لعلك تكون اقوى دروس حياتي ((لعنة اختيارك))

البارت الاخير

السلام عليكم

لعلك تكون اقوى دروس حياتي
                                (لعنة اختيارك)

بقلمي (سقين الشمري)

لا يسمح او يحلل نشر القصة بدون ذكر اسمي

.......................

سديتة من علي واني صافنة عالحجي الي كالة الي
:
كمت وكلت لامي لان حلفت بعد ما اضم عليها اي شي بالبداية هم تفاجات من كتلها
:
بس بعدين كالت والله ليش اجذب يعني الولد صار النة شهور نعرفة وحتى خوانج الي ما يحجون وية غريب
:
صار يحبونة وحتى يطلعون سوة وهو خوش ولد وبعدين على تشوه وجها انتي مو سمعتي امة تكول يسوي عملية تجميل ما يخلي هيج
:
كتلها هو هسه هم كلي هالاسبوع يسافر يسوي العملية ردت اي بعد شكو بقت يمج يمة اني معلية هاي حياتج
:
انتي الي راح تعيشيها وانتي الي تقرريها احمد ما منة فايدة ومستحيل اخليج ترجعين الة
:
وانتي على طلاك ويا يعني ما يخصج شي بي بعد يطبة مرض وين يروح خلي يروح
:
كتلها هو اني اصلا بعد مستحيل ارجع الة بس ما ادري خايفة وما مستعدة لهيج قرار كافي صدمات احس روحي عايشة على شعرة واموت

.......................

بعد فترة من الزمن

علي رجع من السفر بعد ما سوة عملية تجميل لوجهه وما اراويكم شلون صار جمال مو طبيعي هو اصلا قبل الاصابة جان حلو
:
وانوب هسه عملية تجميل صار يخبل احمد ضل يماطل وميقبل يطلك وراد يطلبني بيت الطاعة
:
كمت وسويت الة خلع مو بس طلاق من عرف تخبل وهم ضل معاند ويكلي لو اعرف اخطفج من بيت اهلج هم ما اعوفج
:
طلاكي منة جان اشبه بالموت بعد ما ناجيت الحق يلة خلصت منة شكد حاول يرجعني مقبلت وحتى كرهتة
:
بعد ما خلصت عدة تقدم الي علي الي طول الفترة الي فاتت هو جان مساندني وما يمر يوم اذا ما يتصل ٥ مرات
:
بحيث تعودت علية واعترف خلاني انسى حب احمد الجنوني ما اكللكم كرهتة فدنوب بس انواب احن واشتاق الة
:
لكن اشتياق بكره بسبب الي سواه بية ما انكر ما جنت ما خايفة اتخذ هيج قرار والمشكلة قرار ما من وراه رجعة
:
بس صليت صلاة الاستخارة بليل ونمت وجانت تبشر بخير ورة ما تقدم الية علي ورة كم يوم رجعت الجواب وجنت كلش متخوفة
:
طلب كلشي يسوي عبالك اول عرس الي وبعدني بنية رغم كتلة ما الة داعي كلي اني بعدني عزابي وهذا اول عرس
:
شلون تريدين ما افرح بعرسي كتلة بكيفك احمد كلب الدنيا واجى علية للبيت يهددني ابتعد عن علي وارفضة
:
يكلي والله اذا ما عفتي لا اكتلة خلاص ما صنطت علية ولا اهتميت بس اكو خوف بداخلي من تهديدة لان اعرف بي يسويها صدك
:
لكن خواني تحلفو بي اذا صار شي بالولد لو سويتلة شي نكتلك خلاص وحتى كبر ما نسويلك ونشمرك للجلاب
:
ولو هو ما يصنط على احد لكن هواي خفت وهمزين بموعد الخطوبة راح سفرة لاربيل هو والزركة عذراء
:
صارت الخطوبة ورحت للصالون وهالمرة اختاريت فستان يجنن ومكياج وتسريحة وخصوصا اني صارلي فترة كلش طويلة هاملة نفسي ومو شلون ما جان وحتى ضعفانة كلش
:
فمن رحت للصالون تغيرت ١٨٠ درجة ولبست الفستان واجة علي وشافني ورة ما عقدنة تخبل اباوع علية حتى يرجف
:
ومو مثل احمد فشلني كدام النسوان علي خلة النسوان استحت وخربت ضحك كضاها حضن وبوس وميرضى لا يعوفني ولا يكوم من يمي ويصيح دخيلك يالعباس صارت حلالي
:
خلة النسوان كلها صافنة صدك فرحت على فرحتة بيومها تخبل وميقبل يروح من يمي
:
وراها كلي اريد اخلي موعد العرس باقرب وقت كتلة براحتك وباليعجبك رجع احمد من اربيل
:
وعرف غير تخبل اجة للبيت وخواني جانو طالعين جرني للطرمة وخلة المسدس براسي وحلف يكتلني
:
من صدك دفعت ايدة وكمت ضربتة راشدي امي جانت واكفة يمي تعيط بس من شافتني هيج سويت سكتت
:
باوعت بعيونة ورفعت اصبعي بوجهه وحجيت بعياط وكتلة معليك بية اسوي الي يعجبني واسوي الي يعجبني
:
وانتة ما الك دخل انتة نفسك الي ما ردتني وانتة نفسك الي جنت تضربني وانتة نفسك الي ردت تكتل الطفل بطني من دريت بية حامل وانتة نفسك الي كتلي اكرهج وانتة نفسك الي زوجت علية
وانتة نفسك الي جنت تعاندني بعذراء وانتة نفسك الي سويتني خدامة الك والها وانتة نفسك الي كتلي ما اريدج وانتة نفسك الي سويت بية هيج وهيج بالعرس
:
وانتة كلشي سويت بية ما خليت شي يعتب عليك ما سويتة بية ولحد ما ختمتها راحو جهالي بسببك وسبب الزركة مالتك
:
وهسه ماخذها لاربيل تونسها واني طول فترة زواجي بيك ما طلعتني لحلك الباب ولا جنت تقبل تطلع وياي مو حتى نيشاني من اشتريتة ما رحت وياي
:
وهسه بدال ما تكول اشوفها اهتم بيها هية مرت بهذا كلة ونفسيتها زفت واراعي ضروفها ماخذلي ست الحسن ورايح تونسها
:
واني ضاربني بميت نعال ولا على بالك ولا هامتك اصلا وهسه بعد ما كملتو سفرتكم وونستكم جاي علية تكتلني لان مخطوبة لغيرك
:
اصلا اني اكتل نفسي بيدي وادخل جهنم ولا ارجع الك واصير الك انوب غلطة صارت مرة وحدة ما تكرر مرتين
:
ولو تبقى بس انتة رجال على وجه الكرة الارضية هم ما ارضى بيك ولا ارضى اتزوجك انوب
:
انصدم من كلامي كتلة مستحيل اعيش باقي حياتي وياية انسان باطل مثلك لو اعرف اموت وهسه الباب يوسع جمل
:
ولو يصوغوك الي ذهب هم ما اريدك بعد فاهم لو لا عفتة وطبيت جوة وكلت والله لو راد يسوي شي لو اذى علي بكد الشعرة الا اكتلة بيدي
:
مشت فترة واحمد بعد ما وصل والي عرفتة عمتي مطيحة حضة وكايلة الة عوفها بحالها وخلي تشوف حياتها انتة عايش حياتك وهية متحطمة ومدمرة ومتخبلة علية
:
ورة اقل الشهر تحدد موعد عرسنة اني وعلي الي كام يوم بعد يوم يحلى ويصير احلى
:
اني محجيت شي ولا طلبت وكلت اريد هيج وهيج فاجئني من كلي تعاي نروح نحجز قاعة لعرسنة اني وياج
:
مقبلت رغم اريد هذا الشي كتلة زيادة مصاريف بس مقبل وفعلا رحنة حجزنة احلى قاعة عرس بغداد
:
وصار العرس يخبل وشلون زفة سوالي والفيكات الي بالقاعة والجمال والكياتة والاناقة
:
خلاني احس روحي صدك صرت اميرة بيومها احمد متخربط من وراية ضال يومين بدون اكل وواكع بالدوام والجنود ناقلي للمستشفى
:
ما اهتميت الة خلي يحس بقهري وتعبي من صدك ما خليت شي ما سويتة ما كعدت لا اني ولا علي بس نركص
:
خلينة كل الي بالقاعة صافنين علينة خلص اليوم وجان احلى يوم بعمري واحلى من العسل وراها حجز الي والة شهر عسل لدبي
:
هو جان يدري لان مرة سالني يا دولة تحبين تسافرين الها وكتلة دبي وحجز الي والة لدبي رغم دبي كلش غالية
:
وهو ما خلة شي ما سواه الي كل امنياتي حققهن بوكتها جانن مصاريف هواي اداين من اخوه فلوس السفرة وية الي عندة
:
رغم ما قبلت وحتى كتلة ما اروح بس هو اصر وكال انبلة الا نروح وفعلا رحنة جانت دبي اختصرها جنة الاحلام
:
صدك جنة شلون جمال تخبل وخصوصا برج خليفة شكد حلو عن قرب بقينة ١٠ ايام ورجعنة وفعلا جان شهر عسل
:
وايامي عسل بمعنى الكلمة كلها حسدتني على علي ورة رجعتنة باسبوع يوسف اخوية خطب علا بت عمي
:
وعمي راسا وافق وكلة كبع واخذ وهمة يوسف وعلا واحد يحب الثاني فبضرف اقل الشهر صار عرسهم ما طولو
:
بالبداية علي ما خلاني اروح لبيت عمي بسبب احمد بس كتلة هذا عرس اخوية وهيه بت عمي وهمة بيت عمي
:
واصلا احمد بيتة وحدة شعلية بي حتى لو جان موجود هم ما علية بي كتلة شنو انتة ما عندك ثقة بية
:
كلي شلون ما عندي لو ما عندي ثقة بيج ما اخليج تروحين رحنة للمول اني وعلي واشتريت فساتين العرس مال يوسف الي حلبسهن كلهن مناك
:
ورحت للصالون عيني وطلعت عبالك اني العروس من شافني علي يكلي وين اضمج ما اريد تروحين خاف يحسدونج وما اريد احد يشوفج غيري
:
رحنة لبيت عمي وشفت علا طالعة جنن هية حلوة وبعد عروس طالعة تخبل ومن اروح فدوة لطولة طب يوسف غير طالع يموت
:
هيبة وكشخة يجنن وبلشنة الردح الزين عذراء جاية من وحدها بدون عزيمة جايبها احمد
:
شافتني وشافت الكشخة مالتي لو اتخبلت عيونها صارت براسها ردحت اني وتقى وبنات خوالي وخالاتي وعماتي لمن الله كال بس
:
تعبت من الركص كعدت استراح شوي بس ميتة عطش رحت للمطبخ اشرب مي فتحت كاسة المي ووكفت اشرب واهفي على وجهي كد ما عركت من الركص
:
سمعت صوت وراية انداريت واباوع احمد ويباوعلي بذهول انصدمت زين شجابة شلون طب لهنا
:
تركتة وردت اطلع لزمني ايدي نترتها وكتلة لو لزمتني انوب اكسرها الك كلي على كيفج شدعوة
:
رديت اني مرة متزوجة وزوجي ما يسمح لشخص يباوع علية مو عاد يلزمني ولو يدري يكسرها الك
:
ضحك باستهزاء وباوعلي كلي والله وكت بعد ما جنتي ما تكدرين ترفعين صوتج بوجهي هسه صرتي تهدديني
:
بعد ما اني جنت زوجج واني الي إلي حق بيج اكثر من كل بشر هسه صرتي لغيري
:
وصار احق بيج من عندي بعد ما جنتي ملكي الي وبس رديت كتلة انتة الي ضيعتني من ايدك
:
وهسه رجاءً وخر من كدامي اريد افوت انتة هسه ما تعنيلي غير انو ابن عمي وعلاقتي بيك اكثر من سطحية لان الي صار مو قليل ولو ما اريد افتح دفاتر قديمة وعفتة وطلعت
:
خلصت الحفلة وثاني يوم الزفة وعلي وياي واحلى شي من رحنة ناخذ علا احمد واكف عود لان اخوها ويريد يسلمها ليوسف
:
علي من شافة لزم ايدي وما عافني اتحرك من يمة ابد واحمد يباوع ويفور وانوب الفرقة كامت تعزف وجان يجرني علي ونطب اني ويا بالنص وندك ونركص ويوسف يباوع النة وفرحان
:
خلص عرس يوسف حبيبي وجان عرسة يخبل وهم بالقاعة سوا وراها راحو اسبوع لسليمانية
:
واني انواب اروح على امي رغم بعيدة شوي علية وانواب اخابرها بس خطية شكد فرحانة لان صارت الها جنة وياها بالبيت وتكول هاي بتي الثانية اني ما عندي جنة
:
جنت واكفة بالمطبخ داسوي كهوة لان راسي حينفجر حسيت بحضن من ورة رجعت راسي على صدرة وكتلة بس يمك صرت احس بالامان الله لا يحرمني منك رد ولا يحرمني منج يبعد روحي
:
انداريت علية وكتلة يعني صدك تحبني علوشتي كرصني من خشمي ومنع عني الهوى ويكلي كم مرة كايل الج لا تصيحيلي بهذا الاسم جني طفل عمرة سنتين
:
ضحكت وكتلة يلة لعد علش تلش وانهزمت منة واني اركض وهو يركض وراية وميتة ضحك
:
لحد ما لزمني وكلي هسه اجة وقت العقاب لازم نعاقبج المذنب والمجرم ميصير يفلت بدون عقاب
:
ويضحك بمكر ضحكت وكتلة اموت على عقابك وبستة من شفتة اني سويت هيج لو تخبل
:
سحلني للغرفة واني اعيط وخربانة ضحك طبعا الطابق الثاني مال بيت عمي هو الي كلة وعدنة درج ننزل ونصعد منة
:
يعني الطابق الفوك مفصول عن الطابق الجوة بي غرفتين وصالة ومطبخ وحمام وصحيات يعني بيت كامل
:
لان مساحة بيت عمي جبيرة فالفوك هم جبير وواسع كلش مو خنكة واني من خطبني علي راسا كلي بيتنة وحدنة مو وية اهلي الطابق الفوك النة وراح افصلة عن الطابق الجوة
:
رغم ما رضيت وكتلة عادي اعيش وية اهلك قابل همة شبيهم شو اطيب منهم ماكو بس مقبل كال احنة كلنة الولد من نزوج نطلع بيت وحد وهذا الشي بطلب امي يعني مو تكولين وامكم شلون
:
وفعلا بيت اخو الثاني المتزوج اكبر منة لعلي ذاك بيتة وحدة بصف بيت اهله مشت الايام وحياتي احلى من العسل وية علي
:
يحبني ويخاف الله بية ولحد هذا يومة ما مزعلني اذا امشي يباوع على طولي وين جنت وين صرت
:
ورة شهر ونص صارت عندي اعراض حمل ورحت حللت وطلعت حامل شكد فرحت وخطية علي حتى بيومها ما رحنة للبيت
:
كضاها يفر بية من المول للمطعم وما خلة شي بنفسي ويكول هاي ثمرة حبنه الحلو بي وحبيتة كلش يحسني شي مقدس يموت علية
:
ورة ٣ اشهر صورت وانصدمت من هم كلتلي توم بوكتها كلش خفت بس كالت ٢ بس مو مثل قبل اني شنو سالفتي ما شاء الله كلة توم ولو ما اريد احسد نفسي عين الباردة علية ههه
:
علي ما اوصف شنو شعورة ولا شنو سوة فرحان وخايف بنفس الوكت وخطية هو صار يشتغل الي لان يخاف علية
:
ومداريني مثل المي بالصينية علا هم ورة شهرين طلعت حامل واني مر على ولادتي ٨ اشهر راح اخلص ال٨ اطب بال٩
:
بقى الي اخر يومين بال٨ وصارت عندي ولادة الكل دخلت انذار واولهم اني خفت منا توم ومنا ولادة مبكرة كلش خفت
:
البجي والعياط الي سويتة مو طبيعي حولوني للعمليات واني ابجي وما قبلت ادخل للعمليات الا علي وياي وهو لازم ايدي والا شوي يبجي على وضعي وخايف علية
:
وبعد تعب وعناء طويل والم مو طبيعي الله عوضني باجمل ثنين توم يخبلون جانت ثمرة حبي وتعبي
:
حسيت عوضوني عن الي راحو وعلي متخبل عليهم اكثر الانواب ياخذ اجازة ويكعد وياهم بالبيت
:
سميتهم لارين واسحاق لان جانو ولد وبنية ولارين احلى من اسحاق رغم ثنينهم بيض وحلوين ويخبلون بس لارين احلى وابيض
:
الي يسال على علي شنو يشتغل علي محلل وعندة مختبر خاص بي وحدة ويداوم بالمستشفى هم واخيرا بعد عناء طويل وقهر وحزن والم الله عوضني يومية اسجد سجدة الشكر لربي على هاي النعمة
:
احمد ما شايفتة من فترة طويلة بس امي تسولف الي تكول مشاكل هو وعذراء ويومية كاتلها ودازها لاهلها
:
واخر مرة مطلكها هم وبالتواسيل ودازة ناس علية يلة مرجعها وضالة مكفخة الة يجيب ويضرب بيها
:
وحتى هاملها واكثر الانواب ما يرجع للبيت وطالعة حامل وكاتلها ومذببها الطفل كايل الها ما اريد منج خلفة
:
خليني حاير بس بالبنية احسن شي وعبالج ابقى عليج الا ازوج عليج واكسر خشمج وغصبا ما عليج
:
وعالكة الامور بيناتهم علي سودة علية يخليني الليل كلة نايمة وهو يسهر عالتوم لان يسهرون واني اتعب ليل ونهار كعدة
:
فيعوفني نايمة وهو يسهر عليهم وتعلم هو يسوي مميات الهم ويبدل حفاضاتهم ويكمطهم ذاك اليوم صورتة فيديو
:
ودزيتة لبنات خوالي وخالاتي ماتن من الضحك يحبني ويخاف الله بية وما متندمة على عدد شهر الي براسي بيوم الي وفقت علية
:
صدك الله عوضني بي والى هنا واختم وياكم قصتي
:
اتمنى تكونون استفاديتو منها اكتبو الي رايكم بالتعليقات
:
وهسه خلصت القصة وخلصتو مني اختصرت هواي احدث وسرعت هواي احداث بس شسوي مجبورة ومنها واكوللكم بعد ما اكتب قصص وانزل
:
دمتم في حفظ الرحمن 😘❤️😘❤️😘❤️