لعلك تكون اقوى دروس حياتي ((لعنة اختيارك))

البارت الثالث عشر

السلام عليكم

لعلك تكون اقوى دروس حياتي
                                ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.....................

ا جة ثاني يوم الي هو موعد نزول احمد واني جنت كلش فرحانة
:
عمتي متخليني اشتغل وتخاف علية كمت بعد عياط وصياح من عمتي متقبل اكوم سويت حلويات وكيك الة
:
طب للبيت الضهر الساعة ب٣ ونص هو وعذراء هو سلم وراح على عمتي يسلم عليها لان عمي ميحجي ويا بس عذراء ما سلمت على اي احد من عدنة
:
رأسا صعدت لغرفتها من طلع احمد من يم عمتي كتلة غسلو وبدلو وانزلو اصب غدة الكم رد لا لتصبين تغدينة بالمطعم
:
ها يعني حتصعد بعد متنزل
:
اي ليش خير رايدة شي
:
اي اريد اكلك على موضوع مهم
:
اي كولي
:
لا مو هيج اصعد غسل وبدل ارتاح وتعال
:
ميتاجل يعني
:
الافضل اكولة الك هسه لان بعد ما اتحمل
:
يا ستار شكو شنو هالموضوع قلقتيني
:
لا ماكو شي انشالله دروح اصعد هسه وعود من ترتاح انزل بس كون ما تتاخر
:
خلة وصعد واني واكفة انتضر شوكت ينزل ومتحمسة للحضة الي راح اكولة بيها عمتي اجت كعدت بالهول كالت عاجبني اشوف ردة فعلة
:
كعدت يمها ومتوترة رحت جبت العلبة الي زينتها وخليت بداخلها اللهاية جنت ضامتها بالكاونتر مو فوك
:
ورة ربع ساعة نزل ونزلت ويا عذراء اجوي كعدو وكال كولي ثاري ست الحسن عرفت اريد اكلة شغلة ونازلة ويا تريد تعرف ومتريد تخلي يحجي وياي وحدنة ما عبالها عمتي موجودة
:
باوعت على عمتي وانداريت اباوع علية ومتوترة وايدي ترجف كمت نطيتة العلبة باوع عليها وكلي شنو هاي
:
ضليت واكفة يمة ابتسمت وكتلة افتحها فتحها وطلع اللهاية منها وكلي شنو هاي مفهمت ابتسمت بفرح وكتلة اني حامل
:
لحضة صمت صارت وعيونة اتسعت تريد تطلع من مكانها وانصدم بهذا الخبر وعذراء كامت وكف لحيلها وعاطت
:
نايم وياها احمد واني ما ادري بدون خجل كالتها هيج حتى مو متقربلها هو تلثعم ميعرف شنو يكول الها
:
بعدة مصدوم بالخبر وهية كامت تعيط وتصيح تخوني احمد اي مو اني بت شارع لو ليل ولا الي يكول مرتة
:
من قبل لا ننخطب كتلك متوصلها ولا تعترف بيها تضل مجرد خدامة انوب فوك هذا كلة حامل على حس العياط والصياح طلعن البنات يركضن
:
اجة عمي يركض يريد يعرف شكو هية كامت دك وتلطم وتكولة اني ما ابقى بعد بهذا البيت لو دقيقة
:
والا طلكني وحتى ابنك الي بطني ما الك شغل بي وحجت وغلطت وعدت وفشرت براحتها واندارت تريد تطلع من الهول
:
كمز عليها احمد ويتوسل بيها ويعتذر منها ويحلف الها بس مرة وهية غرتني وهية حثالة ما ابدلها بيج وشوفي شراح اسوي بيها هسه
:
اني واكفة ومصدومة من الي صار والي سمعتة شوكت اني غريتة هو اني اصلا جنت بغرفتي حتى ما شفتة هو الي اجة علية
:
اندار علية وعيونة براسة وكلي تذبي ما تخلي ولا اريدة ولا تجيبي هسه اخذج تروحين تنزلي ما يبقى بطنج ساعة وحدة بعد شكد اتوقع حقارة ونذالة من احمد بس هيج نذالة ما شفت ابنة يريد يكتلة
:
شهكت وفتحت عيوني على وسعهن مصدومة من حجايتة رديت والله لو اموت ما انزلة ليش على اي اساس لو تذبحني هم ما انزلة
:
شمعنى منها فرحت وكيف وشايلها على كفوف الراحة شمعنى اني هسه من كتلك متريدة وتكلي نزلي
:
عمي عاط بي وكلة اكل تبن لتخليني اهينك شنو تذبة شنو من بشر انتة من ذيج الساقطة تريدة بس من هاي الشريفة متريد
:
عاط احمد يابة لا تجاوز وتخليني انسى انتة ابوية تقدم عمي على احمد وضربة راشدي وتفل علية وكلة يا حيف تربيتي وتعبي بيك
:
هو تخبل شلون ضربة عمي واحنة كلنة نصدمنة طفر علية احمد وجرني من شعري وتولاني راشديات
:
عمتي والبنات كامن يعيطن وعمي اجة يركض يريد يخلصني من ايدة ما يكدر عمي والبنات وعمتي يجرن بي ويردن بس يهدني من ايدة ما يكدرن
:
بعد ضابط وخبالاتة وعدكم الحساب شعري كطعة بيدة ووجهي احير منين تجيني الضربة علية يضرب بية ويعيط اني انضرب من وراج وبسببج
:
وفوكاها جاية تبشريني حامل والله ما يبقى بطنج والا تذبي وعلي لو اعرف اموتج هم ما اخليج تضلين حامل بي وتجيبينة
:
عمي يضرب على ضهرة وبريدة يعوفني وهو ماكو عبالك اسد وواكف شمرني بالكاع وكام يضرب دفرات على بطني
:
زاد عياط عمتي والبنات وعماتي وهو يكول الا اموتج واخلص منج هو منو يطلع وراج انتي حتى اهلج متبرين منج لان حثالة محد يريدج
:
اني انتهيت جان يضرب عبالك بحايط بشي قوي عبالك ما يضرب بمرة احس روحي حتطلع جوة ايدة
:
ضربة الي جان يضربنياه بجفة وكلماتة الي يكولهن بجفة جانت يمكن اقوى من الضرب من كال اهلج متبرين منج اجت عيني على علا طلعت تركض
:
عمي يعيط ويسحل باحمد وعمتي تعيط وتلطم وتكول راح يموتها وجع بطني صار مو طبيعي احس شي حار ينزل علية شفتة دم زين شبسرعة مات ابني
:
اباوع عذراء واكفة على صفحة ولازمة بطنها وتضحك بمكر وعمتي من شافت الدم تخبلت ضلت بس تضرب باحمد تريدة يوخر وتعيط ولك راح تموت وهو يضرب مستمر ويعيط موتي اني اريدج تموتين
:
ماكو ثواني مرت من طلعة علا من الهول وما اشوف غير امي وجديتي ويوسف وابو الحسن كلها طبت تركض
:
احس اجاني الفرج امي من شافتني عاطت عيطة هزت البيت بيها بتتتتتتتييييييييي واجتي تركض علية احمد مستمر يضربني
:
ما حسيت غير يوسف شالة وشمرة بنهاية الهول من حلاة روحة علية وخاصةً يوسف يلعب حديد وجسمة مثل مال المصارعين
:
يعني يمكن اقوى بعد من احمد اجاني ابو الحسن يركض ويوسف نام على احمد زوعة العافية
:
عمي يكلة حيل بي موتة اني اكلك موتة وعمتي تعيط تخبلت مدري علية مدري على احمد لان مهما كان هية ام مدري عالعركة الي صارت
:
بنص هذا وما ضحكتني غير جديتي لزمت عذراء من كفشتها وشبعتها تفال وراشديات وكتل بالعوجية
:
ابو الحسن راح جر يوسف من على احمد الي نها من الكتل وكلة عوفة وكوم روان راح تموت فاضت بالدم
:
اباوع يوسف اجى يركض علية بسرعة شفت ابو الحسن نطى بوكس لاحمد وكلة حرامات اوسخ ايدي بيك بس هذا البوكس علمود يبرد كلبي شوي
:
شكد احمد قوي ومحد يكدر الة بس خواني والله كفو ونعم الاخوة صدك الاخوة سند ونعمة وينشد بيهم الضهر يوسف موتة لاحمد بحيث ما كدر يرفع ايدة
:
شالني يوسف وطلع يركض بية ابو الحسن طلع كدامة يركض يريد يفتح السيارة اني احس روحي ساحت ووجع بطني قوي حموت من الوجع
:
شفت عمي وعمتي طلعو يركضون هذا كلة واني عيوني تروح منا ومنا داشوف احمد طلع يركض وراية يجي علية
:
يمكن المرة الوحيدة الي ما انقهرت على احمد هية هسه من سوة بية هيج وحتى ما كلف نفسة يطلع وراية
:
كمت ابجي من الوجع وخفت على ابني كلت اكيد مات فتح ابو الحسن باب السيارة الورة وخلاني يوسف وامي صعدت تركض مددت على رجلها
:
وابو الحسن صعد بالصدر ويوسف ساق بسرعة جنونية خطية عمي وعمتي لحكونة بالسيارة مالتهم جديتي ضلت وادري هسه حتعلكها
:
احس غواش صار على عيوني والم بطني ذبحني وامي تدعي وتقرة ايات وتمسح على راسي وتكلي روان حاجيني ماما شيوجعج
:
كمت اسمع بس شي مو واضح ما فقدت بس تخربطت ما ادري شديصير وصرت اسمع صياح يوسف وابو الحسن
:
يمكن يوسف سوة الطريق للمستشفى عشر دقايق كد ما سريع اول ما وصل عاف حتى السيارة مشتغلة
:
ونزل يركض فتح الباب وشالني وطب للمستشفى يركض ويعيط حالتي جانت فدنوب اجو يركضون الممرضين والدكاترة دخلوني للطورائ
:
سالو على وضعي امي كالت ما اعرف بس اتعرضت للضرب من قبل زوجها وهيج حالتها رديت بقهر وحزن وابجي فدوة ابني ما اريدة يموت اريدة يعيش
:
ردت الممرضة ليش انتي حامل هزيت راسي اي امي انصدمت راسا حولوني على صالة الولادة
:
اجتي الدكتورة شافتني طلبت سونار سريع حولوني عالسونار هذا كلة وبالسدية يفترون بية واني روحي رايحة
:
اخذتلي دكتورة السونار بعد ما شرحت الها حالتي وشافتها عقجت وجها رديت بتعب وكوة احجي دكتورة فدوة خومو ابني بي شي ميت مو
:
ردت لا اسم الله بي نبض لكن الجارة مفطورة ونازلة والجنين ايضا نازل وقريب عالحوض واذا نزل بعد اكثر راسا يصير اسقاط
:
واكو اكياس وية الجنين مداتبين شنو لان بعدة شهر وشوية وكوة يبين وهو حتى نبض الجنين ضعيف واصلا نادرا ما يبين هيج وكت نبض الجنين
:
هسه تاخذين سونارج وتشوفة الدكتورة وتكتب الج على مثبتات وعلاج ولازم بعد اقل الشهر او اذا كدرني منا ل١٥ يوم تسوين سونار
:
علمود نعرف شنو هاي الاكياس لان مو كيس واحد حتى لو تجين علية لهنا او لعيادتي الخاصة هزيت راسي بتعب
:
شافتني الدكتورة وراسا ضربتني ابرة مثبت وكالت لازم منا لفد شهر او علما يتحسن وضعج تنامين على ضهري واي حركة ماكو
:
واليوم تبقين بالمستشفى تحت المراقبة واذا ما صار شي باجر من الصبح تطلعين
:
شكلو الي كانونة وبلشو دك مغذيات وابر بالمغذيات وطلبو يديرون الي دم لان دمي مصفر بيومها جان اصعب يوم مر علية
:
بوكتها صدك كرهت احمد وكلت هذا حدي ويا وانعل ابو الحب لابو الاول لابو التالي لابو حتى كلبي من فكر يحب هيج حقير ونذل
:
حلفت بعد ما ارجع ولا انزل نفسي اكثر من هذا عسى ما يموت هسه هم بعد معلية بي همي صار هسه بس ابني ادعي من الله يبقى وما يموت
:
عمتي خطية تبجي وامي ابد ما سكتت بجي ولا بطلت دعاوي على احمد وعمتي ابد محجت ولا ردت امي لان تدري احمد غلط وحتى هيه ما راضية على تصرف احمد
:
عمي خطية تخربط ومنومي بالردهه ومشكلين الة مغذي وراحو الولد يمة وبقت يمي امي وعمتي
:
مر اليوم صعب اكثر شي كضيتة نوم هم من الدوة وهم تعب وجسمي يوجعني ومن كل النواحي
:
عمتي لليل كلتلها امي روحي ارتاحي واريدج بس باجر علما اجي كولي للبنات يحضرن غرفة روان وتسوين اكل الها علما اجي
:
وكل غراضها الي تحتاجها ينقلنها البنات لغرفتها مقبلت عمتي تروح بس امي اصرت عليها وخواني هم ميكدرون يباتون هنا لان مستشفى
:
اخذو عمي وعمتي ورجعو يوسف رجع بسيارتة وابو الحسن رجع بسيارة عمي هو يسوق لان عمي تعبان
:
وخطية من راجع للبيت ما قابل يروح لبيتهم بايت بيتنة وكايل لعمتي كوليلة من الصبح يطلع هو والكح... مالتة ميبقى بالبيت وبريء منة الا يوم الدين
:
خواني لان عمي يمهم بعد ما وصلو لاحمد بس متحلفين بي بليل من همة راحو وبقينة بس اني وامي كعدت من النوم
:
لكيتها تدعي لزمت ايدها وكتلها يمة رفعت راسها بمعنى ها بجيت وكتلها اسفة محجت شي
:
ماما ادري هواي غلطت بحقج واصلا اني الغلط ركبني من ساسي لراسي علمود واحد ما يسوى بس والله مو بيدي جان ماما جنت عمية ما اشوف غيرة مثل الي عبالك مسويلي سحر
:
لو اضل طول عمري اعتذر منج ومن خواني مراح ينغفر ذنبي ابد بس من اليوم ثقي بالله لو يصير نبي ما ارجع الة
:
وهالمرة اني اكلج اريد اطلك منة وبعد ما ارجع الة ولا ابقالة كلتلي انتي هسه تعبانة مو وكتة هذا الحجي ارتاحي ومن نرجع للبيت الله كريم كلشي بوكتة حلو
:
حضنت ايدها وهية باستني من راسي وغفيت واني حاضنة ايدها علما صار الصبح طلعت روحي وعاد شافتني الدكتورة وكالت ما بيج شي وسجلت الي خروج اجة يوسف اخذنة ورجعنة للبيت
:
رجعنة للبيت ومن نزلنة صارت عيني على باب بيت عمي درت وجهي وطبيت لبيت اهلي وحلفت من اليوم انسى شي اسمة احمد حتى لو احبة بس بعد كافي لهنا وخلص
:
طبينة جوة وتلكنة جديتي ومرت عمي وعلا وتقى وخطية عمي وخايف علية مثل الاب من يخاف على بتة بوسني وتحمدن الي بالسلامة وراسا ودني لغرفتي
:
وكلهن انجمعن وكعدن يمي بالغرفة عمي كعد بالهول يم الولد بعد ما اطمن علية شوية وكومني البنات طبيت سبحت ورجعت نمت بفراشي
:
بليل اجن عماتي كلهن وخالاتي كالن باجر نجي خلي ترتاح روان عماتي اجن شايطات ومتخبلات علية
:
كعدو يحجون وخواني تحلفو لاحمد وكالو لو صاير شي باختنة احمد نكتلة خلاص ورغم هذا كلة ما نعوفة ولا نفوتها الة
:
كلها اتفقت على انو ما نرهم احنة لبعض بعد والطلاك افضل حل واني هم كتلهم اريد اطلك بعد ما اريدة
:
عمي كال ابقى اني هنا لحد ما يطلع من البيت والة مهلة بس هذا الاسبوع اسبوع وساعة ما يصير شوف وين يريد يروح خلي يروح
:
ما اجذب واكول ما حنيت ولا اشتاقيت لان اني النفس الي يصعد وينزل احمد ومو بسهولة انساه وفراكة جان اشبه بالموت البطيء الية
:
بس رغم هذا حلفت ما ارجع هايهية جربت وتحملت ويا هواي كلت عسى ولعل يجي يوم ويحبني بس هذا اليوم ابد ما اجة ومن صار الي طفل
:
راد يكتلة لخاطر مرتة ما مستعدة ابني يروح مني هايهية خلي كلمن يروح بطريقة واذا على حبة هاي عندي ثمرة منة شي منة بعد هايهية
:
بقيت ادعي ربي يحفضلي ابني ويجي للدنيا بخير وسلامة يومين واجتي رسالة من رقم غريب لان رقمة لاحمد سويتلة بلوك
:
فتحتها ولكيت مكتوب بيها الاحسن الج تنزلين الطفل لان صدكي اموتة وما اخلي يجي للدنيا افتهمي ما اريدج شنو يعني لا عبالج عود تفكرين ترجعين الي لان حامل  مني لا اريدج ولا اريد هذا الطفل وحتى لو فكرتي تجيبي للدنيا ما اعترف بي ولا اخلي يسجل باسمي اصلا
:
دكيت علية ما جاوب كتبتلة اذا انتة رجال جاوب ماكو ثواني ودك علية هه هنت رجولتة من كتلة هيج
:
اول ما فتحت خط اجاني صوتة يرعد بالغلط والفشار ويكلي خلي الزمج واعلمج منو المو رجال
:
جمعت كل قوتي وتنهدت و رديت علية هيي لتعيط اي مو رجال وغصبا ما عليك والطفل ما انزلة
:
وعبالك كاتلة نفسي عليك لحد هسه لا عيني هاي جانت ايام زمان هسه صرت غير وحدة مو نفسها روان القديمة
:
وعبالك عود ما نزلت الطفل علمود ارجعلك والله لو تنطبك سما عالارض ما ارجع لهيج واحد حثالة وناقص شرف وغيرة يا حقير
:
رد عاط ولج هاي على منو طالعلج لسان رديت عطت اش انجب واسمعني زين على حس عياطي اجني امي وجديتي
:
رديت اذا عبالك اني نفسي روان القديمة لا غلطان اني هسه روان الجديدة وهاي روان انته سويتها احمد بسببك صارت ولو تنصاغ ذهب هم ما افكر ارجعلك مو ارجعلك مرة وحدة
:
لان انتة ونعالي بعد وهم حرامات اشبهك بنعالي لان احسن منك فايديني البسة برجلي يحمي الي رجلي الا انتة بشنو تفيدني شو هو انتة مضرة مو نفع
:
هو تخبل كام يشيل ويركع بروحة على ابو شلون هيج تحجين وياي وكام يكفر وكلي هسه جاي اني عليج وثقي ما اعوفج الا واني طالع بروحج
:
رديت اي تعال هلا بيك خواني موجودين واني حكوم بنفسي الم شكو نعلان اركعك بيها واحطها بحلكك
:
غلطت وفشرت لمن الله كال بس وسديتة بوجهه الحقير اموت وما انسى لحضة شلون راد يكتل الطفل وجان مستعد يموتني اني
:
خلص اليوم واصلا جذب ما اجة هذا الحقير عبرن كم يوم وهنة هدوء ماكو شي بس احمد ماخذ عذراء لاهلها علما يلكي بيت وينقل غراضهم ويكعدون بي
:
علاجي مستمرة علية اذا كمت حدي اسبح او للصحيات عدة ذني ماكو ارتاحت نفسيتي شوي بس بقيت اشتاق الة
:
خلصت اسبوعين وامي اخذتني للدكتورة تشوف وضعي اخذتلي سونار وهنا جانت الصدمة الي انصدمت بيها
:
الدكتورة ضلت صافنة عالسونار وطولت بي هواي كملت وراحت كعدت بمكانها وكالت الي ولامي اكو خبر مفرح واكو خبرين مو زينات
:
خمشني كلبي كلت يا ستار شكو ردت امي كلتلها خير دكتورة كولي شكو حجت الدكتورة
:
عيني بنتج حامل بتوأم هذا الخبر جان صدمة الي ولامي اطرافي كلها صارت ترجف حجيت وكلبي يرجف تحجين صدك دكتورة
:
ردت اي والله ماما انتي حامل بتوأم
:
فرحت فرحة بعمري ما فرحتها حتى من اتزوجت اني واحمد ما جنت هيج فرحانة وامي كذلك فرحت ردت كالت للدكتورة وشنو الخبرين المو زينات
:
ردت الدكتورة اول شي بنتج حامل بتوأم لكن مو ب٢
:
لعد دكتورة
:
بنتج حامل ب٥
:
الله شاهد اني وامي ضلينة صافنين عالدكتورة  ما مستوعبين الي كالت رديت كتلها لا دكتورة تشاقين مو ردت لا والله بنتي انتي حامل ب٥
:
بوكتها ما اعرف شسوي من الفرحة امي ما مصدكة تضحك وتكول معقولة لكن سرعان ما انطفت فرحتي من حجت الدكتورة
:
بس يا عيني هذا الحمل مو بصالح بتج عالاكثر ويشكل خطورة عليها
:
شهكت امي وكالت الها ليش دكتورة
:
ردت هية اول حمل الها مو كل وحدة اول حمل بتوأم يجون وما تطرحهم اني ما داتفائل بالشر
:
لكن احجيها الج بصراحة ما اضمن انو بتج توصلهم لشهرها اولا والله لا يكولها وثانيا من النادر جدا جدا انو يصير توام بهيج عدد من اول حمل
:
ثانيا رحمها بعدة زغير وجارتها نازلة يعني اقل حركة او ردة فعل يوكعون والخبر الثاني
:
٤ بيهم نبض والخامس ما بي وما مبين اذا عايش او لا لازم تسوي سونار بعد شهر بذاك الوكت حيكبرون ونشوف صار بي نبض او لا
:
الخبر جان مثل الصاعقة ووكعت على راسي راسا كمت ابجي وامي تهدي بية ردت امي زين اذا هيج دكتورة وخطرين على حياتها خلي تسقطهم
:
عطت لا ماما صدك تحجين انتي لو اموت ما اسويها ردت الدكتورة لا مو هيج الحجي اني كلت احتمال وعالاكثر ما توصلهم
:
لكن ماكو شي بعيد على ربج هو قادر على كل شي يجوز تجيبهم كلهم بصحة تامة هسة ما عليها شي واصلا همة هسه بعدهم زغار
:
احنة نفكر للاشهر الجاية ونتابع حالتها اذا تتحمل او لا ...............

يتبع ................

شنو السالفة حسدتكم عالتفاعل شو رجعتو ما تتفاعلون

:
هسه انطوني رايكم بالبارت واكتبولي رايكم وشلونة هذا البارت
:
يجوز باجر ما اكدر انزل اخذ استراحة ويجوز اذا صار تفاعل حلو انزل الكم برتوت زغيرون بعد الله واعلم
:
هسه اروح انام وجمعة مباركة

دمتم في حفظ الرحمن ❤️😘❤️😘❤️😘