ليل سليم

اسكربت 💛

ابتسمت-صباح الخير
حط فنجان القهوه على السور زي عادته كُل صبح بيفطر على فنجان قهوه
=صباح النور ...هتعملي أيه النهارده
-هروح الكليه عشان عندي سكشن مهم وبعدين هروح اشتري فستان جديد هحضر بيه فرح صحبتي
=تمام وأنا هبقى اعدي عليكِ وهنروح نشتريه سوا
ابتسمت ليه ولقيت صوت ريهام وهي بتدخل البلكونه
=بتعملي أيه
-مفيش ، قاعده زي م إنتِ شايفه
=طب يلا ألبسي عشان نروح الكليه
-طيب
دخلت جوه ..بصيت على البلكونه الي ف العماره الي قدامنا وأتنهدت هو ليه كل أما صحابي يخرجوا  البلكونه يختفي ويدخل جوه، ليه مش بيواجه مهو قالي أنه بيحبني ليه ميجيش ويطلب أيدي أو حتى يبين للناس أنه بيحبني، مش مهم المهم هو معايا، من ساعه أما بعدت عن أهلي وفرض عليا التنسيق أني اسافر لمحافظه تانيه لآن أهلي كانوا عايزني أدخل كليه طب بأي طريقة فرضيت أني اسافر وفعلا دخلت كليه طب قسم علم نفس واتعرفت علي صحابي هناك الي هم ريهام ونور ودينا وعرفت أنهم ساكنين في شقه قريبة من الكليه فقررت أني اسكن معاهم بدل مرمطة السكن ومن ساعة أما جيت واتعرفت على آسر، دايمًا كنت لما أطلع البلكونه الاقيه فيها مره مع التانيه اتعودنا على بعض واتعرفنا على بعض أكتر وعرفت إن أهله ماتوا كلهم في حادثه وهو عايش لوحده، خرجنا مره واحده مع بعض جه وخادني من قدام الكليه قبل كدا وروحنا مطعم بس هو مكانش بيرضى ياكل ولا يشرب وقالي أنه مش بيحب ياكل حاجه غير وهو الي عاملها منكرش أنه شخص غريب بس مميز حبيته واتعلقت بيه وأتمنى فعلًا أنه يوفي بوعده ليا وأنه يفضل معايا دايمًا

خلصت السيكشن وطلعت واستأذنت من صحابي وقولتلهم أني رايحه مشوار وطلعت برا المبنى لقيته واقف في الجنينه
بصتله بأستغراب -إنتَ دخلت أزاي
ابتسم =مدير الكليه صاحبي وأنا باجي هنا كتير ومن زمان واتعودوا عليا هنا
ضحكت-طب يلا قبل م الدنيا تليل عشان عاوزه ألّف كل المحلات عشان اجيب الفستان الي على مزاجي
ابتسم=بس زي القمر النهارده
بفخر-أنا قمر كل يوم
=أنا غلطان ، يلا قدامي
-شوف الواد قفوش أزاي
ضحكنا ومشينا بس لقيت في كام بنت بيبصولي بأستغراب كدا احم شكلي ضحكت بصوت عالي ولا أيه!  يلا مش مهم ..دخلنا أول محل في طريقنا
-أيه رأيك فالفستان الأبيض دا
=جميل جدًا بس تقيسيه الأول عشان لو مش مظبوط
-تمام
أخدته وطلبت من صاحب المحل أني عايزه ادخل البروفا..وشاورلي عليها وآسر استناني برا دخلت قيسته وخرجتله
-ها أيه رأيك ؟
ابتسم =يجماعه حد ينادي حد ....يا شيخه هتقتليني مره بجمالك دا
ضحكت -من بعض ما عندكم
دخلت وغيرته وطلعت وروحنا لصاحب المحل
-هاخد الفستان دا
بصلي بتوتر وأخده وحطه في شنطة بلاستيك =تمام ..أتفضلي
اديتله الفلوس وأخدت الشنطه وطلعنا
-هم ليه بيبصلنا بأستغراب كدا
حرك كتفه =معرفش والله ...وبعدين فكك من نظرات الناس تلاقيهم مستغربين أزاي القمر بيمشي على الأرض
ضحكت وقلبي دق -يا أخي بقى قلبي هيقف منك
مشينا وروحنا محل للطُرح
-ها أيه رأيك ..طرحه بيبي بلو ولا لبني؟
=أية دا هم مش لون واحد
-آسر إنتَ بتهزر صح ؟ إنتَ مش شايف فرق الدرجات !
=والله أنا شايف قدامي طرحه زرقه
-زرقه ! زرقه يا آسر ...دا لو صاحب المحل سمعك هيشنقك بالطرحه الي بتقول عليها زرقه دي
=يستي بلاش أوفر ..وبعدين الأبيض بيليق عليه كل حاجه ..كفايه فتي
-طيب أنا عاجبني البيبي بلو أكتر
=جيبيه
-بس اللبني أحلى
=جيبيه
-بس تحس أن البيبي بلو أشيك كدا
=جيبيه
-بس أكيد اللبني هيبقى احلى عليا
=جيبيه
-آسر إنتَ علقت..أنتوا الرجاله ملكوش لازمه والله ف الحجات دي
=وأنا ليه لازم أعرف درجات اللون الأزرق ...هطقم الشراب مع الكوتشي مثلًا ...دا أنا بلبس الشراب لون ولون أتنيلي بقي
ضحكت -طيب خلاص هجيب البيبي بلو وخلاص
روحت واديت الراجل الطرحه وحصل نفس الموقف برضو هو في أيه يا جدعان هو أنتوا شايفين هبله قدامكم ..طنشت ومشيت معاه روحنا اتمشينا على البحر شويه
-بقولك أيه، أيه رأيك لو تسافر معايا وتقابل أهلي وتتعرف عليهم
حسيته أتوتر كدا بس كملت
-مش هتخسر حاجه لو جيت وقابلت أهلي مش مهم تفاتحهم في الموضوع ..على الأقل تعرفهم أن إنتَ موجود في حياتي وهم مش هيستعجلوك ف حاجه
اتضايق =إن شاء الله يا ريم إن شاء الله
ندمت بصراحه أني عكننت عليه شوفت واحد بتاع غزل البنات معدي
أتعلقت في دراعه -عايزه غزل البنات
=طب روحي أشتري إنتِ وأنا هعمل مكالمه شغل ضروريه وهجيلك
-تمام
روحت وطلبت من الراجل تلاته غزل البنات واداهملي وسالني بأسغراب
=إنتِ كويسه يبنتي؟
أستغربت من السؤال -أيوه يا حج، ليه بتقول كده؟
لقيت آسر بيناديني روحت بصتله ومشيت
-في حاجه يا آسر
=لا مفيش ..بس بقول كفايه كدا ويلا نروح
حركت راسي ومشينا بصيت للراجل ورايا لقيته بيبصلي وهو بيخبط أيد على أيد ...هو ماله دا هو مجنون ولا أيه
روحت البيت وطلعت فتحت الباب بالمفتاح ودخلت لقيت البنات متجمعين في الصاله و كأنهم كانوا بيتكلموا في حاجه وسكتوا لما دخلت
-في أيه يا بنات؟
ردت عليا نور وهي بتقوم
=مفيش يا حبيبتي هروح أحضرلك الأكل زمانك ماكلتيش حاجه من الصبح
ابتسمتلها -تسلميلي
دخلت وغيرت هدومي وطلعت البلكونه لقيته واقف وجوده بجد في حياتي بيدي بهجه ونور لقلبي
-يبني إنتَ موراكش حاجه تعملها غير أنك تقف في البلكونه
ابتسم =وأنا ورايا أيه غيرك يا ست ريم
أتكثفت الصراحه الواد هياخد أوسكار في تثبيت قلبي والله
دخلت ريهام وقربت مني بتردد فبصتلها لقيتها بتديني كارت
=ريم أنا عارفه أن الموضوع صعب بس أحنا كلنا واقفين جمبك لغايه أما تفوقي من الي إنتِ فيه ...دا كارت دكتور سامر
استغربت -أفوق من أيه مش فاهمه ومين سامر دا بتاع أيه ؟!
اتنهدت =دكتور نفسي!
-نعم !...ليه شايفني مجنونه ولا أيه
بصيت علي الباب ولقيت نور ودينا بيعيطوا
لقيت ريهام بتزعق
=فوقي يا ريم ...إنتِ كل يوم تطلعي البلكونه وتكلمي شخص مش موجود وتخرجي وتضحكي معاه واحنا ساكتين وقولنا بكره هتفوق بس من ساعه أما إنتِ جيبتي وإنتِ على الحال دا
جسمي أرتعش -يعني أيه مش موجود ..لا أنتوا فاهمين الموضوع غلط بصي آسر هناك اه....
بصيت علي العماره الي قدامنا ملقتش حد ولا فنجان القهوه ولا آسر ولا العماره أصلا!

#شهد_بسيوني

#تعديل: التكمله متروكه لخيال القارئ 💙💙