Cinta Luar Biasa Si Tunduyutung

Part 37

Cinta Luar Biasa Si Tunduyutung 
BY : TESCY DESCY 
Rekaan semata mata
Slowly Update 

Part 37

Tunduyutung dingar bunyi timbakan dari sana dalam tu pub. Ta'kajut bah si Tunduyutung, sampai ta'maki sudah si Tunduyutung. Tunduyutung capat-capat cari tampat parking. Laju butul sudah jantung si Tunduyutung. Paling si Tunduyutung takut, si Oliver ada di dalam tu pub gia.

"Sial!! Sial!! Mana juga parking ni. Apa masalah ni urang semua ni ha! Shit!! Please parking, mana kau."

Tunduyutung cakap-cakap 1 urang sambil tingu-tingu parking kusung. Sana hujung butul si Tunduyutung jumpa parking. Tunduyutung tidak peduli sudah, dia dapat tampat parking jauh. Yang penting dia dapat turun dari kereta. Makin laju jantung si Tunduyutung.

Tunduyutung keluar saja dari kereta, Tunduyutung kasi laju kaki dia mahu jalan pigi dakat tu club. Tunduyutung tingu sana dapan tu pub, bo'tumbuk lagi urang sana dapan. Sampai ada yang bo'putung-putung lagi sana dapan. Tunduyutung tingu butul-butul, macam bukan 1 kumpulan saja tu gengster semua.

"Sial!! Geng si satu mata ni sama si hitam. Apa masalah durang ni pigi kacau ni tampat!!" - Tunduyutung dapat cam 2 kumpulan saja.

Pang.. Pang..

"Shit!!"

Tunduyutung dingar lagi bunyi timbakan dari dalam tu pub. Tunduyutung rasa badan dia macam naik bahang panas. Tunduyutung tutup mata dia. Baru si Tunduyutung tarik napas dia panjang-panjang. Tunduyutung buka mata dia. Tunduyutung kasi kuat saja samangat dia, mahu jalan dari dapan.

Tunduyutung tidak sadar, muyang dia ada sama-sama dia di balakang. Tunduyutung sampai saja di dapan tu club, maju semua tu samsing pigi dakat si Tunduyutung. Tapi tanpa 1 patah arahan, 1 kali saja muyang si Tunduyutung pigi kasi karaja tu samsing semua. Ta'karas saja bah si Tunduyutung.

Apa lagi yang lain, bila durang nampak saja yang kana kasi karaja sama lembaga hitam sampai jadi debu. Ba'larian lagi semua yang mahu pigi cuba-cuba rapat si Tunduyutung. Tunduyutung jalan masuk dalam tu pub. Ramai sudah yang mati. Tunduyutung nampak si Oliver sana atas kana acuh pistul.

"Hoi!!!!" - Tunduyutung teriak saja tu lelaki yang pigi acuh pistul sana kapala si Oliver.

"Dude... Jangan.." - Oliver teriak si Tunduyutung.

"Wowww.. Ada budak hingusan baru." - Tu lelaki yang pigi acuh pistul sama si Oliver, dia pigi acuh tu pistul tampat si Tunduyutung sambil si Tunduyutung kana cakap budak hingusan.

"Apa masalah kamu ha!!!" - Tunduyutung tanya tu lelaki sambil naik atas.

"Dude! Jangan!!" - Oliver marah si Tunduyutung.

Pangg...

Zuppp... Zupp.. Zuppp...

Punya laju muyang si Tunduyutung kasi jadi debu tu samsing di atas. Sampai si Oliver ta'karas saja, bila semua tu panjahat jadi debu. Tunduyutung tingu bahu dia, kana timbak juga bahu si Tunduyutung. Tunduyutung pigang bahu dia sambil naik pigi atas.

"Dude, apa masalah ni?" - Tunduyutung tanya si Oliver.

"Dendam lama punya pasal, Dude." - Berkerut dahi si Tunduyutung.

"Pasal apa?" - Tunduyutung tanya si Oliver.

"Kau tidak ingat ni kes, Dude. Ni kes, sebelum kau hilang ingatan. Saya tidak sangka, musuh yang kau kasi hilang macam tu saja, buli datang cari saya. Ada orang durang 1 orang dapat lari masa tu. Dia lah yang kasi tahu ketua durang. Pasal anak tu ketua mati masa yang kau datang kasi salamat saya dulu." - Oliver kasi tahu si Tunduyutung.