لعلك تكون اقوى دروس حياتي ((لعنة اختيارك))

البارت الاول

السلام عليكم

لعلك تكون اقوى دروس حياتي
                                ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

........................

مثل كل يوم عادي واكفة العصر بالمطبخ داسوي حلويات وفطاير يومية اتعلم شي من النت واكعد اسوي من حلويات من طبخ
:
هسه واكفة داطلع الفطاير من الفرن لان استوت واسمع الباب الي مفتوحة علينة من داخل البيت انفتحت باب بينة وبين بيت عمي اخو ابوية
:
لان احنة بيت بصف بيت ومسوين باب مفتوحة عالبيت علمود اذا وحدة تريد تروح لبيت الثانية منطلع من الشارع نروح من الباب
:
كل ضني وحدة من بنات عمي اجت احنة بطبيعتنة نشاقة لان خوات مو بنات عم عبالك هنة تقى وعلا
:
صحت كلت بالضحك هاي يا نعال من عدجن اجتي شنو عرفتي مسوية حلويات واجيتي تركضين
:
حجيت هيج واضحك لان عبالي وحدة منهن عمي ومرتة من يجون يحجون يكولون وينكم اهل الدار فاعرفهم
:
وهيج وما يجون هيج وكت نادرًا وادري البنات يجن شو مسمعت صوت كلت ومرض شبيجن مو داحجي منو منجن اجت
:
هم ماكو صوت ذبيت صينية الفطاير من ايدي وكلت خلي اشوف منو هاي الي اجت ليش مدتحجي
:
مشيت وكلت شبيج اكل الفار لسانج حيوانة وجان اباوع ولنة احمد ابن عمي وهو ساكت ويضحك
:
عزة اني شفتة ويا كاع انشكي وبلعيني ضليت امتمت كدامة وفشلت فشلة من هاي التوب لان اني كدامة ابد ما احجي هيج
:
وكدامة ابلع لساني ومينسمع صوتي سلم وكال هو انتي اكل الفار لسانج ضليت بس ارمش بعيوني وساكتة
:
وهو خربان ضحك علية شافني خجلت وغصيت بنص هدومي كال يلة ما عليج جديتي وين اجيت اريد اشوفها
:
وسويلي جاي وجيبيلي ويا من هاي الي مسويتها وفضحتينه من وراها عزة متت من الخجل ضحكت وكتلة تدلل هسه اجيبلك
:
كلي :
:
يلة صيحي لجديتي واني راح اكعد هنا بالحديقة ما بية اطب جوة
:
اندار ومشة راح يكعد بالحديقة واني اباوع لطولة واكول يماااااااي من رحت فدوة لطولك
:
رحت على بيبي صحت الها جانت بالغرفة مالتها هية وامي سوة كاعدات بيها جانت كاعدة تباوع على مسلسل النبي يوسف بالتلفزيون لان مخلين الها تلفزيون بالغرفة
:
كتلها بيبي احمد اجى وكاعد بالحديقة يصيحلج راسا كامت وتوكت او توجت على عوجيتها وتكول
:
وينة هذا الحقير اليوم اشعل ابو تمشي وتحجي ساعدتها تمشي رغم هية تتوجى على عوجيتها لكن اريد بس اطلع واملي عيني بشوفتة
:
طلعت للحديقة هو جان كاعد ويباوع بتلفونة شافها وكام اجى عليها ويكللها هلا هلا بنويرة هلا
:
وصل ليمها وهية لزمتة كتل بالعوجية على كيفها وتحجي علية وتكلة حقير ادبسز كول خلي اروح اشوف جديتي اسال عليها
:
اشوفها ماتت عدلت تريد شي محتاجة شي صار هاي الك شكد ما مار علية وشايفني بعد فلا احجي وياك
:
ضلت جديتي تعاتبة وزعلانة وهو يحاول يراضيها لان صار الة اكثر من اسبوع ما جاي عليها وشايفها
:
هو يحجي وية جديتي ويضحك ويبرر الها واني صافنة علية ومن يمي فرحانة واضحك عبالك ديحجي وياي
:
واكول بداخلي من اروح فدوة لضحكتك رحت للمطبخ اصب جاي الة واني ما بودي اتحرك من كدامة
:
اريد املي عيني شوف منة واريدها تشبع شوف منة صبيت جاي الة بكلاص ميحب باستكان وخليت الة بماعون فطاير
:
وصبيت لجديتي جاي هم ورحت وديتة الهم خليت الطبلة كدامة هية جانت موجودة بالحديقة وخليت الصينية كدامة وكدام بيبي
:
وشافها كال اي والله اجت هاي الصينية بوكتها ابتسمت بوجهه وكتلة عوافي يلة مد ايدك واكل
:
امي جانت تسبح بالحمام وخواني واحد طالع واحد نايم كعدت يمهم وهو يحجي وية جديتي واني بس اباوع علية وعلى حلكة شلون يحجي
:
اكل وكلي عاشت ايدج من صدك طيبات هو بس شكلهن يفتح النفس ويسوي واهس للواحد ياكل كتلة بالف عافية اجيب الك بعد
:
احمد : اي والله لان جوعان وما متغدي هاي جيتي عبالي اتغدى بس انتي جبتي ذني وطعمهن بصراحة يجنن فراح اتغدى بيهن واعوف التمن والمرك
:
هو يحجي واني حلكي واصلا لاذاناتي وبس اكلة بالعافية رحت جبت الة بعد وحميت الجاي وصبيت الة بعد لان ذاك الكلاص خلص
:
وديت الة وخليت الة بعلبة ياخذهن ويا وكتلة من تروح للدوام عود كلي اسوي الك كومة
:
طلعت امي واجتي سلمت علية وكعدت وطلع اخوية الي جان نايم كمت صبيت جاي الهم وفطاير وكعدو يسولفون
:
واني نسيت الدنيا واهلها وبس صافنة علية بقى نص ساعة تقريباً وراح لبيتهم وعبر من الباب الداخلية
:
راح واني اباوع على طولة ومشيتة جاي بهدوم الدوام انتبهت جديتي تباوع علية تالي نزلت عيوني واستحيت
:
:
:
....................
:
:
:
هسه اعرفكم علية وعلى عائلتي اني روان طالبة صف خامس اعدادي ابوي متوفي من زمان من واني زغيرة بس مو كلش
:
يعني ما لحكت اشبع من حنانة بسبب مرض صار بي اسمة التهاب الكبد الفايروسي نوع (c) بوكتها تازمت حالتة
:
ومسوين الة عملية زرع كبد مشتري من متبرع لكن ما ناجحة وتوفى عندي خوان ٢ واثنينهم اكبر مني واني اصغر وحدة وما عندي اخت
:
امي بعد ما مات ابوية ما تزوجت ضلت تربي بينة جديتي ام ابوية عايشة بس جدي متوفي هيه عايشة يمنة مو يم بيت عمي
:
بيت عمي اخو ابوية الي هو اكبر من ابوية بس هو يعني جديتي مخلفة ولد ثنين بس و٣ بنات
:
بيت عمي كاعدين بصفنا لزك حايط عالحايط وفاتحين باب داخلية عالبيت نطب ونطلع منها وابدا ما نقفلها
:
بس بيوم الي واحد من البيوت عازم زلم مثلا نردها علمود اذا وحدنة من عدنة البنات او النسوان رادت تطلع بالحديقة او الطرمة بس ابداً ما نقفلها
:
عمي عندة ٢ ولد و٢ بنات واحد من ولدة الصغير مسافر للخارج بروسيا يدرس طب اسمة محمد واحمد الجبير ضابط بالاستخبارات
:
البنات وحدة صف خامس علمي بكدي اسمها تقى والثانية بصف سادس اكبر مني بسنة اسمها علا الي يشوفنة ميكول بنات عم
:
عبالك خوات وحتى الخوات مو مثلنة ومتشاركين بكلشي الحمدلله ماكو اي خلافات بينة احنة هالبيتين
:
وعمي مثل ابونة نعتبرة ونحترمة كلش وامي وخواني رغم همة كبار بس ميسون شي بدون علمة
:
دائما نستشيرة بكلشي بالصغيرة والجبيرة حتى امي كلش تحترمة وتعتبرة اخوها الجبير ودائما تكول لخواني والي
:
هذا مثل ابوكم وبمثابة ابوكم لازم تحترمو وتحسبون حساب الة بكلشي وهو هم خطية تصرفاتة ويانة مثل اب لخلفتة
:
يعني بين قوسين الحمدلله عمي زين ويانة كلش ونحبة ونموت علية ومرتة هم كذلك طيبة وحبابة
:
وما عدها حقد او كره ابد والبنات كذلك والولد أيضًا خواني ابو الحسن ويوسف وكلت اثنينهم اكبر مني
:
يوسف الجبير وابو الحسن بعدة واني اخر العنقود مدلله بشكل وخواني صارو الي اب وبالذات يوسف
:
صار اب حتى لابو الحسن من شب وكبر شوي اعتمد على نفسة وبدة يشتغل وهو طالب رغم راتب ابوي
:
ورغم مساعدات عمي وجديتي هم جانت تعيلنة بالمصرف وخوالي كذلك وعمي الي جان يصرف علينة اكثر من بيتة وخلفتة
:
:
لكن هو مقبل وكال ما اريد اصير عالة على غيري واعتمد على غيري كلش نفسة عزيزة وهسه انشالله حيتخرج صيدلاني
:
وابو الحسن مرحلة اولى تحليلات جان حلم ابوية تكول امي يشوفكم دكاترة واني هم انشالله لو صيدلانية لو دكتورة اسنان كلش عاجبني ادخل وحدة من ذني لو طب اسنان لو صيدلة هذا حلمي
:
اني كلش شاطرة بدراستي ومتفوقة وبنات عمي كذلك هم شاطرات ابن عمي الي بالخارج اخو احمد كذلك راد طب لكن انضلم بالمعدل ومقبلو هنا
:
عاد احمد كلة يسافر للخارج يدرس هناك طب وهو يتكفل بكامل مصرفة وكلشي يخصة
:
احمد بعد ما اتعين وعمي طلع تقاعد هو الي استلم البيت وهو الي بدة يصرف علية وعالكل
:
راتب عمي يكول هو احمد اني ما علية بي شنو يريد يسوي خلي يسوي بي اني اصرف عليهم
:
جديتي ام ابوية عايشة يمنة من اتوفى ابوية عاشت يمنة وصارت ونيسة لامي وابد ما تكرها وامي هم تموت عليها
:
وابد ما تضوج منها اكثر الانواب هية بيدها تسبحها وتكعد تمشط الها وتضفرلها شعرها
:
يعني واقع حال وين منروح اكثر العجايز مو نضيفات وريحتهن ما طيبة ابدا وما بيج تاخذين كلاص مي من ايدهن
:
الا جديتي يمكن انضف مني هم ههه حتى ملابسها تعطرهن امي وما تسبح عجوزتنة غير بغسول مال جسم ابو العطر 😅
:
ومن تصير حارة تكول الي لو لامي جيبن الي هذا البخاج مال الجسم داخلي منة تقصد عالركسونة 😂حجيتنة مستهترة
:
اني اكل من ايدها ونضيفة كلش الا ابعد الحدود ريحتها جنها ريحة الجنة تخبل وكد ما نضيفة الباب اذا لزمتها تروح تغسل ايديها
:
ماما نبع الحنان يمكن ماكو ام حنينة وتخاف علينة مثلها وبالذات اني بزر الكعدة تخاف علية حتى من الهوى ماما اسمها زينب
:
هسه تعرفتو على عائلتي كلها هسه ابدي وياكم بقصتي مواصفاتي حالي حال اي بنية طولي ١٥٥ قزمة
:
عيوني لونهن اسود مثل سواد الليل خشمي كلش صغير حواجبي سود وثخان مثل الخليجيات بحيث الي يشوفني عبالة مخلية الهم تاتو كد ما سود وثخان
:
بشرتي بيضة لكن مو اكول بيضة مية بالمية لا اكو ابيض مني لكن الحمدللة بيضة على حمار حلكي وسط لا زغير ولا جبير
:
وجهي دائري مو طولاني جسمي لا ضعيف ولا سمينة بس شوي بي نعومة يعني مو خشنة وعندي خصر وورك يعني شكلي الحمدلله ما بي شي
:
:
واحلى شي بية لو شكد ما اكل عسى ما اكل الدنيا كلها ما اسمن ابد اذا ردت اسمن لازم اخذ مسمن يلة اسمن
:
:
ودائما يكولون كلما تكبرين دتحلوين بعد اكثر وكلها من تشوفني تباوع علية لكن اكو الي احلى مني طبعا والحمدلله والشكر على النعمة واتمام الخلقة
:
حبيت ابن عمي احمد من عمري ١٣ سنة حب مراهقة ولحد هسه شلون حبيتة ما ادري كل الي ادري بي اخذ كلبي وعقلي
:
وصار عبالك روحي بحيث صرت اكوم واكعد احمد ميفارك بالي لو دقيقة وحدة شنو دقيقة ثانية وحدة او رمشة عين
:
من يجي واشوفة لو اروح لبيتهم واشوفة حتى اكوم ارجف كد ما احبة واحس كلبي يفرفح علية واطير
:
ما شفت ولا حلى بعيني شاب او ولد او رجال بعدة احبة حد الجنون بحيث ابوس التراب الي يمشي علية
:
حبي الة بخبال بحيث مرة مجروح بالدوام بايدة رحت جرحت ايدي ونفس الايد ونفس المكان هيج وصل خبالي بحبة
:
بيوم الي ينزل اضل كاعدة بالحديقة لو اروح عالبنات علمود بس اشوفة باختصار حبي الة تعدى حتى الخبال
:
خلص اليوم وراها بكم يوم سويت الة ٥ كيلوات فطاير وحدي بحيث وكعن ايدية علما كملت وضهري كمت امشي محدبة من وراه
:
كملتهن وصفطتهن بحافضة وهو جان ديطلع للدوام ويبقى كم يوم واجب اجن بوكتهن
:
من شاف الكمية شهك وكال عزة هاي شمسوية ابتسمت وكتلة كلهن الك اخذهن ويضحك ويكول عاشت ايدج
:
بس ليش كلفتي نفسج وكمية جبيرة اكيد تعبتي والله ما الة داعي كتلة فدوة الك اصلا اني احب اسوي اكلات وحلويات
:
وهاي لان حتروح كم يوم متجي تاكل هنا بيتكم هذني علمود تاكلهن وية الجاي خلاهن بالسيارة وهو يتشكر مني
:
ووعدني يجيب الي هدية حك تعبي كتلة لا والنبي ما يحتاج ازعل والله شنو قابل اريد هدية اني سويتهن من ذاتي لخاطرك
:
تشكر مني وراح واخذ كلبي ويا يمة من وكفت وحجيت ويا احس روحي طرت ماما من درت محجت اصلا كيفت لان درت بي حبهن
:
بس هية ما تدري اني سويتهن لان احبة ومجنونة بي عبالها هيج شي عادي راح ورجع وراها
:
واجة لبيتنة وكال الي كدام امي انتي شسويتي وكع كلبي كتلة خير عبالي بي شي كال من نطيتيني الفطاير
:
رحت للدوام وتكومو كلها علية جماعتي الضباط والحراس والمدير مالتي تخبلو بيهن حتى ما خلو الي
:
وحلفوني يمين من اداوم ارد اجيب الهم من نفسهن وفوكاها يريدون كمية جبيرة ضحكنة اني وامي عبالنة بي شي
:
كلتلة امي تدلل يا عمة ماي عيونة الك ولربعك دلل بيوم الي تروح للدوام بس بلغنة علمود تسوي الك روان
:
حك راسة وكللها عمة مو اكو فد مشكلة صغيرة كلتلة خير يمة كول كللها اريد تسوي الي ١٥ كيلو
:
ضحكنة من الكمية لان فعلا جبيرة بس رغم هذا وادري بالتعب الي راح يصير بية كتلة دلل تلكاهن حاضرات
:
احمد : بس كولي الي شنو المواد علمود اجيبهن الج
:
ثنينة ما رضينة لا اني ولا امي وكلتلة ماما عيب هذا الحجي ما يسون انتة تجي وتلكاهن كاملات
:
راح وانداريت على ماما وكتلها بالشقة عزة ذني يراد اقسمهن وجبات ما اكدر كلة بيوم واحد
:
زينب : اي ماما حبيبتي سويهن فد ٣ وجبات او ٤ واني اساعدج بيهن
:
وفعلا ماما خابرت يوسف يجيب الي ١٥ باكيت طحين لان ما استخدم طحين البيت او الحصة استخدم مال معجنات
:
وقسمتهن ٤ وجبات وماما وياي خطية ساعدتني وكملتهن بس ما سويتهن كلهن بنفس اليوم خليتهن بالمجمدة ما عليهن شي ومن راح للدوام نطيتهن اله
:
ورة فترة ازوج واحد من ولد خالاتي ورحنة بعرسة خليت مكياج كلش خفيف اخف حتى من البناتي
:
مجرد بس عدلت وجهي واشتريت ملابس جديدة وعرسة لابن خالتي جان بقاعة كرايب امي كلها تعجبت بية خصوصا اكو بيهن صار هواي ما شايفاتني بحيث حتى ماما خافت علية من الحسد
:
ملابسي جانت محتشمة بالقاعة وحجاب ما طلعت شعري عكس بنات خالاتي وخوالي اني ما ردت هذا الشي علمود ساعتين ٣
:
وعلمود العالم تشوف شعري اشيل ذنب كومة وادخل جهنم فما فكيت شعري رغم رادن مني هواي لكن اني بقناعتي التامة رفضت هذا الشي
:
بعدها باسبوعين من العرس مال ابن خالتي اجني كرايب ماما من بعيد يعني مو نفس المحافضة احنة ساكنين بغداد
:
تفاجات بجيتهن وحتى ماما هم يعني يمكن ما اذكر جايات لبيتنة بس يلتقن بالمناسبات اجني وسلمن وكعدن
:
وحضرت ضيافة الهن قدمت وطلعت ما كعدت استحي اكعد يمهن من طلعت عرفت جايات علمود يخطبني لابن وحدة من الجايات وهنا جانت الصدمة
:
اني اصلا ما مفكرة هسه بسالفة الزواج مجرد احب احمد واذا ازوج اريد ازوج احمد واصلا ما مفكرة بولد غيرة
:
خابرت ماما خالاتي وكالت الهن وكالت لاخواني والمشكلة انو كل مرة يجون خطابة وماما من يمها ترفض بحجة بعدج زغيرة وتدرسين
:
هذا لا ما رفضت كالت اشوفها واشوف خوانها وعمها وارد الكم خبر الولد الي خطبوني الة شايفني بالقاعة
:
ومنعجب بية هو مهندس مال نفط ومتعين واذا تزوجنة يعزل عن اهلة الطابق الفوك كامل وماثث ويخبل ونعيش بي اني وياه
:
وعندة سيارة حديثة وحالتة المادية زينة ماما عجبها الموضوع ودخل عقلها بحيث من كلت الها اني ما ارضى
:
ثاني يوم اجن خالتي وبناتهن وكعدن يقنعن بية واني اعيط ما اريد وما اقبل ما يدرن اني احب احمد واموت علية
:
جديتي عرفت بية وكالت لتجبرنها خلي تفكر بس عرفت اكو شي بمخها بس شنو ما ادري
:
راحن خالتي وامي بليل رحنة لبيت عمي اني وياها كعدت يم البنات وهية يم عمي وعمتي وكالت لعمي وتريد هم يقنعني اوافق
:
واني ضليت افور ما اريد اقبل ولا اريد ازوج غير احمد اسبوع ونص عدل كاملات امي وخالاتي يقنعن بية
:
واني رافضة واكوم ابجي المشكلة الولد حلو وكل الصفات الي تريدها البنية بي ويخليني اكمل دراسة
:
بس اني رافضتة لحد ما اجى عمي بليل وعمتي والبنات ورة الجاي وكم سالوفة فتح الموضوع وية امي
:
وكللها اني اريدها لابني احمد اذا ترضى روان بلغي كرايبج بعدم الموافقة واذا تقبل روان اخطبها لاحمد
:
هذا الخبر جان صدمة الي ولامي وبالذات اني ..........
:
:
:
تصويت وتعليق حبايب كلبي
:
دمتم في حفظ الرحمن ❤️😘❤️😘❤️😘