My Beloved Partner

( 17 )

unicode

ချစ်ရသူတစ်ဦး suicide လုပ်သွားသည်ကို ခံစားရသူအဖို့ ဘယ်လောက်နာကျင်နိူင်ကြောင်း ရိပေါ်မှန်းဆနိူင်သည်။

သူစိုက်ကြည့်နေတာကို ရှောင်းကျန့်က ရိပ်မိသွားဟန်ဖြင့် ဖျတ်ခနဲပြန်လှမ်းကြည့်သည်။

" ဘာလဲ သနားနေတာလား "

ရှောင်းကျန့်ရဲ့ မေးသံထဲတွင် လှောင်သံနှင့် မကျေနပ်သံများဖြင့် ရောနှောနေသဖြင့် သူအကြည့် ပြန်လွှဲမိသည်။

ဘဝရဲ့ နာကျင်စရာတစ်ပိုင်း တစ်ဒေသကို ပြောတုန်းကပြောပြီး အသနားကျ မခံချင်ဘူး ထင်ပါရဲ့။

" ခင်ဗျားတော်တော် ဝမ်းနည်းခဲ့ရမှာပဲ "

သူက စိတ်ရင်းနဲ့ဆိုလိုက်ပေမယ့် ရှောင်းကျန့်က မထီတရီပြုံးခြင်းနဲ့သာ တုံ့ပြန်သည်။ ပြီးတော့ စားလက်စ ပန်းကန်ကိုသာ စိတ်မပါတပါဖြင့် တူနှင့် ထိုးဆွနေလေသည်။

" နာကျင်စရာတွေကို အဆုံးသတ်ဖို့ ရွေးချယ်သွားတဲ့လမ်းပဲ မားဆုံးသွားတာထက် မားရဲ့ခံစားချက်တွေကို ဘာမှမသိခဲ့ရတာ ပိုနောင်တရတယ်

မားက အမြဲတမ်းကြံခိုင်သလို ဟန်ဆောင်တတ်တယ် အဲဒါကြောင့် မားအဆင်ပြေတယ်လို့ပဲ ငါတွေးခဲ့တယ် "

" ခင်ဗျားနဲ့တူသားပဲ "

သူလွှတ်ခနဲ ထွက်သွားမိသည့်စကားကို ရှောင်းကျန့်က အံ့သြတကြီး မော့ကြည့်သည်။ ပြီးမှ နားလည်စွာဖြင့် ဖျတ်ခနဲပြုံးသည်။ ဒါပေမယ့် နောက်ကွယ်မှာ လှောင်ရိပ်ပါတဲ့ အပြုံးတစ်ခုပဲ။

" ငါ့နားမှာ ရှိတာ ရက်ပိုင်းလေးနဲ့ ငါ့ကိုနားလည်သလို ဟန်ဆောင်မနေနဲ့ "

ခပ်ပြတ်ပြတ်ပြောပြီး ထမင်းစားဝိုင်းက ထသွားတော့သည်။ ရှောင်းကျန့်ထသွားမှ မန်နေဂျာအန်းက သူ့ကို လျှာရှည်ကောင်ဟု ထလှမ်းဆဲသည်။

မန်နေဂျာအန်းကို အဖက်မလုပ်ချင်သဖြင့် သူ မကြားဟန်ဆောင် လိုက်တော့သည်။ စားပွဲဝိုင်းမှာ သူတစ်ယောက်တည်း ကျန်ခဲ့သည်အထိ ထိုင်ကျန်ခဲ့ပေမယ့် စားစရာများကို စိတ်ဝင်စားခြင်း မရှိခဲ့။ သူ့စိတ်ထဲ ရှုပ်ထွေးပွေလီသော အတွေးများနှင့်သာ ပြည့်နှက်နေခဲ့သည်။