عتمتي المضيئة

١٨

اليوم كان جمعه صحيت مع الصلاه استحميت وصليت والمطبخ جاك زول ودورنا برنامج جبنه تاني مع خالتي واحمد .....
كنت مشتركه في المبادره بتاعه شارع الحوداث بس م بمشي ليهم كتير قررت الليله امشي وكان عندهم قعده في الساحه الخضراء
لبست واتظبت و وريت بكري يمشي معاي لانو هو زاتو عضو
الاجتماع استمر لي بعد المغرب وكان عندهم حاجات جميله شديد وطلعو بكميه من القرارات الجديده وبرامج عمل جديده
بعد الاجتماع انا تعبت شديد وصدعت وقلت لي بكري انا ماشه البيت م رد لي طبعا وطوالي مشينا مركز كبير كدا عشان يعمل لي الصوره انا كنت نسيت البرنامج دا عديل
المهم مشينا وبعد قعده طويله خشيت للدكتور وعمل لي الموجات وسالني مقابله مع ياتو دكتور وريتو قام سكت كدا وقال لي بكره تاخدي الصوره دي توديها لي دكتور فلان ....وسال بكري انت اخوها قال ليهو ايوه بكري قال ليهو في شنو خوفتنا
الدكتور بتاع الموجات قال ليهو م بقدر اقول ليك شي بس م تتاخر ولا يوم ودا رقم المسجل والدكتور احجزو من الليله
طبعا انا م خفت شديد ....بس بكري اتوتر وقال لي اطلعي انا بلحقك....جا بعدي بشويه و وشو م بتفسر سالتو مالك انت عيان ...بس عاين لي شديد وقال لي كويس انا ...طيب مالك وشك مخطوف كدا مافي حاجه يا رؤي ....واتصل لي المسجل وسجل لي ......بكره الساعه سبعه يا رؤي تكوني جاهزه انا بجي اسوقك وكلمي خالتك عشان تمشي معانا
بكري في شنو وليه اكلم خالتي انا عندي شنو
ماف شي يا رؤي بس عشان تدخل معاك الدكتور انا م بقدر ادخل معاك
قدر م حاولت اعرف من بكري حاجه م قدرت...وصلني البيت ومشي طوالي وشال معاهو الصوره بتاعه الموجات
مالك اتاخرتي يا رؤي
كنت في الدكتور يا خالتي وحكيت ليها الحاصل...خير ان شاء الله يا رؤي بمشي معاك
مشيت الغرفه صليت وم كان عندي نفس اكل اتصلت لي مؤمن وحكيت ليهو يومي كلو
و وريتو بي موضوع الدكتور حسيتو ارتبك شديد وقال لي لي بكري م يوريك ...يمكن هو م عارف انا اكون خمنت ساي
طيب رسلي لي رقمو ...مؤمني ماف ضروره للموضوع ده بكره بعرف الحاصل واوريك  اتونسنا شويه وبعدها نمنا
صحيت الصبح متاخره شويه صليت ونزلت لي خالتي وكان يوم سبت الكلام دا جهزت معاها الفطور والغداء وكان الجيران جاينها بي لمه جهزت معاها حاجاتها برضو وبعد الضهر مشيت نمت
صحيت من النوم مخلوعه وبعرق مع انو الجو بارد م متذكره شفت شنو بس كان حاجه مخيفه  .....
قمت اتوضيت وصليت ونزلت لقيت النسوان لسه قاعدين قعدت اتونست معاهم وبعدها طلعو
بعد المغرب جهزنا انا وخالتي وجانا بكري مشينا للدكتور
وصلنا العياده وقعدنا مساااااافه حتي جا دوري
حكيت لي الدكتور الشي العندي واني مشيت لي دكتور وقال لي اعملي موجات وبتاع الموجات دا جابني ليك شاف الصوره وسالني بتحسي بالالم من متين .....من سبعه شهور تقريبا بس م متواصل من فتره لي فتره طيب تمام خشي ارقدي في السرير واتكلم مع خالتي وبكري اصلا م دخل معانا م سمعتو قال ليها شنو
الالم وين في الثدي الشمال وين بالضبط في الحته دي شاف الالم وكان في حبه صغيره كدا وقال لي تعالي
رجعت بره وقلت ليهو دا شنو
طبعا يا بتي المؤمن مصاب وربنا اذا احب العبد ابتلاه واي مرض عندو علاج والحمد لله الطب اتطور شديد
دكتور من غير مقدمات انا عندي شنو

كانسر

حسيت لي لحظه اني م بسمع
واصل الدكتور كلامو وفي مرحله متاخره ولازم تبدي العلاج طوالي وكتب لي كميه من الفحوصات والصور والاشعه  اعملها
وقال مفروض تتعمل ليك عمليه ازاله للثدي وبعدها تبدي جلسات الكيماوي
انا م عملت اي رد فعل بس خالتي كانت بتبكي شديد وبكري من بتاع الموجات عرف انا عندي شنو شلت الورق من الدكتور وقلت لي خالتي ارح طلعنا لقيت بكري وشو م بتفسر  م اتكلمت معاه ولا هو اتكلم
ركبنا وطول الطريق ساكتين
خالتي بكري ....ماف زول يقول لي امي حاجه نهائي ولا اي زول تاني خلو البنات يكملو امتحاناتهم اول
طيب والعمليه يا رؤي بعد اخواتي ينتهو بكلم امي وبعمل العمليه ....بس التاخير مافي صالحك ....وحتي لو عملتها ح يفيد بي شنو م انا كدا كدا ح اموت في اللحظه دي بكري قرب يعمل حادث
رؤي اوع تتكلمي كدا انتي م مؤمنه وبعدين انتي زوله متعلمه وعارفه الطب اتطور كيف والعلاج بقي ساهل ولو م عايزه تتعالجي هنا سافري بره السودان
الكلام القلتو م برجع فيهو م فرقت كلها اسبوعين بس يخلصو وبعداك افكر اعمل شنو ....وعم الصمت

رؤي ح تقدر تنتظر اسبوعين ولا في احداث جديده ح تحصل ومؤمن رد فعلو ح يكون كيف

#يتبع......