صباحكُم/مساؤكم خير 🙊💛
اليوم حبّيت أتكلّم عن موضوع ليا خبرة معاه شخصياً، وهو 'حساسية الشمس' أو الـ 'Heliophobia' 🌤️
مبدأياً قبل القراءة، حابّة أعرف إيه معلوماتكم عن الموضوع؟ هل تعرفوا عنه ولا أول مرة تسمعوا عنه؟ 🙊
..
الموضوع من طوله مش عارفة ابدأه منين، لكن بدايةً خلينا نبدأ بمعنى الإسم 'Heliophobia'. كلمة 'helio' تعني باليونانية القديمة 'الشمس البادِئة' وطبعاً كلمة "phobia'' غنية عن التعريف!
..
بإختصار، تعريف 'Heliophobia' هو الحساسية المُزمنة من الشمس. سببها واضح من اسمها، وهو التعرض لآشعة الشمس المباشرة -وأحياناً غير المباشرة- لوقت طويل. أعراضها بتنقسم لإتجاهين، إتجاه بيُخطر على بال الناس أول حاجة وهو تأثير الشمس على البشرة. الإحمرار، الحكّة، الجفاف الشديد، وأضرار ممكن توصل للحروق. لكن الهيليوفوبيا مش بس عن أضرار الشمس، هي كمان عن 'الخوف' من أعراض الشمس..
بمعنى إنه الشخص اللي بيعاني من الهيليوفوبيا ممكن 'يحس' بوجع حقيقي، رغم إن بشرته في الحقيقة طبيعية جداً ومحصلهاش أي حروق.
..
الإتجاه التاني واللي -من رأيي- معاناته أقوى، هو تأثير الشمس على الجسد، وخاصةً الدماغ. إيه هي الأعراض؟ عدم التركيز، جفاف الفم والحلق، عدم الراحة في حركة المعدة والأمعاء، عدم إنتظام ضربات القلب، سرعة وضيق التنفس وكل دا مش ناتج عن إصابة جسدية! طبعا بالإضافة إلى هبوط في ضغط الدم والصداع.. الشديد.
طبعاً نقدر نختصر كل الأعراض دي في كلمة 'ضربة شمس' باللهجة المصرية 😹
..
بعد ما اتكلمنا عن معنى الكلمة والأسباب والأعراض، المفروض نوصل للعلاج صح؟ للأسف، بإعتبار إن الحالة 'فوبيا' فبيتجهوا في علاجها للإتجاه النفسي وليس الجسدي. رغم إنه كل الأعراض اللي ذكرناها ممكن يكون ليها مضاعفات جسدية كتير، لكن للأسف لسة مظهرش علاج نهائي للحالة، خاصة إنه المصابين بالفوبيا أحيانا بيفضلوا بتقمصوا دور ال vampires وميخرجوش في النهار أساساً! ودا بيسبب لهم نقص في فيتامين د اللي كلنا عارفين اننا بنحصله من ضوء الشمس. لكن الحمد لله إنه موجود عقاقير ومكملات غذائية ممكن تعوض نقص الفيتامين دا.
..
في النهاية أحب ألفِت إنتباهكم إن مش كُل حالات الهيليوفوبيا واحدة، أعراضها بتتدرج بين الخفيفة والمُزمنة، لكنّي في فصل النهاردا جمَعت كُل الأعراض.
..
أتمنّى إنكم تكونوا استفدتم وأصبح عندكم وعي أكتر بالموضوع، وأخيراً، أتمنّى من كل قلبي تقدّروا معاناة الأشخاص اللي بتعاني من حاجة بسيطة زي دي أو أي مرض آخر حتى لأنهم الوحيدين اللي بيحسوا بالمعاناة بجد، بلاش تنسوا يا حبايب إنكم تستعملوا كريم واقي من الشمس، تلبسوا نضارات عشان عيونكم الحلوين وتستمتعوا بالشمس من ورا الطاقية 😉👩🏻🌾، حتى لو مكنتوش بتعانوا من الفوبيا 💛
وبس شكراً ودمتُم بخير 🙊💛
