عتمتي المضيئة

٤

كان جواي خوف كبير ....خوف من مجهول ....خوف اني افشل .....خوف الثقه المديني ليهو اهلي.....خوف علي نفسي.....خوف علي اخواتي ...كنت في سلسله  من الافكار لي لحظه كدا كنت ح اتراجع واستلسم للواقع بس كل الحاجات الحواليني بتقول لي لا دا م زمن تتراجعي ...قطع حبل افكاري صوت رساله من الماسنجر .....ايييييييك ياخ انا نسيتك عديل هههههه....كان مرسل ليك وينك اختفيتي مالك ....رديت واتونسنا لحدي الساعه 12صباحا وقلت ليهو خلاص انا نعست ونمنا ع كدا صحيت الصباح بدري نضفت ورتبت حاجاتي كلها والبيت وجري ع التلفون بقي شغلي الشاغل يومي كلو معاهو بس م كنت بدي اسراري لي زول بس هو بعرف رؤي الوناسه الظريفه ورؤي البتضحك بس  اسبوعي القبل اسافر دا كلو معاهو تم الاسبوع وامي كان اتصلت ع اختها في الخرطوم وهم نوع الناس المرطبين شديد واولادها بره السودان انا شفت بيتهم دا زمان وهسه م بتذكرو خالتي طيبه وحنينه شديد ورحبت بي شديد وانا كنت خايفه شويه من القعده معاهم بس بعد ترحيبها ارتحت شويه المهم كلمت زولي اني مسافره الخرطوم وعايزه اشوف شغل في الحقيقه م شجعني نهائي بس برضو قلت وجه نظر م ضروري تكون صح طبعا هو كان كاتب اسم مستعار في الفيس وم سالتو من اسمو الحقيقي خالص بعد كم كدا وراني انو اسمو مؤمن وعرفت عيلتو واهلو كلهم البره الحله والجوه الحله
يوم السبت سافرت الخرطوم وكل الليل م نمت من التفكير صحيت حالي بالبلا وانا اصلا م شبه البنات مشاغله ساي م بتشاغل😄 وانا طالعه من البيت دموعي عشره عشره زي الماشه اخر العالم واوصي في اخواتي وامي توصي فيني المهم طلعت براي مشيت الشعبي وطلعت في اول بص وقلبي كان مقبوض شديد استغفرت واتحصنت وهديت شويه ....البص اتحرك وطبعا لمن اسافر طوالي بقول انا ح اموت الليله لانو البص دا ح يعمل حادث😄😄 بعد تلت ساعه نمت م صحيت الا في سوبا غايتو الجمبي دا كان كارهني عديل هههههه ولقيت تلفوني داير يطير من المكالمات من امي وابوي ومؤمن رجعت ليهم كلهم وطمنتهم وصلت الميناء وكان جايني ود خالتي اسمو احمد قعدت شويه كدا وجا تقريبا هو قدري ....الود نضيف نضافه انضف من ضميري ياخ خجلت من روحي سلم على سلام بارد كدا م اشتغلت بي كتير فتحت باب العربيه الورا وركبت بعد رفعت حاجاتي وهو ركب وعاين لي بالمرايه نظام انا م السواق بتاعك وااااي من الاحراج المهم سكت ومشيت ركبت قدام وساكته طبعا ...فجاه قال لي انتي اصلا كدا ....قلت لا إصدار منزلاهو جديد صر وشو لمن خفت انا وتاني م فتح خشمو بي كلمه ....وصلنا البيت لمن فتحو لي البوابه لمن شهقت يا ربي دا مسلسل ولا دا بيت خالتي جد جد ولقاها فرصه وشافني مخلوعه قام ضحك باستهتار كدا وقال لي م متعوده يا بت الجزيره بس براحه الخرطوم م تخلعك ههههههههه ومشي مني كرهت الولد دا وقلبي اباهو ....خشينا وسلمت ع خالتي ساميه وبناتها يعاينو لي من راسي لي رجلي ياخ الشغاله زاتها انضف مني ....احرجت شديد يا جماعه قعدت وجات الشغاله سلمت وضيفتني ورفعت الشنطه فوق وجات خالتي تسلم وتسال من فلان وعلان في الحله وانا برد بي اخر نفس جيعاااااانه وتعبانه الله يحلني منها المره دي
جات الشغاله شايله الفطور والعصير لمن عيوني بقت قلوب قلوب طقيت تمام لمن وشي نور😅😅 بعدها اتكرمت وحده من البنات اسمها ايه وسالتني اتخرجتي من وين وجيتي تشتغلي وين وردمتني اساله اكتر من امها
وبعدها ودوني غرفه كدا وقالو لي دي غرفتك بعاين للغرفه وفاتحه خشمي مترين من جمالها حسيت اني وسختها ياخ الحمام زاتو حكايه طوالي رتبت حاجاتي في الدولاب واخد دوش وصليت وديك يا النومه.......