MARS

MARS 21 (Unicode)

မိုးရာသီရဲ့ နေရောင် ဖျော့ဖျော့က တိမ်အုပ်တွေကြားကနေ Motegi twin ring ပြိုင်ပွဲကွင်းအတွင်းသို့ ထိုးစိုက်နေသည်။ တိုကျိုမှ ကီလို၁၀၀ ကျော်ဝေးသည့် Motegi ကွင်းအတွင်းတွင် လူထောင်ပေါင်းများစွာ ပျားပန်းခတ်အောင်လှုပ်ရှားနေကြသည်။ ပြိုင်ပွဲလာသည့် ပရိသတ်တွေကလည်း ပျော်ရွှင်မြူးတူးနေသလို ပြိုင်ပွဲဝင် Team တွေကလဲ ပြင်ဆင်နေရင်း စိတ်အားတက်ကြွနေကြသည်။

ရှောင်းကျန့်ကတော့ အလုပ်ရှုပ်နေတဲ့ လူတွေကြားထဲ အူကြောင်ကြောင်နဲ့ ဘာလုပ်ရမယ်မှန်းမသိ။ ပထမဆုံးအကြိမ်ပြိုင်ပွဲကိုလိုက်လာဖူးတာဆိုတော့ အရာရာက ထူးဆန်းနေသလို ပြေးလွှားနေတဲ့လူတွေကြားထဲ သူ့ကိုတိုက်မသွားအောင် ရှောင်ပေးနေရတာမို့ လူရှင်းတဲ့ထောင့်တစ်ထောင့်မှာနေရင်း ရိပေါ် အဝတ်လဲ ပြင်ဆင်ပြီးမယ့်အချိန်ကိုပဲ စောင့်နေလိုက်သည်။

ပြိုင်ပွဲဝတ်စုံဝတ်ထားသည့် ရိပေါ်ပုံစံက အရင်သူမြင်ဖူးနေကျတွေနှင့်ကွာခြားကာ အရောင်အဝါတမျိုးနဲ့ ကြည့်ကောင်းနေသည်။

"ရိပေါ် စိတ်လှုပ်ရှားနေလား။ ဘာမှစိတ်ထဲမထားနဲ့ အန္တရာယ်ကင်းအောင်တော့မောင်းနော်"

လက်ထဲက ရေဘူးနဲ့ ရေခဲအိတ်ကို ကမ်းပေးတော့ရိပေါ်က လှမ်းယူပြီး ခေါင်းငြိမ့်ပြသည်။ မျက်ခုံးလေးတွေ တွန့်ချိုးပြီး မျက်မှောင်ကျုတ်ထားပုံက တကယ်ကို စိတ်ပူနေတာ သိသာသည်။

"ကော. . တကယ်လို့ ကျွန်တော်က Rossi ကို လတ်မှတ်ထိုးပေးဖို့ပြောရင် သူက ထိုးပေးမယ်ထင်လား"

ပြိုင်ပွဲဝင်ဖို့ စိတ်လှုပ်ရှားနေတာမဟုတ်ပဲ သူ့အကြိုက်ဆုံး ကစားသမားဆီက လတ်မှတ်ရနိုင်မရနိုင်ကို စိတ်ပူနေမှန်းသိရတော့ ဒီကလေးကို ရိုက်ပစ်ချင်စိတ်တွေတောင်ပေါက်လာသည်။

ရိပေါ်က ဒီနှစ် Moto GP japan မှာ ပွဲဦးထွက်ဆိုတော့ Moto GP level မှာမပြိုင်ရသေးပဲ သူ့လို လူငယ် လက်သစ်တွေပြိုင်ကြရတဲ့ Moto 3 level ကို YAMAHA Team အနေနဲ့ ပြိုင်ရသည်။ ကစားသမားလေးတွေအားလုံးက ရိပေါ်နဲ့ ရွယ်တူ ၁၆နှစ် နဲ့ ၁၈နှစ်ကြားပတ်ချာလည်လေးတွေ။

"သတိထားစီးနော် ရိပေါ်"

"စိတ်ချ။ ကံကောင်းစေမယ့်အဆောင်လေးလုပ်ပါဦး"