طاري اسمك يبجيني(مكتملة)

البارت التاسع

احب كلمه منو مزعلك
او
خوما بيك شي،،
احسها حظن على هيئه سؤال!❤

للكاتبه سماح

تغدينه وكمت نظفت المواعين وماما اليوم بابا يمها ظهريه ورويدا فاتت للحمام واني بغرفتي نص ساعه واسمع عيطه ماما تصيح بعلو صووتهه

ماما: يمه الحكوووووني ولكم رويداااا ماتتت راحت البنيه ...

طلعت طلقه اشوف شكو لكيت رويدا لابسه تراك لافه المنشفه على شعرها ومدده بالممر (صاله) وامي حاطه راس رويدا بحظنهه تهز بيهه ماكو بابا جان نايم ظهريه كعد على صوت ...بوكتها صدك نقهرت رويدا جانت خوش مريه الظروف جبرتها برغم تصير ضره ماما بس ما قصرت ووكفتها مننساها من راحت ويه بنان وكالت اني اختج جبيرة ..عمر رويدا بوكتهه يطلع ٢٥ اكبر من بنان ب ٣ سنوات ..سوينالهه فاتحه ٣ ايام لبسنه الاسود بنان جتي ام رويدا هالمرا صابرا ومؤمنه كلش لازمه سبحه مالتهه وتستغفر وتحمد رب العالمين...
مدة اسبوع واحنه حزنانين عليهه من صدك ...لما صار الهه ٨ ايام على وفاتهه طبعا ماتت موته طبيعيه مبيهه شي بس يومها وماتت ..مكانها خالي غرفتها كل ما افوت لغرفتي احسها راح تطلع مرتين بحياتي شفت الفواتح شلون بموته جلال صديق خالو جانو دك ولطم ونوح وبموته رويدا بس اهلهه خواتهه ثنين ازغر منها شبعن بجي بس امها مؤمنه ..

ليش ما ورة ثمنت يام من وفات المرحومه ويفاجئنه بابا يريد يتزوج !!!!

ماما: شبيك يزلمه تراب مرتك مانشف وتدور زيجه

ضياء: قابل اظل العمر كله بدون ولد ماتت الله يرحمها خوما ادفن نفسي وراهه الاسبوع الجاي اروح اخطب واتزوج واجيب المرة ثانيه هنا خل يكون بعلمجن..

بابا صار مختلف جذريا عن قبل كل هوسه ومخيلته يخلف ولد يكول راح يخلف نبي لو امي متخلف ماما لو يعيشلهه ولد جان خمس ولد عدهه بس الله مكاتب يعيشون ولحمدلله على كل حال

استمرت حياتنه هيج ودوامي مازلت متفوقه بي بعد ٣ اشهر واخلص السنه ...بنان تخابرنه يوميه وكل جمعه يمنه يوسف اااخ منه ميكعد ربع ساعه اذا مالطش شعر او شي فصحى حلكه مثقف على كولت بنان ...

دائما بان تدزلي رسايل يوسف مال غزل وتكولي دوريلي غزل مثل سوالفه فصحى لو راقي مو كلمات شعبيه ..مثلا جان كاتب وهذا شي بقه بالي احس بي معنى بس اني يلامسني الكلمات برغم بنان تضوج من هالطريقه ..

اروع مافي حبنا
انه ليس له عقل ولا منطق
اجمل ما في حبنا
انه يمشي على الماء ولا يغرق...

_ دعيني اؤسس دوله عشق
تكونيين انتِ الملكه فيها
واصبح فيها انا اعظم العاشقين ..

جانت دزلي هاي المحادثات على تلفون ماما لان ماعندي تلفون وتكولي بحوشي الكاع ورديلي واني مطفيه بهيج سوالف اطير على مريم واطلب تنطيني شعر وهاي تكرهه العربي تكوم تنطيني شعبي وهم بدوري اروح ادزهن ل بنان وهاي ترول بيه وخليتي يوسف يضحك عليه ..جانت مريم تنطيني شعر اتذكر لهسه ..