عتمتي المضيئة

١٣

انا كنت مسبقآ مكلمه ناس البيت اني مسافره حته بره الخرطوم وكملت ناس خالتي
ادهم جاني في الشركه قبل نطلع اتونس معاي شويه وقال لي مسافر قطر لمده اسبوعين وجا يودعني وقال لي دايره شنو اجيبو ليك و وصيتو ع كم حاجه  وشاف منتهي عجبتو شديد  وقال لي القرض المعاكم دي منو ....قلت ليهو احترم نفسك يا ود وامشي من هنا ...جا بكري وسلم على ادهم وطلع بينهم معرفه
ادهم طلع مشي ....
ونحن كملنا باقي اجراءاتنا واتصلت ع امي اتونست معاها  مسافه والعربات طلعت  الوفد كان في عربيتين وانا كنت مع بكري والمره دي م نمت بنتونس لحدي م وصلنا وطوالي الاجانب ديل  نزلونا شغل ....دي ورطه شنو يا الله    اشتغلنا كدا لحدي المغرب وبعدها مشينا الفندق انا من التعب نمت طوالي وحاسه بي الم في ضهري ويدي شديد م قدرت استحمل اتصلت لي بكري جاب لي مسكن اخدو ونمت .....صحيت الساعه وحده اكلت واتصلت لي مؤمن لقيتو نام بقيت قاعده في النت شويه لحدي م نعست ونمت
صحيت الصباح ولبست نزلت تحت لقيتهم كلهم قاعدين شربنا الشاي مع بعض واصلنا شغل والاجانب طبعا دقيقين شديد مع اي فرع بقعدو ساعه في باقي اليوم دا كملنا كل الشغل وقررو يرجعو الخرطوم ....مشينا الفندق شلنا حاجاتنا وطلعنا ع الخرطوم طوالي ...وصلنا الساعه عشره قلت لي بكري م ح القي زول صاحي يفتح لي الباب وادهم سافر....خلاص ارح معاي بيتنا😉اكيد جنيت اها عندك حل تاني ....بحجز في الفندق هنا والصباح بمشي البيت ولو م لقيتي حجز ....م عارفه والله يا بكري كدي نصل ونشوف فعلا وصلنا وم لقيت حجز ......اتصلت لي منتهي وردت علي بعد كم مكالمه وقلت ليها انا جيت الخرطوم والزمن اتاخر وم بقدر امشي البيت ....هي كانت ساكنه في شقه تبع سكن الشركه معاها امنيه وكم بت .....قالت لي خلاص تعالي ....بكري وداني وكان الساعه12 جات من دخلت وسلمت مشيت نمت طوالي وم فتحت تلفوني
صحيت الصباح ولبست وجهزت قبل الزمن فتحت تلفوني لقيت كميه من الرسائل من مؤمن اتصلت عليه وكان زعلان مني شديد لانو يوم امس دا كلو م رسلت ليه ولا فتحت النت اعتذرت ليه وقلت ليهو انو يوم امس كان ضاغط شديد عشان كدا م قدرت اتصل عليه بس م رضي نهائي وكان زمني جا خلاص وقلت ليهو برجع ليك بعدين
مشيت الشركه ونزلت شغل طوالي والوفد عندو سفره لي شندي وكم منطقه تانيه انا اعتذرت لاني م كنت قادره امشي
المدير في الاول م وافق بس بكري حسه اني م كويسه بالجد فاقنع المدير ومشت معاهو منتهي ....
في الوقت دا انا كنت تميت شهرين ونص في الشركه ...بعدها المدير قال لي باقي ليك اسبوعين وتبقي موظفه رسمي معانا وعندك امتيازات كتيره ح تعرفيها بس العايزو منك م تقيفي وتبني نفسك اكتر واكتر وح يكون عندك مستقبل كبير ان شاء الله....😍😍 دي كانت طاقه حماسيه بالنسبه لي وعملت لي نفسي جدول ونظمت وقتي عشان اقدر اوفق بين اني اقرا واشتغل
الاوضاع في بيتنا بقت كويسه الحمد لله حتي ابوي شغلو اتصلح كتير وبقي طوالي بقول لي عرسي يا رؤي خلاص وانا كنت برفض لو م عملت الماستر يا حاج م بعرس ......
الدوام انتهي والوفد سافر معاهو بكري ومنتهي وطبعا امنيه بقت فارضه سيطرتها علي واصلا كانت دايره فرصه فيني بس قلت م مشكله كلها اسبوعين واوريك رؤي منو بكري قال لي ح اتصل عليك بعد اصل ....
مشيت البيت وقالو طلعو لي مناسبه صحبتهم اكلت وصليت ورجعت لي مؤمن وكان لسه زعلان المهم حاولت ارضيهو بس شكلو كان زعلان شديد وفي النهايه مشي الموضوع وقال لي داير انوم خليتو براحتو ومسكت تلفوني وبقيت بقرا واي معلومه بحس انها بتفيدني  بكتبها في دفتري قريت مسافه ساعتين كدا ورقدت نمت .....
بعدها اتصل لي بكري صحاني من النوم وبقي بتونس معاي كنت حاسه بي اكتئاب غريب وحاسه اني مخنوقه ...
وكالعاده بكري لو م عرف مالي م بخليني حكيت ليهو خلافي مع مؤمن وبقيت بحكي ليهو عن تفاصيل  حياتي كلها من زمن الثانوي والجامعه وعن ناس البيت تفاصيل كدا مؤمن م عارفه
انا نفسيآ كدا برتاح لي بكري شديد ولمن اتونس معاهو بكون مبسوطه .....
اتونسنا مسافه كدا ونمنا
مرت ايام كتيره و علاقتي مع مؤمن رجعت زي م كانت وعلاقتي مع بكري بقت حلوه شديد وتمت فتره الاسبوعين واتعينت رسمي في الشركه  وراتبي بقا ثابت ومواصله ع قرايتي  و الحمدلله الوفد سافر ورفعو تقرير عني وعن بكري وكان في صالحنا شديد
وقلت لي بكري انا بكره ماشه بكره جامعه السودان اسجل للدبلوم العالي شجعني شديد وقال لي ح اوديك بكره

# يتبع .....