Cinta Luar Biasa Si Tunduyutung

Part 35

Cinta Luar Biasa Si Tunduyutung
BY : TESCY DESCY
Rekaan semata mata
Slowly Update

Part 35

"Dia ada masuk tidur di dalam kah sa'malam?" - Olga tanya durang si Tunduyutung.

"Macam tiada tu. Kami lambat juga tidur. Dia duluan pigi tidur di kem." - Oliver jawab si Olga.

"Jadi tu? Di mana lah dia hilang ni?" - Tulak pinggang sudah si Olga mahu be'pikir.

"Mana surang tahu. Kita cari saja lah." - Oliver jawab si Olga.

"Mahu cari di mana?" - Olga tanya si Oliver.

"Mana-mana saja lah."

Olga tarik napas dia panjang-panjang, baru si Olga kasi lapas. Olga ikut saja pigi cari musuh dia, biarpun si Olga rasa tidak penting. Sampai di sungai sudah durang si Tunduyutung pigi cari si Sofia, tapi tiada juga bayangan si Sofia. Sampai di dalam hutan lagi durang si Tunduyutung pigi cari, tiada juga mayat si Sofia.

"Aikk.. Pelik!! Pigi mana juga ni perempuan. Takan dia sudah sampai bandar." - Olga merungut lagi di dapur. Panat sudah si Olga ikut pigi mencari.

Krookkk..

"Aduiii.. Lapar sudah cacing-cacing sia." - Olga gusuk-gusuk perut dia.

"Minum lah dulu kau. Ada sudah tu mama masak mee guring." - Si Ika cakap sama si Olga, sambil si Ika ampai milo panas untuk si Ika.

"Bulum bah pula sia burus gigi. Gara-gara mahu cari tu sapi." - Terus si Ika katawa saja.

"Aikkk.. Butul juga kan. Macam sapi gia tu gaya dia." - Olga cakap lagi sama si Ika.

"Kosian tu sapi. Tiada kana mangana pun. Kana juga kasi sama." - Si Ika cakap sama si Olga.

"Ahh.. Tu sapi original. Ni 1 ekur, sapi jadian. Ishh.. Macam bau munyit pula napas sia ni. Sia burus gigi dulu lah." - Terus picah bah katawa si Ika.

"Sot sudah kau oh kan." - Ika cakap sama si Olga.

"Gara-gara tu bilas sama taik gigi masi bulum di hapuskan, sudah kana bawa pigi mancari urang yang hilang tiba-tiba kan."

"Hahahhaha.. Pigi lah kau burus gigi. Sampai sini sudah bau napas munyit kau." - Tiba-tiba si Oliver bersuara dari pintu dapur sambil katawa kama.

"Shit!!! Budusa tu kalau curi dingar urang punya cakap!" - Olga marah si Oliver.

"Lagi budusa, kalau urang mati kana tu napas munyit kau." - Oliver jawab si Olga.

"Ishh!! Penyibuk!!"

Olga jeling si Oliver. Oliver katawa-katawa jalan kasi tinggal tu dapur. Si Ika giling kapala sia tingu tu adik baradik. Sikijap jadi musuh, sikijap jadi kawan ni dua urang adik baradik.

Yang lain, masi lagi sibuk cari si Sofia. Barapa kali sudah durang keluar masuk pigi hutan, tiada juga durang jumpa si Sofia. Sampai sana kampung dapan pun, durang si Tunduyutung pigi cari. Tiada juga bayangan si Sofia.

"Bahh.. Pigi dulu kamu rehat. Makan dulu kamu." - Mama si Tunduyutung suruh durang si Tunduyutung pigi isi perut dulu. Dato' Kalik nangis-nangis sambil panggil-panggil si Sofia. Mama si Tunduyutung pigi dakat si Dato' Kalik. Mama si Tunduyutung pigi pigang bahu Dato' Kalik.

"Ada kali dia dia buat salah ni, tanpa dia sedar. Biar kakak tulung urus." - Mama si Tunduyutung cakap sama si Dato' Kalik.

"Apa salah dia bikin?" - Dato' Kalik tanya mama si Tunduyutung.

"Tu yang kita tidak tahu. Tapi, kata hati kakak, mungkin ada lah dia buat yang salah tanpa dia sadar ni."

Dato' Kalik diam-diam saja lapas mama si Tunduyutung cakap macam tu. Mama si Tunduyutung pun tidak juga mahu kasi tahu Dato' Kalik sama Dato' David pasal tu tapak rumah ada kana sumpah. Diam-diam saja mama si Tunduyutung tingu si Dato' Kalik.