Cinta Luar Biasa Si Tunduyutung

Part 1

Cinta Luar Biasa Si Tunduyutung
BY : TESCY DESCY
Rekaan semata mata
Slowly Update

Part 1

Pokk.. Pokk..

"Amaa.. Sakit bah."

Ini si Herry, tapi nama golemor dia. Si Tunduyutung bilang mama dia. Budak kisi-kisi, kurus karing ni baru daraja (tahun) 5. Urang dia, tidak juga jajal ni. Tapi, masi minta mandi mama dia. Masi tidur di bawa kotiak mama dia. Tapi, rajin ni budak tulung mama bapa dia ni.

Budak kampung saja si Tunduyutung ni. Orang miskin bah durang ni. Tinggal di hujung kampung. Tapi, miskin-miskin pun durang si Tunduyutung ni. Basar juga kama tanah bapa si Tunduyutung.

Si Tunduyutung ni, anak pertama dari 4 urang adik baradik. Kalau ikut butul, dari kiraan mama si Tunduyutung ni. Si Tunduyutung ni anak numbur 4 sudah bah. Tapi, mama si Tunduyutung balik-balik ko'guguran gia dulu. Kuat karaja kampung gia kan.

Bila lahir saja si Tunduyutung, baru murah riziki mama si Tunduyutung dapat lagi baranak adik-adik si Tunduyutung, sampai lah rahim mama si Tunduyutung kana ikat sudah. Si Tunduyutung ni, anak ka'sayangan mama dia. Tu lah, si Tunduyutung manja sama mama dia.

Biarpun anak ka'sayangan, tatap kana katuk-katuk juga kapala si Tunduyutung ni. Nahh.. Baru saja tadi kapala si Tunduyutung kana katuk pakai gayung. Gerigitan bah mama si Tunduyutung ni. Gumalas butul gia mahu mandi sondiri.

Si Tunduyutung ada 2 adik perempuan, 1 adik lelaki. Lapas si Tunduyutung. Si Tunduyutung ada adik perempuan, baru daraja 4. Lapas tu, adik ke3 si Tunduyutung, lelaki. Baru daraja 3. Yang bungsu sumandak, daraja 1. Emmm.. Tiap tahun bogia ni, mama si Tunduyutung baranak yang dulu.

Lapas saja mama si Tunduyutung keguguran lagi yang anak ke5. Doktor terus ikat paranakan mama si Tunduyutung. Tidak sudah di pandai bunting-bunting mama si Tunduyutung sikarang.

"Kau ni, daraja 5 sudah. Masi lagi mahu mama kasi mandi!! Tu burung pirit kau, koluar sudah rambut!! Kau tidak malu kah ni, mahu kasi nampak tu burung pirit kau sama mama!!" - Si Tunduyutung tutup kunun lolou dia.

"Eeee... kau tingu tu bah. Ada sudah rambut koriting-koriting." - Bilang gia mama si Tunduyutung. Pandai malu terus si Tunduyutung bah.

"Tu adik-adik kau lagi tidak pandai minta mandi. Pandai malu lagi durang. Bulum pun ada rambut-rambut. Tapi pandai malu. Kau tidak malu kah." - Mama si Tunduyutung pigi gia tarik burung pirit si Tunduyutung.

"Maaa! Sakit bah!" - Aikkk.. Kisi-kisi saja ni budak. Buli tuli juga telinga kana tambus tu suara dia kama.

"Bila kau mahu mandi sondiri ni!!" - Mama si Tunduyutung lagi teriak si Tunduyutung.

"Bahh.. Sia mandi lah sondiri!"

Si Tunduyutung tarik tu gayung di tangan mama dia. Nangis-nangis si Tunduyutung ambil air dalam bolidi. Baru si Tunduyutung siram badan dia.

Prasssss...

"Tuntungon ku tulu nuh tii (Sia katuk lah kapala kau ni)!!" - Mama si Tunduyutung teriak si Tunduyutung.

Mana tidak kana toriak si Tunduyutung, main siram saja gia dia. Mama si Tunduyutung masi duduk-duduk di bangku dakat tu bolidi. Kana tampias gia di mama si Tunduyutung tu air yang si Tunduyutung bikin siram badan dia.

Si Tunduyutung kasi basar kasi kici lubang hidung dia. Mahu manangis bah si Tunduyutung, tapi dia tahan-tahan saja. Kici butul sudah hati si Tunduyutung kana marah mama dia gia.

Siap si Tunduyutung mandi. Si Tunduyutung pigi pakai baju. Baru si Tunduyutung tulung mama dia di dapur. Rajin ni anak ni. Si Tunduyutung pigi masak nasi. Tidak paya suruh-suruh dia ni. Pandai sondiri kama dia pigi buat karaja.