لعلك تكون اقوى دروس حياتي ((لعنة اختيارك))

البارت الثاني عشر

السلام عليكم

لعلك تكون اقوى دروس حياتي
                                ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

..................

سدة بوجهي :
ضليت صافنة والموبايل بعدة على اذاني شحجيت اني شنو الي كلتة الة علمود هيج يسوي وفوكاها يسد الموبايل بوجهي وهية شلون غلطت علية وما كللها شي
:
ذبيت الموبايل وكمت اتعودت عالصدمات من احمد ومشاءالله الله مبين الجاي اعضم من ورة عذراء
:
نزلت جوة ورحت لبيت اهلي بدون محد يدري بلكي عسى ولعل امي تحجي وياي خواني جديتي مو طكت روحي وهمة زعلهم طول وياي
:
عمري كلة ما متعودة ما احجي وياهم هالفترة كلها لكيتها تغسل بالطرمة من شافتني شمرت الماسحة والصوندة واندارت تريد طب للبيت
:
ركضت عليها ولزمتها من ايدها وتوسلت بيها بس تحجي ولو كلمة وياي بس ماكو مقاطعتني حتى بالكلام عافتني وطبت جوة
:
رجعت للبيت واني ابجي صارت بوجهي عمتي سالتني شبيج سولفت الها حضنتني وتهون علية
:
خابرت خالاتي بلكي يقنعن امي تحجي وياي بس حتى هنة يحجن علية وما خلن ما غلطن وحقهن ما الومهن
:
احمد من الفندق طلع هو وعذراء شهر عسل ١٠ ايام لسليمانية واربيل هم عساس بالبداية بس سليمانية هسه اربيل هم
:
١٠ ايام ما شال التلفون ودك علية ولا سال عدة مرة وحدة دز رسالة شلونكم خومو اكو شي كتلة لا شافها وحتى بعد ما رد ولا خابر وحتى مو علية يقصد عالبيت
:
طول ال١٠ ايام واني مثل السمجة المزوهرة انوب هو ماكو وما اشوفة تخبلت كمت كل ما اضوج عندي سجين ضامتها بكنتوري
:
اصعد اشرح ايدي واخلي الدم يجري يلة ارتاح عمتي انتبهت سالتني كتلها من داسوي اكل انجرحت بس مبين مو مال جرح
:
تالي عرفت وتخبلت شكت ثوبها من الطول الطول وملخت نفسها وكالت لعمي تالي حرمتني ما اطب للمطبخ بعد واذا طبيت ما تبقى سجين بالمطبخ
:
بحيث صرت مخبلة رسمي صعدت لغرفتي وطلعت السجين اجتني ايام ما انام الا اشرب ڤاليوم
:
رجعو احمد وعذراء من شهر العسل مالتهم وما شاء الله بلة حسد صدك مبين عليهم عرسان
:
من اجتي ثاني يوم عزمت كرايبها كلها واهلها وسوت حفلة واحنة محد يدري غير احمد اجة بليل بلغني وهه على شنو مبلغني
:
علمود اكعد من الفجر اطبخ وانفخ وارتب الهم البيت يعني خدامة ابو زايد واستاهل اكثر مو اني الي ردتها خلي استاهلها
:
نزلت على عمتي اكول الها لكيتها نايمة استخطيت اكعدها علمود ست الحسن وعلمود شي تافه
:
نصبت موبايلي ومن الفجر كعدت لا خليت طرامي ولا حدايق ولا شي يعتب علية علما كعدو
:
نزلت ست الحسن ب٩ علمود تروح للصالون اجتي للمطبخ وفتحت الكاونتر بكيفها وضلت دعفس اني جنت واكفة اسوي ريوك لان اني الي لازم احضر
:
صاحت حبيبي ممكن تجي شوي طب هو للمطبخ باوع عليها ورد ها عيني كولي شتريدين
:
حبيبي كول لهاي خلي تغسل ذني الكلاصات والصواني تقدم بيهن وما اريد يتقدم بغيرهن
:
هو كالاسد شنو كالت رد رجع كالة الي لا وفوكاها تكولة هاي عبالك خدامة بيت الخلفوها
:
محجيت شي غير هزيت راسي اي وسكتت كملت الريوك وكعدو تريكو وصعدو لغرفتهم واني وكفت اغسل المواعين
:
كعدت عمتي وكتلها تخبلت وحلفت ما تطلع ولا تسلم على احد وتكول ما شاء الله صار البيت مو الي واني صرت غريبة بي
:
ردت علية وانتي اذا كلتي اطلعي واكعدي يمهن الا اغديج خبز العباس افتهمتي لو لا وانعل ابوهم لابو حتى الي يريدهم اثنينهم
:
سكتت محجيت شي وهالمرة اني ما علية ولا اجبرها تطلع يريد يروح هو يكول الها ويتفاصل وياها
:
نزلو الساعة ب٩ ونص اخذها للصالون ورجع جايب ما مخلي صناديك فواكه وصناديك العصاير وكيك جاهز وكرزات وجكليت ما مخلي
:
وكلة وكع براس روان الاكل طلبة الها جاهز من المطعم على عدد الكمية رجعت الساعة ب١١ ونص
:
الي عازمتهن اجني بس جية وحدة مأجرات كوستر جبيرة وجايات طبن واريد بس الحك عالضيافة ما اكدر
:
لا عمتي ولا البنات قبلن يطلعن ضلن بغرفهن وكلة وكع براسي طب احمد وشافني راح يصيح الهن ولعمتي ولا وحدة قبلت تطلع تعارك وياهن وكللهن خلي تطلع العالم واني اعلمجن حسابجن عسير
:
طلع ضايج وبس ينافخ وكاعد على اعصابة ضايج منهن رد خابر الحماية مالتة يجيبون الغدة
:
حضرت المواعين الخواشيك كلشي حضرت علما وصل الغدة وكف هو يسوي وياي علمود ست الحسن لان ماكو احد يساعدني
:
طبت عذراء ولكتة عبالها علمودي وديساعدني تخبلت وضلت تحجي علية وتعيط على كيفها وهو يتوسل بيها ما تزعل ويكوللها علمودج
:
حتى لا كرايبج يحجون عليج لان محد وية روان ومتلحك وعيب ناخر كرايبج تالي قنعت وراحت جوة
:
بس علما كملت كل شوي تجي تباوع علينة وتروح كمت انقل الاكل للاستقبال وهنة كلهن يباوعن علية
:
علما نقلت الاكل كلة متت اخر شي كمت الهث من التعب كام احمد وياي يشيل ويخلي بصواني جبيرة ويوصلهن الي يم باب الاستقبال واني ادخلهن
:
هية كاعدة وتباوع علية وتضحك والله اجتي ترس اذني حجايتها من دانقل الاكل تكول للي بصفها شوفي شلون مخلينها خدامة الي
:
حتى ما يعبرها ولا حاسبها زوجة مجرد خدامة تخدم بينة يعني هية اختها كاعدة وكومة بنات بكصتي بس ما كالت لوحدة كومي عاونيها
:
رديت رجعت سويت اكل ووديت لعمتي للغرفة تاكل ورحت صحت للبنات راحن يمها وطلعت اني لان بعد لازم اسوي جاي