أولاً، أحب بس أنهي أسطورة أو خُرافة يعتقدها بعض الأشخاص..
الخُرافة هي إن الأشخاص المنظمين دول حياتهم كلها على السطر ومثالية وعمرهم ما بيضيعوا وقت وعايشين حياتهم زي الروبوت..
🥁🥁🥁
الأسطورة غير صحيحة بالمرة 🤷🏻♀️
عالأقل بالنسبة لي، لأنه رغم إنّي بحب دايماً أكون محددة إيه المهام اللي عليا وأحرص إني أخلصها بدون كسل أو تأجيل، إلا إني أحياناً بييجي عليا أيام بحس إنّي عاوزة أسترخي ومعملش أي حاجة. ودا طبيعي، إحنا بشر وعندنا مستويات طاقة زي ألعاب الفيديو تماماً!
مش من الطبيعي إن طاقتنا طول الوقت تكون على أعلى مستوى، ولا من الطبيعي كمان إن تكون طاقتنا منعدمة طول الوقت. لكن وقت ما يكون عندنا طاقة، من الجيد إننا ننظم وقتنا ومهامنا بحيث نوظّف طاقتنا دي بشكل مفيد 😌
نيجي بقى لطرق تنظيم الوقت 🗓️
شخصياً، جربت طرق كتييير وأغلبها كانت متعلقة بالجورنال وكتابة قائمة مهام أو to-do-list، ولبعض الوقت كان بينفع معايا الموضوع لكن كل فترة كان بيجيني ملل، لأني كنت بكتب مهام كتييير وبتغاضى عن حقيقة إني عندي كمية طاقة معينة ممكن ماتكفيش كل المهام دي..
لحد ما وصلت للطريقة اللي بتبعها دلوقتي وحقيقي حبيتها ومستمتعة بيها وبتخليني أتحمس كمان 🙊
وهي إن كل يوم الصبح، أو قبلها بليلة بكتب مهمتين أو تلاتة لليوم، والمهام دي بتكون هي المهام الأساسية 📑
وخلال اليوم، بسيب اليوم يمشي بطبيعته بدون تخطيط مُحكم لكن بحرص إن ال ٣ مهام الأساسية دي تكون في بالي دايماً وعلى آخر اليوم أكون خلّصتها.
والنتيجة بتكون إنّي قمت بال ٣ مهام الأساسية، ومهام أخرى فرعية بدون تخطيط أو ترتيب وبصورة عفوية جداً 😸
الصورة فوق 📃
وفي آخر اليوم، بكتب في نفس الصفحة، إيه اللي عملته في يومي ويومي مشي إزاي وكدا، بحس إنها حاجة لطيفة جداً إنّي أوثق اللحظات الصغيرة العفوية وكمان أوثق المهام الأساسية اللي قمت بيها 🧚🏻♀️
في عندي خطوة أساسية تانية بتساعدني شخصياً إن يكون يومي مُنتج قدر المستطاع ومايضيعش على الفاضي، وهي إنّي أعمل لنفسي روتين صباحي 🌅
السبب هو إنه عقولنا البشرية بتعشششق الروتين، حتى لو إحنا ذات نفسنا مش بنحب الروتين 🤔 شيء غريب صح؟
لما تبدأ يومك بروتين صغيور مُنظم، زي بالظبط لما تدور موتور السيارة. بتحط المفتاح، الموتور بيشتغل، والسيارة بتفضل شغالة لحد ما تطفيها إنت.. أهو الروتين الصباحي هو مفتاح الموتور 🤷🏻♀️
بالنسبة لروتيني الصباحي البسيط هو:-
- تهوية فرش سريري 🛏️ - تمرينات تمديد أو stretching لأني عادة بقوم من النوم مع عضلاتي متشنجة، مش بتاخد مني أكتر من ٧ دقايق 🤸🏻♀️ - بعدين باخد حمامي الصباحي السريع 🚿 - ارتداء ملابس لائقة وتغيير بيجامة النوم، وتطبيق مكياج خفيف عشان أضيع ملامح النوم 🧖🏻♀️
بعد بدء يومي بالترتيب دا، مخّي بيبقى جاهز لاستقبال أيي حاجة عشان خلاص الموتور اشتغل 😉 تقدر أو تقدري تكوّني روتينك الصباحي حسب حاجتك ونظام حياتك ومع الإرادة والمواظبة هيصبح أسلوب حياة مش بس روتين، وهتعمليه تلقائياً بدون تخطيط 😌
.. إعلان + تعزيز لنفسي 🤭 بقوم بتصوير فلوجات يومية vlogs في حسابي على إنستجرام على IGTV تقدروا تشوفوا صوت وصورة روتيني بيبقى شكله إيه، أتمنّى تستمتعوا 🧚🏻♀️ ..
آخر حاجة حابة أشاركها معاكم هي أحد خططي للأجازة المفتوحة اللي إحنا فيها 🚶🏻♀️
قررت مع ماما إني هقوم بتغيير دهان الشقة اللي في الدور العلوي للبيت، وهقوم بالمهمة كلها بنفسي بإذن الله 😹💪🏻
محبتش أقول تفاصيل كتير لحد ما أخلّص المهمة عشان كدا قلت مالهوش داعي أتكلم عنه في فصل خاص 🙊 لكن أكيد هطلعكم على آخر الأنباء لما أخلّص 😹💛
وبس كدا يا حبابيب، ألقاكم في فصل جديد ومتحمسة ليه جداً لأنّه متعلق بروايتي الجديدة 🙊 لو لسة مشوفتوهاش، هتلاقوها في بروفايلي إسمها "غريب"، التحديث فيها كل ٣ أيام 💛
