لعلك تكون اقوى دروس حياتي ((لعنة اختيارك))

البارت الحادي عشر

السلام عليكم

لعلك تكون اقوى دروس حياتي
((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.........................

كلي :
روان ارجعي للبيت راح اخلي السايق يوديج هسه بس لتكولين لامي احمد كلي ارجعي انتي كوليلها تعبت او ضجت وخليها هية تبقى طلعي اي عذر وخليها تبقى مترجع وياج للبيت
:
زين ليش مو انتة الي كلت ولحيت علية اجي للعرس
:
اي صحيح بس مو الانضار كلها عليج صايرة وكلها عايفتنة وبس تسولف بيج وعذراء ضاجت وما اريدها تنقهر وانتي تتفهمين وضعي
:
شوفيها هسه حتى زعلت وشلون راح اراضيها ما ادري وانوب كامو يحجون عليها هسه شفتي هذا صديقي الي اجة يمي
:
كلي عايف الكمر ماخذ هاي الزركة وهية سمعتة وتخبلت تجنبًا للمشاكل ارجعي للبيت وهسه الحماية مالتي يوديج
:
رفعت راسي وضليت اباوع بعيونة كتلة صدك تحجي احمد اني شعلية قابل اني الي كايلة الهم تعالو كولو هيجي شلون تريدني ارجع وية واحد ما اعرفة
:
عمتي شكول الها وشلون اقنعها انو ماكو شي وارجع للبيت وحدي واعوفها واني بالف يا علي يلة قنعتها تجي
:
ما ادري روان دبريها من يمج روحي كوليلها وارجعي وانتي اقنعيها ومن تقنع تعاي كولي الي علمود اكول للسايق يوديج لان ترة ضجت وما اريد شي يخرب فرحتي ويخرب العرس
:
صدك كرهت نفسي بلحضتها رديت كتلة هسه اني شعلية عمي حتى لو انتضر اكعد برة القاعة بس لتخليني ارجع وحدي اخاف
:
مقبل واصر وعذراء تباوع علية وتخزر وتكولي كدامة والله لا اطلعها من خشمج قهرتيني بيوم عرسي وخليتي كل الناس تحجي علية مو كتلك طلكها لتخليها على راسي بس هم كدرت الك بس اني اعلمك بس تخلص الحفلة
:
يا ريت لو ردها لو حجة عليها لو كال شي حتى من حجت علية لا بالعكس انوب كعد يعتذر منها ويهديها
:
عفتهم ورجعت للطاولة امشي والناس كلها تباوع علية دمعتي كامت تلالي بعيني عالصار بعد شنو اشوف
:
عمتي شافتة من صاحلي فبس وصلت يمها سالتني شيريد كتلها ميريد اني اشرتلة يصيح الي علمود اروح اكلة اريد ارجع للبيت
:
اي وشكال
:
قبل ارجع هسه حيوديني واحد من الحماية مالتة
:
اي يلة بعد احسن اني هم اريد ارجع
:
لا عمة انتي ابقي ميصير ترجعين حروح بس اني
:
لا شلون اخليج ترجعين وحدج وبعدين اصلا اني ما ردت اجي بس غير من وراج انتي جبرتيني
:
اي وهسه هم اكلج ابقي لان ميصير ترجعين لخاطري
:
ما اكدر واني اجيت علمودج لان ادري شراح يصير بيج وهسه انتي راجعة فبعد على شنو باقية
:
عمة دخيلج لتلحين بروح موتاج ما الي حيل وخلك بعد حتى احجي احلفج بالله والاسلام والكائنات والامة العربية واهل البيت واحد واحد لتلحين وابقي هنا حتى قابلية للحجي بعد ما عندي هو بالزايد بالزايد بعد ٣ ساعات ٤وترجعون اتحملي لخاطري خلص ما بقى شي واصلا اني اريد ابقى وحدي شوية سكتت ما حجت شي بستها من راسها
:
وكتلها تحملي لخاطري اسفة واعذريني دالح عليج بس هانت مبقى شي باستني من خدي وكالت توكلي يمة وبس توصلين دكي علية واذا صار شي دكي علية
:
هزيت راسي وعفتها ورجعت على احمد كتلة يلة كول للسايق خلي يوديني شفتة اشر لواحد يطلع عمرة نهاية العشرينات او بداية التلاثينات
:
جان شاب وحلو ومرتب وشوي ضخم ضليت صافنة على احمد ما خاف علية من راح يدزني وية واحد غريب اول مرة اشوفة وشاب هم مو رجال جبير بالعمر
:
محجيت نزلت من يمهم ورحت اخذت جنطتي ودعت عمتي وعمتي الثانية والبنات طبعا هنة ضلن كاعدات مثل الغربة
:
وكرايب العروسة ورب الكعبة والله شاهد على كلامي اذا اجذب حتى جدتها جاية ما ضالة وحدة بالعشيرة ما جاية
:
وبنات عمامها وخالاتها وعماتها وخوالها كولة واكف ويركص وما شاء الله عاللبس استعراض مو لبس كلة مشلح مصلخ
:
هية عذراء البدلة مالتها عالصدر صايرة وماكو لا حمالات ولا ردان صايرة عالصدر اني توقعت من طبينة لبيتهم حتلبس يلك البدلة او كبوس
:
هية طلعت من بيت اهلها مصلخة تعجبت على احمد وهية صدرها جبير بحيث الله شاهد نصة اذا مو اكثر طالع حتى عمتي والبنات وعمتي الثانية ضلن يحجن ويكولن هيج ماكو حيا ولا مستحى احمد شبي هيج طلي صار وهية عود مطلعة صدرها الازرك عشتو حشى خلقة الله
:
جماعتة هم كلها تركص هو من طلعت من القاعة سمعت من البنات عالكها بالركص
:
حتى ما كلف نفسة يكوم يوصلني للسيارة زين والله فشلة اصعد وية غريب واني حتى السيارة ما اندلها ياهو علمود اروح اوكف يمها يعني لازم انتضرة واروح ويا
:
وكفت يم باب القاعة انتضر الولد يجي انداريت على احمد اباوع يحجي وية عذراء ما مهتم الي باوعت نص القاعة يباوعون علية
:
صدك متحملت نزلت دمعتي هو رفع راسة شافني ضل يباوع علية دنك على موبايلة شوي وسمعت صوت رسالة اجتني
:
فتحت الجنطة طلعت التيلفون لكيتة دازلي يمعودة شبيج تبجين مو فضحتينة كلها دتباوع عليج امسحي دموعج ولتخلين العالم تباوع ترة ضجت
:
كملت قراية الرسالة رفعت راسي علية لكيتة يباوعلي ما رديت الة رسالة رجعت موبايلي بالجنطة وحتى دموعي ما مسحتها
:
درت وجهي للجهة الثانية سمعت صوت يكول العفو خيتي نمشي انداريت لكيتة السايق هزيت راسي اي ورحت امشي وراه بدون ما التفت واندار على احمد
:
طلعنة ورحنة للكراج وصلنة يم السيارة فتحلي الباب الورة وصعدت المهم طلعنة واني ابجي بسكوت