لعلك تكون اقوى دروس حياتي ((لعنة اختيارك))

البارت الخامس عشر

السلام عليكم

لعلك تكون اقوى دروس حياتي
((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

......................

انداريت وشفتة هو ما انكر ما خفت راسا شهكت ورجعت ليورة بخوف هو اتفاجئ من تصرفي
:
تحرك يمشي باتجاهي عطت لتتقرب رد ما اذيج لتخافين والله ما اذيج بس ردت اشوفج شلونج واحجي وياج
:
مشيت اريد اطلع من الغرفة واحجي ما عندي اي حجي وياك ولو ادري بيك هنا ما اجيت
:
لزمني من ايدي وكلي ما ااذيج والله بس اريد نحجي شوية وعود روحي عتيت ايدي منة وكتلة خير
:
تعاي خلي نكعد ونحجي مو زين عليج الوكفة
:
اعتقد هذا الشي ميخصك ولا تمثل دور الخايف
:
بس اني من صدك خايف عليج
:
ههه لو هسه تحلفلي منا لباجر هم ما اصدكك
:
حقج وعاذرج لان الي سويتة بيج مو قليل
:
همزين والله اعترفت
:
سكت ونزل راسة باسف
:
ردت اطلع رجع لزمني من ايدي ما خلاني عتيت ايدي منة وكتلة بنتر خير شرايد احجي وفضني لان اريد ارجع للبيت
:
بروح ابوج اكعدي بس احجي وياج كلمتين
:
عود شنو معناها تحلفني بروح ابوية لان تدري ما اكدر ارفض اذا حلفتني بروح ابوية
:
ما رد جرني من ايدي على كيف وكعدني عالجرباية وكعد بصفي ضل يباوع علية وجانت نضراتة مثل الي عبالك عطشان لشوفتي
:
بس بداخلي اكول لا جذب هو ميريدني فابد ما تتحقق هاي النضرات ما انكر ما جنت خايفة منة وحلفت اي حركة تبدر منة مو زينة راسا اعيط واخلي عمي يصعد يركض
:
ضل صافن ويباوع علية واني دايرة وجهي منة خلة ايدة على بطني راسا جفلت وابتعدت منة رد
:
لتخافين والله ما اسويلج شي
:
اعذرني والله ما احزر شنو تسوي بية ما اكدر اثق بيك
:
ليش هيج خايفة مني روان
:
مو انتة الي سويتة بية قليل الشخص الي جنت بس وياه احس بالامان صرت اكثر شخص اخاف منة وما احس بالامان بوجودة
:
نزل راسة ومحجة عود خجلان وكذا نترت بي
:
ما تحجي عاد اريد اروح
:
ليش هيج اسلوبج وياي روان شبيج مو اني احمد الي تحبيني ليش هيج تعاملج وياي صاير بعد ما جنتي ما تعلين صوتج علية وينها ذيج روان
:
ضحكت بسخرية واستفزاز ههههه عيني ذيج روان ماتت الله يرحمها جانت هواي ثولة وغبية وتالي ماتت هسه صارت وحدة بمكانها روان الجديدة احقر خلق الله
:
باوع بعيوني مصدوم رديت
:
لتتوقع اني نفسي روان القديمة ولتتوقع مني احبك بعد جنت نايمة وهسه صحيت اني ما عدت روان القديمة احمد وهاي روان الي كدامك انتة سويتها
:
واريد الطلاك منك اليوم قبل باجر وبدون حقوقي كلها متنازلة ما اريدها بس اريد اخلص منك لكن هسه ما يصير الطلاك الا بعد ما اولد يلة
:
وانتي من كل عقلج اعوفج بسهولة واطلكج
:
ههه ليش عيني مو انتة نفسك الي جنت تريد نطلك وباسرع وقت مو انتة الي متريدني شنو الي تغير
:
روان انتي بس الي انتي مال احمد
:
هههههههاي شبيك احمد شنو سكران انتة لو شبيك معقولة انتة نفسك الي كاعد تحجي هسه كدامي بس اني ادري بيك يمكن لان سمعت بية توم تريد نرجع ولو هو انتة واحد ومن دريت بي وردت تموتة مو عاد هسه ٥
:
جنت غبي حقير سافل ساقط شتريد تسميني سميني والله شاهد مو علمود الجهال بس اني اريدج روان محتاجج ومشتاقلج
:
شنو الي تغير ممكن اعرف مو جنت كبالك٢٤ ساعة وانتة بنفسك وبعضمة لسانك جنت تطردني شنو الي صار
:
روان اني اكبر غبي على وجه الكرة الارضية تدرين لو لا تدرين بكنوز الدنيا كلها ما ابدلج بس ارجعي
:
شايف الويل بغيابج من يوم الي عفتيني ورحتي لاهلج حال الضيم حالي لتشوفين شصاير بية وشديصير
:
خير شبيك شو جنك العافية شكو بيك
:
تدرين من يوم الي عفتيني واني طلعت لليوم لا شابع بطني ولا ماكل اكلة براسها خير كاضيها من المطاعم ولا هدومي نضيفة ومكوية
:
هدومي يضلن ١٠ ايام نايمات بالحمام ما ينغسلن وكوي ما تكوي الي كاضيها اوديهن للوندري بحيث راتب كامل بس للوندري كد ما اكوي هدوم يمة
:
ها هنا مربط الفرس يعني عود انتة مفتقدني لان ماكو الي يداريك يعني انتة ضايج وتعبان لان خسرت البنغلادش الي عندك
:
حقك اذا اني جنت قايمة بكل هذا مو جنت حتى الجواريب اكويهن الك مو حتى العطر اخلي بملابسك ورة ما اكويهن
:
والاكل جنت يومية شكل اسويلك ما تشوف نفسك حتى ضعفان واني الي مصدكة عود مشتاقلي تالي طلعت مشتاق للخدامة مالتي
:
مو هيج والله بس اني حيل مفتدقج حسج شكلج طولج من يمشي كدامي جنتي بكلشي حتى ايديج الي تسويلي كلشي بحب روان تدرين داتعذب بدونج
:
اني هاي كدامج اعترف واحجي روان اني احبج واكبر غبي ومطي جنت من سويت كل هذا بيج هسه لو تعدميني هم قليل بحقي
:
تدرين اول فترة بعدج عني وما اشوفج كمت حتى اتخايلج تصيحين الي لو تخطفين من كدامي صرت مثل الطفل ويبجي يريد يشوف امة اني هيج حالي
:
ههههههههههه
:
شبيج ليش ضحكين والله
:
شكد جنت اتمنى اسمع هذا الكلام منك قبل شكد جنت اذل روحي علمود اسمع منك الكلمة الحلوة وانتة شجنت تسوي تهين بية
:
شكد ذليت روحي علمودك مو حتى اهلي تبريت منهم لخاطرك بس هسه منو وكف وياي ومنو عافني
:
تدري شنو جان يصير بية من اشوفك تهتم بعذراء واني ضاربني عرض الحايط تدري شكد مرت ليالي اريد اغفى بحضنك على نفسك وصوتك بس هذا كلة ما تحقق
:
تدري شكد جنت اتعب واتعذب واتمرض وهذا كلة واكول ميخالف يجي يوم ويحبني احمد
:
وفعلا اجة وحبيتج
:
خلي اكمل لتقاطعني خلي احجي الي بكلبي لان راح اطك
:
تدري شنو جان يصير بية من اسمع ضحكك وسوالفك انتة وياها لو صوتكم اخر الليل تدري شنو صار بية من خليتني اروح لعرسك وخطوبتك
:
وفوكاها خليتني اني اتكفل كلشي ما هامتك مشاعري ولا همك شنو حيصير بية ما خفت وكلت لا تروح تشوط وتموت بمكانها
:
تدري شنو سمعت وشنو حجو عني لان عفتني وزوجت بفترة شهرين بس تدري شنو شعوري بيوم الي خليتني ارجع وية واحد غريب وما اعرفة في سبيل لا تنقهر عذراء
:
لو من توسلت بيك كتلك خلي نسوي عرسنة بقاعة ما رضيت كتلك نروح بس للفندق ما رضيت كتلك نروح لسليمانية كم يوم ما رضيت وتعاركت وياية وتالي ذني كلهن سويتهن لعذراء ما همك شنو راح اكول ولا شنو حيصير بية
:
تدري شنو صار بية بيوم الي كدامي كلت للدكتورة ما اريد خلفة وانطيها اي شي مانع وبوكتها الدكتورة ساعتين تشرح الك عالخطورة الي حتعرض الها اذا اخذت شي وضربت ابرة وانتة هذا كلة ما همك اذا اصكطيت ولا متت
:
وبعد وبعد وهذا كلة وما قصرت وياك بشغلة وحدة ومن طلعت عذراء حامل شفت شسويت انتة وشلون فرحت ومن اجيت وكتلك اني حامل ردت تكتلني اني والطفل ليا درجة جنت تكرهني لعد
:
وهذا كلة جنت تسوي بية وبلسانك تطردني وابقى كاعدة واخدمك بدون كرامة وكلت كلة يهون وبعد اشكال العذاب الي جنت تسوي بية
:
حبيتك اكثر من روحي حبيتك اكثر من اي شي بهاي الدنيا احجي وابجي بحركة حتى هو بجى وياي
:
دمرت حياتي ومستقبلي لخاطرك مو انتة تدري شكد احب الدراسة والدراسة شنو بالنسبة الي وتركتها لخاطرك ومن ازوجت انتة اجيت وكتلك اريد ارجع للدراسة شسويت بية مو تعاركت وياية وضربتني هم
:
تدري امي من اجة عمي وكال اريدج لاحمد وانفتح الموضوع شكد نصحتني اتركك شكد حجت وياي وكلتلي والله تتندمين بس اني ما فاد بية
:
تدري شكد اجوني ناس ورفضتهم لخاطرك لحد ما عمي من كال اريدج لاحمد هو قبلها بيوم خواني كلولة واحد كرايبي يريدني
:
ومهندس وسيارتة اخر موديل وبيت وحدي وهو اية من الجمال يعني اعيش ملكة وهذا كلة ما ردتة وعفتة وتركتة بس لخاطرك لان احبك
:
بس تالي شصار بية وشنو جنيت من هذا الحب ما جنيت غير الاهانة والمذلة والمسبة وانواع الغلط والضرب وكلشي مو زين
:
تدري جنت عمية يمك او لا مو عمية لان جنت اشوف الي يصير وتسوي بية بس جنت ضعيفة وبلا كرامة واخاف من فقدانك
:
كل اعتقادي جان اذا عفتني راح اموت بس الدنيا ما توكف على احد ولا راح يصيرلي شي اذا تركتك
:
هسه وعيت وانفتح دماغي وعرفت انو الحب مو كلشي وهسه حاليا اني اكرهك ما احبك ولو تقوم الساعة ما ارجعلك
:
بس اني ما اطلكج وراح اسوي المستحيل علمود ارجعج انتي الي ما تصيرين لغيري روان انتي بكنوز الدنيا كلها ما ابدلج
:
ههه لا تضحك علية بهذا كلامك بكنوز الدنيا متبدلني لا عيني انتة مو بدلتني انتة بعتني ارخص من المي بوحدة ما تسوى تبدلني بيها ولا توصل لاضفري
:
روان اعترف اني جنت غبي واعمى واثول وطايح حضة هم بس هسه صحيت من الي جنت بي روان والله احبج تدرين متندم على عدد شعر الي براسي بيوم الي زوجت عليج وبيوم الي سويت بيج كل هذا
:
خلص احمد لتحجي ولتحلف احنة الي بينة انتهى وخلص لتتصور نرجع لبعض وحتى الاطفال ما يربطونة لان انتة ما تريدهم
:
منو كال ما اريدهم اصلا ذابح روحي عليهم وعلى شوفتهم انتي بس ارجعي الي والله لو شتريدين اسويلج لو تطلبين روحي هم انطيها الج
:
كافي لخاطر الله تعبت هواية انتة ما ناوي تعوفني يعني جنت يمك معذبني وعفتك وابتعدت عنك وهم بعدك تعذبني تالي شلون
:
خلي نفتح صفحة جديدة ولو قصرت وياج بشي واحد ذاك الوكت اني بيدي اخذج اطلكج والله بس رجعي الي متبهذل بدونج حال الضيم حالي والله
:
مشكلتك مو مشكلتي فات الاوان على كلشي واحنا ما نرهم لبعض ضل يحجي ويتوسل ما انكر ما مشتاقة الة وانو ما فرحت بهذا كلامة
:
بالعكس طرت واحس نفسي صرت فوك الغيم واخيرا يعني صدك اجى هذا اليوم الي كلهم كلولي علية انو احمد حيحبني ويتوسل الي
:
للحضة خفت لا اضعف وارتمي بحضنة وانسى كلشي صار وسواه بية واكوله هايهية خلص اني قابلة ارجع وياك بس كوة تماسكت نفسي
:
من شاف الحجي ما بي فايدة وياية كلي راح اتركج تفكرين على راحتج وتهدين ادري الي سويتة بيج مو قليل لكن ثقي اني تغيرت
:
حجة وياية بموضوع الاطفال وعلمود الطفل الي ما بي نبض ويريد ياخذني لدكتورة زينة علمود هية تعرف
:
رديت الدكتورة الي رحت الها مو حمارة لو متعرف ولا اخذت شهادة الدكتوراه بالجذب انتة معليك بية ابتعد عني وروح حير بمرتك واهتم بيها
:
وجهالي لتفكر اذا ولدت بيوم اخليك تتقرب الهم اصلا انساهم اعتبر ماتو بيوم الي ضربتني وعفتة وطلعت
:
عرفت هاي خطة من البنات واتاكدت من مكيجني وبدعن بخلقتي طبيتلهن للمطبخ رزلتهن وطلعت رحت لبيتنة لحكني علمود يحجن وياي عفتهم وطبيت لبيتنة اني ادري يريدن نرجع سوة بس بعد لو اموت ما ارجع لاحمد
:
مشت الايام ورحت للدكتورة وفحصتني واخذت الي سونار والحمدلله الطفل الخامس ما ميت بس نبضة كلش كلش ضعيف
:
وكالت صح بي نبض لكن اولا ضعيف وثانيا حالتة خطرة يعني مو اكيد يبقى عايش وخصوصا همة بدو يكبرون وخوانة صايرين فوكاه وخانكي
:
مدري افرح لان عايش وما ميت مدري ابجي لان هيج حالتة احمد يومية مراسلني لو داك علية من رقم غريب وانطي حظر ويرجع ورة يومين يتصل او يراسلني من رقم ثاني
:
بطني بدت تكبر وتكبر بشكل مو طبيعي احمد صار بين فترة وفترة يجي يعتذر من خواني وامي لكن ما يستقبلوه وحتى جديتي ما تحجي ويا
:
حتى وسط ازواج عماتي وما فاد ورد انوب خوالة وما فاد وجاب زلم المنطقة وما فاد وجاب جماعتة الضباط وما فاد بحيث ما خلى احد يعتب علية وما جابة وما فاد وهذا كلة ويدزلي رسالة يكلي لو اجيب العراق بكاملة هم ما امل وراح اضل احاول لحد ما ترجعين الي
:
سمعت من البنات ومرت عمي انو عذراء زعلانة بيت اهلها متعاركة وية احمد لان يريد يرجعني ومتخبل علية ويدز ناس علمود يرجعني
:
متعاركة ويا وهو هم متخبل عليها وكايل الها اكرهج واموت منج وساعة السودة من شفتج وعرفتج تروحين فدوة لنعال روان
:
شنو الي مسويتة الي شو لا اكل تسويلي ولا هدومي تغسليهن وتكويهن والبيت جايف من الوصخ عاديت الكل علمودج المفروض هسه شايلتني بالعشرة صلاوات
:
هية ضالة تغلط وتصيح وتغلط علية حاطها وكاتلها ومجنزها وما مهتم الها وماخذها وشامرها بيت اهلها
:
هه بعد ما جنت اني اركض وراه وادور رضاه هسه صار هو يركض وراية ويدور رضاية وعايف حتى عذراء الي ذبح نفسة عليها
:
صرت لباب البيت ما اطلع كلة نايمة حتى قليل اكعد لان اخاف عالجهال بس نفسيتي تعبت كلش كلش اطلع للحديقة والمرجوحة جبيرة هم اخلي بيها مخدة وامدد لان هية بيها دوشك
:
احتاجيت اروح ازور امي مقبلت نروح لا للنجف ولا لكربلاء بسبب وضعي ولان الطريق طويل هم مو زين علية كالت صلي واقري الزيارة منا وعلى نياتكم ترزقون همة يعذرونج بسبب وضعج
:
صدك رحت توضيت وكعدت صليت وصليت لاهل البيت وقريت الزيارة للامام علي علية السلام  للامام الحسين علية السلام والامام العباس علية السلام
:
بس بقيت اريد اروح ازور ضلت غصة بداخلي توسلت بامي ما قبلت تالي كعدت ابجي محتاجة زيارة ارتاح بيها كتلها ولو للامام الكاضم علية السلام قريب علينة ما رضت ضليت ابجي وحتى ما قبلت اكل
:
يوسف سمع كللها هية ما رايحة تتونس لو تلعب رايحة لاهل البيت واكيد يحفضوها وما راح يكون خطر عليها
:
بالاخير قنعت امي كوة ما صدكت كمت بدلت ولفيت شالي وامي هم خلصت جديتي جانت تعبانة ما كدرت تجي بقت يم بيت عمي
:
رحت ولو قطرة مكياج ما خليت بوجهي لان ما رايحة استعرض نفسي ابو الحسن بقى بالاسواق مالتنة لان العامل يريد يترك الشغل مطوع بالجيش
:
وشوي متبهذلين لان ماكو احد يكعد بالاسواق كعدت وامي كالت بس تتعبين مددي لان الخانة الورة كلها الي بس
:
وصلنة وازدحام قوي امي خافت علية تالي لمن وصلنة الحضرة همة مخليني بالنص ومن جهة يوسف ومن جهة امي ومن ندخل للتفتيش امي تخليني كدامها وتوكف بعد مسافة عني علمود لتخلي احد يطخ بية وتكول للكدامها فدوة بس انتبهي لا تدفعيها حامل ووضعها مو زين
:
طبيت بالصحن اوف يا ريحة الحضرة وريحة اهل البيت بس شفت الكبة دموعي وحدها نزلت بس مو دموع عبالك مطر وينزل من عيوني
:
طبينة وردت اوصل الشباك بس المدافع بفلس راسا امي جرتني وكالت سلمي منا واطلعي برة علما الزم الشباك واطلع الج لان هسه تموتين انتي وجهالج هنا اذا طبيتي
:
وخصوصا الايرانيات تارسات الحضرة وهنة شلون يدفعن عيني من صدك خفت وكفت على صفحة يم الباب واباوع عالشباك وامي واكفة تحامي الي لا تجي وحدة تضربني
:
اباوع عالشباك واحجي بكلبي وابجي تالي متحملت بجيت بصوت عالي وحجيت بصوت مسموع ما كدرت احجي بكلبي بعد
:
شكيت كلشي لغريب بغداد بحيث على حالي امي والنسوان شبعن بجي طلعت كعدت برة صليت وامي راحت تزور وتجي
:
كملت صلاة وقريت شوي قران اجتي امي كعدت تصلي واني كملت وكعدت اباوع عالناس الي تزور
:
اني من البيت كلت لامي ويوسف مو بس نزور ونطلع لا اريد اكعد مدة طويلة بالحضرة لحد ما ترتاح نفسيتي يلة نطلع
:
لفت نضري شاب كاعد ويبجي لابس كمامة بس عيونة ودموعة تشرح للي يباوع علية الحزن الي هو بيهن جان قريب علينة
:
ضليت صافنة علية ونسيت الي كدامي والناس الي تمر حتى امي انتبهت علية اباوع علية سالتني سولفت الها ضليت اباوع علية وامي تقرة قران
:
جنت مخلية بطل مي بالجنطة مالتي لان هواي صايرة اعطش وجان بعدة ممفتوح لان اشتريتة ودخلت للحضرة راسا
:
ما اعرف لفت نضري هذا الولد مو قصة عيني زايغة بس ما اعرف حسيت ما ادري شبي هو يباوع عالكبة ويبجي
:
كد ما بجة اختنك وصار يكح ضليت اباوع علية محد انتبه اله ولا احد تقدم علية ضليت اباوعلة وهو يكح متحملت كمت واخذت بطل المي الة
:
رحت يمة مديت الة بطل المي ما انتبهلي كعدت قريب علية بس مو بصفة وكتلة اخي تفضل هذا المي
:
باوع علية وهو مستمر يكح اخذ بطل المي مني بس ما فتحة وكحتة زادت بحيث الناس انتبهو علية
:
تالي جريت بطل المي منة وفتحتة وانطيتهيا هم ما قبل يشرب ولا ينزع الكمامة كتلة ذبها مقبل زين هو اختنك غير ينزعها علمود يتنفس
:
بس ما قبل اني وداحجي ويا شفت ولد ونسوان اجوي يركضون علية تالي طلعو اهله راسا اخو جر الكمامة وصار يدك على ضهرة
:
اتفاجأت خطية بعض من وجها طاير او رايح ومخيطينة بحيث نص حلكة ماكو وعينة مسحوبة واكثر من نص صفحة وجها رايحة
:
هو يكح ويباوع علية عبالة حخترع وانهزم منة لان هيج شكلة لان ثاري طالع ميرضى ينزع الكمامة لان هيج شكلة
:
امة كعدت تبجي يمة واخو شربة مي وعلما راحت الكحة ورجع وضعة طبيعي كوة امي اجت يمي تسال علية شلون صار
:
ومن عرفو اهلة اجيت اريد اساعدة تشكرو مني ردنة نروح بس ام الولد جلبت بامي كلتلها اذا ما راح تطلعين اكعدي نسولف
:
كعدت امي يم النسوان وضلن يسولفن وجابنها من الشرق للوادي وام الولد سولفت على ابنها طلع خطية بمجمع قريب عالكلية مالتة صاير انفجار
:
وهو داخل المجمع واول ايام ذابي بالخطر وتالي مستئصلين جزء من وجهة لان كلش مضرر ومو زين يبقى
:
هو يحب وحدة وياه بالكلية ومتفقين يزوجون لان يموتون على بعض ومن صاير بي هيج عايفتة وطك بطك كايلة الة اني ما اعيش باقي عمري وية مشوه
:
وهو متخبل وحتى رايد ينتحر بسببها وكايل الها فترة علما يطيب وجهي واروح اسوي عملية تجميل بس ما قابلة وعايفتة
:
سمعت قصتة بالكامل انمرد كلبي وامي هم سولفت قصتي للمرة هو سمعها لامي من حجت لان كاعدة كلش قريب علية
:
ردت امة كالت حشى السامع كبر لفة هو اكو واحد يعوف هيج حسن وجمال هية مو تكول للكمر كوم اني اكعد بمكانك وضلت تمدح بية
:
ضلن يسولفن واني كل شوي اباوع عالولد مرة ينتبه علية مرة يباوع عالناس او عالكبة شكد انقهرت علية ثاري الي يشوف مصايب الناس تهون علية مصيبتة جانت وحدة بكدي او
اكبر مني بكم سنة وياهم جاية طلعت اختة
:
كعدت تسولف وياي واني هم كمت احجي وياها اندمجنة نسولف امي وية امها وهية تحجي وياي بس كل شوي اباوع علية
:
اجة يوسف بالبداية استغرب كعدتنة بقى واكف اشرلي صاحتلة امي اجة سلم وعرفتة عليهم بقى ميعرف شيسوي تالي كعد يم الولد واخو يحجون
:
عاد من بدو يحجون افتهم السالفة ضلينة يمكن اكثر من ساعتين نسولف وتبادلنا الارقام امي وام الولد واني اختة كذلك ما اعرف ليش رغم هاي اول مرة هيج نرتاح لناس غربة ونسولف وياهم وفوكاها تبادلنة الارقام
:
لحد ما كمنة نطلع سوة وام الولد حلفت امي بعد ما تعرفن انو نروح زيارة لبيتهم وامي كذلك ما شاء الله توهن تعرفن على بعض سون تبادل زيارات
:
طلعنة وكلمن راح بطريقة يوسف كال ما شاء الله ابد مو اجتماعيات ضحكنة وكتلة امي مو عوايدها مدري شعجب ردت اني ما اعرف بس ارتاحيت الهم
:
خطية رادت تشتري غراض من السوك بس من وراية لان مو زين المشي علي ما راحت رجعنة للبيت
:
بس ما احجي شنو الراحة النفسية الي صارت بداخلي كلش فرحت وارتاحيت بيومها حتى نمت مرتاحة
:
مرت فترة قصيرة وخالي رجع من السفر وصار ٦ سنين ما شايفينة فقررو بيت جدي يسون الة حفلة
:
جانت الحفلة تشمل خالاتي وبناتهن وولدهن وخوالي وبناتهم وولدهم والاقارب كلش كلش واحنة
:
امي بالبداية ما رضت نروح علمودي بس توسلت بيها وحلف الها ما اتحرك من مكاني بس اكعد واباوع عاد قنعت
:
جنت محتاجة هيج اجواء ولمة كعدت عالجرباية وفرشت مكياجي ومكيجت من نفس مفتوحة وسويت شعري سرح من بدايتة وكيرلي من جوة يعني اطرافة او نصة صار يجنن
:
ولبست فستان مال حوامل كلش حلو جان كملت وعساس يوسف او ابو الحسن يودونة يوسف جان طالع بشغلة ضرورية
:
وابو الحسن بالاسواق ما يكدر يعوفها تالي خابرتنة خالتي كالت احنة طلعنة وراح نمر ناخذكم جنة بس اني وامي جديتي تمرضت ما كدرت تروح
:
كعدنة بالحديقة وجديتي راحت يم بيت عمي علما نرجع شوي وسمعنة صوت الهورن مال سيارة ابن خالتي خليت الشال على راسي وكمت
:
طلعنة وخطية خالتي نزلت ترجع ليورة مقبلت اكعد الا ليكدام علمود لا اتضايق يخافون علية
:
من طلعت نزل ابن خالتي يصوفر على كيفة ويكلي شنو هالكيك هذا يابة هاي الصاكة راح تكعد يمي بالصدر
:
ضحكت ووصلت يم السيارة باوعت واشوف احمد نازل من سيارتة وواكف يباوع علينة وعيونة صايرة شرار
:
رديت لابن خالتي اي عيني هاي الصاكة الي كدامك حتكعد يمك بالصدر بشحمها ولحمها
:
ضحكنة واندار فتحلي الباب لان ثاري الخبيث منتبه احمد واكف يباوع علينة ويريد يغيضة فتحها ويكلي صعدي عيني الاميرة
:
يمة اليوم شيحاجيني وهيج صاكة كاعدة يمي بالصدر ضحكنة كلنة وكلها كامت تغيظ باحمد من شافو واكف يباوع علينة
:
صعدنة بالسيارة وما كفة الورة عاد احمد فتح كراسي الخانة الاخيرة هم الي يسموها خانة الشواذي ههه
:
صعدن البنات ويكولن بالشقة يعني هسه الي يشوفنة شيكول كاعدات بخانة الشواذي رد كرار ابن خالتي شيكولون خلي يكولون اهم شي روان مرتاحة وكاعدة يمي بالصدر
:
المهم صعدنة كلنة وكرار شغل السيارة ومشى بيها من كدام احمد وهو يباوع علينة وعيونة تريد تطلع من مكانها ومعصب ............

يتبع ................

صاحب الشخصية المجهولة يكون

شبيه البطل فخر العراق كلة(( حيدر ال مرجان ))
هذا الشخص الي العراق بكاملة يفتخر بي ويحبة
:
الي يريد بارت يتفاعل حبايبي
:
دمتم في حفظ الرحمن 😘❤️😘❤️😘❤️