عقد قران .. بقلم Doctorita

💫

.

بعيدا عن الفصل.. انا بحب اكتب ارائي ونصايحي

وبما اني متأكدة ان في بنات كتير بتقرالي.. سواء بنوتات او آنثات او مدامات..
بس الي حابة اكلمهم...
البنات الي لسه في اعدادي وثانوي.. والي لسه في الكلية برضه..
لان منهم كتيييير بيتواصلوا معايا...

من الي انا شيفاه...
احب اقولك... ركزي في مذاكرتك... ركزي فيها.. وابعدي عن اي حاجة تلتية.. او اي دوشة في حياتك او حياة غيرك بتشوش تركيزك..
الي قالوا ان البنت مالهاش غير الجواز وان مستقبلها ضاع لو ماتجوزتش.. دول ناس انا مخالفاهم في الرأي جداااا...

البنت مالهاش غير وظيفتها.. وامانها في فلوسها الي مأمنة عيشتها.. عيشة كريمة.. او على الاقل مش هتضطر تمد ايدها لحد يصرف عليها..

اليومين دول معظم.. معظم الاهالي.. عايزين يخلصوا من بناتهم... كأنهم هم تقيل علي قلوبهم.. عايزين يجوزوهم.. وبس.. والاخوات سواء البنات او الرجالة كل واحد بيفكر في نفسه.. انتي بقى كويسة ولا لأ.. محتاجة ولا لأ.. مبسوطة ولا لأ.. مش شغلهم.. هم عملوا الي عليهم وستروكي من وجهة نظرهم... علشان كلام الناس.. علشان ماتبقيش زي بنت خالتك ولا عمتك الي اتدلعت ورفضت عرسان كتييير و خلاص فاتها قطر الجواز...
ودا من وجهة نظر الاهل اعظم حاجة هيعملوهالك..

الزوج.. الله اعلم هيبقي كويس ولا لأ.. الخطوبة دي كذبة كبيرة في الاغلب.. ماتعرفيش هيعاملك كويس ولا لأ.. هيصرف عليكي ولأ.. بخيل ولا لأ.. الفلوس مش اهم حاجة.. لكن وجودها ضروري ولو حتى بكمية قليلة.. انكوا تعيشوا وبس..
ممكن يطلع حد مش كويس... ومش قادرة تعيشي معاه... وممكن تكوني خلفتي.. هتعملي ايه.. وفي حاجات مش عارفة تستحمليها..
اكيد في بنات شايفة ان اهلهم مش مرتاحين مع بعض.. بكل الطرق الحياة مش نافعة.. بس ليه مكملين.. السبب الست عقلها بيفكر في خمسين حاجة.. هتطلق.. سواء اللقب.. مطلقة الي المجتمع بيعتبره عييييبة.. ووصمة عار..
اهلك الي مش هيستحملوكي اصلا.. اخواتك البنات الي ممكن يلقحوا.. اخواتك الرجالة الي ممكن يستقووا عليكي بسبب مراتتهم الي ممكن مش كويسين.. هتقعد فين.. هتصرف علي نفسها وعلي ولادها منين...

قد الله والزوج كويس... تضمني منين اهل جوزك كويسين... والاعمار بيد الله.. افرضي ربنا اختاره.. هتعيشي ازاي.. مهنا كان الست الي بتشتغل بتشوف حاجات كتير بتفرق في تربيتها لعيالها.. في تفكيرها.. العالم بتاعها بيبقي كبيير وواسع مش محدود علي حد..

نصيحتي.. ذاكروا يا بنات.. حطوا امالكوا في الدراسة.. في كليات كبيرة.. مش بقول اسما بس.. لكن كلية تدخليها تبقي عارفة هتتخرجي هتلاقي شغل في المحيط بتاعك.. مش علشان ملحقتيش الكليات العالية في التنسيق.. تختاري اي كلية واه شهادة وخلاص.. اه معظم زمايلي عملوا كده..

انا بزعل جدااا.. ان معظم البنات همهم الجواز.. ودي اتخطبت وهي لأ...
خلي همك انتي.. مش حد تاني..
ذاكري.. وفي امتحاناتك ودراستك ابعدي عن كل حاجة.. عن السوشيال ميديا.. الأفلام والمسلسلات.. الروايات.. عن كل حاجة هتعطلك.. ايوة بقولك ابعدي عن الروايات.. معظم الروايات بتصدر فكر واحد البنت الضعيفة الغلبانة الي يتعمل فيها اي حاجة وتعدي وترضى.. وتحب الجاني عليها..

فلتروا الي تقروه.. والي تشوفوه.. والي تفكروا فيه..

امني مستقبلك.. ولو حابة خدي اجازة بدون مرتب لو مرتاحة للجواز وللشخص.. علشان لما الامور تفلت وتطلع عكس الي مخططاه يبقي في ايدك مفتاح مستقبلك.. ماحدش يقدر يخطف حياتك منك...

كل حاجة بإيد ربنا.. بس نسعى ونعمل الي علينا.. وربنا كرييييم..
بس نعمل الي علينا

واكيد هستني اراءكوا... وخاصة اراء المتزوجات.. لو كلامي غلط.. قولولي وجهة نظركوا.. ولو صح.. قولوا اراءكوا.. علشان البنوتات الي بتقرا تفهم الدنيا ماشية ازاي.. ان الجراز مش احضان ورومانسية وبس.. الاختيار والاحترام.. والامان بيفرق.. اهم حاجة الامان والثقة والاحترام...

الفصل لسه ماكتبتوش..