لعلك تكون اقوى دروس حياتي ((لعنة اختيارك))

البارت التاسع

السلام عليكم

لعلك تكون اقوى دروس حياتي
                                  ((لعنة اختيارك))

بقلمي (سقين الشمري)

لا يسمح او يحلل نشر القصة بدون اسمي

.........................

غفيت من التعب وما حسيت بشي بعد كعدت الساعة ب٩ علمود احجي وية عمي ودعيت الله يسهل امري ويقتنع عمي بسرعة وما اتعب
:
امشي وصافنة على نفسي ليش هلكد داذل نفسي شنو معنى الي داسوي زين انتحر واخلص من هذا الحب والعذاب ليش مصممة اذل روحي
:
هذا الي داسوي كلة يستاهلة احمد قراري جان غلط بغلط واعترف بنفسي لكن كلت عسى يجي يوم ويحبني احمد
:
عمي كاعد بالهول رحت سلمت علية وكعدت يمة سالني شلوني وشلون صرت ومبين عندة علم بالصار وعلى شنو كاعدة يمة هسه
:
حجة وكلي يابة روان صح هو ابني وانتي بت اخوية لكن الي ديسوي احمد غلط وما ارضى بي
:
اعذريني خطيتج بركبتي كسرت بختج ما راح اسامح نفسي ليوم الدين ووعد مني اني ازوجج بيدي لاحسن واحد واحسن حتى من احمد
:
ما عرف قيمتج بس وداعتج حيعرفها ويتندم اني حتى اريد اتبرى منة ومنتضر بيوم الي يزوج اتبرى منة عالاخير
:
روان:
لا عمو دخيلك لتكول هيجي اني اموت بدون احمد اعز واغلى شي عندي تخليت عنهم اليوم بسبب احمد تجي هسه تكولي هيجي
:
عمو والله العضيم وروح ابوية اني قابلة خلي يتزوج ورب الكعبة راضية بس يخليني على ذمتة
:
عمو صارلي اسبوع لا نايمة ولا ماكلة ولا صحة وعافية عندي لان ما شايفتة اترجاك عمو ارضى
:
لخاطري اذا الي خاطر يمك انتة ليش مدتقبل غير علمودي هو اني وقابلة بعد شكو انتة ردت من عندة يتزوجني وهاي اني صرت مرتة
:
ما اكدر اشوفة متعذب ومقهور اهم شي عندي يكون هو فرحان ومرتاح والله ما اريد شي بعد فدوة عمو دخيلك وافق
:
مقبل وساعة احجي ويا وماكو فايدة وساعة ونص وهم ماكو وساعتين وهم ماكو و٣ ساعات وهم ماكو زين الوقت تاخر ويريد يروح ينام
:
هو يكلي عوفيني اريد اروح انام وما ضل وكت واني اكلة انتة تروح تنام وترتاح واني اضل كاعدة للصبح خايفة على احمد
:
مقبل اخر شي حلفت الة وروح ابوية والله والقران لو ما وافق وقبل احمد يزوج اني لو انتحر لو احرك نفسي ويدرون بية الي اكولة اسوي
:
ضل صافن علية كلي انتي من كل عقلج كاعدة تحجين صدك يعني هزيت راسي اي
:
عمو ترة هذا مو حب هذا اسمة خبال او مرض او شي تعدة الحالة النفسية تدرين لو لا شنو هذا حالج علمود واحد ما يسوى اضفرج شنو تكتلين نفسج اذا ما قبلت يزوج لعد انتي شنو شغلج لو غير وحدة جان هسه كالبة الدنيا علية وعلى راسة
:
ضليت احلف واقنع بي اخر شي قنع وكلي علمودج وبيوم الي تتاذين لو تاخذين قرار ثاني اني اول الناس اوكف وياج بما انو انتي بسبب احمد اهلج تبرو منج
:
وشغلة ثانية خلي يروح يزوج ما راح اتبرى منة لكن ما احجي ويا ولساني ما يطخ لسانة لحد ما اموت
:
كيفت وقبلت كلت اكولة لاحمد عود منا لفترة هو اب مهما كان اكيد حيحجي ويا فرحت وصعدت لغرفتي فرحانة عمي وافق وحيرجع احمد واشوفة
:
بس كلبي مكسور احسة صار اجزاء وطشرن اجزاءة من القهر وباقي اخر جزء شوكت يوكع ويطشر هذا الجزء ما ادري
:
طبيت لغرفتي باوعت عليها مشتاقتلها ريحة احمد بيها طلعت قطعة من ملابسة وكعدت عالكرويتة اشم بيها
:
اشم بالثوب مالتة واكول لنفسي اني اكيد مو صاحية اني احتاج طبيب نفسي وضروري الي داسوي مو طبيعي اصلا تعدة مرحلة الخبال
:
اجتي امي على بالي راسا نزلت دمعتي اني البنية الوحيدة الها والمدللة مالتها هيج سويت بيها هسه حتى رب العالمين راح يعابيني
:
اريد ادك على احمد موبايلي بقى عد امي رحت عالبنات لكيتهن نايمات استحيت ادك الباب على عمي وعمتي بهذا الوكت
:
تالي عفت وصعدت حسبالي اخابر احمد او ادز رسالة لان ادري بي كاعد لحد هسه يلة خليها على باجر عود من الصبح ادك علية
:
مددت عالجرباية وتذكرت حجايات احمد من يصيح ما اريدج اكرهج وكل حجاياتة الي قهرني شكد ما عندي كرامة لعد
:
اني هنا كلبي محروك وديتكطع علية وعلى شوفتة وهو عايف البيت علمود الي يحبها ضل بنفسي اشوفها صدك حلوة شنو الي عجب احمد بيها
:
بشنو احلى مني فضلها علية وسوة هذا كلة علمودها والله عمي نيالها ومحضوضة بقت بنفسي اشوفها
:
نمت ودمعتي على خدي واتوقع موتي على دقيقة واودع الدنيا واخلص منها وارتاح
:
ثاني يوم من الصبح كعدت وكلت لعمتي تروح تجيب موبايلي من امي ما ردت اروح اني هسه كلت خلي تهدء وتبرد نار كلبها واروح
:
بين ما راحت عمتي دكيت على احمد من موبايل عمتي وبلغتة وكال ادري امي كلتلي اتاكدت يجي اليوم
:
كفيت ارداناتي ووكفت اسوي الاكل الي يحبة احمد عمتي تاخرت ما رجعت بسرعة ومن رجعت وجها ما يبشر بخير
:
سالت عمتي كلتلي امي البارحة وراية متخربطه ومودينها خواني للدكتور هية كالت هيج لو اني اتخبلت عليها ذبيت الي بيدي وطلعت اركض اريد اروح عليها عمتي ما خلتني ومقبلت اروح
:
لان امي ما راضية اروح عليها واذا اروح هسه وتشوفني تتعب بعد اكثر خلي تصير زينة وعود اني اخذج واروح اوديج توكعين عليها
:
كعدت عالكرسي ابجي طبطت عمتي على جتفي وكالت الله يعينج ويصبرج عالدتمرين بي هذا امتحان صعب من ربج او خبال منج
:
كمت اكمل طبخ وعمل حلويات لاحمد لكن كلبي مشتعل بنار على امي اشتغل وابجي
:
للساعة ب٢ ونص الضهر اجة احمد عمي جان نايم يمة مو شفتة عبالك صار عندي العيد
:
شلت حتى المستحى والخجل وطلعت اركض علية وحضنتة كدام عمتي والبنات حاضنتة وحتى هو كلي كلبج حيوكف شبيج على كيفج
:
عمتي تباوع بقهر سلم عليها ردت من ورة خشمة كعد بالهول شوية ورد صعد يسبح اني الغرفة محضرتها ومزينتها بورد وشموع وريحة البخور والعطر والحمام كذلك ما مخلية لو شي واحد
:
صعدت وراه كلت خاف يريد شي هو ضل يباوع عالغرفة ذب موبايلة والسويج وكلي اشتاقيت للغرفة تدرين ولهاي الاجواء
:
ابتسمت بوجها وكتلة طب اسبح الحمام جاهز وراها انزل حصب الك غدة طب هو واني نزلت اركض احضر وازين واسوي فيكات بالاكل فرحانة برجعتة اني ودازين ماعون الزلاطة اجتي على بالي امي انغز كلبي
:
نزل هو راح للهول واني رحت وديتلة الصينية هو شافها لو تخبل على شلون ترتيب وجمال رد كلي صار كم يوم مماكل هيج اكل وفوكاها الاكل الي احبة
:
كلت بكلبي هو هذا كلة وانتة حتزوج علية محجيت شي بس ابتسمت لان غصة امي بعدها بية كعدت كبالة كلي تعاي تغدي كتلة شبعانة ما اريد واني حتى غذة ما متغدية بس ما اشتهي من القهر
:
كمل غدة شلت الصينية ورحت غسلتها وصبيتلة جاي عمتي بس اجة راحت للغرفة مبقت يمة البنات بغرفتهن
:
رحت للهول لكيتة ماكو صعدت للغرفة لكيتة موجود وسمعتة يخابر وهالمرة بصوت عالي وواضح يحجي بالتلفون ويكول
:
اي حبيبي وصلت قبل شوي سبحت وتغديت وراسا صعدت احجي وياج اشتاقيتلج هواية لا لا شعلية بيها حتى ما الزمها
:
مو كتلج من يوم العركة هية مجرد باقية على ذمتي ما اتقربلها ابد والله حبيبي شبيج اصلا اني كتلها نطلك بس هية ما رضت ولو تقبل اليوم قبل باجر اسمع وكلبي يحترك انجب الجاي على ايدي بدون ما انتبه
:
الجاي حار يسمط اباوع ايدي هية بيضة ومنا احتركت صار لون ايدي احمر مثل الطماطة نزلت اجيب وصلة امسح الكاع انكب عليها جاي ودموعي تنزل صعدت مسحتها
:
رجعت حميت الجاي خاف برد شوي وصبيتلة مسحت دموعي وصعدت فتحت الباب بدون ما احجي ويا كلمة وحدة خليت الجاي يمة عالميز
:
وانداريت عالجهة الثانية انتبه على ايدي من جريت اللحاف لزمها وكلي شبيج
:
احتركت شوية
:
بشنو
:
بالجاي
:
اي غير تنتبهين شوفي شلون صايرة طماطة
:
عادي شسويلها محتاج شي بعد
:
اي والله تعبان تعاي امرغيلي جسمي كلة اشتاقيت لهاي السالفة بس خلي اشرب الجاي
:
شرب الجاي و كمت بدون ولا حرف مرغتلة جسمة كلة لحد ما نام
:
مددت بفراشي من الجهة الثانية وغفيت من التعب لان من الصبح كاعدة وكضيتها كلة شغل وطبخ
:
كعدت العصر احمد بعدة نايم سبحت وطلعت بدون ما اسوي صوت لكيت عمي وعمتي يشربون جاي كعدت يمهم
:
عمي اصلا ما سال على احمد شوية ونزل من فوك احمد اجة سلم على عمي ما ردلة وخلة وكام طلع اتافاف بضوجة
:
حجت عمتي بنتر شتريد لعد يبوس راسك ويكلك عفية ابني تريدة راسا يرضى عليك ويحجي وياك هو معجبة الحجي وهز ايدة
:
انداريت على عمتي وكتلها عمة فدوة والله كلبي مثل النار على امي كومي وياي اريد اروح اشوفها بلكي ترضى تشوفني
:
يمة ما ترضى وبعدة جرحها منج ما طاب اصبري منا ليومين واني اوديج والله هو انتي الي سويتي بيها قليل ومن ورة ناس ما تسوة
:
زين عمة روحي شوفيها خاف بيها شي كلبي يوجعني عليها من الضهر ولحد هسه
:
هسه امي راح اروح اشوفها اصلا اني كلت بعد شوي اروح اشوفها
:
احمد :
ليش شبيها
:
عمتي باوعتلة بطارف عينها واني ما الي خلك احجي اختصرتها الة انو مو زينة ومريضة
:
ردت عمتي اي طبعا من وراج انتي وابني
:
نزلت راسي بخيبة امل واحمد كام طلع البنات بغرفتهن كمت اسوي عشة
:
سويت كباب شوي وتكة شوي ومقبلات كومة
:
خلص اليوم واحمد ثاني يوم فتح موضوع الخطوبة وية عمتي وكللها باجر نروح تمشين الي
:
عمي مقبل اصلا يروح ولا عمتي هو كام يكفر كوة قنعت عمتي وعمي ما كدرنة نقنعة وللنهاية ما راح
:
من صعدنة للغرفة كلي اريدج انتي هم تروحين وتكولين لاهلها بوجه يضحك انو انتي هم موافقة على زواجي
:
وتقنعيهم لان ادري بامي راح تروح شتسوي فاني اريدج انتي بطريقتج تقنعيهم وتخلين السالفة
:
واي شي يصير تلاحكي الة وتلافي الموضوع جان ديكلي بمعنى روحي للموت برجليج كلت بكلبي هواي دست علية بس مو توصل بيك لهنا يعني
:
هزيت راسي ب اي ومحجيت شي صار ثاني يوم ورحنة اني ويا وعمتي لان محد رضى يجي غيرنة
:
الطريق كلة هو يحجي وياية ويوصيني شنو احجي وشنو اكول وعمتي على ساعة وتنفجر بي
:
وصلنة بيت البنية جان بيتهم عادي واعتقد كاعدين ايجار طبينة البيت ما بي اي روح صح تخم ومدري شنو مخلين بس مدري شلونة عبالك
:
ما اكول انو مو مرتب وتعبان ومدري شنو لا بيت طبيعي تخم وطبلات ومزهريات وتحفيات وبلازمة وميزها بس اضلم عبالك رغم اكو كهرباء وبي ضوة لكن عبالك ما بي روح مدري اني شفتة هيج
:
بس الواضح انو عمتي هم ما عاجبها ام البنية من شافت عمتي ما عاجبها الوضع ضلت تعوج بحلكها ويمكن اي خطأ زغير يبدر من ام البنية تكوم عمتي تموتها وطلع قهرها بيها
:
اندارت علية وكلتلي هو انتي مرتة باستهزاء كتلها اي خالة اني مرتة ضلت تباوع علية من فوك ليجوة
:
كاعدة على نار ومنتضرة اللحضة الي تدخل بيها العروس واشوفها بلة اني شكلت لروحي من اجيت كاعدة اخطب لرجلي والي اموت علية
:
ما احجي شنو شعوري بذيج اللحضة لكن كل الي اعرفة بية صرخة تهد الكون كلة واخيراً انفتحت الباب وطبت وحدة لابسة ثوب قصير
:
باوعت عليها عرفتها هية لان حسني كلبي مدري ليش كمت ارجف كلبي يدك سريع احس راح اتخربط
:
شايلة صينية مي كالت السلام عليكم وطبت عمتي باوعتلها بنضرة استهزاء ولعبان نفس من فوك ليجوة
:
ما كامت عمتي الها ضلت كاعدة نزلت تسلم على عمتي وتبوسها عمتي ما مدت وجها وردت الها هلا هية معجبها الوضع
:
انداريت علية كمت الها عبالي حتسلم باوعتلي بنضرة حقيرة وراحت كعدت يم امها خلتني بفشلتي
:
عمتي رادت تكوم كوة جلبت بيها زين شلون احراج عمتي تباوع بضوجة واستهزاء وما عاجبها الوضع ومحجت وتريد بس تكوم
:
جانت ملامح البنية حلوة بس سمرة على حنطية رغم جانت مخلية مكياج بس الباودر كالب شوي على وجها صدرها كلش جبير
:
ورك ما عدها ممسوح جسمها عادي طبيعي شعرها جوة كتفها رجليها الكعب شوي سواد صاير بي من تكعد ما يبين بس من تكوم يبين
:
يعني شي على شي زينة ينطلع بيها لكن وروح ابوية اني احلى منها مو قصة مغرورة لكن مبينة جانت واضحة مثل عين الشمس
:
كاعدة وتباوعلي بطارف عينها وما عاجبها وصدمتني وقهرتني من حجيت بالموضوع لان عمتي ما رضت تحجي
:
فمن حجيت بالموضوع كلتلي اني من اتفقت وية احمد مجنت اعرف حتبقين على ذمتة هو كلي يطلكج متوقعت تبقين
:
بس بعدين من حجة وياي كلي بس عالورق حالنة حال الاخوان اني وياها وانشالله بلكي تطلكين دارت وجها وجان تكول ناس بلا احساس
:
باوعت اريد اكوم املخها اريد احركها الحقيرة شلون هانتني وانقهرت بعد اكثر لمن كالت احمد هيج كايل الها
:
الموقف الي انحطيت بي ما اتمنى لعدوي عمتي ما تحملت تعاركت وياها ورادت تكوم واني توسلت بيها
:
بس هنة مبينات حتى لو هيج سون وديتعاركن لكن راسمات علية وحتى لو ضليت على ذمتة تريد تاخذة اسمها عذراء
:
اختصرها الكم المشية تمت بالف يا علي ٤ مرات تعاركن وعلما اهديهن كوة انوب وكعت براسي كلها
:
طلعنة بعد ما اتفقنا الجمعة الجاية المشية وعقد سيد وحفلة هية رادت الجمعة هية قررت العروس
:
طلعنة من ركبنة عمتي كعدت ورة ما كعدت بالصدر يم احمد تالي رحت كعدت اني من ركبنة كال ها بشرو عمتي ما ردت
:
لزمت ايدة واشرتلة بمعنى اسكت سكت محجة وصلنة للبيت عمتي راسا نزلت وركعت الباب وراها وطبت لغرفتها
:
صعدنة للغرفة واستلمني احمد احجي شصار وما صار حجيتلة كلشي وعود ضاج ليش هيج امي تسوي كلت بكلبي لعد شتريدها تسوي اذا هنة هاننها
:
ثاني يوم رحت على امي اني وعمتي وما استقبلتني قفلت باب المطبخ علية وحتى ما خلتني اطب جوة رجعت للبيت ابجي ومقهورة
:
صار يوم الجمعة والي هو يوم الخطوبة محد قبل يروح غير عمتي الجبيرة خابرتها توسلت بيها يلة رضت واني وعمتي والبنات بس
:
حتى جديتي ما اجت واصلا ما تحجي وية احمد من يوم الي عرفو لليوم احمد من الصبح كعد فرحان
:
راح للحلاق زين واجى عزم جماعتة كلهم الي بخطوبتنة ما عزم ولا واحد رجع وذيج الكشخة الي تخبل
:
الضحكة شاكة حلكة واني بالعرس فشلني حتى كدام العالم ما حجيت بس احس نار وتسري بكلبي
:
كاعدة من الصبح واشتغل واكرب وهم خلاني اروح وياهم اجة للغرفة اني صعدت اريد ابدل كشخ بالقاط وما خلة تفصيل زغير يعتب علية
:
يفتر بالغرفة ويغني وفرحان والي قهرني خابرها كدامي يسالها اذا رجعت من الصالون وها حبيبي وعيني وكلبي
:
وداز حتى الحماية همة يودوها ويجيبوها واني حتى ما سال منو يوديني ومنو يجيبني بالعقد
:
كمل واندار علية كلي طالع حلو هزيت راسي بابتسامة اي اخذ موبايلاتة وديطلع كتلة احمد اندارلي
:
ها
:
خلي ما اروح للعقد
:
ليش
:
تعبانة وما بية
:
لا ما اكدر ما اخليج تروحين اصلا اني اعتمادي كلة عليج بالمشية هسه
:
تعبانة والله خلي البنات مو راح يروحون هنة يتكفلن بكلشي
:
روان ادري هذا الشي صعب كلش عليج بس تحملي لخاطري اذا تحبيني اتحملي لا تروح امي تتعارك لو تحجي شي ويخرب الاول والتالي
:
سكتت ما عندي حجي بعد وما ديقبل اجى باسني من راسي اعذريني داضغط عليج بس احبها
:
من صدك متحملت بجيت بحضنة بس احس البجية دتطلع من كلبي حضني وهو يهدي بية كلت هسه يكول لتروحين بس هو كعد يقويني
:
ويكلي انتي مو تحبين تشوفيني فرحان افرحي لان اني هسه هواي فرحان هزيت راسي لا عادي بس شوية لان صعبة على كل مرة هذا الشي انزل واني اكمل وانزل وراك هز راسة وطلع
:
كعدت عالكرويتة وابجي للحضة ردت اعوف كلشي واطلع وارجع لبيت اهلي بس يا ترى امي وخواني بعد ما تبرو مني حيستقبلوني
:
كملت كلشي ما ردت اخلي مكياج بس صعدن البنات وغيرلي حتى الفستان لبسني ومكيجني هنة ويحلفن اذا ما خلينة العالم تغم احمد لان حيزوج عليج عتبينة ما خلن شي ما سونة بية بحيث انصدمت بشكلي
:
كملنة ونزلنة اني وياهن احمد جان بالمطبخ ديخابر من شافني والله وكع التلفون من ايدة
:
البنات يضحكن بمكر على احمد عمي بيومها ما لفة بالبيت ولا شفنة شكلة احمد هذا كلة ما اهتم الة همة الوحيد ياخذ الي يحبها
:
كملنة وطلعنة لبيت العروس والسيارات كومة كلها جماعة احمد اصدقاءة والضباط الي وياه وهو فرحان وذاك الركص الصدك من القهر ما ضحكت
:
وصلنة بيت العروس ونزلة طبينة يم النسوان راسا باوعت على عذراء جانت حلوة طالعة للامانة بالمكياج
:
بس مختارة لون البدلة اسود بحجة المودة هسه لون اسود كلت بكلبي كبر حتى كبر شنو كاعد بعزة لو فاتحة ابوج هيج تسوين للعلم ابوها ميت
:
البنات كاعدات بصفي ما عافني ضحكني شسون وشلون يقلدن ومن قدمن مي الهن ما رضن يشربن ويكولن اوع خاف وصخ منريد
:
عذراء اباوع عليها كامت تفور من وراهن وهنة يقلدن هنة هواي جانن اكو نسوان من كرايب العروس بحيث ماكو مكان
:
وكلها تكول هية هاي مرتة عزة هية مو تكول للكمر كوم اني اكعد بمكانك عايفها وجاي على عذراء الزركة هية سمعت هيج وتخبلت
:
واصلا حتى ضاجت من جيتي للحفلة والمشية اصلا المهم صار العقد يابة من كالو هلهلو تم العقد راسا نزلت دمعتي للكاع البنات عسني
:
ويصبرن بية ويكولن لتخليها تتشمت بيج اضحكي وبيني انج ما مقهورة واحركيها بنارها
:
دخل احمد واباوع علية الضحكة شاكة حلكة وواصلة لاذاناتة ومكيف وفرحان وهية تضحك بس وصلها راسا باسها من راسها
:
كعد يمها والضحكة تارسة وجهه اباوع حتى عمتي بجت مقهورة ردت اكوم اطلع لان ما داتحمل اختنكت كلش بس البنات مقبلن صارن كدامي
:
وكالن شوفي شراح نسوي بس اصبري الا نخلي يكمز بس اصبري وشوفي قطعو الكيكة ولبسو الحلقات واحمد مو راضي يكوم من يمها
:
طلعن اغنية هادئة يركصون عليها سلو بطلب من عذراء واحمد الي ما قبل يركص وياي كام قبلها وكومها ويركصون ولو يبوسها لو يشاورها ويضحك
:
من ديركص التفت واجتي عيني بعينة ضحكلي بس ما رديتلة الضحكة درت وجهي منة البنات انتبهن
:
وجان عذراء تكول حجاية بعلو صوتها عود قصدتني اني ويعني عمتي بس مخصوصة اني بوكتها متت
:
((((((عسانا من الحسد نسلم وعساهم من الغيرة يموتون ))))))
:
احمد ابتسم الها واندار يباوع علية منحرج عساس اهانة بمعنى الكلمة عجيب امري شداسوي بروحي اني كبر يلفني انشالله
:
بجاه ام البنين انشالله ما اوصل البيت ولا ارجع كون عبوة طك علية سيارة تدعمني واموت بجاه ام البنين
:
كعدو وكرايبها شغلن ردح وكامن يهزن اندارن البنات علية وحلفني بروح ابوية واهل البيت واحد واحد انو الي حيكوللي علية اسوي
:
وجان تكوم علا وتكول هم بعلو حسها عيني شنو ما تسون مجال لخوات العريس ومرتة شوية يركصن
:
فتحت عيوني مصدومة عليهن يريدني بحفلة خطوبتة اركص هو هم راسا اندار علية
:
وخرن البنات وفرغن المساحة الي جانن يركصن بيها كامت تقى وجرني كومني بيني وبينهن كتلهن شدسون عوفني والله ما اركص
:
خزرتني تقى وشاورتني اركصي واقهري خلي يموت قهر شكد بيج قهر هسه عبري عنة بالركص واقهري هو والعكرب مالتة
:
باوعت عمتي وعمتي اخت ابوية يغمزن الي اركص واشعلة لاحمد باوعت علية يباوع علية وصافن يشوفني اركص لو لا
:
عليت صوتي وكلت علا طلعي النة اغنية تخبل داركص لرجلي وافرحلة بمناسبة خطوبتة هو انصدم مني
:
راحت علا طلعت اغنية ساجدة عبيد وما اكول الكم شسويت اني منا جني فيفي عبدو اذا ركصت ومنا صدك من قهري ردت اخبلة لاحمد
:
كمت اركص عالدكة لو من اهز الورك يبو علا وتقى يركصن وياية واني عجبني الوضع وكمت ازيد ما انقص
:
باوعت علية عيونة صارت براسة خصوصا بعد ما صارت الانضار كلها علية وكلها تكلي حتى كرايب عذراء مو مرة تكتل عمي شنو من جسم شبوط
:
عذراء انجنت هو احتقن حتى وجها اني ثوبي جان لازك عالجسم مال حفلات عمتي وعمتي اخت ابوية
:
كان يصيحن فدوة لطولج عفية وعمتي تصيح فدوة لجنتي راحن البنات جرن احمد وجابنة هو بس صافن علية
:
خلنة بالنص وهنة منا ومنا ويركصن باوعتلة واني اضحك حرك ايدية تقدم شاورني وعساس يضحك كلي اذا ما رجعتي لمكانج هسه وكعدتي
:
اخلي كل الي بالعرس ميخلصونج من ايدي باوعتلة وابتسمت انداريت اركص ولا اهتميت الة هو رجع كعد يم عذراء الي راح اطك
:
يمكن بس تكوم تموتني انجنت ما بقى ٥ دقايق وطلع رجعت كعدت بمكاني وعماتي يبسون بية ويكولن زين ما سويتي
:
شوية ودز علينة يكول يلة كمنة ولا وحدة راحت تسلم على عذراء وتبارك الها رحت بس اني باركت الها ما ردتلي بس كالت حسابج عسير اني اعلمج
:
باوعت بوجها بدون ردة فعل وخليت وطلعت علا وتقى من دنطلع حجن بالباب مال الهول بصوت عالي اوي شنو هالخنكة امشي نطلع راح ازوع
:
طلعنة ولكينة احمد واكف يسولف وية جماعتة عذراء عدها اخت بس حتى ما انتبهت على ملامحها من كد القهر
:
وعدهن اخ واحد وما شاء الله مبين كرن صعدنة بالسيارة واحمد يفور وصلنة وبس نزلنة كلي للغرفة بسرعة
:
صعدت وحلفت لو مد ايدة اعوف البيت واطلع عفت كلشي وصعدت وراه طبيت هو يفتر بالغرفة
:
سد الباب واجى لزمني من ايدي وحجة شنو معنى الي سويتي
:
باوعتلة وكتلة شسويت
:
تعرفين بنفسج شسويتي
:
قصدك لان كمت ركصت
:
اي
:
عادي ما مسوية شي غلط غير فرحانة الك وركصت قابل حرام
:
لا كلش زين اعرف سويتي عناد بية
:
شبيك احمد يعني لو كالبة خلقتي جان حجيت وهسه لان ركصت حجيت
:
اي مو انتي عاندتيني وكمتي تركصين وبعدين تعاي كوليلي شنو معنى هذا ركصج جنج فيفي عبدو لا والله هم احسن حتى منها
:
خليتي امة لا اله الا الله كلها تتفرج وفرحانة عود وفوكاها اكولج امشي اكعدي تردين تزيدين عناد بية
:
احمد هاي شبيك هو اني صوجي كتلك ما اريد اولي انتة الي كلت الا تروحين شسويلك هسه لو سويت هيج ولا هيج انتة تضوج
شلون يعني العتب علية هذا كلة وطلعت اني مو زينة شو كلها ركصت بقت علية يعني
بس اني بعد ما علية وحتى اي شي ما اسوي اكعد هنا وانجب
:
مو هيج قصدي بس غرت وضجت شنو اني مرتي تتفرج عليها النسوان وهسة يروحن يحجن بيج يم ولدهن وزلمهن
انوب تتمايلين بجسمج عالدكة خليتني حتى اني صافن والله حتى ملايين وفيفي عبدو هم ما يلحكن بيج
:
ها كتلي غرت همزين اعترفت اني مرتك هو مو انتة نفسك الي كايل لعذراء اني ما اريدها وهية اصرت تبقى على ذمتي
:
ولا توصلني واسمي بس عالورق مرتك وهيج وهيج كايل الها ضل متفاجئ بعدين لافها وضل يحجي علية وها بديتي وكمتي تضوجين وتغارين اني ما احب هيج سوالف ولا تخربين فرحتي
:
عفتة يحجي ورحت طلعت الي ملابس وطبيت للحمام غسلت وجهي وسبحت واني ابجي اكثر مكان ابجي بي هو الحمام وجوة الدوش
:
طلعت وبوجهي عالفراش بدون حتى ما امشط شعري غفيت من القهر والتعب والبجي والتفكير بامي وبالصار اليوم ما كعدت غير ثاني يوم
:
مر اليوم طبيعي ماكو شي جديد بس احمد الي صار يخابر بالعلني وكلة حبيبي وكلبي وعمري وحياتي
:
وفوك هذا كلة يدور مني اهتمام يعني بيومها ما طبخت عمتي طبخت وما سويت حلويات كام يحجي علية ليش مسويتي الية
:
اليوم الي بعدة عرفت باجر يريد يطلعون يجهزون وراها يروح للدوام ومن يرجع يروحون يختارون الغرفة هنة ما رايدات احد يروح وياهن
:
فراحن هنة واحمد الي نيشاني كلة ما راح وياي محجيت شي بس هواي ضعفت صرت عبالك مو اني وجهي شحب وجسمي ضعف وصحتي بالنازل
:
راحو جهزو وما كال حتى بشكد اشترى الها ذهب بس الي عرفتة ماخذلها اكثر مني انقهرت بكلشي احسن مني
:
راح للدوام وبس يرجع يختارون غرفة ويكملون كلشي لان يريدون يزوجون بسرعة ما يريدون يطولون
:
رجع وراحو اختارو غرفة وصدمني وقهرني بيومها من رجع وكلي باجر يجي نجار يفكك غرفتي ويطلعها
لان هو يريد هاي الغرفة تبقى الة ولان جبيرة وبداخلها حمام وهية غرفتة ما يكدر يروح بذيج متعود عليها والغرفة الثانية ما بيها حمام
:
مقبل حتى اكعد بالغرفة الي يمهم عدنة مخزن شوي جبير جوة كلي فرغي وانصب الغرفة بي يريد الطابق الفوك بس الة هو وياها
:
عمي تخبل من درة وكال لا سواها صدك خلي يطلع من البيت ميبقى عمتي مقبلت وتعاركت ويا وكلتلة ما تطلع حاجة وحدة من المخزن
وروان تاخذ الغرفة الفوك مو حيوان علمود تكعد بمخزن زغير حتى الغرفة ما تصير بي كد ما زغير
:
اني محجيت اتخذت وضعية الصمت والسكوت دشوف ليوين توصل بعد تالي ما بقى بيدة حيلة غير انو اخذ الغرفة الفوك لان هنة جوة غرفتين وحدة لعمي وعمتي ووحدة للبنات
:
والفوك وحدة لاحمد وحدة لمحمد بس محمد سافر هسة اني حكعد بيها بليل طلعت كل الغراض هو جان طالع وياها يونسها ويفترون
:
البنات ساعدني يشتغلن وهنة يحجن علية ويغلطن على احمد ويرزلن بية ليش داتحمل كل هذا واني اجاوبهن احبة
:
الصبح اجة النجار فتح الكنتور ونقلو الاخشاب كلها للغرفة الثانية يابة بيومها شكد تعبت علما خلصتها هو اجة نام يمي
:
لان بعدة ما جايب الغرفة بس يعني بس ينام عالجرباية كل واحد بصفحة اليوم الي بعدة جابو الغرفة مالتهم جانت تخبل هو وياها مختارينها
:
محجيت شي من كملو طلب مني انضفها نقل كل غراضة بيها واني بيدي صفطتهن الة وكلي لتكولين لعذراء اني نضفت الغرفة لان كتلها اني انضفها
:
ما رديت علية هو متجاهلني علما صار العرس هو يوم ينام يمي بدون حس ونفس ويومين ينام بغرفتة
:
اجتي عذراء وفرشت الغرفة هية وامها واختها وهو يصيح الي اقدم الهن كملتها وقفلتها وسمعتها تكولة بصوت عالي
:
حبيبي المفتاح يبقى عندك والغرفة ممنوع غيرك يفوتها ٢٤ ساعة اقفلها ولتخلي احد يفوتها ودير بالك تعوفها مفتوحة علما اجي
:
ما تحملت شبعت قهر كمت اريد احرك نفسي شسوي شسوي كسرت تحفية وكعدت اشرح بيدي شجابرني على هاي الذلة انعل ابو الحب
:
صار يوم العرس وووووو ..................

يتبع ......................

هذا البارت ادري روان حتحصل مسبة هواي وغلط
حقكم اذا اني اكتب بي وافور انتو شلون لعد وهاي حاولت اخفف الامور يعني واختصرت هواي احداث
:
كتبو الي رايكم وكثرو تعليقات علمود انزل بارت مفاجئ

دمتم في حفظ الرحمن ❤️😘❤️😘❤️😘