Cinta Luar Biasa Si Tunduyutung

Part 29

Cinta Luar Biasa Si Tunduyutung 
BY : TESCY DESCY 
Rekaan semata mata
Slowly Update 

Part 29

Kok kokkokkk kokkk…

Punya main kuat tu ayam toriak sana luar rumah. Tunduyutung ta’bangun saja, bila dia rasa tu lantai dapur macam kana injak. Tunduyutung tingu sana bawa kaki dia, si Ika pula sedang bakar kayu api. Tunduyutung tingu si Oliver. Kana kasi jadi bantal paluk bah badan si Tunduyutung. Si Oliver pigi paluk badan si Tunduyutung. 

'Adaiii.. Ni urang.' - Tunduyutung cakap dalam hati saja, sambil tingu si Oliver. 

Tunduyutung buka palan-palan kaki si Oliver sama tangan si Oliver. Baru si Tunduyutung bangun palan-palan. Si Edon pun sudah bangun. Tunduyutung duduk sambil tingu si Ika angkat kili mahu ampai atas api. 

"Ka.." - Tunduyutung panggil si Ika. Si Ika tingu si Tunduyutung.

"Napa, bang?"

"Kau okey kah?" - Tunduyutung tanya si Ika. 

"Okey bah, bang. Napa?" 

"Kalau kau tidak okey. Abang mahu suruh kau pigi bandar dulu. Nanti sampai bandar, abang suruh urang sana ambil kau. Abang suruh kawan abang cek kau di bandar."

"Ishhh.. Tidak lah, bang." - Macam ka'takutan pula si Ika. 

"Abang tahu, kau tahan sakit. Tidak buli kasi biar buah pinggang kau tu. Ada kawan abang sana, dia karaja duktur."

"Sia takut, bang. Sia tidak mahu. Sia akun mati, bang. Daripada berulang lagi."

"Jangan cakap macam tu. Abang tidak kasi izin, siapa-siapa lagi sentuh adik-adik abang."

Si Ika giling-giling kapala saja. Baru si Ika jalan keluar pigi luar rumah. Tunduyutung tingu saja tu pintu dapur. Masi galap bah di luar. Tunduyutung bediri, baru Tunduyutung pigi tingu-tingu sana luar rumah. 

"Pisipp.. Pisipp.. Pisipp.." - Limpas macam suara be'bisik di telinga si Tunduyutung. Tunduyutung gusuk telinga dia. 

"Pisipp.. Pisipp.. Pisipp.." - Limpas lagi suara be'bisik di telinga si Tunduyutung. 

"Shit!! Apa juga ni." - Tunduyutung cakap separu be'bisik sambil gusuk-gusuk telinga dia. 

Krass… Krass.. Krasss… 

Tunduyutung terus turun saja dari rumah mahu cari tu bunyi. Tiada sikit pun parasaan takut yang si Tunduyutung rasa. Tunduyutung tingu saja sana kawasan galap di dalam hutan. Tunduyutung nampak macam ada cahaya berkilat, Tunduyutung kasi kici mata dia. 

"Apa tu.."

Tunduyutung nampak macam bentuk rusa. Tapi macam samar-samar. Yang bikin si Tunduyutung rasa, apa yang dia nampak. Tunduyutung nampak tu barang be'kilat-kilat, macam manik-manik kilat tu barang si Tunduyutung nampak. Lawa tu sinaran kilat dia. 

Tunduyutung naik pigi dalam dapur. Tunduyutung pigi cari parang. Baru si Tunduyutung pigi pakai kasut gatah yang kana ampai di dapan tampat mandi. Macam si Tunduyutung hafal butul mana kana simpan tu parang sama kasut gatah. Tiba-tiba saja si Tunduyutung buli tahu ni. 

Tunduyutung pigi masuk dalam tu kawasan hutan sana balakang rumah. Tidak si Tunduyutung peduli tu galap. Tunduyutung pigi dakat tu benda kilat-kilat. Makin dakat, makin si Tunduyutung nampak tarang tu kilat-kilat. Butul-butul rusa bah. 

"Pusss.. Puss.."

Tunduyutung halau kunun tu rusa. Risau bah si Tunduyutung, kalau tu rusa kana timbak urang. Buli-buli pula tu rusa senyum sama si Tunduyutung.