لعلك تكون اقوى دروس حياتي ((لعنة اختيارك))

البارت الثامن

السلام عليكم

لعلك تكون اقوى دروس حياتي
                                 ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

...........................

عفت كلشي وراية وطلعت عمي انهد حيلة وصار فدنوب بس اسمع عياط عمتي والبنات
:
رجعت اركض علية لكيتة كاعد عالتخم والبنات وعمتي فاتحات دكم الدشداشة من يم ركبتة ويهفن الة
:
هو من شاف عمي هيج سكت وكام وية عمتي والبنات بس عمي دفعة وما قبل يتقرب علية وكلة بري منك الى يوم الدين اذا سويتها صدك
:
هو عاف الكل وطلع فات من يمي بعد ما خزرني وراح كعدت للكاع بمكاني واني اباوع يا ربي تعبت
:
عمي هدء شوية بدون ما ينتبهون خليت وطلعت طبيت لبيت اهلي من الباب الخارجية وشكلي كلة مخربط
:
عيوني حمر ومورمات ووجهي صاير خريطة يوسف جان شايل السويج بيدة ويكلب بالتلفون وكاشخ يريد يطلع
:
سمع صوت مشي بالحديقة رفع راسة وشافني تفاجأ وانصدم بشكلي راسا خلة الموبايل والسويج يجيبة واجاني يركض
:
بس كلي شبيج روان منو وياج شمرت روحي بحضنة وكمت ابجي من كل كلبي وابجي بصراخ
:
هو تخبل امي على حسنة طلعت تركض جانت بالمطبخ شافتني لو انجنت وعاطت يمة بتي شبيها يا ستار
:
ضليت بحضن يوسف واحنة واكفين وابجي وهمة يريدون بس يفتهمون شكو كوة من بين شهكاتي كتلهم
:
ا ا احمد يررريد  يزوووووج وطكيت بجي يوسف انصدم وامي لطمت على خدها ولج يمعزاية شدتحجين شنو يزوج هو انتو شكد صار الكم من ازوجتو
:
خلي نفوت جوة واحجيلكم ما بية بعد اوكف يوسف راد يروح لبيت عمي جلبت بي طبينة للبيت وكعدنة بالصالة
:
وحجيت الهم كلشي بس ما كلت ضربني امي لطمت على رجليها وعلى صدرها وعلى وجها وكالت
:
شكتلج اني شكتلج مو كتلج احسة ما موالمج بس انتي ذبحتي روحج علية عبالج ما ادري بيج تحبي ولج تاج راسة اتقدملج ورفضتي
:
تالي هسه ما صارلج شهرين من ازوجتي حيزوج عليج شنحجي شنكول للعالم شراح يحجون ويكولون
:
يوسف صار اعصاب وكام يريد يروح على بيت عمي ويريد يهد على احمد توسلت بي يكعد لان عمي هسة ينجلط ما عايزة هية
:
مقبل وتخبل وخصوصاً يوسف كلش اعصاب بعد قاطات عن احمد وحتى ابو الحسن شوي هادئ الا يوسف
:
جديتي جانت كاعدة وسمعت الحجي كلة شبعت احمد مسبة وغلط وحلفت يمين الا تضربة اني وامي وجديتي علما كعدنة يوسف بالف يا علي
:
بس بقى صاير اعصاب ردت امي كلتلة بتي واطلكها منة والا اخذ حقها وعوفة يولي ولتنكس ايديك بي
:
يروح فدوة لاضفر رجلها ما عليك بي ولا تكبر راسة احنة ما نشمر بتنة ولا نجبره عليها الف واحد يتمناها
:
ولخاطر عمك زين ويانة ومثل ابوكم ودتسمع بي ما راضي على هذا كلة وحتى يريد يتبرى منة اذا ازوج
:
امي ضلت تلوم وتعاتب بية وتكلي شحجيت اني وكلت كلبي جان حاسني شوية واجتي مرت عمي
:
امي ما ضاجت منها ولا كلبت خلقتها عليها بس كعدن وحجن وامي ضلت تحجي على احمد وعمتي خجلانة من امي وتتعذر
:
اني احس راسي طبل عفتهن وكمت طبيت لغرفتي الي بقت على حطت ايدي امي لا لعبت بيها ولا غيرتها وخرت اللحاف ونمت بجربايتي
:
واتذكرت الي صار وتذكرت كره احمد الية ما كرهتة لا بس شكد انقهرت من عندة لكن رغم هذا كلة والي سواه بية ما داكدر اكرهه
:
حبي الة يزيد مينقص شكد تعبني وعذبني حبة بس مداكدر اكرهه وهذا الحب كلش مخوفني
:
ما حسيت على روحي شوكت نمت كعدت الساعة ب٩ بليل راسا طلعت على امي وكتلها ما اجى احمد
:
باوعت علية وكالت روان بالله لو جبتي طارية كدامي الا اتفل بنص وجهج واذا فكرتي ترجعيلة الا اني اتبرى منج واعتبر نفسي مخلفة بس ولد ٢ ما عندي بنية
:
سكتت وكعدت يمها بدون ولا صوت ضليت اريد اعرف اجة لو لا كلتلي امي كومي صلي واني حسويلج عشى
:
بس راحت للمطبخ سالت جديتي كلتلي لا يابة شكد انقهرت كمت توضيت وصليت ودعيت ربي يحل هاي السالفة واخلص
:
طلعت امي خلت كدامي صينية العشى سودة علية مسويتلي كباب وكنتاكي لان تدري بية احبة لكن ردت بس اكدر اكل ما الي نفس
:
اكلت لفة وحدة وبقيت اعلس بيها ساعة ومدتخلص اجوي خواني وابو الحسن هم متخبل عالموضوع حضني ويكول
:
خلي يولي احسبي نعال تلبسينة برجلج وانكطع وشمرتي هو ما عرف قيمتج تاج راسة انتي حتى من كال هيج علية رغم الي سواه بية ورغم الكره الي يكرهنيا احمد لكن ضجت ما ردت اخوية يحجي علية هيجي
:
ضليت ساكتة ما اعرف شنو احجي وشنو اكول واسبوع كامل بيت اهلي لا وصلني احمد ولا دك علية ولا شفتة
:
راحت امي لبيت عمي جابتلي كم ثوب ورجعت سالت البنات كالن اجة مرة وحدة تعارك وية ابوية ورد طلع