In a Long Dream

Episode 9

UNICODE

အရင်က ဒိုင်ယာရီမ​ရေးတတ်တဲ့ ယယ်ဂျင်းဟာ အခု​တော့ ဒိုင်ယာရီ​ရေးတတ်​နေခဲ့ပြီ။ ဒိုင်ယာရီရဲ့ ပထမဆုံးစာမျက်နှာကို ချယ်ရီပန်း​တွေနှင့် အစပြုဖွင့်လှစ်ခဲ့သည်။

ဒီ​နေ့လည်း ယယ်ဂျင်းအတွက် အရင်နေ့​တွေလိုပင် ပုံမှန် လည်ပတ်လျက်ရှိသည်။ ​​မနက်​စော​စောထကာ လုပ်စရာရှိတာလုပ်ပြီး ​ကျောင်းလာ၊ ​ကျောင်းမှာ အတန်းချိန်အပြည့်တက်၊ စာကြည့်တိုက်သွားနှင့် လုပ်​နေကျအလုပ်​များနှင့် အချိန်ကုန်မှန်းမသိကုန်သွားပြန်သည်။ ဒါ​ပေမယ့် ​ဘေးနားမှာ ​ပေါက်​ပေါက်​ဖောက်မည့် ဟယ်ရာမရှိသဖြင့် ယယ်ဂျင်းတစ်​နေ့တာက ပျင်း​ခြောက်​ခြောက်​တော့ဖြစ်​နေသည်။ ဒီ​နေ့ ဟယ်ရာသည် သွားစရာရှိသည်ဆို၍ ​ကျောင်းမလာ။ စကားများလွန်းသဖြင့် တစ်ခါတစ်ခါ ဟယ်ရာ့ကို မကြည်သာ​ပေမယ့် သူမရှိ​တော့လည်း ဟာတာတာဖြစ်​နေသလို ခံစားရသည်။ ​နောက်ပြီး ယယ်ဂျင်း​မျှော်​နေသည့် ထယ်​ယောင်းလည်း ဒီ​နေ့ ​ရောက်မလာပြန်ပါ။

ည​နေ ​ကျောင်းဆင်းသည့်အခါ အိမ်ခဏပြန်ကာ အဆာ​ပြေစား​သောက်ပြီး အချိန်ပိုင်းအလုပ်သို့သွားရပြန်သည်။ အခု အလုပ်လုပ်​နေသည့် ကြက်​ကြော်ဆိုင်မှာမလုပ်ခင် အရင်က စား​သောက်ဆိုင်တစ်ခုမှာ ယယ်ဂျင်း အလုပ်လုပ်ခဲ့ဖူးသည်။ အိုးတိုက်ပန်းကန်​ဆေးရသည့်အလုပ်။ ပထမဆုံး အလုပ်လုပ်ဖူးတာလည်းဖြစ်၊ အရင်ကဆို ပန်းကန်တစ်ချပ်​တောင်မ​ဆေးဘူးသည့် ယယ်ဂျင်းအတွက် ထိုအလုပ်သည် ခက်ခဲသည်ထက်ပိုခဲ့သည်။ ​လေးငါးနာရီ​လောက် ​ရေနှင့်ထိ​တွေ့ရသည်မို့ ပထမဆုံး အလုပ်စဆင်းပြီး ​နောက်ရက်မှာပင် ဖျားခဲ့သည်။ သို့​သော် အလုပ်မလုပ်လျှင်လည်းမဖြစ်သည်မို့ အားတင်းကာလုပ်ခဲ့ရသည်ပင်။ ၂၄နာရီဖွင့်သည့် ကုန်စုံဆိုင်မှာလည်း ယယ်ဂျင်း လုပ်ဖူးသည်။ ၀ယ်သူများလျှင်များသလို မက်တပ်ရပ်ရသည့် အချိန်လည်းများကာ တစ်ဆိုင်လုံးမှာ၀န်ထမ်းတစ်​ယောက်တည်းခန့်သည်မို့ စာရင်းဇယားကအစ သန့်​ရှင်း​ရေးအဆုံး ယယ်ဂျင်း လုပ်ရသည်။ ပန်းကန်​ဆေးရသည့် အလုပ်​လောက်​တော့ မပင်ပန်း​။ သက်​သောင့်သက်သာလည်းရှိသည်။ ဆိုင်ထဲတွင် ယယ်ဂျင်းတစ်​ယောက်တည်း ရှိသည်မို့ တစ်ခါတစ်ရံ တစ်ချို့၀ယ်သူ​ယောကျာ်း​လေးများ၏ မထိတထိစကားများကို​တော့ ကြားခဲ့ရသည်။ ထိုအခါတိုင်းလည်း သည်းခံပြီး အပြုံးနှင့်သာ တုံ့ပြန်ခဲ့သည်။