عقد قران .. بقلم Doctorita

العاشر

امسك يدها بحنان... بجلسها بجواره
-اهدي بس كده.. هو ماغلطش لما طلب كده.. انتي في ايه

نظرت لوالدها بعيون متعبة.. وبنبرة مجهدة
-مش عارفة.. كل حاجة فوق بعض.. منار.. وماما... ومش بنام.. مش عارفة.. بس كتب الكتاب.. يا بابا هيبقي مستني حاجات كتير مني.. وانا مش ادها.. مش هقدر

ربت والدها علي ظهرها
- بصي يا ريحانة... كتب الكتاب ده ماهو الا تصريح انه يدخل البيت ويخرج من غير ذنب.. انه ممكن بقعد معاكي لوحدك.. ان واحنا في الظروف دي يقدر يتعامل معاكي بحرية اكبر.. بصي.. انا عارف ان مامتك تعبانة.. فأنا الي لازم افهمك با روني

خجلت ربحانة.. واحمرت وجنتيها.. فمهما كانت علاقتها بوالدها وطيدة.. الا ان هناك امور مخجلة.. تريد والدتها دليلها فيها.. وليس والدها

ابتسم بوهن فابنته حياته.. تخجل منه
-بصي يا روني... ماتتكسفيش مني.. انا ابوكي.. اكتر حد في الدنيا يخاف عليكي... كتب الكتاب ده.. بيديكوا رخصة لحاجات كتير... بس كل حاجة مش في وقتها بتبقي ماسخة.. مالهاش طعم.. ومافيهاش بركة... يعني.. هو هيقدر يمسك ايدك... امتي يقدر بتخطى المرحلة دي.. اكيد مش علي طول... بصي يا روني.. انا عارف انه مش وقته.. بس ماما تعبانة.. وانا عارف اني مقصر معاكي.. فمنيب.. هو الي هيقوم بالدور ده.. ابن ناس َمتربي علي الاصول.. ومن ساعة الخطوبة ومعدنه باين.. وانا مش هآمن عليكي مع حد غيره... فانا موافق علي كتب الكتاب.. وقبل ما تقولي اي حاجة... بصي يا حبيبتي.. اي حاجة هتحصل بينكو قبل الفرح.. انتوا احرار فيها... بس اتأكدي انه كل مازاد الوقت الي هيطولك فيه.. هتغلي اكتر... ماتبقيش سهلة... عارف انك مستغربة انا بقولك كده ازي... انا اه اب.. وغيران علي بنتي الي ربيتها سنين.. وحاوطت عليها.. وماخليتش حد لمسها.. بس دا مايمنعش اني انصحك.. اني اوعيكي... معظم الابهات بتنسى انها توعي بناتها.. بس انا راجل زيي زي منيب.. عارف طريقة التفكير.. فاهماني

اماءت ريحانة بأنها تفهم
فأكمل حديثه
-بصي.. انا هقول لمنيب ان كتب الكتاب نعمله بكرة.. وانتي اتصلي بصحباتك.. تو.. ماتحاوليش تعترضي يا روني.. خلي ماما تفرح شوية.. وبعدين بعد كتب الكتاب.. انتي كده علي اسمه يا ريحانة.. اي حاجة هتحصل بينكوا ماتتحكيش لصحباتك.. اي حاجة مهما كانت... عايزة تسألي حد اسأليني انا.. ماما تعبانة... حاجة تانية.. بصي يا حبيبتي.. منيب راجل زي باقي الرجالة يعني ليه احتياجات.. َانتي بعد كتب الكتاب هتبقي حلاله.. بس دا مش معناه انك تسمحي بتجاوز كبير... ومش معناه برضه انك تصديه بعنف.. لأ يا روني خليكي ذكية.. لازم تبعدي عن العصبية دي الي انتي بقيتي فيها.. وتصديه برقة يا روني.. بإنك اه متقبلة بس دا مش وقته.. فهماني

واين التي ستجيب.. فهي تتمني ان تنشق الارض وتبتلعها... حمرة كست وجنتيها.. ووالدها مستمر بحديثه.. لا تعرف كيف تجيب...
ابتسم والدها عليها...
-طيب.. هخرج انا اطمنه.. وماتخرجيش انتي.. وكلمي صحباتك..