لعلك تكون اقوى دروس حياتي ((لعنة اختيارك))

البارت الرابع عشر

السلام عليكم

لعلك تكون اقوى دروس حياتي
                                ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

...................

ضلت الدكتورة تفهمني على وضعي وتفهم امي لان اني فصلت كلش بية خمسة معقولة لا واحد ولا اثنين وانوب يمكن واحد ميت لا دخيلك يا الهي
:
شنو ذنبة من بين اخوتة يموت هو يمكن احمد لو سمع هسه يتخبل هو واحد ويكلي نزلي لو درى هسه بية خمسة شلون
:
صحيح اني ما ارجع الة ولا افكر ولا اذا ولدت حنطي الطفل حيبقى عندي لكن لو درى اني حامل ب٥ شنو ردة فعلة
:
من شافتني الدكتورة تخربطت كلش بسبب خبر الطفل كلتلي ماما مو اكيد ميت لا تتفائلين بالشر همة كلهم صغار واصلا همة هسه عبارة عن لحمة وزين هسه بين نبضهم وهمة خمسة
:
كلهم بيهم نبض لكن نبضهم ضعيف هو الوحيد ما بي يجوز لان بعدة زغير يجوز خامل شمدريج لكن اني داكولج يعني مو اكيد
:
هسه انتي صيري قوية لان انتي هسه حتى الظغط مو زين عليج وحالتج النفسية لان فكري باطفالج شيصير بيهم
:
ويراد الج مداراه لان انتي اولا ناعمة انتي على حسب جسمج ووزنج طفل واحد بس تكدرين تحملين بي لكن قدر ربج بعد هو اعرف واحكم انطاج ٥
:
الي مثل جسمج ما تتحمل هيج عدد توأم ينراد لهيج توأم وحدة ضخمة وجثيثة مو مايعة وداري نفسها
:
وانتي هسه من دام ربج نطاهم الج واجبج تحافضين عليهم وداريهم اكثر من نفسج همة وبطنج واصلا نادرا ما يجي هيج عدد توأم
:
يعني بدون لقاح او زرع انابيب او منشطات لان هية سالتني اذا سويت كل ذني وكتلها لا
:
يعني هسه اني اكولها الج الي حيعرف بيج هلكد راسا حيكول شوف شنو سوت يجوز منشطات او لقاح او غيرها محد يصدك هاي عطية ربج
:
ضلت الدكتورة تنصحني وتوصيني واني بين فرحانة وبين خايفة وبين مقهورة اذا صدك طلع الطفل ميت
:
كتبتلي على علاج وكومة ابر مثبتة وطلبت مني انام على ضهري وارتاح طلعت من يم الدكتورة واني مصدومة
:
يعني انتو اعقلوها اني ضاربة الابرة مال منع الحمل زين بس خلص مفعولها اني طلعت حامل ومن اول مرة وبدون ما اخذ دوة او اوصل دكتورة واني اصلا كلت لو ردت طفل اكيد راح اضل اراجع ويجوز ما يصيرلي لان ضربت الابرة
:
واحمد كتلني كتل الي ما راهم ولا صاير وما ماتو شلون هاي الك بيها حكمة يا ربي انتة اعرف واحكم بس خاف وضع الطفل الي ما بي نبض
:
بسبب ضرب احمد الية معقولة اي اكيد لعد ليش لا اذا هو زوعني العافية طلعنة ويوسف كال ها بشرو اني ضليت ساكتة ما اعرف شحجي
:
وامي سولفتلة هو هم انصدم شي مثل الكذبة او الحلم بس انصدم بفرحة هو واخذنة الطريق كلة يكول معقولة ويضحك
:
وهم استلمني نصايح لان امي كلتلة وضعها مو تمام ردت امي زين شلون هسه بس نوصل راح يجون عمك وعمتك يسالون شلون نكول الهم او لا
:
رد همة لازم يعرفون هذا من حقهم لكن الخايس احنة ما نكلة ولا نخلي يتقرب يم روان بقت اكيد عمي وعمتي حيكولون الة ولو عمي ما يحجي ويا بس عمتي اكيد حتكلة
:
لكن شعلينة بس اذا درة او لا بتنة تبقى يمنة واول ما تولد نطلكها منها حتى بدون حاضر وغايب كلشي ما نريد منة والجهال يبقون عدها وما ياخذ لو واحد منهم
:
همة يسولفون واني صافنة عالشارع ولازمة بطني وافكر جنت اتمنى طفل واحد من ريحتة هسه الله رزقني خمسة منة ولو هو واحد وما رادة مني
:
بس شعلية بي اني عفتة وخلي يتهنى هو وعذراء هو هم حقة يمكن يريد الي يحبها ليش اجبرة علية ومع ذلك عشت ويا وشفتة حتى الخدامه هم يعاملوها احسن من معاملة احمد الية
:
هسه صح احبة لكن بعد ما راد يكتل ابني عفتة وكرهتة لكن صرت احبة واكرها هسه من دام عندي نطفة منة وشي من ريحتة
:
خلص بعد هايهية احمد ما ارجع الة لو تنكلب الدنيا رغم احبة بس كافي بعد صح هذا القرار بالنسبة الي دمار وحاليا داتعذب بسببة وبسبب بعد احمد عني لكن هايهة الي ميريدني اني هم ما اريدة لهنا وخلص
:
منا ورايح اعيش لخاطر اطفالي وبس وادعي من الله يحفضهم الي ويسهل حملي ويتممة على خير وما يصيبهم اي مكروه ويجون بخير وسلامة
:
وصلنة للبيت ونزلنة واستقبلتنا جديتي وهم سالت وعادت امي الحجي نفسه وما احجي صدمتها وفرحتها وراسا كذلك بدت بالنصايح
:
وبدت تحجي على احمد وتغلط ولان عافني وشوف شراح يصير بي وردت اندارتلي تكلي انتي بعد متكومين من مكانج
:
تضلين نايمة على ضهرج ومتتحركين لحد ما تجيبين لو اعرف اني اخدمج بنفسي هم ما اخليج تتحركين
:
صراحة تعبانة وشوي لان طلعت صايرة ما بية اكعد فترات طويلة وهسه احس منتهية من التعب
:
بليل راسا اجوي عمي وعمتي والبنات لان درو اليوم رحت للدكتورة واجو يستفسرون وقبلها همة كالو هذا نعتبرة ابنة مو ابن احمد
:
واحنة الي نربي واحمد ما الة اي شغل بي ولا نخلي يوصلة من دام هو ما يريدة وخطية عمي حتى فلوس الي صرفتهن يم الدكتورة جايب ويا علمود ينطيهن لامي ويوسف ويكول اني اصرف علية
:
وهم سالو بشري وشكالت الدكتورة وامي هية الي حجت لان اني من الخوف ما بية احجي وكمت اخاف احجي لا يوكعون الجهال هههه هيج كمت احسب من الخوف حتى النفس من اسحبة على كيفي لان اخاف
:
من كالت الهم توم ما احجي العياط والصياح من الفرح الي صار تخبلو وعمي يصيح الحمدللة والشكر يا ربي دخيلك يا الهي
:
وعمتي تبجي وتكول ما مصدكة ابد ما داصدك والبنات يكمزن حتى اني ابتسمت وضحكت لفرحتهم
:
لكن ساد الصمت والهدوء من امي كالت الهم بس ما عرفتو شكد بيها ضلو كلهم متفاجئين شنو يعني همة عبالهم ٢
:
ردت عمتي ليش شكد بيها لعد غير ٢ هزت امي راسها بلا ورفعت ايدها تأشر بيها بمعنى ٥
:
ضلو كلهم صافنين على امي وما مستوعبين الي صار ساعة يباوعون واحد عالثاني وساعة يباوعون على امي وساعة يباوعون علية
:
ردت عمتي لا تشاقن اكيد تشاقن مو صحيح مو حلفت امي الها انبلة من تاكدو من صحة الخبر 😂 لا قبل شوي عياطهم جان خفيف
:
من عاطو البيت يهتز بعياطهم عمي فرفح من البجي رغم هو رجال عمتي سجدت بالكاع سجدة الشكر البنات يبجن ما مصدكات
:
الشي الي سوو عمي وعمتي من عرفو بالخبر لو احجي منا لباجر ما اوصف الكم منة نقطة بحر
:
وكل شوي وكالو لامي لا خاف تجذبين علينة خاف مسوينة بينة مقلب اتمنيت الفرحة الي فرحوها لمن عرفو ربعها عد احمد
:
واني جنت متاكدة هسه حيتخبل اذا عرف لان هو من عندي ميريد بعد ما استوعبو الخبر وصدكو سولفت الهم امي عالطفل الي ما بي نبض
:
ضلو يكولون لا انشالله ماكو هيج شي وانشالله مو صدك وخلي املج بالله قوي وكلنة راح ندعي يطلع ما بي شي الطفل وضلو يواسون بية ويشجعوني
:
عمتي كالت لامي اذا تقبلين هو احمد وطلع من البيت بعد ما يرجع خلي تجي يمي اني اداريها امي كلتلها مشكورة ومتقصرين
:
بس اني هم ما راح اقصر وياها وتضل كدام عيني احسن وانتي شوكت ما يعجبج تعاي شوفيها واني هم كلت لعمتي مشكورة بس اني اريد ابقى يم امي
:
بعدها راحو وهمة فرحانين ويوصون بية ادير بالي على نفسي طلعو مددت بالهول وخليت راسي بحضن جديتي وهية تلعب بشعري ونسولف
:
خالاتي خابرن يسالن امي علية لان كلها تدري اليوم عندي مراجعة وهم انصدمن وتخبلن بالخبر من سمعن
:
وكالن ثاني يوم نجي كلنة فرحت حيجن هنة والبنات لان نفسيتي تعبانة شوي عاد يتغير جوي
:
جديتي وامي وعمتي من جانت موجودة وعمي والكل حتى خواني اتفقو منكول لاحد بس عماتي
:
ولو مو يزعلن هم ما نكول الهن بس اتفقنة اي احد ما نكول الة لان اعرف كلها راسا حتشهك بية لذلك قررنة منكول لاحد
:
من رحت لغرفتي دانام راسا اجى على بالي احمد اوووف شكد مشتاقة اشوفة رغم الي سواه بية بس مداكدر ما احبة خرب كلبي الي متعلق بي
:
شنو ردة فعلة اذا عرف اكيد حيضوج ويتخبل غفيت وهو على بالي وما اكدر ما افكر بي
:
ثاني يوم اجني خالاتي من الصبح امي عزمتهن عالغدا وجايات هنة وبناتهن يابة شكد فرحت بس خطية امي تشتغل وحدها واني منومتني متقبل اكوم
:
جان اليوم مريح ويفتح النفس والبنات هنه يساعدن امي وردت عزمت عمتي والبنات بس استحت عمتي تجي عاد امي راحت الها للبيت وجابت عمي هم يتغدى وية الولد كلتلها اني ما مركبة علمودكم
:
خلص اليوم واني مرتاحة نفسيا بين سوالف وضحك عمتي جانت متجنبة الكعدة واحسها متوترة عبالها خالاتي ضايجات بسبب الي صار
:
بس من شافتهن يسولفن ويضحكن وياها ارتاحت واندمجت وياهن صار الليل اخ ياليل شكد انقهر من اخلي راسي عالمخدة واتذكرة واشتاقلة
:
ثاني يوم اجني عمتي والبنات العصر ديشوفني من كعدنة البنات غمزن الي انو نكوم من يمهم طلعنة كعدنة بالحديقة
:
وكللي الصبح عمتي داكة على احمد وكايلتلة انو روان بيها توم ٥ وهو جان بالدوام عمي طالع وجاي يركض للبيت طاير
:
من كالن هيج عبالي يعني ضايج بس صدمني من كالن اجة وكعد يحجي ويا امي وما مصدك ويكول لامي احجي الي بالتفصيل الممل
:
ومن كايلة الة على سالفة الطفل الي ما بي نبض متخبل ويريد يشوفني ويحجي وياي وفرحان بهذا الخبر ما ضايج لعد هو مو انتة الي ردت تكتلة بايدك وجان موتة شنو الي صار هسه فرحت من عرفت توم
:
من كايل لعمتي اريد اشوفها عمتي ما قابلة وضالة تحجي علية وكايلتلة اصلا لو ابوك عرف اني مطببتك للبيت يكلب البيت على راسي استر علية واسكت
:
والبنية اصلا بعد الي سويته بيها متخبلة منك تشوف ملك الموت ولا تشوفك وحتى هية مبينة ما تريد انتة تعرف بيها توم لان شافت شسويت بيها من دريت حامل واصلا تريد الطلاك اليوم قبل باجر
:
بس لان حامل وميصير تطلك هسه فساكتة ومتحجي وانتة الي سويتة بيها مو قليل ولا عبالك هية نفسها روان القديمة لا انتة غيرتها وخليتها تصير وحدة ثانية بسبب الي سويتة بيها
:
كلت الهن لو يصير من ذهب هم ما ارجع الة ولا اقبل احجي ويا ولساني ما يطخ لسانة للموت لان الي سواه بية مو قليل
:
ردن كالن بس امي من كلتلة عالطلاك ما قبل مبين ميرضى يطلك كتلهن اي مو بكيفة غصبا ما علية والله
:
مشت فترة اسبوعين او هيج شي امي مداريتني مثل الماي بالصينية وتخاف علية خطية وخواني يطبون ويطلعون جايبيلي اشكال من اكل وحلويات
:
اجني البنات الضهر اني جنت داغسل ايدية عالمغسلة واروح امدد بغرفتي كالن تعاي يمنة ضايجات وصار كومة ما جاية للبيت
:
وبنات عمتي حيجن وزهراء هم وياهن صدك جنت محتاجة هيج كعدة بنات ووحدنة وبيناتنة واصلا اني جنت محتاجة غراض من غرفتي
:
لان البنات ما جايبات كل عراضي بس المهمات ويومية اريد اروح اجيبهن ولو انسى لو اتعاجز كلت لامي وقبلت اروح لان ماكو لا احمد ولا عذراء
:
شو داريد اطلع كالن البنات لا لبسي دشداشة حلوة كتلهن ما رايحة لزفة ضلن يلحن رحت بدلتها بس هنة طلعلي وحدة حلوة وحصر على جسمي
:
ما رضيت بس لحن البسها لبستها وصارت لزك على جسمي  وبينت بطني منها ولان توم فبطني  جبيرة طلع شكلي كلش حلو بيها  ولزمني رسمن حواجبي وخطن عيوني بالالاينر وخلن الي حمرة لون احمر صارخة
:
عطت بيهن شبيجن رايحة لحفلة اني دتسون هذا كلة يعني ردن اي شبيج مو علمود لا يكولن انو فراك احمد والي صار بيها ماثر عليها خليج قوية
:
سكتت محجيت هم صدك تقى ضفرتلي شعري ضفيرة فرنسية وطلعتلي خصلتين من كدام طلعت غير شكل رغم تغير بسيط بس اني اصلا صار هواي ما معتنية بنفسي ولا مخلية مكياج من زمان
:
رشيت عطر وطلعنة رحنة لبيت عمي جانو عمي وعمتي نايمين وبس اني والبنات كتلهن لعد شوكت يجن بنات عمتي ردت فد منا لساعة ساعة ونص
:
كعدنة شوية بغرفة البنات وكالن كومي نزلي غراضج الي تريديهن علما نسوي حلاوة احسن من ما تضلين كاعدة وحدج رديت اي والله هم صدك
:
كمنة وهنة راحن للمطبخ واني صعدت الدرج على كيف لان الدرج مو زين علية صارت بوجهي غرفة احمد وعذراء
:
احس نفسي ضاق استغفرت ربي ودرت وجهي ورحت لغرفتي فتحت الباب وطبيت اتمشى بيها واباوع واكول بداخلي والله اشتاقيت لغرفتي
:
كلشي نفس ما عفتة ما متغير بيها شي شكد انقهرت اني واحجي وية نفسي سمعت الباب انسدت على كيف
:
عبالي وحدة من البنات كلت بصوت مسموع احاجيها لو تدرين شكد مشتاقة لغرفتي ما حسيت غير انحضنت من ورة
:
عرفتة هو من ريحتة من نفسة من كلشي بي بدون ما اندار جسمي صار يرجف كلبي كد ما كام يدك سريع احسة حيطلع من مكانة
:
ضليت صافنة وارجف وصوت نفسي عالي بحيث ينسمع دارني علية وباوعت .............

يتبع ...........

طبعا جدًا جدًا اسفة واعتذر لان صارلي ٣ ايام ما ناشرة لكن الله شاهد وضع خارج عن سيطرتي اني كلت يوم واحد استراحة وانشر وراها صار عشرة محرم واحتراما ما نزلت وانوب عمي تمرض فدنوب ورجع انتكس
:
وضعي ما سمحلي انشر بعد وحتى واهس للكتابة والنشر ماكو نفسيتي زفت واني هم مريضة وتعبانة لكن لتخافون ما بية كورونا
:
ادري البارت كلش قصير وما بي اي احداث لكن ما ردت اعوفكم اليوم هم بدون بارت ما نطاني كلبي صح ابد مو خوش بارت بس تحملوني
:
بلكي باجر اصير زينة واكدر انشر اعذروني امانة بس فدوة فرحوني بتفاعلكم وعلقو هواي هذا الشي يرفع من معنوياتي هواية
:
امانة عليكم ادعو لعمي بالشفاء العاجل
:
دمتم في حفظ الرحمن 😘❤️😘❤️😘❤️