أصعد الدرج والحظ🍀 ينزل بالمصعد

الجزء التاسع

صحيت من النوم مخلوعة من الكابوس الشفتو مشيت إتوضيت و صليت الصبح أصلا الليلة الجمعة قعدت أقرى لحدي الساعة تسعة نزلت تحت لقيت أمي بتشرب في الشاي
_ بسبوسة صباح الخير 😘
_ صباح النور والسرور على أحلى بنت في الدنيا
_ كبي لي شاي عاوزة أشرب معاك
_ حاضر من عيوني
قعدت أتونس مع ماما شوية و بعد داك مشيت بيت مالك الليلة الفطور عند سمر فقلت أسعدها شوية ، أول حاجه عملتها إني أتأكدت إنو بوبي مربوط ، جيت داخلة لقيت مهند ببكي
_ هنودي مالك حبيبي
_ مافي زول بلعب معاي 😢
_و أنا مشيت وين 😉 بعدين ماما حتجيب ليك بيبي قريب و حيلعب معاك ، أمشي هسى جيب البليستيشن 🎮
_ حاضر 😀
مشيت لي سمر في المطبخ ساعدتها شوية و قعدت أتونس معاها
_ يارا مش إنتي إمتحناتك قربت أمشي اقري عليك الله أنا بتم الباقي
_ كيف يعني أخليك تشتغلي براك وانتي قربتي تولدي ، بعدين أنا قريت ما تخافي علي
مهند جانا في المطبخ : عمتو أنا جبت البليستيشن
_ طيب بس دقايق أسوي لي نفسي عصير وأجيك 😊
قعدت ألعب مع مهند في الأرض لكن كالعادة حظ مافي ما فزت قعدنا نلعب قيم تاني كنت قاعدة أشرب العصير 🍹 و ألعب ، جبت أول قون لي 😂 إنفعلت شديد من الفرح و شوت العصير في الجهاز 😱 إتلفت لي مهند لقيتو قاعد يبكي 😭 : بابا بابا
_ مهند و الله أنا ما قاصدة بجيب ليك واحد تاني بس ما تكلم أبوك
_ لا ما حاتجيبي لي أنا حاكلم ليك أبوي
_ ود الكلب دا جزاتي 😢
( نعم قلتي شنو )
إتلفت ورا لقيتو مالك 😱
_ كدي كرري القلتيهو
_ هاااا 😓 سلامتك
_ شنو 😒
_ قلت سلامتك

ماما و نرمين جو ، ماما جابت معاها الملاحات ، مشيت نظمت السفرة و نرمين رصت معاي الأكل طبعا مالك كان بحمر لي ساي 😂 خلصنا أكل و سمر جابت التحلية
إبتسام : يارا مش عندك إمتحان بكرة
_ اي
_ قومي طيب قاعدة تسوي في شنو
سمر : أي يا يارا ولو على التحلية أنا بجيبها ليك بعدين 😊
_ الله ما يحرمني منك يا سمورتي 😘
رجعت البيت و قضيت اليوم كلو قراية ( قراية الدفس المن غير نفس 😂)