لعلك تكون اقوى دروس حياتي ((لعنة اختيارك))

البارت السابع

السلام عليكم

لعلك تكون اقوى دروس حياتي
                                   ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.......................

عدلت كعدتي وكتلة :

همزين والله اجيت نور البيت والغرفة بوجودك
:
هاي شمسوية هاي الزينة كلها علمود البارحة
:
اي بس هواي شفتك اهتميت وين جنت كم مرة دكيت عليك ليش مجاوب واخر شي سديتة بوجهي وغلقتة
:
شنو هو تحقيق يعني
:
اي تحقيق لان اني مو طرطور لو خراعة خضرة كاعدة هنا
:
جنت طالع وية جماعتي وضلينة نفتر ولان البارحة جان اكو احتفالات بعيد الحب
:
ها كتلي وية جماعتك هو عيد الحب تحتفل بي وية جماعتك لو وية مرتك زين صوت البنية الي من حجيت وياية المن
:
وين اكو ماكو هاي خاف من جنة دنمشي مو يفوتون عالم من يمنة ويجوز فاتت بنية وسمعتي صوتها
:
ها اوك صدكتك لكن الحمرة الي على قميصك وريحة العطر النسائي هاي شنو
:
وينهن ماكو شبيج انتي هو شنو تحقيق كاعدة دورين مشكلة من صباحيات الله
:
اي اليوم اني اريد اتعارك وياك داشوف اني شنو موقعي من الاعراب انفصم ضهري البارحة واني اطبخلك وانفخلك واعدلك
:
وما خليت شي يعتب علية ما سويتة كلة داسويلك حفلة بمناسبة عيد الحب حتى الهدية جبتها الك واكعد انتضرك تالي طالع تسهر وية الكح....
:
بس كلت هيج ضربني براشدي طير وجهي ورد لزمني من شعري وكال
:
باعي من البارحة ما نايم وجاي تعبان ومكسر جسمي واريد انام واجي تتلكيني بمشكلة يطبج مرض الي صدكتي والي ما صدكتي
:
ساعة السودة من كعدتج لو ادري مخليج مطمورة بمكانج مثل الجلب هواي احسن بس اني اثول
:
وباعي اكلج بكيفي اسوي الي يعجبني واطلع وين ما يعجبني وكلشي اسوي وحسج ما اسمعة اذا رضيتي ولا لا بمزاجي
:
وان ما عاجبج الباب يوسع جمل وولي من جهرتي يلة اريد انطمر دفعني كل قوتة وتوجه للجرباية يريد ينام
:
يعني هذا كلة وما مهتم وضاربني عرض الحايط صدكت تخبلت علية وما حسبت لاي شي
:
رحت دفعتة وكتلة حقك عيني ما نايم من السهر والونسة بالله هسه احرك روحي اذا ما كعدت وخليت حد لهاي المهزلة كلها لا طرطور اني ولا مكطمة ما عندي اهل حتى كاعد سوي هيج بية
:
وهو تخبل شلون دفعتة وانوب صيحت علية وضلينة كلمة مني وكلمة منة علكت بيناتنة وجان يضربني براشدي
:
لزمت خدي وضليت اباوع بوجها وكتلة تضربني احمد فوك ما انتة الغلطان تضربني بس مو رجال الي يستقوي على مرة ويضربها

اني كتلة هيج لو انجن ما ادري الراشديات والدفرات منين تجيني وكعت للكاع من كد الضرب
:
عمي وعمتي والبنات صعدو يركضون فتحو الباب وشافو مجنزني من الكتل صدك اذاني عبالك يضرب بحايط
:
هو ما اهتم لوجود اهلة مستمر يضرب ويغلط ويصيح كلبة حقيرة انعل الساعة السودة الي شفتج بيها
:
خرب بذاك اليوم الاسود ساعة السودة عمي روحي لاهلج وخلصيني شنو ما عندج كرامة انتي
:
صار شهرين وياية ومتجاهلج واي اهتمام بيج مني ماكو شوكت تملين وتروحين ترة اني ما اريدج اعترف الج بلساني
:
اني اكرهج عمي اتخبل منج ساعة السودة من ازوجتج اني ما احبج احب غيرج واريدها والا ازوجها
:
اني ما اريدج اهلي الي غصبوني عليج همة يريدوج اني ما اريدج اكرهج اشوف دم سنوني ولا اشوفج
:
ترة اني احب وحدة وواعدها بالزواج بس الي ما يتسمون اهلي وحسبي الله عليهم رادو يتبرون مني اذا ما تزوجتج
:
هسه ما الهم حق علية بعد عادي حتى لو رادو يتبرون مني خلي يتبرون اني نفذت الي رادو وكتلهم حتى لو اتزوجتج ترة اخذها يعني اخذها وانتي دريتي بعد تريدون تقبلون متقبلون اني ترة اخطبها والا ازوجها
:
وها ترة داكلج بيوم العقد واليوم الاكشر من عتيت ايدج وطبيت كالب خلقتي ومن عفتج وعفت الكعدة كلها وطلعت كتلكم صديقي استشهد
:
جذذذذب جذذذذذذذذذب افتهمتي جذذذذذذذب هية الي احبها واريدها من وراج و ورة جهرتج اتخربطت ونقلوها للمستشفى
:
واني عفتج وطلعت رحت عليها وهمة يدرون وتعاركت وياهم والي داسوي كلة بيج من اذية لانو احبها ولخاطرها اريد ااذيج وما اقهرها
:
اكرهج اكرهججججججج اكرهجججج اعيد اكثر لو خلص افتهمتي انعل ابو هيج عيشة كشرة
:
رجع اندار على عمي وعمتي يعيط عليهم ويصيح حسبي الله عليكم حركتو كلبي وبليتوني بوحدة ما اريدها
:
بس والله غصبا ما عليكم وعناد بيكم الا اخذها مو رجال اطلع اذا ما اتزوجتها وغصب عنكم كلكم وخلي تفيدك انتة بت اخوك
:
اتبرو مني عود اني الي بعد ما اريدكم واخرب هيج عيشة كشرة وساعة السودة هم البنات كاعدات يمي وحاضناتني ويبجن
:
وانوب لفيت روحي بالبطانية لان ما لابسة شي مستر وعمي اجى للغرفة احس الدنيا سودت بعيني من كال هيج رجع اندار علية وكلي
:
وانتي بعد ما دريتي تريدين تبقين تريدين تروحين لاهلج وتطلكين بعد بكيفج بس خلي بالج شغلة وحدة اني ما اريدددددددددددج بعد اعيد لو افتهمتي
:
هو يحجي واني نسيت الضرب الي ضربنياه ونسيت كلشي بس بقيت صافنة علية واركز بكلامة والصدمات تتوالى على راسي
:
هذا حب عمري وحياتي من وعيت عالدنيا وكمت افهم اني احبة فتحت عيني علية احبة اكثر من روحي حبي الة تخطى كل الحدود
:
صار شهرين ويا نسيت حتى نفسي وراحتي والله اموت من وجع ضهري والتعب واسكت لخاطرة وخصوصا البنات صارن شي قليل يشتغلن
:
وتجي ايام اصلا ما يمدن ايدهن بشغلة حتى وجبة مواعين ما يغسلن لان عدهن امتحانات وكومة واجبات فالشغل كلة علية
:
عمتي للامانة تجي تريد تعاوني بس هية مرة جبيرة مو مال تشتغل انواب اذا ما الحك عالغدة هية تطبخه
:
هذا كلة واكول ميخالف لخاطر حبيبي وروحي واغلى شي بالدنيا عندي يهون تالي يطلع هذا كلة صاير واني ما ادري
:
واني الي صدكت بيوم الخطوبة وحتى النيشان الي ابد ما حضرة وياية وحتى بالذهب وبكلشي واني اعدي واكول يجوز لان ضابط يستحي من هيج امور
:
هو يحجي او مو يحجي يرج البيت بعياطة واني احس ما اكدر افتح عيوني بعد اكثر وغواش صار على عيوني
:
ما حسيت بشي بعد وين يلة كعدت لكيت عمتي والبنات يمي يبجن وعمي كاعد برة بالباب واني لافة روحي بالبطانية ووضعة مو زين
:
راسا عيوني دورت علية اريد اشوفة اريدة يخاف علية بس خاب ضني من ما لكيتة كوة حجيت كتلهن وينة احمد
:
عمتي دارت وجها وتبجي والبنات يريدن يكومني واني حتى حيل وقوة ما عندي لحيت عليهن بالسؤال جاوبني بجواب كسر كلبي وروحي انو عافني وطلع من البيت كلة
:
عمي صاح يابة روان كومي اوديج للمضمد للمستشفى يشوفون شبيج كوة حجيت وكتلهم ما بية شي بس اريد ابقى وحدي شوية
:
ما رضو وكالو لا نزلي جوة خلي البنات ينضفن الغرفة ما رضيت وكتلهم بس عوفوني وحدي
:
ما رضو لحيت عليهم طلعو وعافوني كمت قفلت الباب وكعدت وراها بالكاع وافكر اريد استوعب الي صار قبل شوي ما داكدر
:
يا ربي معقولة اترجاك يا الهي كون هذا الي صار كلة يطلع حلم مو حقيقة اني احبة والله مستعدة اعوف كلشي لخاطرة
:
يا ربي والله ما اكدر بدونة احسة شي ما اكدر استغني عنة مثل المي واكثر ساعة وحدة ما اكدر افاركة من يروح للدوام اضل احسب ثواني مو ساعات ولا دقايق شوكت يرجع مو انوب اطلك منة واعوفة