لعلك تكون اقوى دروس حياتي ((لعنة اختيارك))

البارت السادس عشر

السلام عليكم

لعلك تكون اقوى دروس حياتي
                                  ((لعنة اختيارك))

بقلمي (سقين الشمري)

لا يسمح او يحلل نشر القصة بدون ذكر اسمي

.......................

من عبرنا من يمة الكل طكوها بضحكة وكالو مبين اشتعل بنار من الغيرة ما اهتميت الة ما ردت اعكر مزاجي
:
وصلنة بيت جدي وكلها تسلم وتسال على وضعي لكن ابد ما جابو طاري التوم لان اكو بعض الاقارب الي عزمناهم ما يدرون وما ردنة نحجي كدامهم
:
بس همة اصلا عرفو لان كلها كلتلي شو بطنج هواي جبيرة مو مال طفل واحد خاف بيج توم
:
ردت امي لا بس عدها مي الطفل هواي واكياس صايرة وية الطفل المهم صارت الحفلة وما شاء الله عليهم سووها ديسكو
:
وكلها تكولي اليوم فيفي عبدو كاعدة مو زين عليها تتحرك واني اضحك عليهم بس اني وكاعدة بمكاني اصفك لو اهز جتف خفيف
:
موبايلي ما سكت رقم غريب يدك علية عرفتة احمد فما جاوبتة تالي كام يدز رسائل ولا فتحتهن ولا شفت شنو بيهن
:
خلصت الحفلة واحنة فرحانين ومرتاحين شكد حلو جنت كاعدة على قنفة تخم اني وبصفي عاليمنى يوسف وعالجهة اليسرى ابو الحسن
:
وساعة انام على جتف هذا وساعة على جتف هذا ابد ما حاسة بهيج امان قبل ولا وية اي احد حتى احمد
:
ما اعرف شنو لحضة احساسي وشعوري بذيج اللحضة احس نفسي ملكة هيج عندي سند قوي يعني شعور ما ينوصف ابد
:
دعيت واني كاعدة بنصهم الله يحفضهم الي وكون من عمري على عمرهم انتبه يوسف علية حضني وباسني من راسي
:
خلصت الحفلة ورجعنة للبيت وراسا نمت لان تعبت شوي مشت الايام بعدها طبيعية رحت مراجعة للدكتورة وضع الطفل الخامس ما عجبها
:
كالت خوانة كلهم كبرانين الا هو لا احتمال جبير يموت لان نبضة حيل ضعيف بجيت بيومها للصبح واني ادعي الله يحفضة الي
:
بيوم كاعدة اكلب بالتلفون وراسلتني البنية الي تعرفنة عليها هية وامها واخوها بالكاضم علية السلام
:
جاوبتها وسلام وكلام وكالت نريد نجي زيارة الكم فرحت ورحبت بيها جان اسمها دلال كلتلي باجر نجي رحبت بيها وحلفتها يجون عالغدة بس ما رضت
:
كلت لامي وخابرت امها وساعة كاملة امي تتوسل بامها يجن عالغدة بس مقبلت يستحن ثاني يوم اجني
:
بس امي ما خلت شي من الحلويات ما سوتة واني هم اني وكاعدة سويت كم شكل حلويات وسويت بقلاوة بيتية وانطيهن لامي تشويهن
:
اجني وكلش فرحانة بيهن جان جاي اخوها الي وجها متشوه وخواني كعدو ويا ورحبو بي وكلش فرحو بجيتة
:
تمنيت اشوفة شلون صاير سالت دلال كالت زين احسن من قبل بس ننتضر يطيب جرحة ويسافر للخارج يسوي عملية تجميل
:
ردت انتي هم صاحبة حمل وشدة ادعيلة بلكي الله يسهلها الة ويسويها ويرجع احسن من قبل
:
كتلها والله بدون متكوليلي ادعيلة وحتى بصلاتي وكل ما يجي على بالي ادعيلة وداعة جهالي
:
جديتي هم تعرفت عليهن وما شاء الله شلون كعدة وسوالف حلوة صارت تخبل وجديتي اندمجت الى درجة مو طبيعية وياهن
:
صار وكت روحتهم رغم امي جلبت بيهم عالعشى بس مقبلو طلعنة للباب نوصلهن وطلعو خواني والولد وياهم همزين كدرت اشوفة ضل بالي علية
:
سلم على امي وامي هم ضلت تسالة على حالة انتبه علية اباوعلة راسا درت وجهي بس خطية لابس كمامة يستحي من وجهه
:
انتبهت علية هو هم يباوع علية بس من ادير وجهي علية راسا يدير وجهه ودعناهم وراحو وامة حلفت امي زيارة الجاية احنة نروح
:
ردت امي انشالله نجي بس خلي تصير عمتي زينة لان هالفترة هواي تمرض خطية وما اكدر اعوفها ولا اكدر اجيبها وياي خاف تتعب من الطريق او من الطلعة
:
خلص اليوم طبيعي ما صار شي جديد بعدها
:
احمد اجة للبيت ووحدة وتعمد يجي من خواني موجودين وكعد يحجي وياهم رغم خواني ما طايقي ويوسف يريد يكتلة بس هو اصر واجة
:
و٣ ساعات على كعدة وحدة يتوسل بيهم ارجع الة وهمة معارضين وكل شوي وكبت العيطة بينهم
:
كللهم لو تطردوني وترفضوني الف مرة ارد ارجع انوب زين بس احجو وياي انتو خواني اني ما عندي غيركم منو الي ردو علية خواني كلولة من احنة خوانك جان حسبت حساب النة قبل لا تسوي هذا كلة
:
هالفترة كلش قوت علاقتنا وية اهل دلال امي تكعد ساعتين تحجي وية امها اذا خابرت واني على طول اذا مو اتصال وية دلال نتراسل
:
وضليت على طول اسالها على اخوها وشلون صار خطية مو قصة شفقة لكن احسه مثلي رغم اوجاعنة تختلف لكن ثنينة كارهين الحياة
:
وبيوم من الايام جنت احجي وياها مكالمة وهية جانت فاتحة سبيكر ومخلية الموبايل يمها جانت رايدة مني طريقة عمل حلاوة من اجوي سويتها الهم
:
كعدت اشرحها الها وطبقتها مثل ما كتلها وكملت ووكفت تخوط بيها فمن كملت كتلها لعد شلون صار اخوج
:
ردت او والله صرعتيني بي كل ما دكين او ادك لو نتراسل تسالين علية هاج احجي ويا هيانة هو بصفي وسمعج
:
رديت بسرعة عزة العزاج ولج مو هيج بس ردت اسال شلون صار ما سمعت مني ضحكت ونطتة التلفون
:
حاجاني وكلي السلام عليكم ضليت ساكتة اريد الحجاية تطلع من حلكي ماكو ميتة خجل ومتفشلة يربي طاح حضج دلال على هاي العملة
:
رد عاد السلام بالف يا الله ويا علي طلعت مني الكلمة بغصة وعليكم السلام هو من سمعني ضحك كلي على كيفج حتختنكين
:
رديت خجلانة لا والله بس وسكتت رد ههه على كيفج حقج شخص غريب ديحجي وياج لكن انشالله مو غربة سكتت محجيت
:
كلي شلونج شخبارج
:
زينة الحمدلله انته شلونك شلون صرت
:
لا الحمدلله برحمة الله واحسن بهواي من قبل
:
الله يجعلك وانشالله دوم للأحسن
:
تسلمين بالمناسبة اشكرج جزيل الشكر بيوم الي ساعدتيني بالحضرة
:
لا يمعود قابل اني شسويت هو بطل مي وما رضيت تشربة
:
ههه اسف بس جنت مستحي انزع الكمامة واطلع وجهي خفت لا تخترعين مثل البقية
:
لا يمعودة اصلا وداعة جهالي عكس تفكيرك ولا خفت ولا اشمأزيت اصلا اعتبرك بطل لان جاهدت وكافحت وعشت لو غيرك اسم الله عليك جان شابع مي ورد هسه لان هيج حالة مو هينة
:
اي صح تسلمين الله يكثر من امثالج هو اني حتى عمليتي من سووها جانت فوق الكبرى
:
الله لا يرد ذيج الايام صارت سوالف وبيوم الي تسوي العملية الثانية وترجع احلى واحسن من قبل انشالله
:
تسلمين هواي ترفعين المعنويات ما اعرف شلون اشكرج
:
لا لتكول هيج اعتبر نفسي صدك غريبة اذا هيج تكول وبكلبي اكول بيني وبين نفسي ما هو احنة صدك غربة مجرد صداقة بيناتنة
:
سلم علية وانطا الموبايل لدلال رزلتها لان هيج سوت ردت هو اني تعمدت هيج سويت كتلها ليش
:
ردت الحلاوة الي واكفة اسويها هو رادها صرعني من يوم الي اجيناكم لليوم يكول طعمها مديروح من حلكي
:
وبس يسال عليج لا عبالج بس انتي تسالين وانوب زاد اكثر من عرف دوم تسالين علية
:
صفنت بيني وبين نفسي شعجب ليش شنو معنى هذا الشي سكتت ما علقت نهيت الاتصال وياها وتركت الموضوع
:
مشت فترة واني تعبت حيل دخلت نص بشهر السادس سمنت بشكل مو طبيعي ورجلية ورمن بشكل لحد ما صارن يخوفن
:
الجهال من زمان بدو يتحركون شكد افرح من تصير مباريات بينهم بطني اضل بس صافنة على بطني شلون تتحرك من كل جهة عبالك حلبة مصارعة
:
لكن سرعان ما هبطت معنوياتي وشبعت قهر وبجي من رحت للدكتورة وهية تكلي وضع الاطفال مو تمام وديشكلون خطر على حياتج
:
ولان ٥ وبدو يكبرون وجلد بطني والرحم ما ديتقبلن يكبرن اكثر وينمدن كبرن لحد حجم معين وبعد ثبتن وما دتكبر بطني بعد اكثر
:
وصايرين واحد فوك الثاني واحد خانك الثاني والطفل ال٥ ميت هية هيج كالت واني كمت ابجي بصوت عالي وتخبلت
:
واتوسل بيها فدوة دكتورة عيدي السونار يجوز متوهمة غلاطنة امي تريد تهديني بس اني ماكو فقدت
:
ردت مو زين والله هيج تسوين لان ترة الحالة النفسية الها دور مهم وبعدين غيرج اضفر الطفل ما لاكين وانتي بقى الج ٤ ودتبجين
:
بدال ما تحمدين ربج تشكرينة وتدعين يبقي ذولة بخير ويعيشون كاعدة تبجين علمود الخامس حقج والدة لكن ما يصير هيج
:
انتي هسه اقل حركة مو زين عليج ادعي من الله يبقون عايشين اني ذاك الي مات مو من اول ما اخذتلج سونار كتلج ما انطيج امل بي
:
ضلت تحاول تهديني لكن اني فقدت كد ما انقهرت اختنكت واني منا صايرة اختنك واكثر الانواب ابقى عالاوكسجين
:
كد ما كمت استعملة يوسف جابلي وحدة من المستشفى على عرفتة ومخليتة يمي بالغرفة بس اختنك لو ما اكدر اتنفس اخلي
:
كلتلها امي زين اذا الطفل ميت شلون يبقى بطنها مو حيكتل الباقين لو يسممهم وشلون اذا ردتي تذببيلهيا
:
ردت الدكتورة لا هسه ما اذبة وهو اذا بقى هيج ما يشكل خطر عالباقين بس نبقى كل اسبوع لازم تجي اخذ الها سونار واشوف وضع الاطفال
:
طلعت من يم الدكتورة واني منتهية وعيوني مورمة ووضعي صاير فدنوب شافني يوسف واتخبل على وضعي
:
ارتميت بحضنة وابجي واشهك هو تخبل عبالة كلهم ماتو تالي امي فهمتة وكلتلة كلشي وهو صح انقهر لكن كعد يهيديني
:
ويقنع بية انو ادير بالي عالبقو وهذا امر الله ولازم احمد ربي ولا اعتراض على حكمة
:
رجعت للبيت واني ما سكتت وعلى بجية الوحدة من وصلنة البيت نزلت من السيارة وامي اجتي كادتني
:
صار بوجهي احمد من شافني اخترع واجة يركض وصل وعاط روان شبيج دفعة يوسف بس هو تخبل ما اهتم لا ليوسف ولا لاي شي
:
طبيت للبيت وهو اجى يركض وراية لزمني من ايدي يريد بس يفتهم شبية ما حجيت حتى ما الي نفس احجي
:
كعدت بالصالة وابجي اختنكت كلش كمت اشهك امي راسا عرفتني عاطت يوسف الحك شيلها وديها للغرفة اختنكت
:
احمد يعرف حالتي لان يسال عمتي والبنات فيدري اني استخدم اوكسجين ما انتضر يوسف يشيلني شالني هو وركض بية للغرفة
:
مددني عالجرباية وخلاني عالاوكسجين يوسف ما حجى وطرد احمد لان الوضعية ما تسمح كمت اشهك بكل قوتي احس الهوى كلة راح ماكو
:
اشهك وعيوني صارن دم علما شوي حسيت اكو هوى يلة ردت بية الروح احمد كاعد بصف الجرباية بالكاع ولازم ايدية
:
ويفرك بيها لو يمسح وجهي لو على شعري ويصيح روان يبعد عافيتي روان شلون صرتي اوديج للمستشفى
:
اني من التعب كمت اغمض عين وافتح عين تعبت حيل احس نفسي اريد بس انام رغم الهوسة الي يمي كلها غفيت وما دريت بشي بعد
:
ما كعدت غير على صوت امي بليل تكعدني علمود اتعشى واخذ ادوية بس كعدت راسا كمت ابجي وما الي نفس اكل بس امي جبرتني علمود الجهال والدوة
:
حتى ما سالتها على احمد لان ما الي خلك ثاني يوم الساعة تقريبا ب١١ هيج شي اني طبيت سبحت وطلعت توجهت للمطبخ اباوع على رجلية واحجي وية امي واكوللها
:
ماما اليوم وروم رجلية زايدة كلش حتى ما اكدر ادوس عليهن يوجعني ما ردت رفعت راسي شفت احمد كاعد عالكرسي
:
وهية واكفة يم السنك واحمد صافن علية ما حجيت شي بس ضليت اباوع علية كلي شلونج روان
:
بخير الحمدلله
:
شلون صرتي وضعج شلونة البارحة فدنوب اتخربطتي
:
لا عادي متعلمة اسال الي كاعدين وياية بالبيت الي ما شايف حالتي ما يعرفني هيج يصير بية ويستغرب
:
اكعدي لضلين واكفة مو زين عليج الوكفة
:
اعرف ماكو داعي تكولي جريت الكرسي داكعد ردت امي كومو اكعدو بالاستقبال هنا حارة
:
صدك كمنة رحنة ثنينة كعدنة جديتي نايمة بغرفتها الضاهر درت احمد اجة وطبت بغرفتها لان ما تحجي ويا لحد هسه
:
كعدنة بالاستقبال وهو كعد يمي بس ما ادري ليش كارهتة صح مو يعني ما احبة نهائي لان هذا حب الطفولة وكبر وياي بس هسه كارهتة
:
اخذ ايدي بايدة وباسها خلة ايدة على بطني وصار يمشيها درت وجهي منة بنفور شافني هيج سويت
:
عدل كعدتة وكلي البارحة كلتلي عمتي على وضعج وانو الطفل ميت لتنقهرين يبعد عمري وعافيتي اهم شي انتي بخير وبعد عدنة خير من الله بقو بعد ٤
:
عتيت ايدي منة وكلت حقك مو انتة الي شايلهم وتحس بيهم ليش شنو ذنبة من بين اخوتة يموت شمعنى هو وليش ما عاش ولتكول عدنة لان همة ما يخصوك الك بس الي وحدي
:
حبيبي هذا قدر الله ربج هو اعرف واحكم هو يسوي الصح سكتت ما رديت علية تعبانة وحتى ما الي خلك احجي
:
رد حجة وكلي يريد ياخذني لدكتورة هو يعرفها زينة ومشهورة نفس حجي قبل اشهر اول ما عرف توم
:
علمود هية تشوف الطفل وتتاكد اذا صدك ميت او لا كمل كتلة خلصت ضل صافن بوجهي رديت من رخصتك تعبانة واريد انام وارتاح
:
عفتة وطلعت من الاستقبال ورحت لغرفتي ما هامني اي شي همي بس اطفالي مددت وغمضت عيوني وضلت السالفة بالي وشابعة قهر
:
صرت كل اسبوع اقل اروح للدكتورة علمود تشوف وضعي طبيت بشهر ال٧ وجديتي وكعت علينة فدنوب
:
احمد يومية اذا مو بين يوم ويوم يجي يشوفني بس كمت حتى ما اطلع الة وبيوم جديتي تخربطت كلش وجسمها كلة ورم وطلعو يركضون بيها للمستشفى طلع نازل مي بصدرها وتعبانة حيل
:
بقت اسبوع كامل هية بالمستشفى ويباتن يمها عماتي او مرت عمي بس امي ما تبات لكن تروح باليوم مرتين تشوفها
:
واصلا كلها عاذرتها بسبب وضعي وعلمودي لكن امي رغم تخاف علية لكن مرة ودتني يم بيت خالتي ومن تروح توديني لبيت عمي علمود البنات يديرن بالهن علية وتروح تشوفها وتجي لان امي كلش تحب جديتي
:
من تروح وتجي شابعة بجي لان تموت عليها وحتى ما تحسبها عمتها ام رجلها بس وضع جديتي للاسوء مو للاحسن
:
اني ردت اروح بس اشوفها كلها مقبلت بسبب وضعي واصلا اني صايرة ما اكدر امشي واتعب هواي وبسرعة
:
لحد ما بيوم خابرونا الصبح الساعة ب٨ وكالو جديتي توفت .........

يتبع ..........

طبعا اليوم اختصرت هواي احداث بسببكم
:
وهذا البارت اختصرت احداثة بحيث يصير ٣ بارتات
:
لان ما شاء الله السب والشتم بفلس واني كلت الكم سابقا وضعي مو تمام
:
لكن ماكو احد اليعذر وتفاعل ما شاء الله ماكو
:
حتى نفسيتي تعبت وانشالله باقرب وقت اختم القصة وهواي احداث راح اختصر بيها لان تعبت
:
ومفكرة اعتزل الكتابة وبعد ما اكتب اي قصة لان هذا التعب والمجهود كلة وتقدير ماكو
:
بس فالحين تحجون لو غير كاتبة جان صعدتوها بيومين بس خلص هايهية عرفت قيمتي عدكم
:
هاي بدال ما تقدرون تعبي والله مريضة وباجر عندي روحة للدكتورة وخطار عدنة جان واني كاعدة اكتب الكم بارت
:
خلص هايهية تعبتوني

دمتم في حفظ الرحمن 😘❤️😘❤️😘❤️