أهلاً ومرحباً بكم من جديد في منزلي المُتواضع 😸💛
مبدأياً حابة أشكر @xxllJasminellxx لإقتراحها فكرة فصل النهاردا 🙊 وإن شاء الله هيبقى جزء من سلسلة اسمها 'عادات جديدة' 🌸
دلوقتي بس لاحظت ان دا تقريباً أطول إسم فصل نزل في التاريخ 😹!
المهم، العادة اللي حابة أتكلم عنها النهاردا هي الأكل الصحّي 🥗
منقدرش ننكر إنه كتييير انتشر الفترة دي influencers أو صُناع محتوى كتير على يوتيوب أو على منصات تانية عاملين زي trend لإيه هي الأغذية الصحية، الموضوع أحياناً ممكن يصبح مُشتت. والحقيقة إن الأكل الصحي هو الأكل المتوازن من حيث البروتين والخضار والكربوهيدرات، مش السموذي ومشروبات ال detox! 🤷🏻♀️
..
نرجع لموضوعنا، النهاردا هنتكلم في حاجتين: ازاي تعتمد نظام غذائي - في متناول اليد - وصحي، وليه وامتى أنا بدأت أغير نظام أكلي، يمكن أقدر ألهِم حد 💛
..
١- ازاي نعتمد نظام غذائي صح؟ 🥗
الموضوع، زي أي عادة تانية، أساسه ضبط النفس والتحكم فيها. بمعنى إنه إنت خلاص نويت تعتمد نظام أكل صحي، يبقى تحاول تغير كل حاجة حوليك عشان تناسب النظام دا. يعني إيه فايدة من إننا ننوي نبدأ ناكل أكل صحي من غير تطبيق؟ وكل يوم نقول بكرا! 🤔
انا فاهمة إن المغريات كتير حولينا 😹 بس لو مبدأناش دلوقتي عمرنا ما هنبدأ!
فمثلاً، لقيت شهيتك راحت للـ snacks في نص اليوم، بدل ما تسحب كيس شيبسي، إسحب طبق فاكهة، أو بدل البيبسي خليه عصير طبيعي - شخصياً الفاكهة بالنسبة لي هي ألَذ snack 😹🤚🏻-
أنا مستوعبة إن الكلام دا أكيد سمعناه كتير لحد ما زهقنا منه، بس حقيقي دا الحل الوحيد الفعّال، إحنا بس اللي بندور على حلول أسهل كحِجة.. كُل اللي بيتطلبه الموضوع مننا هو ضبط النفس، وهتتفاجئوا حقيقي من القوة اللي هتحسوا بيها لما تروح تاخد موزة بدل كيس شيبسي، رغم بساطة الخطوة.
..
٢- ليه وإمتى قررت اتبع نظام صحّي؟ 🤔
حاسة إني هقدر أنقلكم معلومات أكتر وأوضح بحُكم تجربتي 😹
السبب الأساسي هو إني عندي، أو كان عندي، مشاكل في القولون، تقدروا تقولوا عيب خُلقي، وبعد ما خُضت عمليتين وصححت العيب الخُلقي دا كان لازم أتبع نظام غذائي مُعين، هو مكنش نظام مُعقد لا أبداً هو بس شرطه الأول والأخير إني ماكلوش من برا البيت 😹
اللي ساعدني في الموضوع إني أساساً مش من مُحبي الوجبات السريعة والأكل بتاع برا عامةً زي البرجر والشاورما وهكذا، فإني أتعود على النظام بسرعة مكنش عقبة.
الخطوات اللي كنت بعملها عشان أتأكد إني مخربش النظام إني مثلاً لما بخرج من البيت للمدرسة أو مشوار طويل، باخد معايا ال lunch box بتاعي وأكون آخدة فيه أكلة بسيطة زي سندويتش، عادةً بيكون باقي غدا اليوم اللي قبله.
هتقولولي دي شغلانة ووجع دماغ إني أحضر ال lunch box كل ما أجي أخرج! عندكم حق، بس مع التعود هتلاقوا الموضوع بقى بسيط ومش بياخد وقت! يعني صدق أو لا تصدق أنا لسة باخد ال lunch box معايا وانا رايحة الكُلية 😹 من وأنا في ٢ ثانوي تقريباً بدأت ولحد دلوقتي وأنا في سنة ٢ في الكُلية.
كمان لاحظت حاجة مُهمة جداً إني بدأت أوفر أكتر من ورا الموضوع دا! 😭 يمكن الموضوع ميكونش مهم لناس كتير في سن المراهقة وكدا بس حقيقي لما تدخلوا الكُلية هتحسوا بقيمة التوفير وقهرة ال broke life 😹😹💔
المغزى من الموضوع إننا نتجه للأكل الصحي رغم وجود مُغريات حولينا، والمُغريات دي بنلاقيها دايماً برا البيت، عشان كدا ال lunch box كان حل مثالي ليا 🙊
فاكرين لما قلت في الأول إن السبب الأساسي كان مرضي؟ دلوقتي فعلاً دا كان الخطوة الأساسية ليا إني أغيّر نظامي الغذائي، ربنا يعافينا ويعافيكم جميعاً، بس ليه نستنى صحّتنا تتدهور بعدين ندور على حل؟
دايماً كنت بقول لصحابي في الكلية اللي كانوا بيسألوني أنا ليه بجيب معايا lunch box لما كُل الناس بتروح المطاعم والكافيتريات! وكان ردي دايماً:
"I might have learned that the hard way, but I'm praying you would learn it the easy way. "
"يمكن اتعلمت بالطريقة الصعبة - بسبب مرضى -، بس أتمنى لكم إنكم تتعلموا بالطريقة السهلة."
..
بسبب تعودي بدأت أحِب الموضوع وأستمتع حقيقي وأنا بحضّر ال lunch box بتاعي وأبتكر فيه 😹 🍱
بس أنا فاهمة إن مش كُلنا بيستمتع بدا ومش كُلنا مش بيحب الأكل السريع وسهولة هيقلل منه، واللي أقدر أقوله بخصوص دا إن مع ضبط النفس والتعود مفيش حاجة مستحيلة!
If I could do it, so can you 💛
لو أنا قدرت أعملها، يبقى إنت كمان تقدر 💛
..
خلصت حلقتنا النهاردا 🙊، حاسة إني كُنت بتكلم بطريقة عشوائيّة ومش مُرتبة بس حقيقي أتمنّى أكون أفدتكم وبدعي ربنا تقدروا تتبنوا نظام صحي أكتر، إحنا أه شباب وعاوزين نستمتع بكُل الأكل اللذيذ اللي موجود برا، بس كمان لأننا شباب المفروض صحتنا تبقى أهم حاجة عندنا 💛
..
أشوفكم في فصل جديد إن شاء الله 🙊💛
