Cinta Luar Biasa Si Tunduyutung

Part 9

Cinta Luar Biasa Si Tunduyutung
BY : TESCY DESCY
Rekaan semata mata
Slowly Update

Part 9

Mahu 1 minggu sudah huru hara dalam kampung durang si Tunduyutung. Gara-gara orang kampung masi tidak dapat jawapan, kanapa ada ka'jadian pelik jadi sama tu 3 urang tanak wagu. Lapas saja tangan tu 3 urang tanak wagu kudung. Lidah durang pun macam kana bakar.

Durang si Tunduyutung langusng tidak tahu apa jadi sana kampung dapan. Orang kampung pun masi tidak tahu, rumah durang si Tunduyutung ta’bakar. Durang si Tunduyutung, mahu barapa hari sudah tidak pigi sekolah, gara-gara tiada sudah buku-buku sekolah.

Banyak sudah tu bambu si Tunduyutung kumpul. Buli bikin 1 rumah sudah kalau cukup pa’kakas si Tunduyutung. Lain lagi kayu-kayu bulat yang si Tunduyutung ambil di hutan, mahu bikin kasi jadi tiang-tiang tu rumah pun banyak sudah.

“Utung.. Oii.. Utung..”

Tiba-tiba ada suara urang panggil si Tunduyutung sana dapan simpang mahu pigi kawasan rumah durang si Tunduyutung. Tapi, si Tunduyutung tiada di rumah.

“Aikk.. Aman (panggilan dusun untuk angkol).” - Mama si Tunduyutung tegur tu orang yang tinggal sana kampung dapan. Urang tua sudah ni.

“Aikkk.. Kanapa di rumah kamurang ni?” - Heran tu urang tua nampak rumah durang si Tunduyutung tiada sudah.

“Emmm.. Ta’bakar bogia tu aman.” - Bilang gia mama si Tunduyutung.

“Odoiii.. Bila lagi gia?” - Ta’kajut tu ta’aki-aki.

“1 minggu sudah tu.”

“Kanapa kamurang diam-diam?”

“Sama siapa di kami mahu kasi tahu. Bukan juga surang kana poduli.” - Terus tu ta’aki-aki tingu tu rumah bakas ta’bakar.

“Emmm.. Kamu ada dingar-dingar kah hal sana kampung dapan?”

“Tiada. Kanapa gia?”

“Tu tanak wagu si kotua kampung sama tu kawan dia dua urang. Tiba-tiba buruk tangan durang. Lidah durang pun buruk.” - Bulat saja mata mama si Tunduyutung.

“Aikk.. Kanapa gia?”

“Tidak tahu surang tu. Surang tanya, tidak buli sudah durang cakap. Ada kali tu durang buat masalah, sampai buli jadi macam tu.” - Terus mama si Tunduyutung diam-diam sambil bo’pikir.

‘Jangan-jangan, durang kali pigi bakar ni rumah. Ishhh.. Kanapa di sia pikir bukan-bukan ni.’ - Mama si Tunduyutung bisik dalam hati.

‘Tapi, seingat sia, dulu ada juga tu muyang durang si Tunduyutung baca tu sumpahan. Eeee… Kanapa juga ni pikiran buli pikir masam-masam ni.’ - Mama si Tunduyutung bisik lagi dalam hati.

“Jadi, apa tujuan kau datang sini ni aman?” - Mama si Tunduyutung tanya tu ta’aki-aki.

“Sia kosian bogia tu tanak wagu semua. Sia ingat di kau pandai gia di buat ubat. Sia kira-kira mahu suruh kau pigi tingu tu tanak wagu. Mana tahu kau buli tahu apa ubat mahu bikin untuk tu tanak wagu.”

“Emm… bah. Sia pigi tingu dulu lah.” - Bilang mama si Tunduyutung.

“Mana si Utung?”

“Dia pigi cari daun rumbia tu sana hutan.”

“Duii bah. Rajin butul bah si Utung tu.” - Mama si Tunduyutung senyum saja.

“Jadi, si Utung mahu bikin balik lah ni rumah kamurang?” - Sambung lagi tu ta’aki-aki tanya sama mama si Tunduyutung.