لعلك تكون اقوى دروس حياتي ((لعنة اختيارك))

البارت السابع عشر

السلام عليكم

لعلك تكون اقوى دروس حياتي
                                  ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

..................

الخبر جان مثل الصاعقة علينا لان كلنا جنة متأملين طيب وترجع للبيت العياط شال المنطقة عماتي كلهن انجمعن بيتنا والكرابة كلها اجت
:
امي جانت وياها بالمستشفى خالاتي كلهن اجني ونسوان خوالي هم البيت انترس عالم زلم ونسوان العياط يرج البيت
:
كد ما نحب جديتي عبالك اسم الله بنية شابة او ولد شاب الي مات مو مرة جبيرة وراحت لدار حقها
:
اني كاعدة عالدرج وابجي جسمي كلة يرجف وبطني توجعني واحس راح اختنك كالو حيجيبوها للبيت
:
مرت عمي جانت موجودة لان هية تروح وامي تجي وامي تجي وهية تروح فجانت رغم الهوسة كلها والعياط
:
تجي تشوفني ووصت البنات علية شكد اتمنيت اروح اشوفها بس محد خلاني شلون راحت وما شفتها وهية شكد جانت تحبني
:
وجانت تنتضر شوكت اولد وتشوف جهالي زين هسه ما اكدر اروح اشوفها وابوسها لان اخاف من الميت اني عسى ما جان منو
:
حتى لو جديتي هم اخاف اني حتى ابوية ما وعيت على موتة وما شايفة جنازة ومتقربة عليها ابد
:
شوي وجابو الجنازة والصريخ شال البيت امي منتهيه عليها وبس طببو التابوت شمرت روحها عليها وتعيط اكثر من عماتي
:
خلو التابوت بالاستقبال واني جنت واكفة باب الاستقبال الداخلية وابجي واشوف التابوت وعياط عماتي وخوفي من التابوت
:
هذا كبري وراح اصير ام واخاف حتى من التابوت حتى لو جان فارغ وكل عقلي هسه جديتي تنهض من التابوت وعيونها بيض واموت بمكاني
:
عماتي كام يصيحن علمود يفتحون التابوت يريدن يشوفنها مجرد الفكرة ترعبني ولا الي يكول هية نفسها الي عاشت عمر ويانة
:
انوب من الخوف جمدت بمكاني لا بية اضل واكفة واباوع ولا بية اتحرك واطلع من ذاك المكان حتى ما اشوف
:
احس روحي بدت تنسحب مني ووجهي صار اصفر وكلي على بعضي اختض وارجف مثل السعفة
:
حسيت روحي حتطلع اريد اوكف ما بية لزمت الباب واباوع ديشيلون القبغ مال التابوت اني شفتهم هيج راحت مني اخر ذرة مقاومة
:
واستسلمت للاغماء المشكلة محد منتبه الي حتى البنات بس جابو التابوت التهن حسيت بنفسي ايدي وكعت من الباب وراح اوكع للكاع
:
ما حسيت غير احتضني واحد يعني وكعت بحضنة عرفتة من عطرة ونفسة كلبي عرفة راسا هو
:
الدنيا دور وتفتر بية مو كادرة اثبت واريد بس انام حسيت شالني ومشى بية واسمعة يعيط شلون تعوفوها وحدها
:
خلاني بفراشي وخلالي الاوكسجين وعاط عالبنات يجن يمي واسمعة يكول اللهن قسما بذات الله لو عرفت متحركات من يمها اموتجن
:
جان يحجي ويمسح على شعري وراها طلع نمت شوي عبالك منطيني تخدير رغم الهوسة وراها صحيت
:
لكيتهم رايحين يدفنوها وناصبين الجادر برة ويوسف وعمي واحمد هم رايحين  باقي ابو الحسن وازواج عماتي وخوالي كلهم جايين
:
طلعت من غرفتي البيت عبارة عن بس روس كلها جاية وملتمة بيتنة وعياط عماتي بالاستقبال وقسم منهم رايحات وية جديتي
:
توجهت للمطبخ لكيت امي كاعدة بالكاع ومخلية ايديها على راسها وتبجي وخالاتي يمها من شافتني راسا كامت واجت تسالني شلون صرت
:
حضنتها وابجي وهية تبجي وياي شوي واجت الملاية وبدت تقرة وتنعي وتخلي الكل تصرخ
:
بعد ساعات رجعو من الدفنة واحمد عاف الكل واجة يركض علية يريد يشوفني جان مبين تعبان من وجهه
:
رحت على عمي بوستة وكتلة البقية بحياتك حضني ويبجي خطية جان مقهور هواي عليها وتعبان وحتى كالو متخربط
:
:
زين الي اجو كلها تسال ليش هلكد بطنج جبيرة معقولة طفل واحد وهلكد جبيرة بطنج اني كل ما اشوف فرصة انهزم اكعد بمكان وحدي اذا لكيت
:
كلها ضلت تسال ليش هيج بطني جبيرة واني وامي وعماتي ومرت عمي وخالاتي خايفة علية لا يعرفون اني بية توم راسا يضربوني بعين
:
عماتي كلهن باتن يمنة وخالاتي قسم راحن وقسم باتن علمود امي والكرابة الي بعيدين هم باتو بحيث بيتنة ما كفة
:
امي بالبداية كالت بس انتي تنامين بغرفتج بعدين ما كفة البيت نصها نامت بغرفتي ووحدة مرة جبيرة بالعمر ما تكدر تنام بالكاع نامت على جربايتي
:
زين الفوك ما اكدر اصعد الة مو زين علية الدرج يوسف وابو الحسن تعبانين مو مال يشيلوني خطية
:
امي كالت روحي باتي يم البنات بيت عمج وهم هناك هدوء وترتاحين ماكو احد من داطلع من باب المطبخ عرفنة احمد باقي هنا وبايت بيت عمي
:
هية من سمعت رجعتني ومقبلت اروح ابات ما بقى حل كدامي غير اصعد الدرج لان الولد اصلا صعدو خطية ومو مال اصيحهم ينزلون يشيلوني
:
اضطريت اصعد صعدت على كيف باية باية ولازمة بطني وامي صعدت وياية علمود تفرش الي فراش
:
رحت لغرفة يوسف خطية جان مدد وتوة يريد ينام من شافني كعد وكال ها كلتلة امي هيج وهيج
:
خطية كام من جربايتة وكلي نامي هنا امي كلتلة يوسف ولو تعبان بس لو حسيت ولكيت لا سامح الله روان بيها شي صيحلي
:
ما اكدر انيمها جوة لا يجفصون بطنها والعالم كلها دتسال ليش بطنها هيج جبيرة رد اي اني هم كلت بس مو الدرج مو زين عليها جان راحت بيت عمي ردت امي مو احمد باقي هنا وما خليتها تروح رد اي زين سويتي عبالي رجع لبيتة
:
فرشتلة امي بالكاع واني نمت بفراشة وراحت امي اريد انام اجتي على بالي جديتي هية وبالتابوت وشكل التابوت ومن رادو يفتحو
:
خفت لدرجة مو طبيعية حتى بطني مغصتني وانعاد علية المنضر وعبالك هسه ديفتحون التابوت كدامي
:
صحت بخوف واني ارجف يوووووسف رفع راسة وكلي ها عيني كتلة فدوة تعال خلي انام بحضنك خايفة ومن اغفى ارجع لفراشك
:
نهض من فراشة خطية هو وتعبان اجة لزم ايدي كلي ليش خايفة شبيج كتلة هيج وهيج باسني براسي وكال ماكو شي بوية لتخافين
:
وهاي حنام يمج علما تغفين دنيت شوي ونام لزمت ايدة وارجف من الخوف ما ادري شبية احس جديتي راح تفتح الباب وطب وعيونها كلها بيض
:
حتى يوسف حس دارجف خلة راسي على صدرة وحضني كلي لتخافين اني هنا شبيج ماكو شي
:
اثناء ما كال هيج انفتحت الباب من صدك راسا عطت وحضنت يوسف كل قوتي وكتلة يوسف والله اجت جديتي
:
هو رفع راسة ورغم حزنان وتعبان طكها بضحكة كلي شوفي جديتج رفعت راسي وجان يطلع ابو الحسن مستغرب ليش عطت
:
هو واكف بالباب كلة يوسف هيج وهيج رد ابو الحسن يا خونة انتو هنا مجتمعين وعايفيني وحدي وبعدين شنو بس ليوسف الحضن
:
طبت امي وراه كالت هاي شكو شبيكم كللها يوسف وهية اتخبلت اجتي يمي وتقرة ايات على راسي وخايفة
:
كالت مو زين هيج شي وخصوصا انتي حامل كومي كومي كتلها شكو راحت جابت فراش وفرشت النة تلاثتنة بالكاع واني بنصهم
:
لكن شوي خلت مسافات بيناتنة علمود بطني خاف بدون ما يدرون يضربوني على بطني وكالت روان انتي نامي بنصهم
:
وضلت توصي بيهم يديرون بالهم علية ومقبلت ولا واحد يروح ينام عالجرباية حتى يوسف كالت ضلي نايمة بنصهم
:
طلعت امي ويوسف كلة لابو الحسن شعجب اجيت هنا تنام رد مو احتلو غرفتي كنالة منو رد خالاتي لان الجوة ما مكفي
:
المهم نمنة سوة واني اطكطك من الخوف علما صبح الصبح اويلي ومن الفجر اجتي امي كعدتهم للولد علمود يكومون خطية كوة كعدو
:
اني كاعدة واسمعهم بس ما بية افتح عيوني من النعاس كلتلهم على كيفكم لا تكعد روان خلوها نايمة اني ما اريدها تنزل
:
كتلها واني مخلية راسي جوة البطانية من كل عقلج تريديني ابقى وحدي بالغرفة واني ميتة الخوف
:
فزو عبالهم اني نايمة وخرت البطانية وكعدت كتلها مستحيل انام وحدي هنا لو ابقى هو اني الليل هم عرفت انامة من الخوف
:
ردت دضلي هنا حتى لو لتنامين علما يجن بنات خالاتج ويصعدن يمج رفضت رفض نهائي بسبب الخوف
:
ردت كومي نزلي اكيد احمد هسه كعد وراح يلتهي بالفاتحة من يطلع انتي روحي نامي هناك واصلا لتجين لهنا
:
يمة لعد اني شفرقت مو هم نفس الشي وراح ابقى وحدي ردت وصمخ عود تبقى وحدة من البنات وياج المهم ما تضلين هنا
:
المهم هيه راحت تسوي النه ريوك واحنه كعدنة نسولف علما صاحت لابو الحسن نزل جاب الصينية وصعد تريكنة وكملنة وابو الحسن نزل الصينية
:
ويوسف نزلني على كيف يمشيني طلعو الولد وثواني وخابرو على امي كلولها احمد موجود بالخيمة هنا خلي روان تروح لبيت عمي
:
راسا امي كومتني وكالت لعمتي هيج وهيج وعمتي طيري بية لبيتهم علمود لا احد يشوفني
:
تونة كعدنة بالغرفة دك رقم غريب عالبنات جاوبن طلع محمد جاي من البارحة رايح حاجز وطاير من الليل وهسه نازل بالمطار
:
وحيأجر تكسي ويجي لهنا فرحنة بجيتة مددت على جرباية تقى وكتلهن نعسانة وحنام مو تعوفني وحدي
:
هزن راسهن غمضت عيوني وغفيت من النعاس وين يلة حسيت على حضن وانفاس اعرفها كلش زين
:
راسا كلبي رجف اوووووف يا كلبي بعدك تحبة ومو ناوي تكرهه وبعدك تتخربط كل احوالك بس تحس بي قريب علية
:
اريد اتحرك ماكو ما اكدر زين اني صايرة من جهة الحايط يعني بينة وبين الحايط هو هم غافي
:
تحركت وكعدتة لان بعد ما اكدر حس علية وكعد باوع بوجهي وابتسم ضليت اباوع علية كلي صار شهور واني انتضر شوكت اغفى على ريحتج وانتي بحضني وافتح عيوني بوجهج
:
باوعت بعيونة وضليت مركزة بيهن هو يحجي واني صافنة على عيونة تهت بيهن شكد مشتاقتلة بودي هسه احضنة وما اهدة لحد ما ما اموت
:
ما حجيت ردت اكوم لزمني من ايدي وحلفني بروح جديتي وابوية ابقى نايمة شوية يريد يشبع مني
:
يمكن جنت محتاجة حضن اني همين وبالاخص حضنة هواي مشتاقتلة وروحي لايبة علية جنت فاتحة شعري ونايمة ضل يشم بخصلات شعري
:
لو يشتم ركبتي لو يبوس بية لو يهمس يم اذني فقد كلش واني ذبت بيدة لحد ما دك تلفونة مقبل يجاوب بس لحو علية بالاتصال
:
استغفر ربة وجاوب تالي طلعت علا وكالتلة عذراء اجتي هية وامها ودتسال عليك هو صاح شجابها هاي مو كلت الها ما تجي
:
خلة وكام راح يشوفها ما حجيت شي بس ضجت من شنو ما ادري واني اصلا اريد اطلك منة
:
ماكو يمكن خمس دقايق ودك موبايلي باوعت دلال تتصل جاوبتها سلمت علية وكلتلي اكلج عود ترة احنة اجينة وراح نوصل بيتكم
:
كتلها هلا بيكم سديتة وكمت لميت شعري ولبست شالي وكلت خلي اروح اسلم عليهن عيب هسه امي ملتهيه وهم عيب من دلال غير اجت علمودي
:
علما يروحن وارجع هنا طلعت لكيت تقى كاعدة بالصالة عطت بيها لان خلت احمد يجي كالت شسويلة طب وسالني شعندي هنا وحدي لان علا راحن تساعدهن ومن عرف طلعني من الغرفة وهو بقى يمج
:
الي ساعة كاعدة حرس بالطرمة لا احد يجي من وراكم رجلية راحت كتلها وليش ما اجيتي يمي هسه مو تدرين اخاف ردت بضحكة سخيفة
:
مو كلت خاف الكيها بغير وضع غميتها وكتلها امشي صديقتي اجت هيه وامها عيب لازم اشوفهن سالت منو كتلها بعدين اسولفلج هسه تعرفيها
:
عبرنة للبيت من الحديقة لكيت احمد واكف يسولف وية عذراء ومنطيني ضهرة هيه شافتني وبدت اللواكة وعساس تريد تقهرني
:
ما اهتميت الها طبن دلال وامها توجهت الهن وتجاهلتهم وصلت يمهن وسلمن وعزني هو سمع صوتي راسا اندار وابتعد عنها
:
عود ديبرر او يكولي انو ما اريدها وعلمود يصير الي امل واقبل ارجع الة تعذرت منهن وكتلهن اني ما اكدر ادخل جوة
:
ام دلال كالت اي حكج يمة ابد لطبين ولا تخليهن يضلن يباوعن عليج لا يضربنج بعين ويكتلنج انتي وجهالج هزيت راسي
:
واحمد واكف ويباوع علية صاحو علية وطلع ودلال كالت لعد اني راح اجي اكعد يمج بس خلي اسلم على امج وارجع يمج
:
هزيت راسي وهية راحت وية امها جوة واني رحت كعدت بالحديقة الثانية من الجهه الثانية
:
عذراء واكفة وتباوع علية شالت تلفونها ومدري المن خابرت ما اهتميت الها شوي وطب احمد بس ما يشوفني
:
وصل يمها وهية كعدت تتموع وتتنعوص وتتلزك بي وهو يحجي وياها ويضحك وخلة ايدة على بطنها ويحاجيها
:
كلت بكلبي صدك لو كالو جذاب حقير توة من شافني سوة روحة ميريدها هسه من شافني ماكو رجع لطبيعتة
:
هية تعمدت تسوي هيج علمود تكلي شوفي ميحبج يبقى الي طلعت دلال ضلت تباوع تريد تشوفني
:
صحت الها هياتني تعاي هو راسا اندار وضل يباوعلي مصدوم وانخطف لون وجهه وابتعد عن عذراء باوعت علية وابتسمت باستهزاء
:
اجت يمي دلال وكعدت سالت علية كالت منو هذا الي ديباوع عليج هيج كتلها احمد زوجي ضلت مصدومة كملت وكتلها والي بصفه ضرتي
:
ضلت تباوع عليهم كتلها يمعودة ديري وجهج هسه عبالهم دنسولف عليهم صدك اندارت الي وضلينة نسولف
:
وهو بعدة واكف يباوع علية تالي من شافني ما اهتميت الة خلة وطلع وعاف حتى عذراء وحدها هيه ضلت تباوعلي وضايجة
:
وخلت وطبت جوة ماكو يمكن ربع ساعة وصارن كرايبنة يجن علية ويكوللي روان صدك بيج توم و٥
:
انوب ضليت متفشلة لا اكدر انكر ولا اكدر اكول الصدك تالي ضليت امتمت عاد اخر شي كتلهن لا اكياس وية الطفل كالت الدكتورة بس ما صدكن
:
انوب اريد اكوم اروح لامي واكول الها ما يخلني لان كامن كلهن يجن ويجمعن علية ولا حتى اكدر انهزم واروح لبيت عمي
:
تالي من شفتهن هيج كلهن درن واجن يسالني كتلهن انتن منو كللجن هذا الحجي ردن ضرتج توها كالت النة
:
كمت وكفت وحجيت بصوت عالي رجاءً هذا الشي راجع الي اذا بية توم ولا لا وما يعجبني احجي خصوصيتي
:
وعفتهن ورحت اريد اتعارك وية عذراء من صدك فوخت كلبي يعني راح اطب الشهر السابع ما كلت لاحد بية توم و٥
:
صح كلها تكلي بطنج مبينة بيها توم لان جبيرة بس رغم هذا ما حجيت جنت اكوللهم اكياس وية الطفل صايرة
:
لزمتني دلال وكالت امشي روحي لبيت عمج اكعدي هناك ولتسوين مشكلة هية هذا الي تريدة وتريد تخلي العالم كلها تتفرج
:
ما تنحل هيج خليها ورة ما يطلعون العالم خلي امج تتصرف لا تتقربين عليها لا تروح تضربج على بطنج لان مبينة حقيرة كلشي توقعي منها
:
اخذتني من ايدي ومشينة لبيت عمي وسديت الباب الي بين البيتين علمود ما اشوف احد بس شنو كمت افور شكد قهرتني الحقيرة
:
كعدت ودلال يمي تهدي بية واني احجي بحركة كلب كتلها راح يصير سبعة اشهر ضامة هذا الشي شلون هسه بكعدة وحدة كلتي للكل
:
ضلت دلال تهدي بية بس اني ضليت افور اخر شي صار وكت روحتهن دكت امها عليها ودعتني وراحت
:
اجني يمي تقى وعلا وسولفت الهن وتخبلن رادن يروحن يكتلنها بس كعدتهن وكتلهن عيب نسوي مشكلة وعدنة فاتحة ونخلي الناس كلها تتفرج علينة شيكولون وحلكنة متروس دم
:
حلفن يكولن لاحمد كتلهن عساس براسة خير وحيسوي شي دنحجي وطب محمد كمت واني فرحانة بجيتة سلمت علية وبوستة وتحمدت الة بالسلامة
:
وهو يتغزل بية بالشقة ويكلي شصايرة ويرد انوب يعيب يكلي صايرة جنج قنينة غاز ويضحك
:
طب وراه احمد تجاهلتة وكعدنة نسولف اني ومحمد والبنات هو باوع علينة ورد طلع لان اصلا شوي محمد وجهه ثكيل علية لحد هسه واني ولا باوعت اله
:
شوي والبنات كللة على سواية عذراء وضل يغلط عليها ويكول شكد حقيرة كتلة بعدها توها طبت هيجي سوت رد كال وهية على شنو جاية
:
ضلينة نسولف وصعد ينام شوية لان تعبان كال صار يومين ما نايم عاد نام بغرفتي الي هيه جانت غرفتة واني هم تعبت ومنا مقهورة من ورة هاي الحقيرة رحت نمت
:
كعدت المغرب على صوت امي ديصبون عشى وجاية تشوفني والبنات مسولفات الها شسوت عذراء وهيه اصلا النسوان هم رايحات عليها كايلات الها روان بيها خمسة توم وما تحجين وهم ضالة تفور وتريد تطردها
:
امها مولية بس هية باقية ما رايحة ضلت امي تغلط عليها بحركة كلب كتلها ماما جوعانة اريد اكل كامت خطية وراحت تصب الي بس شنو كعدت عالجرباية وصارت عندي تقلصات قوية بطني
:
والله حتى خفت ضليت هيج اريد تهدء ماكو جابت امي العشى ما كدرت اكل من الوجع كتلها تجيب الي الدوة من البيت علمود اشربة
:
هيه تخبلت لان بطني وجعتني كالت اكيد انضربتي بعين وفتحت زيجها وضلت تدعي على عذراء راحت جابتلي الدوة وهية شايطة
:
مقبلت اخذ الدوة الا اكل واني حتى نفسي نسدت من ورة الوجع بس جبرتني اكل لكمتين علمود الدوة كملت واخذت العلاج
:
وهيه صاحو عليها ضروري وراحت مددت عسى ولعل تهدء بطني والبنات يمي جانن اجتي امي ورة شوي شافتني وكالت كومي كعدي هناك يمي
:
كلها راحت بقن عماتج وزلمهن وخلفتهم وخوانج عالاقل صيري كدام عيني وكعدي يم خوانج وهم ينتبهون عليج
:
صدك كمت لان اصلا اني هم ضجت وحدي هنا وتكئبت كلش كمنة ورحنة للبيت وهيه لازمة ايدي وتمشيني على كيف
:
وصلنة وطبينة للاستقبال واتفاجات بوجود احمد وعذراء باوعت على امي كلتلي معليج بيهم امي خلي يولون لو مو عيب من عماتج هسه والعزا الا اطردهم وادري ديسووها شغل عناد فخلي يولون
:
واكعدي يم خوانج ولتهتمين وكسري خشمهم وعانديهم محجيت ما الي خلك كل هاي السوالف همي الوحيد صار يبتعدون عني
:
سلمت عليهم وكعدت يم خواني ومحمد جان كاعد يمهم سالوني شبيج كتلهم شوي بطني توجعني اني من اكول هيج كلها تدخل انذار
:
اباوع يوسف يريد يطرد احمد بس كوة متحمل على اعصابة وهو بعين صلفة كاعد والحوبة يمة ولا واحد يحجي وياهم ومعبرهم
:
عمي سالني شلوني وشلون وضعي ويوصي بية ادير بالي على نفسي وابتعد عن النسوان لا يدفرني واحمد وعذراء يباوعون وهو متجاهلهم
:
زاد الوجع عندي امي راحت تكمل شغل خليت راسي على جتف يوسف وانعقجت ملامح وجهي واحمد يباوع علية حس بية شي
:
همة يسولفون واني الوجع زاد عندي وصرت عبالك بغير عالم من الوجع اخر شي متحملت كمت كلت بلكي شوي اذا مشيت تهدء
:
كلها سالت وين كتلهم اختنكت شوي بس اريد اتمشى لو اكعد بالحديقة وخليت وطلعت ردت ابجي من الوجع
:
امي جانت دتعزل الجوة ما شافتني طلعت بالحديقة تمشيت ماكو فايدة انوب تعبت ورجلية صارن يوجعني
:
رحت كعدت بالمرجوحة وانوب اخاف بس شسوي راح اموت بلكي تهدء بطني ضليت كاعدة والوب
:
وادعي يا الله يا محمد يا علي يا حسن يا حسين يا عباس يا فاطمة الزهرة يا ام البنين يا شريفة بت الحسن كمت ابجي من وجع بطني وخفت حيل
:
كمت اريد اروح اكوللهم يحيرون بية حموت من الوجع وية ما وكفت مثل الولادة صارت عندي وراسا نزل مي ودم اكثر شي فضت
:
راسا شهكت وعطت اريد اتحرك اروح اكوللهم ما بية رجلية انتهن فدنوب عطت انوب بس ماكو احد يسمع
:
ضليت ادعي واكول يا الله كوة حركت رجلية وامشي بس الخطوة سنة يلة اخطي الوراها امشي واعيط وفضت بالدم
:
اريد احد يطلع ماكو وصلت قريب الاستقبال وعطت بعلو حسي الحكولي ماكو ثواني وشفت باب الاستقبال انفتحت وكلها طلعت بس اولهم احمد
:
لان هو جان كاعد قريب على باب الاستقبال من شافني وشاف الكاع كلها دم اخترع واجة يركض يعيط روان شبيج بس وصل يمي ولزمني ما تحملت
:
بعد ما عندي طاقة اوكف على رجلية احس رجلية صارن ما بيهن عضام بس جلد وما يعينني اوكف بعد وكعت بحضنة
:
وصرت ما اسمع غير بس الصريخ.........

يتبع ............

طبعا جدا اسفة واعتذر صار هواي ممنزلة بارت وحقكم علية
:
بس وحق هذا الشهر وحق القران امر خارج عن سيطرتي
:
هسه كوة كتبت البارت واني مريضة وانوب وكعت بشدة جديدة وحيل خايفة منها ادعو الي كون اطلع منها
:
القصة قربت للنهاية واعذروني راح اختصر بيها هواي احداث علمود اكملها بسرعة لان مو كادرة اكتب بعد
:
وترة داكوللكم باجر مو اكيد وما انطيكم موعد تنزيل البارت القادم شوكت لان اني نفسي ما اعرف
:
بقى وكت الي عندي مجال وفراغ وزينة اكتب الكم واشلع عيوني هم الكم
اعذروني لكن امر خارج عن سيطرتي
:
دمتم في حفظ الرحمن ❤️😘❤️😘❤️😘