اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
مرحب مرحب ومرحبتين 😸
دي تقريباً أول مرة من فترة طويلة أكتب فصل وأتكلم فيه بدل ما يكون خاطِرة مثلاً 😅 المهم، ربنا يروّق الحال.. ✨
كتبت قبل كدا فصل بعنوان 'يوم من حياتي'، ولكنه كان نوعاً ما عشوائي بدون أي ترتيب، دا غير إن حياتي اتغيرت بشكل كبير من ساعتها لحد دلوقتي. عشان كدا حبيت أكتب فصل النهاردا ويكون حاجة خفيفة لطيفة كدا عشان نفصِل سوا قبل ما ندخل في الجَد من تاني 🤭
يلا بينا 🤸🏻♀️
- الصبح بيبدأ عندي وقت الفجر بالصلاة، عشان نكون واقعيين مش دايماً بقدر أقوم وقت الفجر 😅 لكن اليوم اللي بقدر أقوم فيه مصحصحة بحمد ربنا وبحاول استغل الصبح على قد اقدر 🌷 بعد الصلاة عادةً برجع السرير تاني اقرأ أو أنام لحد الساعة ٧ ونص كدا.
بعد ما اصحى بعمل روتيني المعتاد وبغيّر هدومي، بحاول مؤخراً أتجهز الصبح ومقعدش بالبيچامة طول اليوم. لما بغيّر هدومي لحاجة مناسبة اكتر بحس بتغيير كبير في طاقتي 👗 مؤخراً بدأت أفقد الاتصال بأنوثتي لأسباب كتيرة، فبحاول الصبح أكون هادية مثلاً اعمل يوجا، احط مكياچ خفيف (كحل وروچ) وألبس اكسسوار بسيط زي سلسلة أو حلق في محاولة لإستعادة الاتصال بأنوثتي من تاني✨
- بعد الفطار ببقى في أعلى درجات طاقتي (هي طاقتي بتكون عالية لمدة ساعتين تلاتة كدا وبعدين بالسلامة 😅😹)، عشان كدا بحاول استغل الوقت دا في إني أنجز المهام اللي محتاجة تركيز زي الدراسة أو حضور محاضرات اونلاين 💻
- حد غيري بيحس أحيانا إن طاقته الذهنية صفر بس لسة طاقته الجسدية عالية؟ 😅 إحساس نيلة جداً 😹 بس هنا بقى بخلص المهام اللي عندي في البيت زي ترتيب أو غسل المواعين أو غسل الغسيل.. وهكذا.
- على وقت بعد الضهر بطلع السطح عشان أحط أكل لحماماتي 🕊️💛 مش بطلع لهم كل يوم، بطلع يوم ويوم، بس بحب أقضي وقت معاهم بحس بصفاء ذهن 🌷
- بعد ما أنزل من السطح ساعات ماما بتحتاج حاجات من السوق فبلبس حجابي على طول واطلع. الصراحة في الجو دا بيبقى أكره شيء على قلبي الخروج برا البيت في الشمس 😩 بس أهو بحرك جسمي وأغير جو البيت شوية 🤸🏻♀️
من وقت بعد العصر لحد بعد العشا بيكون وقت فاضي نوعاً ما مش بيكون ورايا أي حاجة أعملها، بقضيه مع ماما أساعدها في الغدا وكدا، بالليل كمان مش بيكون عندي حاجة معينة بعملها كل يوم.
أحياناً بعمل روتيني الاسبوعي للعناية بالبشرة لو كان يوميها معاده 🧖🏻♀️ وأحياناً بخبز حلويات لأني بحب أعمل حلويات جداً 🙈 إمبارح عملت حجازية بس طلعت مش تمام 😅😹 المهم آدينا بنتعلم 🍪 كمان بحاول أعمل أي حاجة تلهيني وتغير مزاجي لأنه بسبب الاحداث الأخيرة في العالم، بالإضافة لأحداث على المستوى الشخصي، نفسيتي مش في أحسن حال مؤخراً..
شيء تاني بعمله بالليل، أو في أي وقت من اليوم حسب الإلهام ما ييجي، هو إني بكتب 🤭 بشتغل على قصة قصيرة جديدة وفاضل فيها حاجات بسيطة، فكرتها شوية عشوائية. أحداث القصة لم تحدث في الواقع لكنّي استلهمتها من الواقع. المهم مش هقول تفاصيل كتير هنا عشان أول ما أخلص كتابتها هنزل فصل خاص بيها هنا في خرابيش وردية 🙈
بس كدا يا حلوين جه معاد النوم 😅😴
حابة أعرف هل في شيء مشترك بين روتيني وروتينكم؟ 🌷 هحب تشاركوني بيه!
الفصول الجاية بإذن الله هنرجع للنصائح بتاعت زمان زي سلسلة الأنوثة اللي وعدت ببدءها 😅
في أمان الله ✨
اللهم صلّي وسلّم وبارك على سيدنا محمد وعلى آله وصحبه أجمعين 💛
