هو أنقذني من عذابي

"part 15 زادت أحزاني أضعافا "

رن هاتف مالك وهو يقف مع محمد وكريم ، وما إن رد حتى جاء صوت والدته وهي تبكي
_"مالك الحقني"
_"إيه اللي حصل يا أمي؟"
_"رضوى أختك مرجعتش لغاية دلوقتي من الدرس"
_"ازاي مرجعتش؟ طب استني هرن على رقم السنتر ممكن تكون لسه هناك"
_"طيب رن عليهم وطمني"
_"حاضر"
أغلق مالك مع والدته وقام بالاتصال على مدير المركز التعليمي الذي تدرس فيه رضوى ، لكن أخبروه أنها قد ذهبت منذ زمن
_"في إيه يا مالك؟"
نظر مالك لمحمد وهو يقول بقلق
_"رضوى أختي مرجعتش البيت ورنيت على مدير السنتر قالي مشيت بقالها كتير"
_"طب رنيت عليها؟"
_"رنيت وفونها مقفول"
_"إن شاء الله خير ، ممكن تكون راحت عند واحدة صاحبتها ولا حاجة؟"
هو رأسه بنفي وهو يقول
_"مبتروحش في حته من غير ما تقولي"
وضع محمد يده على كتفه وهو يقول
_"اهدى طيب "
_"أهدى ازاي يا محمد؟ أمي عايزاني أطمنها هقولها إيه أنا بقا دلوقتي؟"
صمت محمد وقاطعهم صوت رنين هاتف مالك، كان رقم غير معروف أجاب مالك
_"الو مين معايا"
_"ايوة يا مالك انا رضوى"
اعتدل مالك في جلسته وقال بلهفة
_"أيوة يا رضوى إنتِ فين؟"
_"أنا في المستشفى"
_"إيه اللي حصلك إنت كويسة؟"
_"متخافش أنا كويسة بس في واحد عمل حادثة في الشارع بتاع الدرس بتاعي وروحت معاه على المستشفى"
_"واحد مين وروحتي معاه ليه؟"
_"لإن مكنش في حد في الشارع والراجل اللي خبطه مراته حامل وبتولد ورضي يركبنا معاه بالعافية"
_"طب متعرفيش هو مين؟!"
_"لا ماشفتوش قبل كده"
تنهد مالك وهو يقول
_"مرنتيش عليا ليه في ساعتها؟!"
_"تليفوني فصل شحن وشوفت اي تليفون أرن عليك منه"
_"طب انتِ في مستشفى إيه؟"
_"في مستشفى****"
_"طيب انا جاي"
أنهى مالك مكالمته فنظر لمحمد وقال
_"في واحد عمل حادثة ورضوى راحت معاه المستشفى"
_"طيب يلا نروح"
_"طب وآسر؟"
_"عمر لسه مكلمكش فأنت روح اطمن على اختك ولو كده هنستنى في العربية"
_"طيب"
وقاد مالك السيارة ليذهب إلى المشفى ، جلس محمد وكريم في السيارة بينما دلف مالك للداخل وما إن رأى رضوى ، حتى ركضت له واحتضنته فقال
_"خضيتيني عليكِ يا رضوى"
_"أنا آسفة "
قالتها ببكاء فقبل رأسها وقال
_"خلاص متعيطيش أهم حاجة إنك كويسة"
مسحت دموعها فأردف
_"هو اسمه إيه؟"
_"كان معاه ڤيزا باسم آسر"
نظر لها مالك باهتمام وقال
_"مش فاكرة آسر إيه؟"
نظرت أمامها قليلا بتفكير وقالت
_"أظن كان اسمه آسر الجندي أو حاجة زي كده"
مرر مالك يده في شعره وقال
_"يبقى أكيد هو ، استنيني هنا"
وتركها وهرع إلى حيث صفَّ سيارته ، فتح الباب وقال لمحمد
_"أنزل بسرعة"
نظر له محمد باستغراب
_"في إيه يا مالك؟"
_"أنزل بس، آسر هنا"
اتسعت عيني محمد بصدمة وقال
_"آسر!! بيعمل إيه في المستشفى"
_"آسر عمل حادثة يا محمد"
نزل محمد من السيارة بسرعة وتبعه كريم ودلفوا إلى المشفى ويكاد الخوف يقتلهم ، وصلوا إلى حيث تقف رضوى فقال محمد
_"هو حالته إيه؟"
نظرت رضوى  لأخيها ثم له وقالت
_"الدكتور لسه مخرجش"
سار مالك مبتعدا عنهم ليتصل بوالدته يطمئنها على رضوى ، أخرج محمد هاتفه واتصل بحسناء التي ردت بسرعة قائلة
_" أيوة يا محمد لقيتوا آسر؟"
أغمض محمد عينيه يستجمع نفسه لا يدري كيف سيخبرها
_"آسر عمل حادثة يا حسناء"
وقع الكوب الذي كانت تمسكه حسناء أرضا وتحطم ، سمع محمد الصوت فقال بقلق
_"حسناء الو حسناء سمعاني؟"
_"ا أيوة سسمعاك إيه اللي حصل لآسر يا محمد"
_"لسه الدكتور مخرجش"
_"طب قولي عنوان المستشفى"
_"لا خليك في البيت وانا هبلغك"
_"قولي العنوان يا محمد"
_" خلاص أنا هاجي اخدك"
_"طيب مستنياك"
التفت محمد لكريم الذي يقف أمام باب غرفة العمليات ووضع يده على كتفه يشد أزره ، نظر له كريم بأعين دامعة
_"أنا هموت لو حصله حاجة"
احتضنه محمد بسرعة وقال
_"بعد الشر عليك وعليه إن شاء الله هيبقى كويس ادعيله بس"
تمسك كريم بمحمد وقال
_"بدعيله والله"
أبعده محمد عنه وقال
_"طب أنا هروح أجيب حسناء ، هتستنى هنا؟"
أومأ كريم برأسه إيجابا وقال
_"ايوة"
ذهب محمد إلى حيث يقف مالك مع رضوى وقال
_"ممكن آخد عربيتك يا مالك؟"
_"طبعا يا محمد ، خد"
أعطاه مالك المفاتيح فذهب  سريعا إلى المنزل ،في اللحظة التي جاء فيها شخص لرضوى وقال
_" يا آنسة"
التفتت رضوى وجدته نفس الرجل الذي صدم آسر بسيارته وقالت
_"نعم ،اه زوجة حضرتك عامله ايه؟"
_"لسه في أوضة الولادة"
_"ربنا يقومها بالسلامة"
حك رأسه وقال بحرج
_"أنا حاليا مش معايا فلوس أتكفل بعلاج الراجل اللي اتخبط بعربيتي ، فممكن تدوني مهلة بس كام يوم كمان؟"
نظر له مالك وقال
_"متقلقش يافندم مفيش محضر ضد حضرتك اصلا ، وعلى المصاريف فاحنا عيلته وهنتكفل بمصاريف علاجه، وربنا يقوم زوجتك بالسلامة"
_"الله يسلمك شكرا يا استاذ .."
مد مالك يده يصافحه وقال
_"أنا مالك"
_"وأنا أنس"
_"اتشرفت بيك يا أنس"
_"الشرف ليا"
وتركهم انس وذهب ليطمئن على زوجته.