لعلك تكون اقوى دروس حياتي ((لعنة اختيارك))

البارت الثاني

السلام عليكم

لعلك تكون اقوى دروس حياتي
                              ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.............................

بيومها وليلتها ما جنت اعرف شعوري شنو من كال عمي استحيت وكمت طلعت من الاستقبال
:
بس ما احجي شنو فرحتي جانت ما تعادل كنوز الدنيا كلها معقولة صدك وهيج اصير خطيبتة وراها مرتة
:
طلعو بيت عمي راحو لبيتهم وامي اشوفها جن ما عجبها هذا الشي مبين من وجها من اجو خواني كالت الهم
:
من دنام اجتي علية للغرفة وكعدت يمي وكالت سمعتي عمج شنو كال انتي شنو رايج حجيت وية خوانج وكالو شوفيها شنو ردها
:
دنكت وكتلها بكيفكم انتو تفاجات من ردي حسبالها هم راح ارفض ردت يعني مقتنعة انتي
:
سكتت وما رديت عاد ردت يعني من خلال شكلج انتي موافقة وتريدي رديت ماما بكيفكم
:
باوعت علية وخلت وطلعت من الغرفة بس ما ادري شبيها يعني معقولة ضاجت لان هالمرة ما رفضت
:
لو لان ما قبلت بكرايبها ورضيت باحمد مددت عالجرباية واجة على بالي احمد اووووووف معقولة لو داحلم
:
مدا اصدك هيج يجي يوم واصير الة من صدك ونصير اني ويا بغرفة وحدة اوووووووف ربي دخيلك فرح كلبي
:
ثاني يوم كعدت طلعت للمطبخ وشفت ماما كاعدة تنضف خضرة وبالها مو يمها عبالك
:
غسلت وجهي ورحت صبحت عليها كعدت يمها وحتى ما سويت الي ريوك كتلها شبيها نبع الحنان مو على بعضها
:
زينب : لا ما بية بس دانضف بالخضرة
:
روان : انبلة بيج شي من البارحة بليل من طلعو بيت عمو وانتي مو على بعضج شبيج
:
زينب : والله يا امي تريدين الصدك لو ابن عمة
:
روان : اكيد الصدك كولي خير اكو شي
:
زينب : لا ماكو بس اني ما مرتاحة لسالفة انو تزوجين احمد ابن عمج
:
روان : ليش يا ستار شكو
:
زينب : هاي شبيج
:
روان : لا ماكو شي بس اكول شكو صاير شي سامعة شي
:
زينب : لا والله ما سامعة بس احس ما تتناسبون صح ولد حلو واخلاق وجمال ورتبة وكامل والف وحدة تتمناه
:
لكن احسج مترتاحين ويا اذا اخذتي اني مو قصة انو اريد اخرب لكن هذا الي يتراوالي رغم انو الولد من يوم الي انخلق وصار لليوم ما شايفة علية عيب بكد الشعرة
:
بس ما اشوف انو تتناسبون تكونون زوج وزوجة يعني ابن عمج اي لكن مرتة ما احسها راهمة يعني اتصور ما اشوف احمد يشوفج زوجة الة مجرد بت عمة
:
وبعد ما ادري خايفة وانشالله يطلع ضني خطأ وحتى خوانج البارحة مقتنعين بعد موافقتج لكن اني شو ما مرتاحة
:
روان : جفلت من حجي ماما وكتلها لا حبيبتي هذا الشي يتراوالج واذا تريدين ما اوافق بكيفج وعلى راحتج
:
زينب : اي مبين اشوفج هاي كم واحد اجو خطابة ما رضيتي ولحد البارحة اقنع بيج على هذا المهندس الي اجة وما رضيتي
:
بس كال عمج طرتي وما صدكتي يلة عالعموم الله يقدم الي بي خير انشالله قابل شريد اني لعد هو اريد راحتج وسعادتج
:
وماكو احسن من بيت عمج لان يحبونج وعمج نفس ابوج ومرت عمج مرة حبابة وتخاف الله وما عدها حقارة و ضلم
:
ضلت تحجي وياي وراها كملت حجي وكمت سويت ريوك الي وجديتي اجت للمطبخ وهم حجت وياي صح فرحانة لكن حجي ماما سوة رهبة عندي وراها ارجع اكول لا هذا مجرد شعور خيالي يتراوالها
:
وللضهر اجو خواني وبلغتهم ماما بقراري وكالو نرد الجواب الهم انو اني موافقة يمة ساعتها احس كلبي يريد يوكف
:
هذا كلة واني بعدني مجرد بس رديت الموافقة ما شفتة ولا اي شي ثاني سويت وهيج يريد كلبي يوكف
:
لثاني يوم يلة رجعت امي الجواب لعمي مو يعني انحسب ثالث يوم بس احمد ابد ما شفتة هذا الوكت كلة
:
هو من قبل جان عندة دوام وما نازل وراها استحي اسال البنات فما شفتة ابد كيفو عمي ومرتة بموافقتي
:
والبنات يكمزن ما مصدكات يكولن راح تصيرين ويانة بنفس البيت المهم كال عمي بس ينزل احمد من الدوام نجي عليكم
:
ومشن ٤ ايام وما نزل احمد وهاي مو عادتة المفروض هو قبل هذا الوكت نازل لان اني حافضة وكت نزولة وكم يوم دوامة
:
بس كلت يجوز صار عدهم واجب ضروري او غيرة ما علقت رابع يوم بليل اجوي بيت عمي يمنة تعللو
:
وعمي فتح الموضوع اول شي اني ما دخلت استحيت بس بعدين صاحني عمي ومرتة وجديتي
:
طبيت للاستقبال سلمت وعبالك اول مرة اشوفهم ويشوفوني جنت كلش مستحية جان احمد هم جاي
:
كعدت بصف امي بس البنات صاحن الي وكمت كعدت يمهن همة ضلو مستمرين يحجون وخواني هم جانو موجودين
:
بس احمد ابد ما سمعت الة حس صار عندي فضول اشوفة رفعت راسي لكيتة مدنك بالكاع
:
وضايج او بالاصح صاير اعصاب ووجهه محتقن وصاير لونة احمر دم واذا واحد كلة بز يموتة خلاص
:
حجن وياي البنات واني كل شوي ارفع وجهي اشوفة تالي هو هم رفع راسة باوع علية بس مثل الي خازرني عبالك
:
راسا نزلت وجهي بعد ما كملو حجي كال واخيرا نطق وسمعت صوتة بس اني عندي شرط
:
لازم تسمعون شرطي رفعت راسي باوعت مثل الي يحجي من ورة خشمة ردت امي كلتلة كول عمة شنو الشرط وانشالله سهل
:
احمد :
:
اني اريدها تترك الدراسة وتكعد بالبيت راسا باوعت على امي الي قبلي باوعت علية
:
بصراحة انصدمت ابد ما جان هذا الشي على بالي والمشكلة اني احب الدراسة اكثر من روحي
:
ودوم اكول اريد اصير دكتورة تالي هسه اترك دراستي بس المشكلة انو اني احب احمد اكثر من روحي
:
يعني لو هسه يكول استغني عن الهوى لخاطري هم اعوف الهوى وما صدكت اجى اليوم الي يجي ويخطبني بي
:
ردت امي بس عمة شنو الاشكال الي يصير اذا بقت داوم وهية اكيد ما راح تقصر بواجبك
:
رد وبعين صلفة والله عمة اني رجال وعلى طول بالشغل وارجع تعبان واريد هدومي نضيفة فراشي نضيف ومرتب
:
واكلي موجود وكلشي كامل وجاهز وهية تضل تكمل دراستها وتضل تقرة لو بالدوام رجعت وما لكيت شي حاضر
:
ام يوسف : يا ابني قابل ٢٤ ساعة هية تقرة لو بالدوام والشي الي متلحك علية لا سامح الله او ما تكدر تسوي
:
امك موجودة وامك مو غريبة وما راح تضوج وادري بيها تحب بتي وهم هية امك الي ربتك وتعبت عليك وكبرتك
:
ويومية هية تسويلك هذا الي دتحجي هسه وتكولة يعني مو فد اشكال الشهادة هم حلوة للبنية واني اريدها تكمل وافتخر بيها وهية هاي البنية الوحدة عندي
:
احمد : اني على شنو مزوج لعد اذا امي تحضر الي هذا كلة ما مجبور اخذ طالبة او موضفة اخذ ربة بيت احسن
:
وبعدين امي مرة جبيرة وتعبانة وهية تريدني ازوج علمود تخلص مني ومن مسؤوليتي وترتاح وخواتي كل وحدة عدها دراسة وتقرة
:
ويلة كل وحدة شايلة نفسها فما اكدر اخليها تكمل دراسة رد اخوية يوسف كلة احمد انتة رايد لو ما رايد
:
شو من خلال طريقة كلامك معاجبك وضايج بيك شي خوية رد لا ما بية بس اني هذا شرطي غيرة ما اقبل وما اعوفة
:
اباوع الوجوه كلها صافنة علية ومنتضرين جواب مني واني حتى بطني مغصتني والبنات يباوعن علية
:
وعلامات القلق باينات على وجهن رادت امي تحجي بس شنو تحجي ما عرفت لان سبقتها وكتلهم موافقة
:
كلها انصدمت وحتى احمد كلها ما جانت متوقعة اقبل وعبالهم راح ارفض لان اني يدرون بية روحي بالدراسة
:
عندي وجهوني عالموت ولا تكولون اتركي الدراسة بحيث كلش شاطرة ومتفوقة واشطر حتى من بنات عمي ثنينهن
:
وحتى المدرسات يكولن الي انتي طلعين دكتوراه اذا ضليتي على هذا المعدل ودائما جنت اطلع قدوة الصف بالشطارة
:
فجوابي الهم انو اقبل بشرط احمد واترك الدراسة جان صدمة للكل حقهم اذا هو اني نفسي انصدمت وصح كلت اتركها
:
بس مجرد الحجاية ومجرد التفكير متت قهر لعد من تصير صدك وما راح اداوم شلون امي اباوع عليها حتى مثل الي اختنكت
:
واني احس قطعة من كلبي راحت وكلبي ضل يوجعني بس شسوي احبة اموت علية النفس الي يصعد وينزل احمد
:
هسه علمود شرط ما اوافق علية بس جان الاختيار اشبه بالجحيم يعني جنت بين نارين ونار اصعب من نار لكن ضغطت على نفسي ووافقت على احمد
:
:
عمي كلة عندك بعد شي ما ادري حسيتة جاوب من ورة خشمة لا مدري اني تاثرت بسالفة الدراسة
:
كام وكال عندي اتصال ضروري لازم اسوي من رخصتكم خواني استاذنو وهم مستغربين تصرف احمد
:
وكالو انتو بيت عمنة التفاصيل الي بقت براحتكم سولفو بيها وخلو وطلعو امي ومرت عمي بدن يحجن بالتحضيرات لان يريدون نهاية الاسبوع الخطوبة :