ليل سليم

اسكريبت 💛

"بقالك فتره مسألتيش؟!"
بعتلها ماسدج استنيت منها إنها ترد، يوم، يومين، تلاتة، لغايه دلوقتي مردتش، أتصلت بيها لقيت تليفونها مقفول، كنت هلبس واروحلها بس لقيتها أونلاين !، فبعتلها ماسدج تاني والمرادي ردت
-بتصل بيكِ تلفونك مقفول
=تلاقي مفيش شبكة
-اممم، طب أيه رأيك ننزل نتقابل النهاردة
=اا لأ، مشغولة النهاردة مش هينفع
-مالك؟ أنا مبقيتش حساكِ !
=أزاي يعني
-مبقيتش حساكِ، كأنك واحده تانية، إنتِ مش روان الي أنا أعرفها، بقيتي بعيدة، بقيتي مختلفة!
=بس أنا روان هي هي
-لأ، بقالك فترة كبيرة مسألتيش بقالنا فترة كبيرة
متقابلناش، فين مكالماتنا الي مكانتش بتخلص، فين مقابلاتنا الي كنا بنزوغ في أي وقت عشان نتقابل، فين الشات الي مكنش بيتقفل، حتى حضنك أتغير، حاسة إن الشات بتاعنا بقى بارد زي مبقولك أنا مش حساكِ ومش فهماكِ
=في أوقات بنتغير
-نتغير !؟
=أوقات بنحاول نبقى بخير بس مش بنعرف، أوقات بيكون في جوانا تنهيدة بس مش عارفين نخرجها، أوقات بيكون في حجات جوانا زعلانين منها بس مش بنتكلم، أوقات بتتجمع كل الحجات دي وبيغيرونا، بنتغير واحدة واحدة من كتر التراكمات
-معاتبتيش ليه؟
=ويفيد بأيه العتاب لو عاتبنا مرة واتنين وتلاتة ونفس العتاب بيتكرر، نفس الموضوع ونفس الموقف بيتكرر، أنا تتعبت
-يعني هتبعدي؟
=أنا بعيدة من الأول، مكانش بأيدي إني اخسرك إنتِ الي خسرتيني، من أول ممكاني أتحط فيه أشخاص تانية، من أول مكلامك ومشاكلك بقيت تحكيها لغيري، طلعتيني واحدة واحدة من حياتك بالتدريج لغاية أما خرجت منها
-محدش أخد مكانك
=يبقى مكاني هو الي أتغير، حياتك مليانة ناس وحياتي دايرة صحابي بتتلخص فيكِ، شوفتيني شخص مضمون فركنتيني على جمب، أنا مش هلومك أكيد كلنا بنمِل وكلنا بنفقد الشغف من ناحيه الشخص الي مشي معانا فترة كبيرة وبنكون عاوزين نجدد، طاقتك خلصت من نحيتي وأنا كذلك
-قولتيلي أنك هتفضلي جمبي مهمى يحصل
=وأنا عند كلامي أي مشكلة إنتِ هتقعي فيها أنا هكون جمبك بس مش هقدر أكون جمبك في أي حاجه تانية
-طب، طب متبعديش أنا عارفة إني قصرت معاكِ وإن في حجات كتير أنا مكنش ينفع أعملها
=إنتِ لو كنتِ خايفة تخسريني مكنتيش عملتي الي يزعلني ....فمتلومنيش

#شهد_بسيوني