لعلك تكون اقوى دروس حياتي ((لعنة اختيارك))

البارت الثامن عشر

السلام عليكم

لعلك تكون اقوى دروس حياتي
((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.....................

وكعت بيد احمد وما كمت اسمع غير بس الصريخ
:
ما جنت احجي واكول غير يا الله يا علي احمد يحاجيني يعيط يريد بس احاجي احس لساني انعكد ما يكول غير يا الله يا علي
:
شالني راسا وطلع يركض صرت اسمع صوت امي وهية تعيط بعلو حسها بتي يمة روان بس ردي شيوجعج شصار ليش هذا الدم
:
اسمع عياط يوسف وابو الحسن ومرت عمي وعماتي وعمي الوجع الي صار عندي تشاهدت بداخلي من وراه
:
رغم ثكلي وزيادة وزني بس احمد كد ما ركض بية للسيارة عبالك شايل ريشة راسا خلاني بالسيارة وامي كمزت كعدت وخلت راسي بحضنها
:
اباوع عليها حتى عبا ما لابسة عمي ديصعد يمة بالصدر احمد ما انتضر احد شغل السيارة وطلع طاير حتى طلع حافي ما لابس شي برجلة
:
لزمت ايد امي قوي واردد يا الله يا علي احمد يسوق واسمعة يحاجيني بخوف عيني روان ابوية انتي بس حاجيني
:
ليش هيج صرتي شيوجعج لزمت بطني من الوجع ودموعي عشرة على عشرة تنزل متحملت كمت اعيط من وجع بطني لان صار كلش قوي
:
عضيت حتى ايد امي واتوسل بيها واكللها ولج يمة حموت الحكيلي حموت واضرب بالكشن احمد من اكول هيج يتخبل ويزيد السرعة
:
وجع لعدوي ما اتمناه تحس روحك دتنازع اصلا كمت اتخيل عزرائيل على راسي وراح ياخذ روحي
:
ماكو يمكن عشر دقايق وصلنة المستشفى بس اني كلبت الدنيا بعياطي من الوجع والخوف
:
بس صف السيارة احمد نزل يركض شالني وركض لداخل المستشفى ويعيط الحكولي راسا اخذوني من ايدة ونيموني عالسدية
:
واسمع امي واحمد يعيطون ويشرحون الحالة الهم اخذوني لغرفة السونار اول شي وبعد ما الدكتورة اخذت سونار وجها ما بشرلي بخير وما كالت الي شي راسا حولوني لغرفة العمليات
:
احاجيهم بس اريد اعرف وافتهم جهالي ميتين عايشين ماكو محد يجاوب كمت اعيط كتلهم دخلولي امي
:
بالكوة وبعد عياط مني دخلت امي لزمت ايدها وابجي واتوسل اريد تكلي شبيهم جهالي بس تبجي ومترد حلفتها بروح ابوية اذا ميتين
:
لا تودوهم دفنوهم الا اشوفهم ترة والله اطك واموت مقبلت الدكتورة اطول بعد راسا ضربوني ابرة البنج واني لازمة ايد امي بعدها ما حسيت بشي
:
وين يلة صحيت على وجع مخيف بطني تموتني من الوجع ضليت اصيح اخ بوية حموت من الوجع حسيت احد لزم ايدي هاي ايد امي اعرفها
:
بدون ما افتح عيوني كتلها ماما ردت ها عيونها لامج كتلها ماما وين جهالي ماتو لو بعدهم
:
راسا بجت بس كلت الها سمعت صوتها تبجي عرفت ماتو جهالي عطت بعالي صوتي وبجيت بس احس بطني طك الخياط مالتها
:
لزمتني وتهدي بية وراسا كالت بقى واحد عايش ما ماتو كلهم اتحملي لخاطرة حتى لو طفل محتاجج لان حالتة كلش خطرة
:
كمت اشيل واركع راسي عالمخدة وبس الي جايبة عملية واول بطن تعرف الوجع شنو لكن هذا كلة ما اهتميت الة رغم احس بي للوجع همي جان جهالي
:
احساس وشعور حقير ولعدوي ما اتمناه شوي شوي فتحت عيوني لان قبلها بيهن غواش ما اشوف بيهن بس بياض بعيوني جان
:
باوعت عماتي وامي ومرت عمي وخالاتي كلهن كاعدات بالغرفة وكلها تبجي بس لا عمي ولا احمد ولا خواني ولا حتى محمد
:
راسا كتلها لامي وينهم راحو يدفنون الباقين مو حلفتج اريد اشوفهم يمة بروح ابوية لا تحرميني من شوفتهم اني انحرمت منهم عالاقل لا تحرميني من شوفتهم
:
ردت ولج يمة والله تموتين شتشوفين منهم اربعتهم ميتين رديت اي اي اريد اشوفهم والله اموت اذا ما شفتهم
:
رديت بانفعال احمد وين احمد اريد اشوف احمد صيحولي احمد وخواني اريددددددددهم
:
تالي طلعو واكفين برة ما متحملين يبقون يمي وعمي ذابي بالانعاش راسا من وراية من داري الجهال ميتين
:
على حس عياطي انفتحت الباب وطب يوسف راسا شهكت وصحتلة يوسف عيوني يوسف خيتك اني ابوس رجلك لدفنوهم بس اشوفهم
:
عيونة حمر دم ويبجي اجى يمي لزم ايدي وباس راسي ويكلي اهدي مو زين على عمليتج لطك
:
عطت يوسف بروح ابوية اريد اشوفهم خوما دفنتوهم لتحرموني من شوفتهم والله اكتل نفسي يوسف والقران اذبح نفسي
:
رد بخوف بعد ما شاف حالتي شنو صارت كلي سهلة بس ارتاحي توج طالعة من العملية ما ادفنهم الا تشوفيهم
:
يحجي بس يتهرب من عيوني عصرت ايدة قوي ولو حتى قوة ما عندي وكتلة لجذب علية يوسف بروح ابوية
:
طب احمد الي ما اوصف شكلة شنو جان بس اوصفة بكملة شكلة يكسر كلب الكافر لعد اني شكول الي جنت شايلتهم بطني
:
باوعت علية وكتلة احمد من شهور ولاول مرة اطلب منك شي اذا تحبني صدك خليني اشوف جهالي
:
عليك القران لتدفنهم الا اشوفهم اجة حضني وباسني من راسي ويكول بس اهدي والله ما ادفنهم وداعتج تشوفيهم بس اهدي راح تموتين
:
شحجي انتو تخيلو المنضر يمكن بيومها لو ميتة احسن الي ولا باقية عايشة بعد ما حلف الي احمد ما يدفنهم الا اشوفهم
:
محمد واكف بالباب ويبجي وشكلة متخبل خطية
:
بس رغم الحالة والانهيار الي جنت بيها بكلبي كلت شعجب ما دفنوهم لحد هسه وين مبقيهم اني الي ادري بي والي سامعة بي
:
الطفل الميت راسا ياخذو يدفنونة سالتهم وين خليتوهم ردو بالثلاجة كمت اشهك وابجي واكولة احمد جهالنة بردانين روح غطيهم زين صغار بعدهم
:
توهم طلعو من بطني ويبردون فدوة اذا صدك تحبني روح غطيهم وشوفهم خاف جوعانين جنت احجي هيج وابجي
:
وكل الي يمي يبجي بس مو بجي لا هستيريا صارت عد الكل حتى يوسف واحمد يبجون عمتي اتخربطت وشكلولها مغذي
:
بس ابو الحسن ما اجة ولا طب عرفت بي منهار كلش تقريبا ورة نص ساعة اكثر هدءت بطني من الوجع
:
ضليت اتوسل بيهم ياخذوني اشوف الطفل الي بقى عايش مقبلو وكالو اصلا ما يخلون احد يشوفة ولا يطب الة احنة ما شفناه
:
وانتي توج طالعة من العملية ما يصير كمت اهلس بشعري وعاندت الا يودوني راح احمد جابلي كرسي وكعدني هو ويوسف على كيف وكعدت علية
:
طلعت وهمة يمشون بية بالكرسي وامي تكول هسه يرجعوج اكيد وما يخلوج تشوفي لان ما يقبلون اتجاهلت حجي امي اريد اروح
:
وصلنة يم الخدج ومن كالو للي واكف عالباب صدك مقبل لحو علية مقبل تالي حجيت ويا كتلة
:
انزل على رجلك وابوسها اعتبرني اختك وتشوفها بهذا الموقف شتسوي لتحرمني من شوفتة بس هو بقى الي لا يروح يموت بس خلي اشوفة
:
ابجي واحجي كتلة دخيلك بروح اعزاز كلبك اعتبرها صدقة على راسك بس خليني اشوف ابني اباوع علية دمعت عيونة
:
صاح للمسوؤل عالخدج ودكتور الاطفال بالبداية هم مقبلو بس من شافو حالتي وعرفو احمد ضابط وضل يحجي وياهم يلة قبلو
:
بس كالو خمس دقايق وتطلع راسا اخذوني بالكرسي وطببوني اني واحمد لان هو هم راد يطب
:
طببونة للخدج جانن مثل الغرفة بطن غرفة واكو غرف بيها جام وسراير اطفال وقسم هم بيها اطفال
:
وصلنة لغرفة فتحت الباب الممرضة وطبينة باوعت بس هو بالغرفة مخلينة راسا كلبي نغزني وعبالك يكلي هذا ابنج
:
باوعت علية وشهكت من قهر من حزن من خوف من المنضر الي شفتة يعني ملبسي حفاضة رقم واحد بس طالعة علية عبالك رقم ٦ من كد ما صغير يطلع اكبر من جف ايدي بشوي كلش صغير
:
وعيونة شاديها وكلة على بعضة من اضفر رجلة لحد راسة حتى راسة مخلين بي اجهزة وكانونة برجلة وايدة
:
وصلت يمة ودموعي يمكن مية بلحضة وحدة مو عشرة جان تنفسة سريع اباوع جسمة يصعد وينزل بسرعة مو طبيعية
:
كلبي علمني بي شي سالت الممرضة الي واكفة يمنة كالت ما بي شي بس كالت هيج وتباوع بقلق على احمد
:
ردت اخلي بحضني اشم ريحتة طلعتة من الخدج وهو واجهزتة خلتة بحضني احس كلبي حيوكف اباوع علية لحمة صغيرة
:
وحتى شكلة ما مبين كد ماكو اجهزة علية وحتى مال نبضات القلب مخلين الة وبحلة صوندة رفعتة اشم ريحتة بس شعور ما اعرف اوصفة شنو
:
نزلتة بحضني وباوعتلة بس راسا شهك وصفر الجهاز ........

يتبع ........

طبعا جدا جدا اسفة واعتذر
:
صح صار هواي ممنزلة وحقكم علية
:
لكن ثقو بالله مو بيدي
:
والقران غير صارلي ٣ ايام اني نايمة يم الدكتورة
:
اول البارحة والبارحة واليوم واول البارحة بالمستشفى هم
:
تعبانة وكارهة روحي والدنيا كلها
:
ادري ضايجين مني لكن انتو هم ما ترفعون المعنويات اي تفاعل ماكو
:
انشالله بس اصير زينة ويصير عندي مجال انزل الكم وهذا نص بارت نشرتة لكن هذا الي كدرت علية وكدرت اكتبة
:
انشالله ما بقى شي واختم القصة واعذروني راح اختصر هواي شغلات واكتب بس المهمة لان تعبت كلش
:
وهسه علقو هواي وارفعو معنوياتي
:
دمتم في حفظ الرحمن 😘❤️😘❤️😘❤️