لعلك تكون اقوى دروس حياتي ((لعنة اختيارك))

البارت العاشر

السلام عليكم

لعلك تكون اقوى دروس حياتي
                                  ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

...................

صار يوم العرس طبعا مقبلت عمتي تروح بس هو لح داك على عماتي وخالاتة متعذرات منة ما قابلات يجن وعماتي كايلات الة بت اخونة ما بيها شي علمود تروح تتزوج عليها اعذرنة بس منجي للعرس
:
رحنة بالحنة ساعة هواي كعدنة اصلا رحت شبعت قهر ورجعت اني مكيجت نفسي اني مكياجي يخبل بس ما الي واهس بكلشي خليت خفيف مو ثخين ضلن البنات يحجن مجرد طوخت الحمرة
:
المهم وصلنة وطبينة وراح كعد بصفها ومكيف وكل شوي يبوسها وكل قطعة ذهب يلبسها الها يبوس مكانها
:
قطعو الكيكة ومن وكلها صارت كريمة على حلكها لا مسحها بايدة ولا خلاها تمسحها قدم شفتة باسها من شفتها كدامنة ومسحها الها
:
شبعت قهر وما اتحملت طلعت كعدت بالطرمة علما كملو الحقير كتلة ما اجي يكلي لا لازم تجين
:
خلصنة وطلعنة وهو فرحان وشافني مقهورة بس ما اهتم سوة حنة شكبرها ما خلة واحد ما عزمة وفد فرحان ويضحك واني بعرسي مقبل يسوي وشكد رادو منة كرايبنة كلها علمود يركصون ما رضى يسوي
:
عفت الاول والتالي طبيت بغرفتي وكعدت شكد حاولن وياي البنات اطلع احجي بس قفلت الباب وكعدت كاعدة بزاوية الغرفة وابجي
:
وقهرني اكثر لمن عرفت حيسوي العرس بقاعة وارقى قاعة بغداد حسب طلبها هية ومناك للفندق ومن الفندق لسليمانية شهر عسل
:
ملخت شعري خرمشت خدودي لطمت على صدري وحدي بالغرفة اني جنت اريدهن مقبل يسويلي ولا وحدة منهن
:
ردت بس شي واحد يرضى اسوي مقبل تالي هسه هية كلهن حيسويهن الها صدكت كمت اريد اروح لاهلي وتالي من وصلت للباب تراجعت
:
شخصيتي هواي ضعيفة وبلة قيمة وكرامة يم احمد اجذب اذا اكول بيومها نمت للصبح كاعدة محراب عيوني ما غفن
:
وكد ما بجيت ومنا سهرت عيوني ورمن وعبالك معضوضات اذن الفجر كمت اريد اصلي طلعت برة بالحمام الفوك
:
صاير بصف الغرفة الي اني بيها وغرفتي او جانت غرفتي هسه صارت غرفة عذراء هية بيها حمام
:
توضيت بسرعة ورجعت للغرفة فرشت سجادتي ولبست ازار الصلاة ووكفت اريد اصلي نزلت دمعة غير عن دموعي الي تجري من البارحة واليوم دمعة حارة مو جوت كلبي لا لجعت كلبي لجع
:
كلت يا صاحب الاذان ارشدني للصح وريحني تعبت صليت واني ابجي ابد ما سكتت كملت صلاة ورجعت لفراشي
:
تعبانة واحس هموم الدنيا كلها على صدري اريد اتنفس ما اكدر ضليت هذا حالي للساعة ب٨
:
جنت مغطية راسي سمعت الباب نفتحت لان من طلعت توضيت ورجعت ما قفلتها بس سديتها
:
عرفتة هو الي اجة حسني كلبي وفعلا طلع هو اجة كعد يمي على طارف الجرباية ندسني على كيف روان روان
:
سويت روحي نايمة ما جاوبتة زين شلون راح اطلع وجهي واخلي يشوفة مورم وحيعرف راسا
:
جر الغطة على كيف وبعد الشعر من على وجهي الي صار راسا فتحت عيوني راسا كلبي كام يدك سريع
:
باوعت علية اجتي عيني بعينة هو فتح عيونة مصدوم كام وراسا جرني من ايدي كعدني وكلي
:
هاي شبيج ليش هيج عيونج مورمة
:
ما ادري
:
هو شنو متدرين روان
:
مو هواي نمت من البارحة ولحد هسه
:
روان لجذبين حتى مبين من عيونج ما نايمة
:
دنكت راسي شريد احجي ويا سكتت محجيت شي
:
رفع راسي بيدة ليش هيج دسوين بنفسج روان
:
هنا متحملت صدك بجيت بوجها حضني واني جلبت بقميصة كل قوتي وتوسلت بي
:
احمد فدوة لتعوفني ولتروح احمد والله احبك وروح ابوية احبك حتى اهلي عفتهم علمودك بشنو مقصرة وياك اني والله ما اكدر اعوفك
:
احمد اني داموت داتكطع من جوة احمد... احمد فدوة لتعوفني ترة حتى المخبلة ما تسوي نفسي قبلت تزوج علية ورجعت وحدي وبارادتي
:
ورحت قنعت اهلك الي ما جانو قابلين ورحت خطبت الك بنفسي وخطيبتك تجاوزت علية وغلطت وسكتت وحتى ما حجيت وكتلك
:
ولحد البارحة اني رحت بالحنة مالتك انتة وياها وشفتني انقهرت وطلعت برة حتى ما ضليت بس ما اهتميت الي
:
احمد والله احبك شمسوية الك علمود تكرهني هيج
:
ومنو كال اكرهج
:
اذا انتة تحبني لعد ليش هيج دتسوي بية
:
روان احبج والله احبج بس حب عن حب يختلف اني احبج ك بت عمي وهسه احبج والج مكانة عندي لان انتي قايمة بواجبي رغم كل الي صار
:
ورغم الي سويتة بيج وما مقصرة بحقي واني بنفسي اعترف اذا مو انتي اني اضيع واتيه امي ما مداريتني بكد ما انتي مداريتني
:
بس روان احبها افتهمي احبها مثل ما انتي تحبيني وهيج متخبلة علية اني هم هيج احبها واتخبل عليها وانتي اذا تحبيني تتحملين
:
سكتت ما بيدي شي شدانتضر اليوم العرس مالتهم يعوفها ويرجعلي لو يبقى بس الي سكتت واكتفيت بالسكوت
:
باسني من راسي كتلة اريد منك اخر طلب بما انو حتتزوج اليوم واعرف كلش زين وادري بعد ما اكدر احجي وياك وانسى نفسي زوجتك
:
كولي شتريدين واني حاضر
:
بس ولو نص ساعة خليني انام بحضنك وعلى صدرك وكلشي ما اريد منك بعد ابتسم الي ومحجى شي لا راسا مدد عالجرباية وفتحلي ايدة
:
رحت نمت على صدرة وهو حضني ويلعب بشعري اوووووووف شيصير لو نبقى هيج قابل تنكلب الدنيا
:
ضليت ابجي بسكوت بس دموعي تنزل ضلينة هيج لحد الساعة ب٨ ونص يعني ضلينة نص ساعة واني نايمة بحضنة
:
رفعت راسي وكتلة يلة كوم حتتاخر كام ورجع حضني وباسني هالمرة بشفتي مو راسي وكلي سامحيني
:
ابسط حقوقي هاي بس من حضني وباسني احس روحي ملكة ملكت الدنيا كلها عبالك راد احضر ريوك ويكلي هم يلة ما ضل وكت
:
طلع هو تنهدت بحزن شسوي هذا الي كاتبة الله بعد يصير لكن الجاي شنو وشراح يصير ما اعرف بعد
:
عزلت غرفتي ونزلت لكيتة بالمطبخ ويخابرها وعيني وحبيبي وعافيتي من شافني سكت محجيت شي وكفت اسوي الة ريوك
:
بدون ما اسالة لان اعرف شنو يحب وشنو يتريك وشنو يريد لا عمتي ولا البنات كاعدات وعمي لكيتة طالع من الصبح
:
يمكن دييقى بيت وحدة من عماتي لان خطية ما الة عين يروح لاهلي بسبب احمد حتى لو هو ما راضي ولان عرفو اهلي انو جبر احمد يزوجني
:
سويتلة الريوك وهو طلب مني اكعد اتريك ويا هو ضل يخابر بجماعتة وعالمركز مالتة وخابر واحد من الحماية وكلة بفلان ساعة تجي تاخذ السيارة تزينها كمت اسوي الة لفات وانطي وهو ياكل
:
وحدة من اللفات بالشقة عض اصبعي فد فرحت وكيفت احمد ديشاقيني كملنة ريوك وكمت نضفت البيت سويت غدة
:
حضرت كلشي صارت ب١١ وعمتي ما كعدت شنو السالفة طبيت اريد اشوفها خاف بيها شي لكيتها نايمة بفراشها وتبجي
:
رحت نمت بحضنها وابجي وياها شوي ودك تلفونها محمد ابن عمي يعني اخو احمد جاوبتة عمتي وخطية من الغصة الي بيها متكدر تحجي بس تبجي
:
اخذتة منها وطلعت كعدت بالهول احجي ويا سلمت علية وكلي دكيت عليج البارحة شكد كتلة والله حتى تلفوني ما ادري بي وين ولحد هسة ما شفتة
:
حجينة بموضوع زواج احمد وهو يصبرني بجيت وكعدت اسولفلة كلشي وهو يصبر علية وكال بلكي هالاسبوع اكدر اجي عدنة عطلة بوكتها جان عدهم مناسبة ومعطلين
:
وحتى محمد يكلي ميستاهل تخسرين اهلج من وراه واني لو بمكانج من اول يوم اعوفة رديت علية محمد الحجي سهل بس الفعل صعب
:
محمد :
ما اكول غير الله يصبرج ويكون بعونج الجاي اصعب بت عمي اتحملي اذا رايدتة واذا لا اتركي وشوفي طريقج الف واحد يتمناج وانتي حلوة وما ناقصج شي وصدكي هو الي خسر مو انتي وهسه يتندم
:
محمد كلها دتكول هو الخسر مو انتي بس اني مداشوف هيج اني الي خسرت مو هو بالعكس اخذ الي يحبها واني ضاربني عرض الحايط
:
انتي صبري وشوفي وهسه تكولين محمد كال
:
ما ادري الله كريم لوكتها يلة عيني اني استاذن لان وراية بعد كومة شغل ومثل ما تدري حتوكع كلها براسي لان محد يقبل يحضر لان كلها ما راضية
:
سلمت علية وسديتة وكمت كملت الشغل الي بقى عندي عمتي صايرة فدنوب ما قبلت تروح للزفة واني احلفها والح عليها كد ما رفضت خفت لا صدك متجي خابرت عمتي الجبيرة كتلها عاد ولو بس انتي تجين ميصير
:
تقريبا ورة ساعة رجع احمد للبيت بس شنو الفرحة ورايح محلق انوب رغم هو البارحة حلق بس مسوي تعديل ومسوي شعرة يم الحلاق
:
صار وكت الغدة دكيت على عمي طمنت علية ما بي شي وسديتة صبيت الغدة وكملنة اجتي عمتي وقنعت مرت عمي تروح رغم هية ما راضية
:
كمت بسرعة غسلت المواعين ورتبت كلشي وصعدت ابدل بس ما اعرف كمت امشي واحس الدنيا دور بية وغواش بعيوني
:
طبيت للغرفة كعدت اريد اكوم ابدل بس ما الي لا حيل ولا خلك اني وصافنة ودايخة طبن البنات للغرفة
:
باوعن علية وراحن الي طلع ملابس والي طشرت المكياج طلعن الي ثوب مال حفلات فاضح اكثر من ما ساتر ويكولن الي البسي هذا
:
باوعت علية جان شكلة  نفس هذا بوكتها شفتة بمول المنصور وعجبني اشتريتة بي اختلاف بسيط مثل من فوك مو هيج الحمالات جانن تعلاكة