أصبحت زهرة

الفصل الثالث عشر

أضحت حواسها تصغي له بكل ما فيها، مرة يقف في منتصف حديثه يخرج تنهيدة تعالج بعضًا من هذا الأذى الذي يتذكره، ثم يكمل:

-منكرش كانت فترة صعبة وعدت، ربنا كافئنا بكائن صغير بيزيح هموم الدنيا لما تبصي في وشه، آمان كانت المكافأة الوحيدة اللي تستحق تُذكر في حياتي كلها بعد سنتين من جوازنا.

زادت الخناقات بيني وبينها وبالأخص لما عنادها زاد وصممت تقعد مع أخوها بعد ما آمان جت، أخوها مكنش الشخص اللي الإنسان يقدر أثق فيه بأي طريقة، إنسان مدمن على الشرب، عديم المسؤؤلية، جبان.

سكت قليلًا وهو يكور يده في غضب يحاول مقته بشدّة، نظر لدعاء التي كانت تناظره بهدوء، أخذ شهيقًا عميقًا وأكمل:

-وبالإضافة لكل دا كان بيكرهه أخته، أخته اللي أبوه ساب لها الشركة بعد ما مات، حقده وسخطه عليها كانوا بيزيدوا يوم بعد يوم، وبالأخص مع وجود مراته اللي كانت بالأصح هي اللي بتمشيه.

ومع كرهه اللي بيزيد قرر يبيع جزءه من الشركة للشركة المنافسة، بس أخته مسمحتش بـإن دا يحصل، الشركة اللي تعبتْ فيها كان على وشك إنه يدمرها بغبائه.

قدرت تشتري أسهمه عن طريق وسيط ونجحت في دا وضمنت الشركة، في نفس اليوم دا كنا سايبين بنتنا في البيت مع أخوها والخدامة، يومها رجعنا ملقناش الخادمة اللي اختفت ومعرفناش نلاقيها بعدها، ولا آمان.. 

كانت ملامج زهرة تتغير كل مرةٍ عندما يسرد عليها المزيد، قاطعته قائلة وهي تلتفت مخاطبة دعاء:

-قوليلي إنكم لقتوها.

ابتسمت دعاء ابتسامة صغيرة متعبة وهي تهزّ رأسها بالنفي، لتقول:

-يومها مكنتش عارفة أعمل إيه، دورت في القصر كله ملهاش أثر، كنت شاكة في فريدة مرات أخويا سليم بالأخص إنها السبب في ادمان سليم وموت والدي مش راضي عنه.

أكمل خالد نيابةً عنها:

-عدى أسبوعين وبرضو ملهاش أثر، كان معظم شغلي بيشيله زميل عني بس أنا اللي بمضي الحضور كإني موجود.

كنا بنشيل بعض، في يوم لقينا البوليس موجود في البيت طالب القبض عليا، بتهمة إنهم لقوا أوراق موقعة مني تثبت اشتراكي بطريقة ما أو بأخرى مع عصابة لِـتجارة الأعضاء.

شهقت زهرة واضعة يدها على فمها وسارعت بالقول:

-تجارة أعضاء!

همهم بصوت مسموع وأكمل:

-قضيت ليلتين في السجن والمحامي قال إن موقفي صعب وكلام كتير من رغي المحامين المعتاد.

بس بعد اليومين لقيت شخص غريب جه وخرجني بكل سكوت، وسمعت كلام من الشرطي وقتها إن في غلط أو حاجه زي كدا.