حق ولا باطل المهم فاتحه الفيس كدا وبشوف في طلبات الصداقه والاقتراحات لفت انتباهي واحد طوالي خشيت البروفايل بتاعو ولقيتو من حلتنا واول مره اشوفو اكتشفت اني بعيده شديد من الجنس الاخر 😄😄 وكمان فيها جفاف عاطفي طوالي رسلت لي الولد طلب صداقه كان وجيييييه وجاهه السنين اخدراني كدا والنظارات دي يخلوها لي والسكسوكه والدقن استغفر الله بس 😍😍 انتظرت عشره دقايق بالضبط والولد عمل لي ادد عاد انا م صدقت سرحت بي خيالي طوالي واني خلاص بقيت مرتو عديل ههههههه م قلت ليكم جفاف عاطفي المهم اتعرفنا ع بعض وطلع بعرفني و بعرف كل اهلي وقال اخر مره شافني كنت صغيره وطلع مغترب كمان🥰 اتونسنا وكان ظريف شديد حبيتو عديل انا بس عامله فيها مستر تقيل هههههه
فجأه اتذكرت ليك الحاج وموضوعي جمعت كل الطاقه العندي ومشيت ولقيتهم قاعدين بتونسو قعدت جمب امي وسلمت علي ابوي
يا ابوي انا دايره اسافر ....مسافره وين يا بت...الخرطوم يا ابوي....انتي يا بت م بتفتري من السيره دي ليك سنه ونص بتنقي للسفر دا
يا ابوي انت عاجبك وضعنا دا
حسيت ابوي اضايق من الكلمه دي لانو سكت قلت ليهو معليش يا ابوي م قصدي شي انت م مقصر معانا بس المسؤليه كبرت عليك شديد وعارف انت البنات واحتاجاتهم وانا من انتهيت قرايتي بفكر اشتغل عشان اشيل معاك الحمل يا ابوي
اها يا بتي قولي انا وافقت ح امشي ع وين وتشتغلي وين والخرطوم دي م بلدآ هينه عامله زي الطاحونه يا بقيتي قويه ومرقتي يا تطحنك او كمان تمشي في الدرب الما ياهو يا ابوي انت م واثق في بتك ...واثق فيك يا بتي بس لكن ...م بس يا ابوي انا بمش وبقعد مع اهل امي وبتم تلاته شهور لو م اشتغلت بجي راجعه ....ابوي ساكت والحاجه ساكته
شويه وامي قالت ليهو والله رؤي كلامها صح خليها تجرب والله معاها ابوي م رد لكن انا عارفه انو اقتنع خلاص بقت المشكله عندي صحي انا ح امشي وين واعمل شنو وانا م بعرف شي في الخرطوم بس برضو م ح اغير راي واكيد وقلت خلاص بدايه الاسبوع الجاي ح اسافر

ومن هنا تبدا العتمه......