ايه بقت تتمتم انا انا امي انا ...في شنو يا ايه وشك دا م وش خير....خالتي اهدي....ايه جاها هبوط حاد واتصلو لي مشيت ليها في المستشفي رقدوها ساعتين واخدت علاجاتها وجينا ....وهبوط حاد من شنو ودا م بخليها تتمتم كدا والكلام يغلبها ....يا خالتي ساميه البخلينا نكذب عليك شنو اوديك المستشفى الكانت فيها عشان تتاكدي ....بعدها خالتي هدت شويه واتقبلت الموضوع بس انا بقيت قدر م اطلع بخاف
وبالنسبه لي محمد والمعاهو طلعو م ودوهم قسم شرطه بس دقوهم وعذبوهم وبكري اجبر محمد يتقدم لي ايه وفتره شهر بس ويطلقها او ح يلفقو ليهو قضيه ياخد فيها اعدام ومحمد وافق طوالي
بالجانب التاني ادهم وعمي محمد جو والزول العايز رندا اتقدم وطلعو ناس كويسين شديد وناس خالتي وافق وبعدها اهل محمد جو اتقدمو لي ايه .وسبحان الله خلاف من ولدهم اسره محافظه عمي محمد م وافق بس بعد تعب ادهم اقنعو واتفقو يعملو العرس بعد شهرين ايه ورندا
انا شغلي ماش كويس مع جانب الدراسه وقررت اسافر الحله الاسبوع الجاي
وعلاقتي اتطورت مع بكري شديد وعرفت اهلو وهو عرف ناس بيتنا وكتير كان بتكلم مع امي ......
اما مؤمن😍🙈 فشغال في تجهيز البيت وقرب يخلص وكل يوم مشغلا لي بالعرس
امنيه اقتنعت انو بكري م بحبني وحلت عن سماي
ادهم ومنتهي امورهم كانت ظابطه شديد واتفقو يعملو خطوه بعد عرس البنات
تم الاسبوع ويوم مسافره دا م خليت شي م شلتو لي امي واخواتي وبكري شبعان ضحك على البشوفك يقول م جايه تاني.....هههههه يمكن م اجي الموت من الحياه م معروف
رؤي اوع تقولي كدا
يا ود قول بسم الله الموت حق
خلاص يا ستنا بس قفلي السيره دي .....
خلاص خلاص م تجوط ساي
وصلني الميناء وقعد معاي لحدي م البص اتملا
ياخ كان احساس عجيب
راجعه وحققت اكتر من نص احلامي في فتره سته او سبعه شهور ....دا غير الشوق للحله وناس البيت ومواضيع الجبنه بالنهار واللف في الفريق
اول مره اسافر وم انوم
المدير اداني اجازه اسبوع بس وبعد تحانيس حاسه انو الاسبوع دا م ح يكفيني اعمل الحاجات الفي راسي
فجاه لقيت نفسي جمب لافته الحله😍😍😍
وصلت البيت وكان فيهو تغيرات كتيره سلمت ع امي وببكي واخواتي و م خليت شي م وصفتو ليهم ولا حكيتو ليهم
يا بت كفاك جري ليك نفس الايام قدامك اشبعي ونسه خلاص سمح يا امي اها الغداء شنو ...
ملاح خدره طبيخ 😍😍😍بي رز صاح عارفني بريدها
براءه ظبطي الشطه عليك الله
ابوي بجي متين يا امي بقي بتاخر مالو ...والله قال السوق مشي معاهو كويس عشان كدا بتاخر .....هوي ابوي جا وسلمت عليهو بي نفس الشوق واتلمينا كلنا في الغداء ونسه وضحك
وامي بقت تفت لي في شمارات الحله فلانه عرسوها وخالتك دي كانت عيانه وخالتك ديك بتها ولدت وعمك عندو وعمتك عندها المهم طلعت بي قائمه من الزيارات ....
اليوم دا من صليت العشاء نمت وكانت احلي نومه صحيت الصبح مع امي واشتغلت معاها وبقينا نتونس برانا و وريتها بي عرس بنات خالتي وقالت بتجي
يا امي انا بعد تلاته شهور بدوني شقه في سكن الشركه تعالي نرحل الخرطوم
بري بري خرطوم شنو البنرحل ليها مالك يا امي هسه البنات ح يدخلو الجامعه ويمكن يشيلوهم هناك بدل يسكنو داخليه يكونو في البيت وانتو معاهم...وابوك وشغلو
السوق دا بس هنا يا امي الخرطوم زاتها فيها سوق يشتغل هناك والزراعه طيب ...ياجر الارض بس
خلينا ساي يا بت بنجي الإجازة ونرجع لكن سكنه دي انا م بدورها.....
كويس نشوف
لفيت ع اهلي كللللللهم وطبعا بقيت مزه حبتين من رؤي الزمان وكنت مبسوطه شديد
قبل اتم الاسبوع ضربت لي بت معانا في الدبلوم وقالت في دكتور عندو امتحان بره الجدول وبعد اسبوع انا بقيت عامله كده😟😟
وبقيت لا اسمع لا اري وم جايبه معاي ولا ورقه
شفت ال F عديل انا من شده م مسطحه طوالي لملت حاجاتي نضيف ع وسخان وقلت لي ابوي طلعني في عربيه الخدار الماشه الخرطوم😂😂😂😂😂ابوي دا مات بالضحك على
يا بت استهدي بالله بكره بالبص بتصلي وربنا بوفقك ان شاء الله والنصيبه الشايله دا م بقريك قصدو التلفون
والله انت يا حاج بتفكر مرات 😅😅
انا كيف م فكرت اقرا من التلفون
الليل كلو ابحت في التلفون مؤمن شبع رسايل واتصال ولا شغاله بيهو اتصل بكري رسلت ليهو
مشغول الان
رسل لي يشغلك بي قده 😂😂
وبرضو سفهتو نمت قريب الساعه 2وصحيت فجر طلعت مع ابوي الكلام دا كان يوم الاربع ....
وصلت الخرطوم وجا بكري وداني البيت وطبعا شمتان فيني
الاسبوع القبل الامتحان دا رجعت عمي عبدو جد جد
جا يوم الامتحان وامتحنت كويس بس برضو م مطمنه
وامتحانات السمستر كانت بعد العرس طوالي
المهم بقيت من الشركه للبيت و اغلب وقتي بقرا وطبعا م قصرت انحبست مع العروسات
وجهزت فساتيني وحاجاتي
اسبوع العرس دا كان خرافي
بس ايه ظاهر انها م مبسوطة قلبها مابي محمد عكسو تماما كان مبسوط كانو م عمل شي بس ظاهر انو شاميني😂
عزمت ناس المكتب العرس وكان في صاله (..) والعروسات طلعو مزززززز
وانا طلعت رهيبه😍😍عاد انبذ روحي😅
انتهي العرس وامي وابوي جو حضرو وكميه من اهلنا ناس الحله
ورجعو طوالي لانو امتحانات البنات وانت بعد العرس نزلت امتحانات طوالي
اخر يوم امتحان لي طلعنا بعد الامتحان شله الدبلوم كلها واتعرفنا يدوب ع بعض لانو م كانو فاضيين وكلهم ناس شغالين طلعو ظريفين شديد ويتحبو وعملنا قروب في الواتس
بعدها جاني بكري كان عازمني غداء😋😋
رجعت البيت المغرب وكان فاضي بس خالتي سميه واحمد حالهم يحنن
اتونسنا مسافه وعملت ليهم جبنه بي بخور وفنكوش فرفشت ليهم حبه
مشيت غرفتي اخد حمام و صليت وتلفون طويييييييييييل مع مؤمن لحدي الاذان الاول🙈🙈
صليت ونمت
#يتبع.....
أنت تقرأ
عتمتي المضيئة
Romanceرواية سودانية بقلم ريان العجب اي حاجه بتحصل لينا في الدنيا دي لي خير بس وقتها م بنكون عارفين الخير الوارها شنو اللهم إلا بي موقف معين
