ليل سليم

اسكريبت 💛

="لسه إنت كنت في بالي حالًا من مفيش، من بعدي عايش ولا مش عارف تعيش، دا أنا من كتير سيبتك وحاسس إنك إنت مسيبتنيش"
حطيت إيدي على خدي -وأيه كمان
="ميهمنيش مين الي سايب فينا مين، واحدة النتيجه أنا وإنت طالعين خاسرانيين، وأنا مش بخير، زيك وبعدك كان هيجي الخير منين"
-وأيه كمان يالي متخزوق وأيه كمان
="فكرة إنك روحت مني مش قابلها، شوف نهايه أنا وإنت نستاهلها، دا إنت لو هتقول نسيت واسمعها منك برضو هعتبرك مش قايلها"
-شوف عديم الكرامة
ماشي، دخلت من البلكونة وعماله رايحة جاية، طب اخليه ينساها أزاي، كل يوم يطلع يغني في البلكونة الي فوقيا على طول، يطلع يغني ي أغاني يحنلها بيه يا ندمان بيه اي حاجه يحسها بيطلع يغني لعمرو دياب، تحس إني لو عصرته ينزل عمرو صغير كتير كدا

=يالي شايلة طاجن ستك
-عايزة أيه يا زفتة
=طيب شكلك متعصبة أجيلك في وقت تاني
-خدي هنا أوضتي مش زريبه هي
=طيب يا ستي أنا لقيت فكرة حلوة بخصوص الموضوع
-موضوع أيه؟!
=هتعملي فيها غبية هسفخك قلم يفوقك
سمعنا معاذ بيغني =أهو الموضوع طالع يغني أهو
-طب أخلصي فكرة أيه
=مش هو بيقعد في كافية كل يوم بعد الشغل قبل ميرجع البيت
-اه
=إنتِ بقا تقومي زي الشاطرة كدا تعملي جوابات كدا صغيرة وتبعتيها مع عيل
-ها
=يادماغااااي
-فهمت فهمت خلاص
=طب اروح أنا اشوف أمك قبل متلاحظ التجمع الي أحنا فيه دا، عشان عاملالي المخبر كرومبو في الرايحه والجاية وبتبصلي بنظرات غريبه كدا، لازم نمسك ف خناق بعض عشان تطمن
ضحكت -طب روحي طب
"على حبك عندي مية إثبات، شوقي مثلًا بان في عيني سعات، وبخاف وبغير خد من دا كتير، وإن سيرتك جت أنطق بالخير  " 
بسخريه -يا حنين

فضلت سهرانه طول الليل بفكر أكتبله أيه، كان عندي جوابات قديمة كدا فاضية شكلها عامل زي جوبات زمان كانت جدتي محتفظة بيها كنت كل أما أسألها هو إنتِ ليه محتفظة بشوية ورق كانت بتقولي "أهو الورق دا الي باقيلي من ايام الزمن الجميل" وادتني منهم شوية، ماشي يا معاذ أما طلعتة على جتتك ما أكونش نور الي هتسامحك عشان هي حيوانة وكرامتها ف مقام كرامتك كدا

جه تاني يوم ووقفت قصاد الكافيه بس من بعيد وماسكة الجواب ف أيدي وواقفة متوترة، مين قال إني أسترونج ها مين الي يتشل في لسانه وقال كدا
لقيت بنت صغيرة كيوتة كدا متعديش 10 سنين بتبيع ورد
-حبيبتي ممكن طلب؟
=اتفضلي يا طنط
-طنط! ما علينا، بصي يا قمر أنا هشتري منك وردة كل يوم وفي نفس المعاد وهتاخدي معاها رسالة وتوديها للراجل الحليوة دا أبو قميص أبيض، بس متقوليلهوش عليا حاجة، أديهالة واجري على طول
ضحكت البنت وأخدت الجواب وراحت لمعاذ وأنا أستخبيت عشان ميشوفنيش، لما راحتله إستغرب وفتح الرسالة ابتسم وشّم الوردة،  يكش الإنشكاحة دي تنشكحها في وشي قادر يا كريم، كنت كتبالة في الجواب
"وما عجبي موت المحبين في الهوى
ولكن بقاء العاشقين عجيب
لقد دبّ الهوى لك في فؤادي
دبيب دم الحياة إلى عروقي"