أصعد الدرج والحظ🍀 ينزل بالمصعد

الجزء التاسع عشر

إتلمينا كلنا في الجامعة  أي زول كان واقف مع شلتو و بسترجع في زكرياتو معاهم كنت لابسة فستان لونو بيبي بنك من فوق مشغول بالتل و جاي فاري لي تحت ، نرمين ظبت لي فل ميكب رهيب جاي مع لوني الأسمر معظم زمايلي ما عرفوني 😌 ، طبعا حتسألوني حليت مشكلت طول الفستان كيف 😀 شلت من نرمين كعب عالي شديد أول مرة ألبس كعب طولو كدا في حياتي ، كنت بمشي و انا متكلة على رماز 😂😂
ركبنا العربات و إتحركنا أنا و غادة فتحنا الشبابيك و بقينا نصرخ 😂😂😂 و صلنا الصالة بتاعت التخريج لقينا أهلنا قاعدين مع بعض مشيت سلمت على أهل صحباتي قربت من مالك لكن إتصدمت لما شفت  القاعد يتونس معاهو ، إتخيلو قاعد يتونس مع جواد أخو غادة 😲 ،
مالك : مبروك يا يوري تعالي ، بالجد ما كنت عارف إنو جواد دا أخو صحبتك
يارا : هاااااااا 😶
_ جواد دا حصل جمعني بيهو شغل و من اليوم داك بقى صحبي
جواد : ونعم الصحاب و الله
أنا كنت ما عارفة أودي وشي وين و هو كمان ما قصر أبا يزح عينو مني ما كنت قادرة أحدد دي حميرة و لا شي تاني 
طبعا أنا تالتة الدفعة و لينا التانية  😍 ما كنت قادرة أوصف فرحتي معقولة أنا الكنت بكره القراية كره العمى أجيب كدا ،أحتفلنا مع بعض و إتصورنا صور حلوة بالجد دا كان أحلى يوم في حياتي رجعنا البيت متأخرين زي الساعه ٢ صباحا رقدت في السرير و ما جاني نوم كنت بفكر في جواد ، و إنو كيف الصدفة تجمعهم و يطلع بعرف مالك 
قدمت لي كم شركة هندسية و كلهم رفضوني 😭 ياخي يلعن ابو الحظ  🍀 زاتو 😒
في يوم صحيت الصباح مشيت المطبخ لقيت أمي و نرمين قاعدين يطبخو
_ أصبحنا وأصبح الملك لله الأكل دا كلو لينا 😃
إبتسام : عليك النبي و أنا أسوي الأكل دا كلو ليكم لشنو مربية أفيال أنا 😒 ، أخوك عازم أصحابو هنا
_ 😪 دا كلو لي أصحاب كريم ، و الله محن
سمر جات داخلة المطبخ : مالك عازم أصحابو هنا عندكم لأنو بيتنا ما بشيلهم كلهم
_ م مالك 😶
هنا فكرت مع نفسي مالك عازم أصحابو و أكيد جواد معاهم الليلة أنا أسوي شنو طلعت أوضتي و ضربت لي رماز
_ زفته أنا الليلة جايك في البيت
_ خير مالك
_ يعني إلا يكون في مصيبة عشان أجيك
_ صحبتي و أنا عارفاك
_ خلاص مسافة السكة
مشيت إستحميت 🚿 و لبست لي بلوزة و بنطلون و نزلت
_ يا بت ماشة وين 
إتلفت لقيتها ماما
_ ماشة وين و مخليه لينا الشغلة دي كلها و الضيوف قربو يجو
_ رماز صحبتي دي عيانة 💔
_ واااي سلامتها خلاص عفيت ليك أمشي شوفيها

مرقت و حمدت ربي إنها خلتني أمرق مشيت لي رماز دقيت الباب فتحت لي أمها
_ خااالتووووو 😍 كيفك
_ أهلا يا بتي مشتاقين عديل لي بقيتي ما بتجينا
_ و الله يا خالتو كنت ساكة موضوع الشغل دا
_ الله يوفقك
مشيت لي رماز في أوضتها
_ أها قولي لي مهببة شنو تاني
_ ما حأرد عليكي لأنو لسانك دا متبري منك 😌

مشت جابت لي العصير 🍹 و جات : أها حتتكلمي ولا لا
_ والله يا رماز مالك عازم أصحابو في بيتنا
_ أهاااااا و جيتيني هاربة من الشغل ، و أمك كيف خلتك 😐 
_ أي ، و أقنعت ماما إنو إنتي عيانة عشان كدا خلتني ، وفي سبب تاني عشان جواد
_ مالو جواد ، و حأتغاضى عن إنك مرضتيني و أنا نصيحة 
_ طلع صاحب مالك
_ إنتي جاااااااادة 😱 يا بت المحظوظة
_ محظوظة شنو عليك الله خليني أتم كلامي
_ أتحفيني
_  تتذكري لما سألتك من إسم صفحتو في الفيس يلا مشيت فتشتها و بقيت بتصفح فيها و شكلي عملت ليهو طلب صداقه بالغلط 😥  و ما عرفت الكلام دا إلا بعد ما وافق عليهو
_ أها لحدي هنا الموضوع عادي ، حصل شنو تاني
_ يلا أنا ما عرفت أسوي شنو غير إني قمت حظرتو 
_ يارا إنتي متخلفة 😐 ، كان تمشيها عادي ما فيها شي
_ 😭😭😭😭😭😭
بعد ما فطرنا مرقنا إتفسحنا شوية مشينا إشترينا  إسكريم و جيانا أكلناهو في العربية
رماز : يارا إنتي عملتي شنو في موضوع الشغل ؟
_ أبدا كل الشركات القدمت ليها رفضوني
_ طيب رسلي لي الحاجات المهمة في الإميل عشان اقدم ليك في شركة أبو غادة ، طبعا الشركة دي معظم الدفعة إتوظفت فيها
_ بالجد 😀 إن شاءالله يقبلوني
وصلت رماز و رجعت البيت لقيت الضيوف مشو 😍 و كريم قاعد يحضر في التلفزيون و معاهو مهند
_ كيمو ، إزيك مختفي وين الأيام دي
_ كان عندي قراية
_ إنت مالو شعرك دا من حلقتو تاني ما قام 😕 أوعى تكون صلعته
_ الله أعلم أمشي خليني أحضر
طلعت أوضتي و غيرت هدومي و أول حاجة عملتها إني مشيت لي نرمين في أوضتها
_كدا يا زفته تخلي الشغل كلو علينا 😤
_ الجا منو من أصحاب مالك
_ يعني أنا أقعد أعدهم ليك كلهم
_ قصدي جواد جا معاهم
_ أي 😐 لي يعني ، المهم مالك قال ليهو يشغلك معاهو و وافق  قال تجي تعملي الإنترفيو في أي وقت
_ بالجد أنا كنت بتكلم مع رماز في الموضوع دا