كتاب أسود.🖤

المرة الاخيرة.

"إيزار؟"
"نعم؟
"يا إيزار"
"نعم"
"هادي اخر مرة نشوفو فيها بعضنا"
———————————————
الابتلاءات؟ مش موجودة وكلمة للجهلة، كل الظروف نِعَم، لكن للقوي بس!❤️
———————————————
     إيزار ناض من النوم، دار اموره، طيب قهوته، ولع سبسيه وقعمز. . . قعمز قدام الروشن يتفرج علي الشمس، شاف عصافير، فتح الروشن بش يسمعهم. . . يسمع سعادتهم، الوباء الوحيد لي يتمناه أي حد!❤️
...
    وفِي نفس الوقت هديل في سابع نومة، والمخدة غارقة دموع.
    الفرق بين هذا وذاك، القوى يقلب الابتلاء نعمة!💙
...
    قام الكتاب وقلب صفحاته كلهم، "هذا كله كتبته اني؟" سأل روحه، "وكأني كنت نعرف إن هكي بيصيرلي!؟" سأل روحه ثاني. . حط الكتاب في مكانه، مشي وقف قدام المرايا بالزبط، "رد عليا!" قال إيزار لي إيزار.
"علاش كتبت هذا كله!؟"
مافيش رد
"من هي!؟"
مافيش رد
"وين مشت؟"
مافيش رد
"ردددددد علياااااااااا" عيط إيزار وبدي يلود في الحوش ويخبط ويعاود في جملة واحدة بس "أي حد يجاوبني". . . "أي حد يجاوبني!"
       حتى إيزار طلع مش قوي.
———————————————
    كنز ناضت، طيبا الفطور ونادت علي اختها لي راقدة فوق. .
   "هديل!؟ هديل!؟"
ومافيش رد.
...
    صيحت كنز "بنخش ندوش ونطلع نلقاك مقعمزة عالطاولة تستني فيا!!"
    ومشت خدت دوش.
———————————————
   هبه نوضت إيزار، "هي هي، بش تفطر وتمشي للمدرسة هي."
     "حاضر" رد إيزار. . ناض، حك سنونه وقعمز علي سفرة الفطور.
     "شن حال قرايتك" سأل حمزة إيزار، "كويسة، جبت 8.5 من عشرة في الانجليزي يوم الاحد". . صفقله حمزة مع ابتسامة وقال "برافووو". . . هبه شبحت لي إيزار وقالت "المرة الجاية؟"، وإبراز رد بصوت يقلد في صَوْت هبه "مسكرة، درجة مسكرة".
    حمزة انفلق بالضحك🤣 وإيزار كذلك. . هبه قالت "هي هكي؟ باهي نوض انت واياه ودورو من يفطركم في الجديد."
    "لالالالالا خلاص خلاص" قالو الزوز في نفس الوقت، والضحك ماوقفش🤣
———————————————
     إيزار خدي القهوة، ونزل بيها لي نفس المكان، نفس المكان. . !
...
    خش قعمز في وسط الفوضى، حاجات مكسرة وحيوط مخروطة ودم. . شبح لي ايده والحديدة لي مكتوب عليها أماريس، أتكا وتنهد تنهيدة حزن وقال "وينك يا أماريس!!!!!!!". . .
     وهي خيالها يتفرج من بعيد، نفس الخيال لي يطلع لي ولدها، لكن حتى الخيال يخاف مرات، يخاف من إنه يبتلى، يبتلى بالحب!💔
———————————————
     طلعت كنز من الدوش، "حي عليها هادي قاعدة ماناضتش تحساب عندنا اليوم كله." قالت لي روحها.
     لبست حوايجها. . سلتت شعرها القهوي الناعم. . وركبت.
    طق. . طق. . طق
"بنخش راه" قالت كنز
مافيش رد.
فتحت الباب وخشت، لقت اختها راقدة.
"نوضيييييييي!" قالت كنز ومافيش استجابة، هزت اختها وكذلك مافيش استجابة، "تي خيرك يا بنت شن فيك!؟" قالت كنز. . وهزت اختها بالقوة وكذلك مافيش اي استجابة! بدت ترعش كنز! حطت ايدها علي رقبة اختها مافيش نبض. . كنز انصدمت، تحسست المخدة المبلولة وهمست، "أختي ماتت تبكي". . علت صوتها شوية وقالت "أختي ماتت تبكي". . صيحت بأعلى صوت "هديل ماتت تبكيييي!!!!"
...
    نزلت لي الدور اللوطي، شبحت سفرة الفطور وضحكت علي روحها بسخرية، "من بيفطر معاي توا؟"
...
    نفس الوقت ونفس الخمسة دقايق.
خمسة دقايق حزينة في مكان ونفس الخمسة دقايق كارثية في مكان ثاني!
———————————————
     ركب إيزار فوق، حط سبيدروه في رجله، لَبْس جيبوطيه وطلع.
...
    وصل لقي سيارة اسعاف وبنت.
بنت طويلة بشعر قهوي ناعم طويل، شعر أشبه بِالحَرير، عيون عسليات، في الشمس يشبهو الشمس، لابسة، دموعها جواهر.
    مشي للبنت سألها "هديل وين؟"
            جاوباته "هديل ماتت."
وقف ساكن في مكانه مِن الصدمة.
           وفِي لحظتها خدي قرار
وهمس لي روحه
"قررت ان معش بنعيش مع حد ومعش بنكلم حد ومعش بنحب حد، لان اي حد نحبه يمشي!"
       والحلوة سمعت الهمسة.
...