Cinta Luar Biasa Si Tunduyutung

Part 5

Cinta Luar Biasa Si Tunduyutung
BY : TESCY DESCY
Rekaan semata mata
Slowly Update

Part 5

Lapas saja kawan baik si Tunduyutung tiada sudah. Si Tunduyutung banyak be’diam. Tunduyutung kasi sibuk diri dia sama kerja-kerja mahu tulung mama bapa dia, lapas dari sekolah.

“Utung, bapa mahu kau pigang ni.”

Bapa si Tunduyutung bagi si Tunduyutung 1 rantai. Tu rantai ada macam-macam jenis gigi taring binatang berbisa kana gantung. Sebelum ni, selalu bapa si Tunduyutung bawa masuk pigi hutan.

“Utung, kalau bapa tiada sudah. Kalau kau mahu masuk pigi hutan. Kau bawa ni. Ni bikin kau tidak kana kasi sasat di hutan. Sama tiada binatang yang ada bisa sama binatang buas buli dakat kau. Ni rantai ni, kana kasi waris sama bapa. Sekarang, bapa mahu kasi waris sama kau. Bila kau ada anak. 1 urang saja anak kau buli waris ni.” - Si Tunduyutung angguk-angguk kapala saja.

“Tu tanah kita, kalau butul-butul sudah kamurang mahu pakai duit. Kamu jual saja yang sana sa’balah bukit punya.”

‘Kanapa si bapa ni cakap lain-lain.’ - Tunduyutung bisik dalam hati sambil tingu bapa dia.

Tunduyutung rasa macam ada sesuatu saja bah, bila bapa dia cakap lain-lain sudah. Tapi, si Tunduyutung tidak mahu banyak tanya. Tunduyutung diam-diam saja dingar apa bapa dia mahu cakap.

#1 Bulan Kemudian

“Utung.. Utung..” - Tu ketua kampung panggil-panggil si Tunduyutung sana sawah padi.

“Ya angkol?” - Tunduyutung teriak saja jawab tu ketua kampung.

“Utung.. Bapa kau jatuh dari rumah si Ongos.”

Terus si Tunduyutung buang saja cangkul dia. Tunduyutung lari mahu naik pigi tebing. Macam mahu sajuk saja badan si Tunduyutung, bila dingar pasal bapa dia.

“Apa angkol cakap?” - Tunduyutung minta ka’pastian.

“Utung, bapa kau. Dia tidak dapat kana kasi salamat sudah. Dia jatuh dari rumah si Ongos.”

Terus to’duduk saja si Tunduyutung. Bapa si Tunduyutung pigi buat rumah urang sana dapan kampung. Nama tu urang, si Ongos. Kira urang kaya ni urang juga ni urang di kampung, pasal sigu sama JKKK kampung gia.

“Jadi, mana bapa sia, angkol?” - Nangis-nangis si Tunduyutung tanya tu ketua kampung.

“Sana dapan rumah si Ongos juga.”

“Napa tidak bawa pigi rumah sakit?” - Terus tu ketua kampung garu-garu kapala.

“Siou, Utung. Surang pun baru gia nampak bapa kau. Surang tingu, tiada sudah napas dia.”

Tubb… Tubb..

“Aarrgghhh!!!”

Si Tunduyutung tumbuk-tumbuk tu tanah sambil teriak. Diam-diam saja tu ketua kampung tingu si Tunduyutung. Sakit butul bah hati si Tunduyutung. Pasal kana biar lagi gia bapa dia sana dapan tu rumah, bukan nogi tu ketua kampung tulung suruh urang kampung pigi hantar di rumah.

Tunduyutung bediri. Baru dia jalan pigi rumah. Si Tunduyutung pigi ambil tu kereta surung bikinan bapa si Tunduyutung sendiri. Tunduyutung tulak tu kereta surung kayu, mahu pigi ambil bapa dia.

Nangis-nangis si Tunduyutung. Tu ketua kampung sana sudah dapan. Tidak kama tu ketua kampung pigi tulung si Tunduyutung tulak tu kereta surung. Kana tinggal nogi si Tunduyutung.

Tunduyutung sampai saja sana dapan rumah yang bapa si Tunduyutung bikin. Duii bah, semua orang kampung bediri saja tingu bapa si Tunduyutung bah. Masi ba’tiarap lagi badan bapa si Tunduyutung di tanah.