لعلك تكون اقوى دروس حياتي ((لعنة اختيارك))

البارت التاسع عشر

السلام عليكم

لعلك تكون أقوى دروس حياتي
                                  (لعنة اختيارك)

بقلمي (سقين الشمري)

لا يسمح أو يحلل نشر القصة بدون ذكر اسمي

..........................

شهك وراها راسا صفر الجهاز الممرضة راسا جرتة من ايدي وكامت تصيح علمود يجي دكتور الاطفال
:
ايدية ترجف دموعي جفت بعيني انداريت على احمد شفتة مصدوم بقهر ومخلي ايدي على راسة ويباوع عالطفل
:
كتلة بخوف احمد مات ابني مو باوع علية مصدوم ومحجى شي ورد باوع عالطفل اجى دكتور الاطفال يركض
:
فحصة سواله هيج وسوالة هيج بس الجهاز مصفر بالنص ساعة تقريبا الدكتور يحاول ويا وهو ماكو
:
لحمة طرية يروح بيد الدكتور يمنى ويجي يسرى واي روح ما بي رادو يطلعونة كتلهم لو تقوم القيامة هسه هم ما اطلع منا
:
تركوني وحارو بي واني اتوسل بالدكتور عيوني دكتور فدوة بس لتخلي يموت لو يريد روحي هم انطيهيا بس لا تخلي يموت
:
ما خلى شي ما سوو لحد ما بزعو اخر شي خلا الدكتور بمكانة وكال البقاء لله عرفت بي مات من اول ما شهك وصفر الجهاز
:
وصار نص ساعة يحاولون ويا وادري بي ما بي اي روح لكن رافضة فكرة انو هو مات اكول لا هسه يعيش هسه يرجع للحياة
:
واجذب على نفسي لكن انهاريت من كال الدكتور البقاء لله ومات بعد هايهيه نسيت نفسي ونسيت عمليتي
:
ونسيت الوجع كلة ونسيت كلشي كمزت من الكرسي عالدكتور كتلة أبوس رجلك أوكع دخيلة على رجليك خلي يعيش بقى بس هو الي
:
اربعة ماتو ما اريدة هو الخامس يموت شتريد انطيك بس خلي يعيش نزل راسة باسف ويكلي ياريت لو بيدي شي بس هذا امر الله
:
ولا اعتراض على حكمة احمد لزمني من ضهري يسندني ويجر بية على كيف واني اتوسل بالدكتور ويكلي والله حاس بيج
:
بس ما بيدي شي هذا امر الله عطت بوجهة وكتلة لا لا هسه تخلي ابني يعيش ربت على جتفي وعافني وطلع
:
كمت اعيط وراه واكلة دكتور ارجع دكتور تعال شوف ابني دكتور احمد لازمني ويبجي وكل الي اجوي لغرفة الخدج كامو يبجون
:
حسيت برطوبة عاط احمد روان امشي ارجعي عمليتج دتنزف باوعت ملابسي فاضت دم عتيت ايدة وكتلة ما ارجع اريد ابني
:
شالتة الممرضة دتلفة وكمت اعيط فقدت شالني احمد شيل وطلعني برة واني فقدت من طلعت من قاووش الخدج كلة
:
المستشفى كلها التمت على عياطي حسيت شي بطني طك عرفت العملية والوجع ذبحني بس ما اهتميت
:
وداني احمد للغرفة الي جنت نايمة بيها وخواني وامي وكلها اجتي وراية وتبجي واني كلبت الدنيا بعياطي
:
خلاني عالسرير وحتى هو ايدة صارت بيها دم لان وكع عليها اجتي الممرضة تضربني ابرة مهدئ ومنوم مقبلت
:
من وصلت يمي شكد بية قوة همشت الابرة من ايدها وذبيت الدوة من عدها وشمرتها بالكاع
:
اجوي ديلزموني علمود تضربني الثانية كتلهم وروحة لابوية الي يتقدم اكتل نفسي ما اريد تنطوني مهدئ
:
عاطو عمليتج تنزف رديت بس جيبو الي ابرة مسكن وهنا اشوفها اني بعيني والابرة تجي فارغة اني بعيني اشوف يلة تضربونياها
:
تريدون تنوموني وتاخذوهم تدفنوهم اموت والله اموت اذا ما متت اكتل نفسي بيدي
:
شافو ما مني فايدة وتخبلت سوو مثل ما ردت اجتي كدامي الممرضة سحبت من الابرة وبعيني شفتها مسكن يلة خليتها تضربني
:
شوي وهدئ وجع بطني بس بعدها تنزف لان طكت العملية بس ما كلت لاحد لان ادري شراح يسوون
:
ضليت الوب وانوح اريد اشوفهم وامي وخواني واحمد ما يرضون واني اخرمش بوجهي
:
تالي خالتي كالت لامي عوفيها خلي تشوفهم  مو راح تموت ردت امي واذا شافتهم هم تموت رديت بانهيار لا لا ما اموت
:
اريد نار كلبي تبرد اريد اشوفهم معلية علما قبلو وقنعو بالف يا علي احمد طلب منهم يجيبوهم ليمي للغرفة
:
لان ما بية اكوم جابوهم من الثلاجة وطبو الممرضين مخليهم كلهم على سدية جبيرة ومخليهم بالعرض واحد بصف الثاني
:
وفوكاهم غطى ابيض راسا شهكت بس شفتهم امي انهارت اصلا ما بقى واحد بالغرفة ما انهار حتى الممرضين
:
رادو يجيبوهم واحد ورة الثاني مقبلت كتلهم اني اكوم اشوفهم ساعدتني امي وخالتي هم وكمت
:
وصلت للسدية واني ارجف جانت قريبة علية كلهم جانو خايفين من ردة فعلي وصلت يمهم والممرض جر الغطى من عليهم
:
راسا شهكت شهكة يمكن مو الغرفة بس لا المستشفى كلها سمعتها شهكة زرفت صدري من طلعت
:
باوعت لافيهم بغطى ابيض واحد نايم بصف الثاني جانو ٣ ولد و٢ بنات مخلين البنات وحدة بصف الثانية والولد واحد بصف الثاني
:
منضر يمكن للي كتل الحسين ما اتمناه نايمين مو عبالك ميتين وناعمين بس شفتهم بيضة
:
جانو يختلفون ما يتشابهون مشيت واني اباوع عليهم واحجي وياهم واكوللهم جنت منتضرتكم بفارغ الصبر ليش عفتوني
:
وصلت للولد الي مات قبل شوي كتلة مو بس انتة قوي من بين خوانك وعشت ليش ما بقيت يمي لو تريد تلحك خوانك
:
جان تحملت لخاطري مو اني امك ليش ما متت راسا ليش خليتني اتلوع بيك ليش بحضني شهكت ومتت
:
ليش ما واحد منكم انكسر كلبة علية وكال ابقى عايش علمودها جنت احجي بصوت مسموع وابجي احمد من كلت هيج
:
كعد للكاع ويبجي ومخلي ايدة على راسة يوسف طلع ما اتحمل اما امي بحثًا اخر والبقية تخبلو حجيت قهري كلة وية جهالي
:
واكوللهم ٧ اشهر شايلتكم بطني واخاف من الهوى عليكم وانتو بداخل بطني ٧ اشهر حافضت عليكم ما خليت احد يدري بيكم
:
ليش ولكم ليش لخاطر تعبي اكعدو بس يوم واحد انيمكم بحضني وروحو حك لهفتي عليكم فدوة ماما اكعدو
:
والله لخاطركم ابيع الدنيا واهلها بس اكعدو نايمين مثل الملاك امشي عالسدية يمنى وارجع يسرى
:
واحسب باصابيعي واحد أثنين تلاثة اربعة خمسة وارفع راسي اباوع عليهم واضحك واكوللهم راحو مني ٥ شعندي عايشة بعد
:
لا واحد ولا اثنين اصلا اعتبر عارة من العارات اذا بقيت عايشة يا ناس راحولي خمسة كلولي شسوي
:
كمت اشيل بيهم واحضنهم واشم ريحتهم وابوسهم تالي تعبت لا عندي حيل ولا عندي طاقة بعد
:
كعدت وتربعت عالسرير وكلت لامي جيبيهم كلهم الية ضلت صافنة كتلها يمة مو وكت صفنتج اريد اشبع منهم
:
صارت تشيلهم وتنطينياهم واحد واحد خليت واحد بحضني عالجهة اليمنى واحد عالجهة اليسرى واحد بالنص والبنات حضنتهن
:
وحدة باليمنى وحدة باليسرى واباوع عليهم اشم هذا وابوسة وارد اذبة بحضني واشيل الثاني اشمة وابوسة
:
حاضنتهم واشم بيهم وصافنة الممرضة كالت ميصير بعد لازم نرجعهم للثلاجة علما تكملون المعاملة وشهادة وفاتهم
:
باوعتلها بعدم مبالاة وكتلها ااش اسكتييي ذولة خلفتي وتريدون تاخذوهم مني يا ضلام يبقون يمي ما افاركهم
:
مقبلت عطت بيها صوت خليتها تسكت وتطلع من الغرفة هم ضليت على هذا حالي ساعة وهمة يتوسلون بية اعوفهم علمود ياخذوهم يدفنوهم واني من يكولون هيج اتخبل واكللهم دفنوني وياهم
:
علما اخذو الجهال مني اني طكيت جروهم مني واني اعيط خلوهم عالسدية وغطوهم وطلعو وبدى عياطي
:
كمت وراهم اركض وثوبي صار عبارة عن دم وحتى الكاع انترست بطني احس بيها انفتحت
:
مشيت شوي واحس اسودت الدنيا بعيني لزمتني امي وتعيط اخر شي كلتة احمد عليك الحسين ادفنهم بالنجف يم ابوية
:
وراها وكعت وما حسيت بشي بعد ما كعدت غير ثاني يوم لكيتهم ماخذيهم ودافنيهم واني مدخليني للعمليات مرة ثانية
:
ومخيطين العملية كلها من جديد اريد احجي اعيط بس احس مثل السكرانة ما اكدر
:
وحالتي صايرة خطرة بقيت ٤ ايام ويوم الخامس يلة طلعت من المستشفى بس هذا الوكت كلة عالمهدئات
:
ما احجي شنو حالتي ونفسيتي وحتى فكرت اكتل نفسي الاكل كطعتة نهائي عشت عالمغذيات بس
:
صرت عبارة عن جلد وعضم الكلام كطعتة يحاجوني ما اجاوبهم تعبت حيل صورتهم لجهالي ابد متروح من بالي
:
صدفة شفت ماخذين الهم صور بموبايل امي نقلتهن لتلفوني بدون ما تدري امي ويومية بليل اكابل صورهم وابجي
:
تركت كلشي صرت جثة بس عايشة احمد ابد ما التقيت بي من يوم الي طلعت من المستشفى لليوم
:
يجي يريد يشوفني بس لا اني ارضى اشوفة ولا خواني وامي يخلو يشوفني كرهته وكرهت كلشي
:
وبالاخص عذراء ويمكن لو اشوفها اشرب من دمها كلة بسببها الي صار كلة من وراها خسرت اطفالي بسببها
:
اهل المستشفى صارو يعرفوني لان ماكو اسبوع يعبر اذا مو اني متخربطه وطالعين يركضون بية للمستشفى
:
مرة صادفت اتخربطت واحمد جاي لبيت عمي وعرف ولحكني للمستشفى ورة ما صحيت
:
طب للغرفة يشوفني ويريد يحجي وياي من شفتة درت وجهي وجلبت بايد يوسف وشكد حجة وياي ما رديت لحد ما طردة يوسف
:
مر على هذا الحجي شهرين وطلع اربعيني واربعين جديتي كذلك وراحو للنجف وجلبت الا اروح وياهم
:
هم اشوف جديتي وهم جهالي مدفونين يمها لان هيه وابوية بنفس القطعة اويلي من شفت كبور جهالي شمرت روحي من السيارة ونمت على كبورهم
:
بحيث كلها نست جديتي وكبر جديتي واندارت علية شي الي سويتة كسرت كلب الكافر بي
:
واحمد هم جان جاي يوسف يشيلني وارد اشمر روحي واعيط ولكم بس كلولي على منو اندار من منو اريد اشبع
:
خمسة يا ربي خمسة ما كسرت خاطرك وخليتلي واحد اشيل بالتراب واذب على راسي انداريت على كبر جديتي
:
وكتلها جدة تمنيتي تشوفيهم هسه همة هم لحكوج كلهم ديري بالج عليهم انتي وابوية
:
يشيلون بية وارد اشمر نفسي على كبورهم احمد كاعد يم كبورهم يبجي ومنهار من شافني تخبل علية
:
يجي يشيلني وادفعة واعيط كلة منكم انتة وياها حسبي الله عليكم الله ياخذكم انشالله عساكم بنار كلبي كون
:
تعبت وهذا كلة واني مستمرة اعيط لحد ما فقدت ودوني بمستشفى بالنجف والدكاترة تخبلو على حالتي
:
سوء تغذية وخفقان وانهيار عصبي ومضاعفات وكلة على بعضة بحيث اخترعو مني ويكولولي انتي شلون عايشة
:
وراها بفترة توسلت بيهم ياخذوني للنجف مقبلو كالو هم مثل ذيج المرة يصير بيج
:
مشت فترة طويلة وحالتي من سيء الى أسوأ دلال وياي ابد ما فاركتني اذا متجي التلفون ميسكت وتضل تحجي وياي
:
واكثر الانواب من تخابرني اخوها يحجي وياي ويسلم علية ويحجي وياي ويضل ينصح بية ويكولي شوفي اني رغم الي صار بية بس بقيت عايش وانواب يطول بالحجي وياي
:
انواب امي تسمعة شلون ينصحني تكلة احجي وياها يا خالة مو والله بزعت وكرهت روحي من وراها دتموت نفسها ومو راضية تتقبل الواقع وتنسى
:
اسمه علي مرة من المرات كتلة باسمة يكلي اكولج ليش اسمي بلسانج يخبل عبالك تكولي بشكل يختلف عن العالم خلاني اضحك
:
ورة شهرين ونص تقريبا شفت عذراء او مو شفتها جانت جايبة ولحد هسه محد من بيت عمي شايفين بتها
:
ومحد رايح ولا احد يقبل يروح وهيه جاية عساس تريد توكع عليهم وتحليهم يسامحوها وتشوفهم حفيدتهم
:
غافلت امي جانت متدري بيها جاية بس صدفة البنات كللي كتلها ضايجة رايحة اكعد يم البنات
:
هيه كلش فرحت وكيفت لان ابد ما اطلع الحديقة مالتنة ما اطلع الها كاضيتها بغرفتي
:
توجهت لبيت عمي طبيت من المطبخ شفت احذيتهم باب الاستقبال من طبيت سمعت عياط عمي
:
يكللهم اني ما عندي حفيدة اني جان عندي احفاد وهمة خلفة روان وماتو وخلص هايهية بعد ما عندي ولا اعترف بغيرهم
:
طبيت للاستقبال وكلها انصدمت من شافتني عبالهم ما ادري وطبيت فجأة وراح انقهر
:
باوعت على عذراء وضحكت وكتلها هلو ضرتي شلونج ضلت تباوعلي بحقد وضايجة مني وما ردت السلام
:
احمد بس يباوع علية رحت يمها جانت شايلة بتها دنكت عليها وكتلها بالخير عليج الصغيرة
:
ما ردت مديت ايدي اريد اشيلها حضنت بتها ورفضت تنطينياها وبعدت ايدية وتكلي ديري بالج تمدين ايدج
:
ضحكت كتلها لتخافين ما راح اكلها ولا راح اموتها احمد كللها عذراء انطيها البنية مقبلت بس هو خزرها
:
نطتنياها كوة ومو راضية غصب عنها شلتها باوعت الها وابتسم شميت ريحتها وبستها وحضنتها
:
هيه راسا نترت كافي رجعي بنتي رفعت راسي عليها وضحكت انداريت وتمشيت يم عمتي كتلها عمة شيلي حفيدتج شوفيها شكد حلوة
:
مقبلت تشيلها بس غمزت الها وهية حست اني ناوية على شي شالتها بعدم اهتمام انداريت ورحت يم عذراء
:
واحمد فرحان عمتي قبلت تشيل بتة دنكت على عذراء وكتلها شوفي قنعت جدتها تشيلها
:
باوعت عليها مسوية شعرها باف من كدام ومخلية الشال باهمال باوعت على الباف مالتها
:
وبحركة سريعة جريتها منة وكع الشال ولزمتها جر من شعرها هيه راسا عاطت بصوتها العايق
:
واحمد طفر يريد يخلصها مني بس بيومها الله ذب بية قوة مو طبيعية بحيث احمد يجرها من ايدي واني مجلبة بيها
:
هلست شعرها كلة وشبعتها راشديات واعيط لج ليش حقيرة شحصلتي من رحتي كلتي للعالم كلها بية توم وما عبر علية ذاك اليوم وجهالي كلهم ماتو
:
لج لييييييش هسه انتي فرحانة ومكيفة جهالي ماتو وبتج عايشة لج ليش مو انتي ام ما خفتي من الله ما خفتي على بتج
:
شسويتلج ولج مو عفتة الج مو طول هاي الفترة يجي يريدني ارجع واني تاركتة وناوية بس اجيب اطلك منة
:
ليش شسويلج بعد شستفاديتي ها برد كلبج ارتاحيتي هسه احمد يجر بيها من ايدية دفعتة بكل قوتي وكتلة
:
حبيبة كلبك مو خايف عليها ودافع الها ليش ما انكسر كلبك علية بدال ما انتة تحاسبها بدال ما انتة تاخذلي حقي منها
:
عايفها على حل شعرها وجايبها هسه لبيت اهلك وجنها طالعة من الصالون ولك لييييييش يا ضالم ليشششششششششششششش
:
جريت ايدها وعضيتها من ايدها بكل قوتي ما عفت ايدها لحد ما طلع منها دم هيه فرفحت جوة ايدي
:
وعمتي والبنات مكيفات ويكولن اي عفية بعد ايدي ربيها عدل اخذي حيفج منها اختصرها الكم بيومها
:
طلعت قهر المدة الي فاتت وقهر جهالي وكلشي صار بيها ما عفتها غير الا صايرة بشر ثاني من الكتل ما تنعرف صارت اكتل بيها وتعيط احمد الحكلي تستنجد بي
:
باوعت على احمد الي مصدوم مني كتلة ما اكول غير حسبي الله ونعم الوكيل عليكم عساها بحضكم وبختكم وبعزيزكم
:
وعساكم لا شفتو الراحة ولا عرفتوها ولا اتهنيتو بحياتكم وباجر عكبة بيوم القيامة اشكيكم لربي هو ياخذلي حقي
:
اخر شي ضربتها بدفرة على وجها وخليت وطلعت طبيت لبيتنة واحس براحة عجيبة وغريبة من شهور ما حاستها من فقدان جهالي
:
وصلت للمطبخ تلكتني امي باوعت علية شكلي مو مال وحدة ما بيها شي بس جنت فرحانة
:
كلتلي خير روان شبيج ابتسمت بوجها وكتلها كتلت عذراء ردت شنووو كتلها اذا تريدين روحي شوفي بنفسج وتاكدي
:
هسه اني مرتاحة لحد يحاجيني ورايحة اسبح وحضريلي اكل من اطلع من الحمام لان كلش جوعانة
:
ضلت تباوعلي مصدومة من كتلها هيج اجتي خلت ايدها على كصتي تقيس حرارتي عبالها مسخنة
:
بيومها جانت بية راحة عجيبة خابرت دلال وسولفت الها وفرحانة جان علي بصفها كلي والله عفية طلعتي مو هينة
:
وضلينة نحجي ونسولف ونضحك وراها بيومين رفعت دعوة طلاق وتنازلت عن كل حقوقي لان كلشي ما اريد منة لاحمد
:
ومن واصلة الدعوة الة رفض يطلكني وشكد حجو ويا ارجال عماتي وخوالة علمود يطلكني لان احنة طلبنة منهم بس هو رافض وما يرضى
:
وكايل الهم روان الي مستحيل تصير لغيري ولو تطلب الامر مني اطلبها بيت الطاعة
:
ضليت بين مد وجزر مر على موت جهالي ٦ اشهر ما اكول نسيت بس حالتي صارت احسن من قبل
:
وهم ابقى من اشتاق الهم انهار بالكامل مرة حلمت نايمة واجتي جديتي كلتلي بيبي بعد لتبجين ترة جهالج بخير وزينين
:
وطيور بالجنة واني ادير بالي عليهم مر كم يوم وبيوم دكت دلال كلتلي علي يريد يحجي وياج
:
كلت بكلبي شيريد حجى وياي وسلم علية وصدمني من كلي روان اني احبج ورايدج على سنة الله ورسولة بس تطلكين
:
وادري هسه تخترعين من شكلي وتكولين هم الك عين تحب بهذا شكلك بس اني بعد منا لكم يوم اسافر اسوي عملية تجميل لوجهي
:
وانشالله هذا كلة يتغير وتشوفين وجه كامل وزين وما تضوجين من وجهي
:
كتلة علي اني بهذا شكلك وما ضايجة ولا مستنقصة منك وبالعكس كلش افرح من احجي وياك وارتاح واكيف
:
بس انتة تدري لحد هسه ما مطلكة واحمد معاند ما يطلكني وراها عدة لازم الزم واصلا ما مستعدة اعيش تجربة ثانية
:
لان التجربة الاولى كفت ووفت واخذت نص عمري ما مستعدة لمجازفة ثانية
:
رد انتي بس وافقي والله اعيشج ملكة وبيت الله روان مو كل اصابعج سوة وثقي ما راح تتندمين اذا وافقتي
:
روان اني مو احمد اني علي واخذي عهد مني لو بيوم واحد ضوجتج لو زعلتج الي تريدينة يصير لو جان روحي هم
:
ضل يحجي الي ويقنعني كتلة الله كريم بس ما اكلك اي ولا اكدر اخليك تتامل
:
رد انتي اخذي راحتج وفكري على راحتج عدج وكت منا لمن تطلكين ولحد ما تخلص العدة مالتج على راحتج واي شي تريدي وتطلبي اني حاضر ومن هسه موافق
:
كتلة الله كريم اني استاذن سلمت علية وسديتة واني مصدومة .......

يتبع .............

طبعا اني ما نشرت لحد هسه مريضة وفوك هذا كلة صارتلي مشكلة شكبرها شكدها
:
بسبب قصتي الاولى الي نشرتها مال الفصلية بسبب وحدة ما تستحي وما تخاف الله مسحت حتى القصة الي موصلة ٣ مليون ونص
:
وبسببها تلاغيت اني واعز صديقة عندي ما اكول غير حسبي الله ونعم الوكيل عليج وعساها بحضج وبختج يا حقيرة
:
تعبي كلة راح بسببج وبسبب استهتارج واذا دتابعيني بهاي القصة ودتقرين اكلج لا محاللة ولا مواهبة لا دنيا ولا اخرة
:
وارجع واكول حسبي الله ونعم الوكيل عليج يا ما مرباية عالسويتي
:
القصة شارفت عالنهاية ومن عدها وبعد راح اعتزل الكتابة لان تعبت حيل تعبت
:
دمتم في حفظ الرحمن 😘❤️😘❤️😘❤️